Tabang Gikan sa “Dios na Nagtatao nin Pakatagal Asin Karangahan”

KAIDTONG mga 2000 na taon na an nakaagi, an parasurat kan Biblia na si Pablo ilinadawan si Jehova bilang “Dios na nagtatao nin pakatagal asin karangahan.” (Roma 15:5) Mantang inaasegurar kita kan Biblia na si Jehova dai nagbabago sa pag-agi nin panahon, kompiado kita na an Dios nagtatao pa man giraray nin karangahan sa mga naglilingkod sa saiya. (Santiago 1:17) Sa katunayan, ihinahayag kan Biblia na si Jehova nagtatao nin karangahan sa manlaenlaen na paagi sa mga nangangaipo kaiyan. Ano an nagkapira sa mga paaging ini? An Dios nagtatao nin kosog sa mga minadolok sa saiya sa pamibi, na naghahagad kan saiyang tabang. Pinapahiro man nia an tunay na mga Kristiano na magtao nin karangahan sa mga kapagtubod. Asin si Jehova nagtatao man nin nakakaogmang mga pagkasaysay sa saiyang Tataramon, an Biblia, na espesyalmenteng nakakapakosog sa mga nagmomondo huli sa pagkagadan kan saindang aki. Saro-saro niatong konsideraron an tolong paaging ini nin pagranga.

“Si Jehova Mismo Nagdangog”

Si Hadeng David nagsurat manongod sa satong Kaglalang, si Jehova: “Magtiwala kamo sa saiya sa gabos na panahon, O banwaan. Sa atubangan nia biyong pahayagan an laog kan saindong puso. An Dios sarong pailihan para sa satuya.” (Salmo 62:8) Taano ta nagkaigwa si David nin siring na kompiansa ki Jehova? Nagtataram manongod sa saiyang sadiri, si David nagsurat: “An nagsasakit nin makuring ini nag-apod, asin si Jehova mismo nagdangog. Asin sa gabos niang kasakitan sia ilinigtas Nia.” (Salmo 34:6) Sa gabos na kasakitan na inagihan nia, pirmeng namimibi si David sa Dios para sa tabang, asin si Jehova pirmeng nagtatabang sa saiya. Aram ni David basado sa eksperyensia na susuportaran sia nin Dios asin tatabangan siang makatagal.

 Kaipuhan na maaraman kan nagmomondong mga magurang na sususteniran sinda ni Jehova sa panahon nin grabeng kamondoan, siring kan ginibo nia ki David. Makakadolok sinda sa dakulang “Paradangog nin pamibi,” na nagtitiwalang tatabangan nia sinda. (Salmo 65:2) Si William, na nasambitan sa sinundan na artikulo, nagkomento: “Dakol na beses na an pagmate ko dai ko na kayang mabuhay pa na mayo an aki ko, asin inarang ko ki Jehova na paginhawahon ako. Pirme nia akong tinatawan nin kosog asin karigonan nin boot na magpadagos na mabuhay.” Kun mamimibi man kamo na may pagtubod ki Jehova, sususteniran kamo kan dakulang Dios nin langit. Total nanunuga si Jehova Dios sa mga maigot na naglilingkod sa saiya: “Ako, si Jehova na saimong Dios, nagkakapot sa saimong toong kamot, an Saro na nagsasabi sa saimo, ‘Dai ka matakot. Ako mismo an matabang sa saimo.’”—Isaias 41:13.

Pagsuportar nin Tunay na mga Katood

An mga nagadanan nin aki sa parate nangangaipo nin panahon na magtangis sa pribado asin analisaron an saindang emosyon. Minsan siring, magigin bakong madonong kun panhaloyan nindang lilikayan na makaibanan an iba. Segun sa Talinhaga 18:1, ‘an nagsusuway kan sadiri’ tibaad mapahamak. Kun siring, an mga nagmomondo maninigong mag-ingat na dai isuway an saindang sadiri sa iba.

An matatakton sa Dios na mga katood puedeng magtao nin mahalagang tabang sa mga nagsasakit. An Talinhaga 17:17 nagsasabi: “An tunay na kaibaiba mamomoton sa gabos na panahon, asin tugang na namundag manongod sa panahon nin kasakitan.” Si Lucy, na nasambitan man sa sinundan na artikulo, nakaeksperyensia kan karangahan na itinao nin tunay na mga kaibaiba pagkagadan kan saiyang aki. Manongod sa mga katood nia sa kongregasyon, sia nagkomento: “An mga pagdalaw ninda nakatabang nin dakula, minsan ngani kun beses kadikiton an sinasabi ninda. An sarong katood nagdadalaw sa sako sa mga aldaw na nagsosolo ako. Aram nia na yaon ako sa harong asin naghihibi, asin parate siang minahapit asin naghihibi man. An saro pa inaapodan ako sa telepono aroaldaw tanganing parigonon an boot ko. An iba pa iniimbitaran kami na magkakan sa saindang harong, asin padagos nindang ginigibo iyan.”

Minsan ngani bakong madaling mawara an hararom na kolog na namamatean nin mga magurang kun magadanan nin aki, an pamibi sa Dios asin pakikiasosyar sa tunay na Kristianong mga katood matao nin tunay na karangahan sa mga nagmomondo.  Dakol na Kristianong magurang na nagadanan nin aki an nakakaeksperyensia na si Jehova kaibanan ninda. Iyo, “pinapaomayan [ni Jehova] an mga nalugadan an puso, asin binobogkosan an saindang makolog na mga kabtang.”—Salmo 147:3.

Mga Pagkasaysay sa Biblia na Nagtatao nin Karangahan

Apuera sa pamibi asin nakakapakosog na pakikiasosyar, an nasusurat na Tataramon nin Dios sarong gikanan nin karangahan sa mga nagmomondo. Ihinahayag kan mga pagkasaysay sa Biblia na si Jesus igwa kan hararom na pagmawot asin kakayahan na haleon an kolog nin boot kan mga magurang na nagadanan paagi sa pagbuhay liwat kan mga gadan. An siring na mga pagkasaysay nagtatao nin tunay na karangahan sa mga nagmomondo. Konsideraron niato an duwa sa siring na mga pagkasaysay.

Isinasaysay kan Lucas kapitulo 7 kun ano an nangyari kan masabatan ni Jesus an sarong paglobong sa siudad nin Nain. Ilolobong na kutana kan mga tawo an solong aki nin sarong babaeng balo. An bersikulo 13 nagsasabi: “Kan maheling sia kan Kagurangnan, [si Jesus] napahiro nin pagkaherak sa saiya, asin sia nagsabi sa [babae]: ‘Dai ka na magtangis.’”

Pira sana an mangangahas na sabihan an sarong ina na dai na magtangis sa lobong kan saiyang aki. Taano ta sinabi iyan ni Jesus? Huli ta aram nia na madali nang mawara an pagmondo kan ina. An pagkasaysay nagsabi pa: “[Si Jesus] nagdolok asin dinuotan an andas, asin nag-orontok an mga nagbuburulig, asin sia nagsabi: ‘Hoben na lalaki, ako nagsasabi sa saimo, Bangon!’ Asin an gadan nagbangon asin nagpoon na magtaram, asin itinao [ini ni Jesus] sa saiyang ina.” (Lucas 7:14, 15) Kan oras na idto, an ina seguradong napahibi giraray, alagad sa panahon na ini napahibi sia sa kagayagayahan.

 Sa saro pang okasyon, duminolok ki Jesus an sarong lalaki na an ngaran Jairo, na naghagad nin tabang para sa saiyang 12 anyos na aking babae na grabe an helang. Dai nahaloy pakatapos kaiyan, nag-abot an bareta na nagadan na an daragita. An baretang ini nagpamondo nin grabe ki Jairo, alagad sinabihan sia ni Jesus: “Dai ka matakot, magtubod ka sana.” Dinumanan ni Jesus an mayong buhay na daragita sa harong kan pamilya. Kinakapotan an kamot kaini, sia nagsabi: “Daragita, ako nagsasabi sa saimo, Bangon!” Ano an nangyari? “Ensegida an daragita buminuhat asin nagpoon na maglakaw.” Ano an nagin reaksion kan saiyang mga magurang? “Sinda haros mawara sa sadiri huli sa labi-labi kadakulang kaogmahan.” Mantang kinukugos ni Jairo asin kan saiyang agom an saindang aki, nakamate sinda nin dakulang kaogmahan. Garo man sana sinda nangangatorogan.—Marcos 5:22-24, 35-43.

An siring kadetalyadong mga pagkasaysay sa Biblia manongod sa pagkabuhay liwat nin mga aki nagpapaheling kun ano an puedeng antisiparon kan nagmomondong mga magurang ngonyan. Si Jesus nagsabi: “An oras maabot na an gabos na nasa mga lolobngan na girumdoman makakadangog kan saiyang tingog asin maruluwas.” (Juan 5:28, 29) Katuyohan ni Jehova na an mga nagadan buhayon liwat kan saiyang Aki. Dai mabilang na minilyon na aki na nagadan an “makakadangog kan saiyang tingog” kun magtaram sia sa sainda: ‘Ako nagsasabi sa saindo, Bangon!’ An mga hoben na idto magraralakaw asin magtatararam giraray. Asin arog ni Jairo asin kan saiyang agom, an mga magurang kan mga aking idto ‘haros mawawara sa sadiri huli sa labi-labi kadakulang kaogmahan.’

Kun kamo nagadanan nin aking lalaki o babae, aramon tabi nindo na an saindong kamondoan kayang salidahan ni Jehova nin kagayagayahan paagi sa pagkabuhay liwat. Tanganing makinabang sa mamuraway na paglaom na ini, sunodon an sadol kan salmista: “Hanapa nindo si Jehova asin an saiyang kosog. Danay na hanapon an saiyang lalauogon. Girumdoma nindo an makangangalas na mga gibo na saiyang ginibo, an saiyang mga milagro.” (Salmo 105:4, 5) Iyo, paglingkodan an tunay na Dios, si Jehova, asin sambahon sia sa inaakong paagi.

Ano an magigin ensegidang resulta kun ‘hahanapon nindo si Jehova?’ Mag-aako kamo nin kosog paagi sa pamibi sa Dios, mararanga kamo kan mamomoton na pagmakolog nin tunay na Kristianong mga kaibaiba, asin magigin maogma kamo paagi sa pag-adal kan Tataramon nin Dios. Dugang pa, sa haraning ngapit, maeeksperyensiahan nindo an ‘makangangalas na mga gibo asin milagro’ na gigibohon ni Jehova para sa daing sagkod na kapakinabangan nindo asin kan saindong nagadan na aki.

[Kahon sa pahina 5]

“Daraha Digdi an Babae na Nagadanan nin Duwang Aki”

Si Kehinde asin Bintu, mag-agom na Saksi ni Jehova na taga Nigeria, nagadanan nin duwa sa saindang mga aki sa sarong aksidente sa kotse. Poon kaidto, namatean ninda an grabeng kolog nin boot huli sa makaturotristeng pagkagadan na ini. Dawa siring, an pagtitiwala ninda ki Jehova nagsustenir sa sainda, asin padagos nindang ihinihiras sa saindang kataraed an mensahe nin paglaom sa Biblia.

Nariparo kan iba an katoninongan asin kosog na ipinapaheling ni Kehinde asin Bintu. Sarong aldaw sarong babae na an ngaran Mrs. Ukoli an nagsabi sa saro sa mga katood ni Bintu: “Daraha digdi an babae na sabay na nagadanan nin duwang aki asin naghuhulit pa man giraray kan mensahe sa Biblia. Gusto kong maaraman kun ano an nagtatao sa saiya kan puersa na makatagal.” Kan umabot si Bintu sa harong kan babae, sinabi ni Mrs. Ukoli sa saiya: “Gusto kong maaraman kun taano ta naghuhulit ka pa man giraray manongod sa Dios na guminadan sa saimong mga aki. Kinua nin Dios an sakong solong aking babae. Poon kaidto, dai na ako interesado sa Dios.” Ginamit ni Bintu an Biblia tanganing ipaliwanag an dahelan kun taano ta nagagadan an mga tawo asin kun taano ta puede kitang magkaigwa kan seguradong paglaom na bubuhayon liwat an nagadan na mga namomotan.—Gibo 24:15; Roma 5:12.

Pagkatapos, si Mrs. Ukoli nagsabi: “An paghona ko kaidto an Dios an dahelan kan kagadanan nin tawo. Ngonyan aram ko na an katotoohan.” Nagdesisyon siang makipag-adal sa Biblia sa mga Saksi ni Jehova tanganing makanood pa nin orog manongod sa mga panuga nin Dios.

[Kahon sa pahina 6]

‘Gusto Kong Makatabang, Alagad Dai Ko Aram Kun Paano’

Mantang grabe an pagmondo kan mga magurang asin mga tugang nin sarong nagadan na aki, tibaad nahahandal an saindang mga katood. Gusto nindang suportaran an pamilya alagad naghahadit na an pagsabi o paggibo kan salang bagay mapagrabe kan kolog sa boot ninda. Uya an pirang suhestion para sa mga tibaad nag-iisip, ‘Gusto kong makatabang, alagad dai ko aram kun paano.’

❖ Dai paglikayan an nagadanan huli sana ta dai nindo segurado kun ano an sasabihon o gigibohon nindo. An saindo mismong presensia nakakapagpakosog sa sainda. Nadedepisilan daw kamo kun ano an sasabihon nindo? An pagkugos asin sinserong pagsabi nin “Namomondo akong gayo” nagpapamate sa sainda na nagmamakolog kamo sa sainda. Natatakot daw kamo na kun maghibi kamo, madudugangan nindo an saindang kamondoan? An Biblia nagsasabi: “Makitangis sa mga tawong nagtatangis.” (Roma 12:15) An saindong mga luha nagpapaheling na nakikidamay kamo sa saindang kamondoan, asin iyan nakakaranga.

❖ Kamo na mismo an humiro tanganing tumabang. Puede daw kamong mag-andam nin simpleng kakanon para sa pamilya? Puede daw nindong hugasan an mga kinakanan na natipon? Andam daw kamong gibohon an mga bagay-bagay para sa sainda? Dai kamo magsabing, “Ipaaram nindo sa sako kun may kaipuhan kamong ano man.” Dawa kun sinasabi nin may pagkasinsero, ipinaparisa kan mga tataramon na iyan sa dakol na nagadanan na magurang na sibot kamong marhay tanganing tumabang sa sainda. Imbes, hapoton nindo sinda, “Ano an magigibo ko tanganing makatabang sa saindo ngonyan?” dangan gibohon an saindang kahagadan. Alagad likayan an paglaog sa pribadong mga lugar kan saindang harong o pakikiaram sa saindang personal na buhay.

❖ Likayan an pagsabing, “Aram ko an namamatean mo.” An lambang tawo may laen-laen na reaksion sa pagkagadan nin sarong namomotan. Dawa pa kun kamo nagadanan na man nin aki, dai nindo aram nin eksakto kun ano an saindang namamatean.

❖ Dakol na panahon an maagi bago magin garo baga normal giraray an buhay kan pamilya. Padagos kamong tumabang sagkod sa mapupuede. Sa primero, parateng kadakol an itinataong atension sa pamilyang nagadanan, alagad orog pa an kaipuhan ninda. Magin kamong maasikaso sa saindang mga pangangaipo sa maabot na mga semana asin bulan. *

[Nota sa Ibaba]

[Mga Ritrato sa pahina 7]

An mga pagkasaysay sa Biblia nagpapaheling na si Jesus igwa kan kapangyarihan asin kamawotan na buhayon liwat an mga aki