May Kabiadian​—Pero Gustong-Gustong Maglingkod

KUN enot nindong mamimidbid si Leonardo, tibaad dai nindo isipon na sia sarong trabahador sa konstruksion. Mayo na an duwa niang kamot huli sa nangyaring aksidente kaidto na konektado sa trabaho. Minsan siring, sa ibong kan saiyang kabiadian, si Leonardo mahigos sa trabaho sa sarong lugar nin konstruksion sa Acajutla, El Salvador, siring kan maheheling nindo sa retrato.

Tanganing makikabtang sa proyekto nin pagtogdok na iyan, nagdisenyo si Leonardo nin sadiri niang mga kasangkapan. Ilinalaog nia an saiyang toong takyag sa pabilog na metal na nakatakod sa sarong poro nin pala asin ekspertong ipinapala an ati sa karetilya. Imbes na kapotan nin kamot, tinakodan nia nin mga argolya sa mga kapotan tanganing ikatulod nia an karetilya. Ano an nakapahiro sa saiya na makikabtang sa proyektong ini?

Boot ni Leonardo na makikabtang sa pagtogdok nin Kingdom Hall, o lugar nin pagsamba para sa lokal na kongregasyon nin Mga Saksi ni Jehova. Dakol sia nin dahelan tanganing dai kutana makikabtang sa gibohon na pagtogdok. Bilog na panahon sia na empleyado, may kabiadian sia, asin naglilingkod na sia bilang ministeryal na lingkod sa saiyang kongregasyon. Pero boot niang gibohon an makakaya nia tanganing paglingkodan man an Dios sa lugar nin konstruksion.

Igwa daw kamo nin kaparehong aktitud sa paglilingkod sa Dios? Imbes na gibohon na dahelan an saiyang kabiadian, ginamit ni Leonardo an saiyang mental na kakayahan tanganing magdisenyo nin sadiri niang mga kasangkapan tanganing magibo nia an trabaho na imposible kutanang magibo nia. Naglilingkod sia sa Dios ‘sa bilog niang isip.’ (Mateo 22:37) May kabiadian o mayo, an mga trabahador na nakikikabtang sa pagtogdok nin mga Kingdom Hall kan Mga Saksi ni Jehova sa bilog na kinaban igwa nin espiritu nin pagboboluntaryo. An saindang mga pagtiripon bukas sa publiko, asin kamo maogmang iniimbitaran na umatender.