Hararom Asin Nagdadanay na Kolog

KASUARIN pa sana, gustong maaraman nin sarong parasiyasat kun paano naaapektaran kan pag-agi nin panahon an saboot kan mga nagmomondo huli sa pagkagadan nin mga namomotan. Nagpadara sia nin mga lista nin mga hapot sa nagkapirang magurang na nagadanan nin aki pirang taon na an nakaagi. May mga magurang na dai nagsimbag. An sarong ama na an ngaran Vladimir, na nagadanan nin aking lalaki limang taon na an nakaagi, nagpaliwanag na makologon pa man giraray sa boot na mag-estorya manongod sa saiyang aki. *

An siring na naglalawig na kamondoan bakong pambihira sa mga magurang na nagadanan. Sampulong taon na an nakaagi, an 18 anyos na aking lalaki ni William nagadan huli sa pagkalamos. Si William nagsurat, “Makolog pa man giraray an boot ko huli sa pagkagadan na iyan, asin mamamatean ko iyan sagkod na ako nabubuhay.” Limang taon pagkagadan kan aking lalaki ni Lucy huli sa dai linalaoman na helang, sia nagsurat: “Sa enot na nagkapirang aldaw, pirme kong iniisip, ‘Bako iyan totoo.’ An paghona ko binabangungot sana ako asin na mapapagmata man tolos ako. Pakalihis nin pirang panahon, narealisar ko na iyan totoo, na dai na sia mapuli sa harong. Limang taon na an nakaagi kan magadan an sakong aki, alagad kun beses, kun nagsosolo ako, hinihibian ko pa man giraray an pagkawara nia.”

Taano an nagadanan na mga magurang, arog ni Vladimir, William, asin Lucy, ta nakakamate nin hararomon nanggad asin nagdadanay na kolog? Konsideraron niato an nagkapirang dahelan.

Taano ta Grabe an Pagmondo?

Pagkamundag nin sarong omboy sa pamilya, naeeksperyensiahan nin mga magurang an mga emosyon na dai ikakakomparar sa iba pang relasyon nin tawo. An pagkapot sana sa saindang sadit na aki, pagmasid mientras na nagtotorog iyan, o an pakaheling na naghuhuyom iyan nagtatao sa sainda nin hararom na kaogmahan asin satispaksion. Pinakamamahal nin mamomoton na mga magurang an saindang mga aki. Sinasanay ninda an mga ini na gumawe nin angay asin magin magalang. (1 Tesalonica 2:7, 11) Mantang nagtatalubo an mga aki kaoyon kan mga paghihingoang ini, nakakamate nin pag-orgolyo an mga magurang asin sinda nagkakaigwa nin haralangkaw na linalaoman para sa saindang mga aki.

An maasikasong mga magurang maigot na nagtatrabaho tanganing itao an mga pangangaipo kan saindang mga aki. Tibaad regular sindang nagtatagama nin kuarta o materyal na mga rogaring tanganing matabangan an saindang mga aki sa pagpopoon kan mga ini nin sadiring pamilya sa ngapit. (2 Corinto 12:14) An pambihirang pagpaheling na ini nin emosyon, paggamit nin panahon asin kuarta, saka paghihingoa, nagpapatunay sa sarong bagay—pinapadakula nin mga magurang an saindang mga aki tanganing mabuhay, bakong magadan. Kun magadan an sarong aki, an pagpadakula sa saiya bakong kompleto,  asin dai na maootob an mga linalaoman kan mga magurang para sa saiya. An mainit na pagkamoot asin kapadangatan na garo baga nagbobolos gikan sa mga magurang pasiring sa aki minapondo, na inoolang kan garo gapong lanob nin kagadanan. An dati nindang pinagpapahayagan kaiyan mayo na ngonyan. An mga magurang nakakamate nin grabeng pagmondo na dai tolos nawawara.

Kinokompirmar kan Biblia na an mga magurang na nagadanan nagtatagal nin grabe asin dai nawawarang kolog. Sa paglaladawan kun ano an nangyari kan maaraman kan patriarkang si Jacob na ginadan an aki niang si Jose, an Biblia nagsasabi: “Rinabsing ni Jacob an saiyang mga gubing asin nagsulot nin telang sako sa saiyang habayan asin ipinagmondo an saiyang aki sa dakol na aldaw. Asin an gabos niang aking lalaki asin babae nagdatong tanganing rangahon sia, alagad ta nagsayuma siang rangahon asin nagsabi: ‘Huli ta mahilig akong nagmomondo sa sakong aki pasiring sa Sheol [o, lolobngan]!’” Pakalihis nin mga taon, ipinagmomondo pa man giraray ni Jacob an saiyang aki, na hinohona niang gadan na. (Genesis 37:34, 35; 42:36-38) An saro pang halimbawa sa Biblia iyo an maimbod na babaeng si Noemi, na nagadanan nin duwang aking lalaki. Huli sa grabeng pagmondo, gusto niang salidahan an saiyang ngaran na Noemi, na an kahulogan “An Sakong Kagayagayahan,” nin Mara, na an kahulogan “Mapait.”—Rut 1:3-5, 20, 21, nota sa ibaba.

Minsan siring, dai sana minimidbid kan Biblia an kamondoan na naeeksperyensiahan kan mga magurang. Ipinapaheling man kaiyan kun paano si Jehova nagtatao nin kosog sa mga nagmomondo. Sa sunod na artikulo, kokonsideraron niato an nagkapirang paagi kun paano an Dios nagtatao nin pagranga sa mga nagtatangis.

[Nota sa Ibaba]