Mga Hoben​—Naaapektaran Nindo an Puso kan Saindong mga Magurang

“DAI na ako nin orog pa kadakulang dahelan sa pagpasalamat kisa mga bagay na ini, na madangog ko na an sakong mga aki padagos na naglalakaw sa katotoohan,” an isinurat kan gurang nang si apostol Juan. (3 Juan 4) Minsan ngani an mga aki na sinambit sa bersikulong ini sa Biblia nanonongod sa Kristianong mga disipulo, nasasabotan tolos kan matatakton sa Dios na magurang an saboot na ini na ipinahayag ni Juan. Kun paanong an mga magurang may mahalagang epekto sa buhay kan saindang mga aki, an mga aki may dakulang epekto man sa buhay kan saindang mga magurang.

Si Hadeng Salomon nin Israel nagkomento kun gurano kakosog an epekto nin mga aki sa saindang mga magurang. Sia nagsurat: “An aking madonong iyo an nagpapagayagaya sa sarong ama, asin an aking mangmang kamondoan kan saiyang ina.” (Talinhaga 10:1) Kun siring, marahay na isipon nin gabos na aki—dawa an mga mas may edad—kun ano an magigin epekto kan saindang mga gawe-gawe sa saindang ama asin ina. Taano ta angay ini?

Isip-isipa na sana an gabos na pag-asikaso kan saindong matatakton sa Dios na mga magurang sa pagpadakula sa saindo! An mga pagmakolog asin pamibi ninda para sa saindo nagpoon haloy pa bago kamo mamundag. Pakamundag nindo, ikinaogma pareho kan saindong mga magurang an pagpatalubo nin dayupot na relasyon sa saindo asin posibleng marhay na nagpasalamat sinda sa Dios sa marahayon—alagad seryosong—pribilehio asin paninimbagan nin pagpadakula sa aki. An sadit na omboy yaon na ngonyan sa pag-asikaso ninda, asin bilang mga parasamba ki Jehova, sineryoso ninda ini.

Mantang an saindong mga magurang tunay na Kristiano, nagkonsulta sinda sa Biblia asin sa mga babasahon na basado sa Biblia para sa mapagtitiwalaan na paggiya, asin naghagad sinda nin sadol sa mga nagpadakula na nin mga aki. Padagos man sindang nagpahayag kan saindang mga kapurisawan sa Dios paagi sa pamibi. (Hokom 13:8) Mantang kamo nagdadakula, aram kan saindong mga magurang an marahay na mga kualidad nindo alagad aram man ninda an mga kaluyahan nindo. (Job 1:5) Kaiba kan mga taon nin pagkatinedyer an bagong mga problema. Kun beses, tibaad guminawe kamo nin may pagrebelde, asin an saindong mga magurang orog na namimibi, orog na nagbabasa, asin orog na nag-iisip kun paano kamo tatabangan na padagos na magsamba sa saindong langitnon na Ama, si Jehova.

An saindong mga magurang nungkang mapondo sa pagigin ama asin ina. An pagmakolog ninda sa saindong pisikal, mental, emosyonal asin espirituwal na ikakarahay nagpapadagos dawa dakula na kamo. Minsan siring, sa gabos na panahon na iyan, ginigirumdom nin mga magurang na kamo may  sadiring boot asin na mayo nin garantiya kun ano an aabtan kan saindong buhay. Sa katapustapusi, kamo an madesisyon para sa sadiri nindo kun ano an susunodon nindong dalan.

“Dai na . . . nin orog pa kadakulang dahelan sa pagpasalamat” an mga magurang na madangog na “padagos na naglalakaw sa katotoohan” an saindang mga aki. Kun siring, bako daw rasonableng sabihon na totoo man an kabaliktaran kaiyan? Iyo, an mga aki na minagawe sa lolong na paagi nagtatao nin kamondoan sa saindang mga magurang. Si Salomon nagsabi: “An aking mangmang pasakit sa saiyang ama asin kapaitan sa babaeng nangaki sa saiya.” (Talinhaga 17:25) Grabeng kamondoan an mamamatean nin mga magurang kun babayaan nin sarong aki an pagsamba sa tunay na Dios!

Malinaw nanggad, igwa kamo nin darudakulang impluwensia sa laog asin luwas kan saindong pamilya. An saindong gawe-gawe biyong nakakaapektar sa puso kan saindong mga magurang. Kun matalikod kamo sa Dios asin sa saiyang mga prinsipyo, magsasakit an saindong mga magurang. Minsan siring, totoo man an kabaliktaran kaiyan. Kun magdadanay kamong maimbod asin makinuyog ki Jehova, maggagayagaya an saindong mga magurang. Magin determinado na pagayagayahon an puso kan saindong mga magurang! Ano pang mas mahalagang regalo an ikakatao nindo sa mga nagpapadakula, nagpoprotehir, asin namomoot sa saindo?