Mas Mahalagang Marhay Kisa sa Kamugtakan nin Panahon

HAROS gabos na nasyon igwa nin sinasabi manongod sa kamugtakan nin panahon na arog kan: ‘Kun mapula an langit sa banggi, ikinakaogma iyan na marhay nin mga paralayag; kun mapula an langit sa aga, nag-iingat an mga paralayag.’ An mga nag-eespesyalisar ngonyan dapit sa kamugtakan nin panahon (meteorologist) nagtatao nin teknikal na mga dahelan kun taano ta an kamugtakan nin panahon nagigin arog kan sinasabi sa enotan.

Siring man, kan panahon ni Jesus, tuod an mga tawo na pagmasdan an langit asin iinterpretar an itsura kaiyan. Sinabi ni Jesus sa nagkapirang Judio: “Kun banggi na pinagkatodan na nindong sabihon, ‘Magkakaigwa nin marahay na panahon, ta an langit arog kapula sa kalayo’; asin kun aga, ‘Ngonyan magkakaigwa nin malipot, maoran na panahon, ta an langit arog kapula sa kalayo, alagad madampog.’ Tatao kamong mag-interpretar kan itsura kan langit, alagad . . . ” Alagad ano? Nagpadagos si Jesus sa nakakaapod nin atension na pahayag: “Dai kamo nakakainterpretar kan mga tanda kan mga panahon.”—Mateo 16:2, 3.

Ano an “mga tanda kan mga panahon” na ini? Iyan an dakol na bagay na malinaw na nagpaparisa na si Jesus iyo an tunay na Mesiyas na isinugo nin Dios. An saiyang mga ginibo malinaw nanggad na maririsa siring kan pagkapula kan langit. Minsan siring, dai inintindi kan kadaklan sa mga Judio an mga tanda na nagpatunay na nagdatong na an Mesiyas—sarong pangyayari na mas mahalaga nanggad kisa sa kamugtakan nin panahon.

Siring man ngonyan, igwa nin tanda na mas mahalagang marhay na masabotan kisa sa kolor kan literal na langit. Ihinula ni Jesus na an marigsok na kinaban na ini tataposon tanganing ponan an sarong mas marahay na kinaban. Sinambit nia an dakol na pangyayari na iribang maheheling kun harani na an pagbabagong ini. Kabilang digdi an mga guerrang lakop sa globo asin mga tiggutom. Sinabi ni Jesus na kun maheling na an mga bagay na ini, harani na an paghiro nin Dios.—Mateo 24:3-21.

Naheheling daw nindo “an mga tanda kan mga panahon”?