Mga Hapot Hale sa mga Parabasa

Maninigo daw na likayan nin sarong Kristiano an mga inomon asin kakanon na may caffeine?

Dai pinagbabawalan kan Biblia an sarong Kristiano na uminom nin kape, tsa, tsokolate, maté, asin mga soda na may caffeine. Minsan siring, an Kasuratan nagtatao nanggad nin mga prinsipyo na makakatabang sa sato na makagibo nin madonong na mga desisyon. Konsideraron nguna niato kun taano ta may mga tawong linilikayan an mga inomon asin kakanon na may caffeine.

An sarong mayor na dahelan iyo na an caffeine tibaad ibinibilang na sarong droga na nakakaapekto sa disposisyon kan isip, na may pampabagsik na epekto sa isip. Iyan puede man na makaadikto. Sarong minimidbid na reperensiang libro para sa mga parmasista an nagsabi: “An pagkonsumo nin dakol na caffeine sa halawig na panahon puedeng magbunga nin pagigin bako na gayong sensitibo sa epekto kaiyan, adiksion, asin sikolohikong pagkaadikto. An pisikal na mga sintomas nin pagpondo sa paggamit arog baga nin pagkolog nin payo, pagkairitable, nerbios, kahaditan, asin pagkalula puedeng lumataw kun an saro biglang pumondo sa paggamit kan pampabagsik na ini.” An helang huli sa pagpondo sa paggamit nin caffeine kinokonsiderar na iiba sa listahan kan Diagnostic and Statistical Manual of Mental Disorders, pati na an iba pang helang huli sa pagpondo sa paggamit nin droga. Huli kaini, natural sana na may mga Kristianong nagsasaboot na tibaad bakong angay an paggamit nin caffeine huli ta gusto nindang likayan an ano man na pagkaadikto asin mawot nindang magpaheling nin pagpupugol sa sadiri.—Galacia 5:23.

May mga nagtutubod na puedeng maapektaran nin caffeine an salud nin sarong tawo o nin sarong omboy na nasa matris pa. Kaipuhan na kamotan nin mga Kristiano an Dios ‘sa bilog nindang kalag,’ kaya dai ninda ginigibo an ano man na magpapahalipot kan saindang buhay. Asin huli ta pinagbobotan man sinda na kamotan an saindang kapwa, linilikayan ninda an mga bagay na tibaad makadanyar sa omboy na nasa matris pa.—Lucas 10:25-27.

Rasonable daw an siring na mga kahaditan sa salud? Igwa nin kontrobersia manongod sa kun baga may koneksion an manlaenlaen na helang asin an pagkonsumo nin caffeine. An nagkapirang parasiyasat nagrereport pa ngani na marahay sa salud an kape. Kan 2006, an magasin na Time nagbareta: “Isinuherir nin naenot na mga pag-adal [na an caffeine] tibaad magbunga nin kanser sa butog, alta-presyon asin iba pang helang. An mas bagong pagsiyasat dai sana pinahimutikan an kadaklan sa mga paghihingakong iyan kundi nakadiskobre man nin nagkapirang mahalagang pakinabang. Minalataw na an caffeine may nakakaprotehir na epekto laban sa danyos sa katoy, Parkinson’s disease, diabetes, Alzheimer’s, bato sa apdo, depresyon asin tibaad dawa sa nagkapirang klase nin kanser.” Manongod sa paggamit nin caffeine, an sarong peryodiko nagbareta: “An pinakaliabe—bakong makangangalas—iyo an tama sanang paggamit.”

An lambang Kristiano maninigong gumibo nin personal na desisyon basado sa saiyang pakasabot sa impormasyon na makukua ngonyan manongod sa caffeine asin sa mga prinsipyo sa Biblia na garo baga imbuelto. Halimbawa, tibaad pilion nin sarong bados na Kristiana na lumikay sa caffeine mientras na sia bados kun magkonklusyon sia na puedeng makaapektar iyan sa saiyang omboy na nasa matris pa. Kun madiskobre nin sarong Kristiano na sia nagigin iritable o medyo maraot an pagmate kun dai sia regular na naggagamit nin caffeine, tibaad sadolon sia na lumikay sa caffeine, kisuerra temporaryo. (2 Pedro 1:5, 6) Maninigong igalang nin ibang mga Kristiano an siring na desisyon, na dai ipinipirit an saindang punto de vista.

Ano man na desisyon an gibohon nindo mapadapit sa mga inomon asin kakanon na may caffeine, papagdanayon nindo sa isip an konseho ni Pablo: “Kamo man nagkakakan o nag-iinom o ano pa man an ginigibo, gibohon an gabos na bagay sa ikakamuraway nin Dios.”—1 Corinto 10:31.