Sarong Langtad na “Maputi Na Para sa Pag-ani”

Sa norteng poro kan Amerika del Sur manonompongan an Peninsula nin Guajira. Yaon iyan sa norteng parte kan Colombia asin sa norteng solnopan na parte kan Venezuela. An nakakapasong saldang asin limitadong oran an pasakit sa may pagkadesiertong lugar na ini, na an temperatura minaabot sa 43 na grado Celsio. Sa ibong kan siring na panahon, an mga tawo digdi mga paraomang sibot asin produktibo. An dagos-dagos na huyop-huyop gikan sa kadagatan asin doros na amihan nagpapapasil kan pamumuhay, na nagtotogot sa mga nagbibisita na ikaogma an nakakaakit na mga tanawon asin magagayon na baybayon.

MAOGMA kamong inaako sa daga kan mga Indian na Wayuu. Igwa nin mga 305,000 na Wayuu, na an 135,000 nag-iistar sa Colombia. An tribong ini namumuhay na digdi haloy pa bago an pananakop kan mga Kastila.

An pangenot na kabuhayan kan mga Wayuu iyo an pag-ataman nin mga hayop asin pag-oma. Nagdadakop man sinda nin sira asin nakikipagnegosyo sa kataraed na nasyon. An kababaehan eksperto sa paghabol nin telang subida an mga kolor, asin an saindang mga produkto mabenta sa mga turista.

An mga Wayuu midbid sa saindang sinseridad asin pagkamapag-istimar. Minsan siring, sinda nabubuhay man sa “delikadong mga panahon na masakit pakibagayan.” (2 Timoteo 3:1) An kadukhaan iyo an saro sa saindang mayor na problema, na minaresulta man sa iba pang mga problema, arog baga nin dai pakabasa asin pakasurat, malnutrisyon nin mga omboy, kakulangan nin medikal na pag-asikaso asin, sa nagkapirang lugar, delingkuensia.

Sa laog nin mga dekada, an mga iglesia nin Kakristianohan nagpadara nin mga misyonero tanganing mag-istar sa tahaw kan mga Wayuu. Bilang resulta, an kadaklan sa mga eskuelahan sa pagsasanay nin mga maestra asin mga eskuelahan na may paistar saka pakakan kontrolado nin iglesia. Dakol na Wayuu an uminako sa Kristiano daang mga kostumbre, arog baga nin pagsamba sa imahen asin pagbautismo sa omboy, alagad dai ninda binayaan an mga paniniwala asin seremonyang gikan sa tradisyonal na mitolohiya asin mga superstisyon.

Sa pangkagabsan, an mga Wayuu matatakton sa Dios asin gustong maghimate sa mga katotoohan sa Biblia na itinotokdo kan mga Saksi ni Jehova. Sa kapinonan kan dekada nin 1980, igwa sana nin pitong Saksing Wayuu sa Guajira, na an tolo nakaistar sa Riohacha, an kabisera. Apuera sa mga Saksing propiong taga duman, 20 iba pang parahayag an naghuhulit kan maogmang bareta kan Kahadean duman sa lenguaheng Kastila.

Mensahe sa Sadiri Nindang Lenguahe

An mayoriya kan mga Wayuu na nag-iistar sa Riohacha kadikit sana an aram sa Kastila apuera sa saindang sadiring lenguahe, an Wayuunaiki. Sa primero, bakong gayong mapanggana an paghuhulit kan mensahe kan Kahadean. An propiong mga taga duman garo baga minalikay sa mga arijunas, an apod ninda sa mga bakong Wayuu. Kun nagdadalaw an mga Saksi sa saindang mga harong, kadaklan sa mga Wayuu nagsisimbag sa sadiri nindang lenguahe, bakong sa Kastila. An mga Saksi minaduman na sana sa sunod na harong.

Minsan siring, sa katapusan kan 1994, an sangang  opisina kan Mga Saksi ni Jehova nag-asignar nin sarong grupo nin mga espesyal payunir, o bilog na panahon na mga paratokdo kan Biblia, tanganing maglingkod sa Kongregasyon sa Riohacha. Pinakiolayan kan mga pioneer an sarong lalaking Saksi na Wayuu na tokdoan sinda nin Wayuunaiki. Pagkatapos na tuomon an nagkapirang simpleng presentasyon, an mga ministrong idto nagduman sa teritoryo asin tolos-tolos na nariparo an mahalagang pagbabago sa reaksion kan mga tawo. Minsan ngani an mga paratokdo kan Biblia putol-putol an pagtaram nin Wayuunaiki, an mga kagharong may pagkaogmang nagngalas asin andam na maghinanyog, na kun beses nagpapadagos na makipag-olay nin maogma paagi sa kadikit na aram ninda sa Kastila!

“Maputi Na Para sa Pag-ani”

Iinagid ni apostol Pablo an Kristianong paggibo nin mga disipulo sa pagkultibar nin oma, sarong komparasyon na madaling nasasabotan kan paraomang mga Wayuu. (1 Corinto 3:5-9) Sa piguratibong kahulogan, an langtad nin mga Wayuu tunay nanggad na “maputi na para sa pag-ani.”—Juan 4:35.

Si Neil, sarong Indian na Wayuu na nag-iistar sa Manaure, nagkaigwa nin depekto poon sa pagkaaki. Binabasol an Dios huli sa depektong ini, si Neil nagmondo nin makuri sagkod sa punto na nagprobar siang maghugot. Sarong Saksi na inaprobetsaran an oportunidad na maghulit sa harong-harong mientras na nagbibisita sa manlaenlaen na banwaan may koneksion sa saiyang sekular na trabaho an nakipag-olay ki Neil manongod sa Kahadean ni Jehova. Si Neil 14 anyos pa sana kaidto. Huling naheling an interes ni Neil, pinonan kan Saksi na adalan sia sa Biblia. Naogma si Neil na manodan an manongod sa mamomoton na personalidad ni Jehova, asin nakapagkonklusyon sia na bako an Dios an nagpangyari kan saiyang pagsakit. Napahiro nanggad siang marhay kan mabasa nia an manongod sa panuga nin Dios na sarong daganon na paraiso, kun saen mayo na nin helang!—Isaias 33:24; Mateo 6:9, 10.

Kan panahon na idto, an pamilya ni Neil naimbuelto sa haloy na pakipag-iwal sa ibang pamilya. Sa pagmamaigot na masegurado an saindang sadiring proteksion, an mga paryente ni Neil nagsagibo nin nagkapirang ritual nin tribo. Nagigirumdoman ni Neil: “Sa primero, natakot akong magtaram sa sakong pamilya manongod sa sakong bago pa sanang makuang pagtubod, nangorogna sa mga payo kan pamilya, na iginagalang na marhay.” Naanggot an mga magurang ni Neil na maaraman na dai sia masunod sa bakong sono sa Kasuratan na mga paniniwala ni masagibo nin espiritistikong mga kostumbre. Dangan nagbalyo si Neil sa Riohacha asin nagpoon na makiasosyar sa kongregasyon duman. Nabautismohan sia paghaloyhaloy. Kan 1993, ninombrahan sia bilang ministeryal na lingkod, asin pakalihis nin tolong taon sia nagin regular pioneer. Dangan kan 1997 ninombrahan sia bilang magurang sa kongregasyon. Kan taon 2000, pinahiwas nia an saiyang ministeryo, na nagin espesyal payunir.

Estudyare man an nangyari ki Teresa, sarong propiong Wayuu na nagpoon na makipag-adal sa Biblia sa mga Saksi. Pinag-olog-olog sia kan saiyang kasaroan na si Daniel, asin sia saka an saindang tolong aki minamaltrato kaini sa pisikal. Minsan ngani paghaloyhaloy uminoyon ini na mag-adal sa Biblia kaiba ni Teresa, parate siang nakikipag-inoman na mayong pakundangan sa saiyang mga amigo, na kun beses sagkod apat o limang aldaw. An saiyang pamilya nagin pobre. Si Teresa nagpadagos na mag-adal nin maimbod asin mag-atender sa Kristianong mga pagtiripon. Nakatabang ini ki Daniel na masabotan an importansia nin pag-adal sa Biblia. Dangan saro sa saindang mga aki an  aksidenteng buminagsak sa sarong takuri nin nagkakalakagang tubig asin nagadan huli sa grabeng mga paso. Apuera sa pagtios nin grabeng kamondoan huli sa pagkagadan nin sarong aki, kinaipuhan na atubangon ni Teresa an pangigipit nin mga katood asin kataed na sumunod sa bakong sono sa Kasuratan na mga kostumbre sa lobong.

Durante kan depisil na panahon na idto, an mag-agom na ini uminako nin nakakaparigon sa boot na tabang asin pagranga gikan sa mga miembro nin kaharaning mga kongregasyon. Pagkatapos kan lobong, padagos sindang nag-ako nin nakakarangang mga pagdalaw gikan sa lokal na kongregasyon na Wayuu an lenguahe. Kan maheling an Kristianong pagkamoot na isinasagibo, napahiro si Daniel na umoswag sa espirituwal. Pinondo nia an pag-inom asin pagmaltrato ki Teresa. Nagpakasal si Daniel asin Teresa, asin sia nagtrabaho nin maigot tanganing sustentohan an saiyang pamilya. Uminoswag sinda sa espirituwal asin nabautismohan kan 2003. Pareho sindang nagkokondukta nin nagkapirang pag-adal sa Biblia. Huli sa marahayon na patotoo ni Teresa sa saiyang pamilya, an saiyang mga paryente andam na ngonyan na maghinanyog sa mga Saksi kun sinda minadalaw. Saro sa mga sobrino ni Daniel an dai pa bautisadong parahayag, asin duwa sa mga sobrina nia an nag-aadal sa Biblia asin nag-aatender sa mga pagtiripon kan kongregasyon. An hipag ni Teresa, na nagadanan man nin aki huli sa aksidente, asin an saiyang pamilya nagpaheling nin interes sa pag-adal sa Biblia.

Espirituwal na Kakanon sa Lenguaheng Wayuunaiki

Kan 1998 an pulyetong Enjoy Life on Earth Forever! * ilinuwas sa Wayuunaiki. Ini nagin sarong mapapakinabangan na marhay na kasangkapan sa pagkultibar kan langtad nin mga Wayuu asin pagkondukta nin mga pag-adal sa Biblia. Kan 2003, ginibo an mga areglo na magsanay nin nagkapirang tugang na itradusir an mga publikasyon kan Mga Saksi ni Jehova sa Wayuunaiki. Huli sa kahigosan nin sarong grupo nin mga paratradusir sa Riohacha, mas dakol nang brosyur an makukua, na nakatabang sa espirituwal na pagtalubo nin mga disipulong nagtataram nin Wayuunaiki.

Poon kan 2001, an nagkapirang kabtang sa programa kan pandistritong kombension iniinterpretar sa Wayuunaiki. An mga inaadalan sa Biblia namomotibar sa espirituwal kun saindang nadadangog an programa sa sadiri nindang lenguahe. Saindang inaantisipar na sa haraning ngapit an mga dramang basado sa Biblia ipepresentar man sa Wayuunaiki.

Sarong Nag-ooswag na Langtad

An Uribia sarong banwaan na mga 100 kilometros sa norteng sirangan nin Riohacha. An Kongregasyon nin Wayuu sa Uribia igwa nin 16 na parahayag kan Kahadean, na an dakol sa sainda dinadagdagan an saindang mga paghihingoa na makapaghulit sa mga Indian na nag-iistar sa mga lugar na rural. Saro sa mga magurang sa kongregasyon an nagsabi nin arog kaini manongod sa siring na biahe sa paghuhulit: “Dinalaw niamo an sarong rantso na kompuesto nin mga doseng harong na harababa an atop asin saradit an bintana. Sa atubangan nin lambang harong igwa nin planodong atop na gibo sa yotojolo, an matagas na laog kan paklang nin sarong kaktus. Duman, an pamilya asin mga bisita protektado sa nakakapasong saldang. Naogma kami na maheling na dakol an nagpaheling nin dakulang interes, kaya naggibo kami nin mga areglo na bumalik asin makapoon nin mga pag-adal sa Biblia. Kan magbalik kami, nariparo niamo na dakol an dai tataong magbasa asin magsurat. Sinabihan ninda kami na may sarong eskuelahan na inabandonar na huli sa kakulangan nin pondo. An namamahala may kabootan na tinogotan kaming gamiton an saro sa mga kuarto tanganing magkaigwa nin klase para sa pagbasa asin pagsurat asin makapagkondukta nin mga pag-adal sa Biblia. Anom na Wayuu an nakanood na bumasa asin sumurat asin nag-ooswag sa saindang pag-adal sa Biblia. Napahiro kami kan apresasyon na ipinaheling ninda, kaya nagplano kami na magsagibo nin mga pagtiripon sa rantso.”

Dakol na Saksi na bakong propiong taga duman an nag-adal nin Wayuunaiki, asin an saindang tabang pinapahalagahan nin marhay. Sa Peninsula nin Guajira, walong kongregasyon asin duwang grupo an naggagamit ngonyan kan lenguaheng ini.

An bendisyon ni Jehova sa mga paghihingoang ini risang-risa. Daing duda, dakol pang marhay an puedeng magibo sa paghuhulit kan maogmang bareta sa mga Wayuu. Linalaoman an marahay na mga resulta mantang an mga nakakamate kan saindang espirituwal na pangangaipo nagigin Kristianong mga disipulo. Logod na magsugo si Jehova nin dagdag pang mga ministro tanganing kultibaron an langtad na ini, na “maputi na para sa pag-ani.”—Mateo 9:37, 38.

[Nota sa Ibaba]

[Mga Mapa sa pahina 16]

(Para sa aktuwal na format, hilingon an publikasyon)

VENEZUELA

COLOMBIA

LA GUAJIRA

Manaure

Riohacha

Uribia

[Picture Credit Line sa pahin 16]

Kampo nin mga Wayuu sa ibaba: Victor Englebert