An Pagkabuhay Liwat—Tunay daw Iyan Para sa Saindo?
An Pagkabuhay Liwat—Tunay daw Iyan Para sa Saindo?
“Magkakaigwa nin pagkabuhay liwat.”—GIBO 24:15.
1. Taano an kagadanan ta garo baga segurado?
“SA KINABAN na ini mayo nin segurado apuera sa kagadanan asin buhis.” An komentong iyan, na isinurat kan 1789 kan Amerikanong estadista na si Benjamin Franklin, hinangaan nin nagkapira bilang madonong na komento. Minsan siring, dakol na madaya an nandadaya sa pagbayad ninda nin buhis. An kagadanan garo baga mas segurado nanggad. Kun kita sana, mayo ni saro sa sato an makakalikay dian pag-abot nin panahon. Kita gabos dai makakadulag dian. Huling dai naninigoan, an Sheol—an pangkagabsan na lolobngan nin katawohan—hinahamil an mga tawong mahal niato. (Talinhaga 27:20) Alagad isip-isipa an sarong nakakarangang paglaom.
2, 3. (a) Taano ta dakol an dai nakakarealisar na puedeng malikayan an kagadanan? (b) Ano an eestudyaran niato sa artikulong ini?
2 An Tataramon ni Jehova nagtatao nin siertong paglaom na pagkabuhay liwat, an pagbangon giraray sa buhay. Bako sanang pangatorogan ini, asin mayo nin puersa sa uniberso an makakaolang ki Jehova sa pagpangyari kan paglaom na ini. Minsan siring, dakol sa ngonyan an dai nakakarealisar na puedeng malikayan nin nagkapira an kagadanan. Taano man? Huling an daing bilang na “dakulang kadaklan” makakaligtas sa “dakulang kahorasaan,” na maabot sa dai na mahahaloy. (Kapahayagan 7:9, 10, 14) Padagos sindang mabubuhay pagkatapos kaiyan, na may paglaom na mabuhay nin daing sagkod. Sa siring, malilikayan ninda an kagadanan. Dugang pa, “an kagadanan paparaon.”—1 Corinto 15:26.
3 Kaipuhan na makamate kita nin kasiertohan sa pagkabuhay liwat kapareho ni apostol Pablo, na nagsabi: “Magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Estudyaran niato an tolong hapot mapadapit sa pagkabuhay liwat. Enot, ano an nagpapagin sierto nanggad sa paglaom na ini? Ikaduwa, paano kamo personalmenteng mararanga kan paglaom na pagkabuhay liwat? Ikatolo, paano puedeng makaapektar an paglaom na ini sa saindong pamumuhay ngonyan mismo?
An Pagkabuhay Liwat—Sarong Kasiertohan
4. Paanong an pagkabuhay liwat mahalagang marhay sa katuyohan ni Jehova?
4 Dakol an dahelan na nagpapagin sierto sa pagkabuhay liwat. Sa pangenot, iyan mahalagang marhay sa katuyohan ni Jehova. Girumdomon, dinara ni Satanas an katawohan sa pagkakasala, na may dai malilikayan na resulta kaiyan, an kagadanan. Huli kaini, si Jesus nagsabi manongod ki Satanas: “An sarong iyan sarong paragadan kan sia pumoon.” (Juan 8:44) Alagad nanuga si Jehova na an saiyang simbolikong “babae,” o arog sa agom na organisasyon sa langit, mapaluwas nin sarong “banhi” na iyo an malugad sa payo kan “orihinal na halas” na iyan, na biyong maronot ki Satanas. (Genesis 3:1-6, 15; Kapahayagan 12:9, 10; 20:10) Mantang luway-luway na ihinahayag ni Jehova an saiyang katuyohan may koneksion sa Mesiyanikong Banhing iyan, nagigin malinaw na an gigibohon kan Banhi labi pa kisa paglaglag sana ki Satanas. An Tataramon nin Dios nagsasabi: “Sa katuyohan na ini an Aki nin Dios ipinahayag, na iyo, tanganing laglagon an mga gibo kan Diablo.” (1 Juan 3:8) An kagadanan na pinangyari nin kasalan na minana niato ki Adan iyo an pangenot sa mga gibo ni Satanas na katuyohan ni Jehova na remedyohan paagi ki Jesu-Cristo. Mapadapit digdi, mahalagang marhay an atang na pantubos ni Jesus asin an pagkabuhay liwat.—Gibo 2:22-24; Roma 6:23.
5. Taano an pagkabuhay liwat ta magpapamuraway sa ngaran ni Jehova?
5 Determinado si Jehova na pamurawayon an saiyang sagradong ngaran. Pinakaraot ni Satanas an ngaran nin Dios asin pinalakop an mga kaputikan. May kaputikan na sinabi nia na si Adan asin Eva ‘dai nanggad magagadan’ kun magkakan sinda kan bunga na ipinagbabawal nin Dios. (Genesis 2:16, 17; 3:4) Poon kaidto, nagpalakop si Satanas nin kaparehong mga kaputikan, arog kan falsong katokdoan na an kalag nabubuhay pagkagadan kan hawak. Minsan siring, paagi sa pagkabuhay liwat, ihahayag ni Jehova an pagkafalso kan gabos na kaputikan na iyan. Papatunayan nia sagkod lamang na sia sana an nagpepreserbar asin nagbabalik nin buhay.
6, 7. Ano an saboot ni Jehova manongod sa pagbuhay liwat sa mga tawo, asin paano niato naaaraman an manongod sa saiyang saboot?
6 Hinihimuyawot ni Jehova na ipaotob an pagkabuhay liwat. Linilinaw kan Biblia an saboot ni Jehova sa bagay na ini. Halimbawa, estudyare an ipinasabong na mga tataramon na ini kan maimbod na si Job: “Kun an pusog na lalaki magadan puede pa daw siang mabuhay giraray? Sa gabos na aldaw kan sakong obligatoryong trabaho ako maghahalat, sagkod na umabot an sakuyang pakaginhawa. Ika maapod, asin ako mismo masimbag sa saimo. Para sa ginibo kan saimong mga kamot ika magkakaigwa nin paghimuyawot.” (Job 14:14, 15) Ano an boot sabihon kan mga tataramon na iyan?
7 Aram ni Job na pagkagadan nia, kaipuhan niang maghalat sa laog nin sarong peryodo nin panahon mantang natotorog sa kagadanan. Minansay nia an panahon na iyan bilang “obligatoryong trabaho,” sarong peryodo nin paghalat para sa pagkabutas nia. Para sa saiya, an pagkabutas na iyan sarong kasiertohan. Aram ni Job na maabot an saiyang pakaginhawa. Taano? Huling aram nia an saboot ni Jehova. ‘Naghihimuyawot’ si Jehova na maheling giraray an saiyang maimbod na lingkod na iyan. Iyo, minamawot nin Dios na buhayon liwat an gabos na matanos na indibiduwal. Tatawan man ni Jehova nin oportunidad an iba na mabuhay sagkod lamang sa Paraiso digdi sa daga. (Lucas 23:43; Juan 5:28, 29) Mantang kabotan nin Dios na otobon an katuyohan na iyan, may makakapugol daw sa saiya?
8. Paano si Jehova “nagtao nin garantiya” sa satong paglaom para sa ngapit?
8 An satong paglaom para sa ngapit ginagarantiyahan kan pagkabuhay liwat ni Jesus. Kan si Pablo magdiskurso sa Atenas, ipinahayag nia: “[An Dios] nagtalaan nin aldaw na katuyohan niang hokoman an ineerokan na daga sa katanosan paagi sa sarong lalaki na saiyang ninombrahan, asin sia nagtao nin garantiya sa gabos na tawo ta binuhay nia sia liwat hale sa mga gadan.” (Gibo 17:31) An nagkapira sa mga nagdadangog ki Pablo nagtuyatuya kan madangog ninda an manongod sa pagkabuhay liwat. Minsan siring, may pira na nagturubod. Tibaad nakaapod sa saindang atension an pag-isip-isip na garantisado an paglaom na ini. Kan buhayon liwat ni Jehova si Jesus, ginibo Nia an nakakalabi sa gabos na milagro. Hale sa kagadanan, tinawan nia nin buhay an saiyang Aki bilang makakamhan na espiritu. (1 Pedro 3:18) An binuhay liwat na si Jesus mas dakula pa ngani an katongdan kisa kan panahon bago sia nagin tawo. Si Jesus na imortal asin ikaduwa sana ki Jehova sa kapangyarihan, nasa kamugtakan na ngonyan tanganing akoon an marahayon na mga asignasyon hale sa saiyang Ama. Si Jesus an gagamiton ni Jehova tanganing gibohon an gabos na iba pang pagbuhay liwat—para sa buhay sa langit o sa daga. Si Jesus mismo nagsabi: “Ako iyo an pagkabuhay liwat asin an buhay.” (Juan 5:25; 11:25) Paagi sa pagbuhay liwat sa saiyang Aki, ginarantiyahan ni Jehova an siring na mga paglaom para sa gabos na maimbod.
9. Paanong an rekord kan Biblia nagtataong katunayan sa pagkabuhay liwat?
9 An pagbuhay liwat ginibo sa atubangan kan mga nagheheling mismo asin isinurat iyan sa Tataramon nin Dios. An rekord kan Biblia igwa nin detalyadong paglaladawan nin walong tawo na binuhay liwat bilang mga tawo digdi sa daga. An mga milagrong ini ginibo bakong sa hilom kundi sa hayag na paagi, sa parate sa atubangan kan mga nagheheling mismo. Binuhay liwat ni Jesus si Lazaro, na apat na aldaw nang gadan, sa atubangan kan grupo nin mga nagmomondo—na daing duwa-duwa na kaiba an pamilya, mga katood, asin pagtaraed ni Lazaro. Mapuersang marhay an ebidensiang ini na si Jesus isinugo nin Dios kaya nungkang nagnegar an relihiosong mga kaiwal ni Jesus na nangyari iyan. Imbes, nagpakana sinda na gadanon bako sanang si Jesus kundi pati si Lazaro! (Juan 11:17-44, 53; 12:9-11) Iyo, makakasarig kita na an pagkabuhay liwat sarong kasiertohan. Itinao sa sato nin Dios an rekord kan nakaaging mga pagkabuhay liwat tanganing rangahon kita asin pakosogon an satong pagtubod.
Pakanompong nin Karangahan sa Paglaom na Pagkabuhay Liwat
10. Ano an makakatabang sa sato na maranga kan mga pagkasaysay sa Biblia manongod sa pagkabuhay liwat?
10 Nagmamawot daw kamo nin karangahan kun napapaatubang sa kagadanan? An saro sa seguradong gikanan nin karangahan makukua sa mga pagkasaysay kan Biblia manongod sa pagkabuhay liwat. Magigin mas tunay para sa saindo an paglaom na pagkabuhay liwat kun babasahon nindo an siring na mga pagkasaysay, hohorophoropon iyan, asin ilaladawan sa isip an mga pangyayaring iyan. (Roma 15:4) Bako ining mga eroestorya sana. Talagang nangyari iyan sa tunay na mga tawo kapareho niato, na nabuhay sa sarong tunay na panahon asin sa sarong tunay na lugar. Magkonsentrar kita sa halipot sa sarong halimbawa—an enot na pagkabuhay liwat sa rekord kan Biblia.
11, 12. (a) Anong trahedya an uminabot sa babaeng balo sa Sarepta, asin ano an reaksion nia kan enot? (b) Iladawan kun ano an ginibo ni propeta Elias para sa babaeng balo paagi sa itinaong kapangyarihan ni Jehova sa saiya.
11 Imahinara an eksena. Sa laog nin nagkapirang semana, an propetang si Elias nagin bisita kan babaeng balo sa Sarepta, na nagdadagos sa sarong kuarto na nasa atop kan harong kaini. Masakit na panahon idto. An rehion nag-aagi nin tigmara asin tiggutom. Dakol an nagagadan. Ginamit na ni Jehova si Elias sa paggibo nin pinalawig na milagro tanganing tawan nin balos an pagtubod kan hamak na babaeng balo na ini. Kan an mag-inang ini madali nang mapaatubang sa makuring gutom, huli ta ultimo na an pagkakan ninda, tinawan nin Dios si Elias nin kapangyarihan na gumibo nin milagro tangani na an suplay na harina asin lana kan babaeng balo dai maubos. Pero, nangyari ngonyan sa saiya an sarong trahedya. Biglang nagkahelang an aki, asin dai nahaloy nagadan ini. Grabe nanggad an kamondoan kan babaeng balo! An mabuhay na mayo kan kosog asin suporta nin agom na lalaki talagang depisil, alagad ngonyan nawara pa an saiyang solong aki. Huli sa saiyang kamondoan, binasol pa ngani nia si Elias asin an Dios kaini, si Jehova! Ano an gigibohon kan propeta?
12 Dai sinagwe ni Elias an babaeng balo huli sa salang akusasyon kaini. Imbes, sinabi nia: “Tawan sakuya an saimong aking lalaki.” Pagkatapos na darahon an gadan na aki sa kuarto na nasa atop, paorootrong namibi si Elias tanganing ikabalik an buhay kan aki. Sa katapustapusi, huminiro si Jehova! Imahinara an kagayagayahan na mababanaag sa lalauogon ni Elias kan maheling nia na naghiro an daghan kan aki huli sa paghangos. Nagmuklat an mga mata kan aki, asin buhay na buhay an mga mata kaiyan. Dinara ni Elias an aki sa ibaba asin itinao sa ina kaini patin nagsabi: “Helinga, buhay an saimong aki.” Dai ikaladawan an kagayagayahan kan babaeng balo. Nagsabi ini: “Ngonyan, talagang aram ko nanggad na ika lalaking isinugo nin Dios asin na an tataramon ni Jehova sa saimong ngoso totoo.” (1 Hade 17:8-24) An saiyang pagtubod ki Jehova asin sa representante kaini mas kuminosog kisa kasuarin man.
13. Taano ta nagtatao nin karangahan sa sato ngonyan an pagkasaysay manongod sa pagbuhay liwat ni Elias sa aki kan babaeng balo?
13 An paghorophorop sa siring na pagkasaysay seguradong nagtatao sa saindo nin dakulang karangahan. Malinaw nanggad na kayang daogon ni Jehova an satong kaiwal na kagadanan! Imahinara na sana nindo an aldaw na maeeksperyensiahan kan rinibong nag-eerok sa daga an kagayagayahan kan babaeng balo sa pangkagabsan na pagkabuhay liwat kan mga gadan! Magigin dakulaon man an kagayagayahan sa langit mantang ikinakaogmang marhay ni Jehova an pagdirehir sa saiyang Aki na gibohon an pagbuhay liwat sa bilog na globo. (Juan 5:28, 29) Nagadanan na daw kamo nin sarong namomotan? Kanigoan karahay na maaraman na kayang ibalik asin talagang ibabalik ni Jehova an buhay kan mga nagadan!
An Saimong Paglaom Asin an Saimong Buhay Ngonyan
14. Paano puedeng makaapektar sa saimong buhay an paglaom na pagkabuhay liwat?
14 Paano puedeng makaapektar sa saimong pamumuhay ngonyan mismo an paglaom na pagkabuhay liwat? Makakakua ka nin kosog sa paglaom na ini kun napapaatubang ka sa mga kasakitan, kadepisilan, persekusyon, o peligro. Gusto ni Satanas na matakot ka nanggad sa kagadanan kaya magigin andam kang iribay an saimong integridad sa daing saysay na panuga nin pagigin ligtas. Girumdomon na sinabi ni Satanas ki Jehova: “An gabos na sadiri nin tawo itatao nia para sa saiyang kalag.” (Job 2:4) Sa pagsabi kaiyan, kita gabos, kaiba ka na, pinakaraot ni Satanas. Totoo daw na mapondo ka na sa paglilingkod sa Dios kun mapaatubang ka sa peligro? Paagi sa paghorophorop sa paglaom na pagkabuhay liwat, mapapasarig mo an saimong determinasyon na padagos na gibohon an kabotan kan saimong langitnon na Ama.
15. Kun napapaatubang sa peligro, paano puedeng magtao sa sato nin karangahan an mga tataramon ni Jesus sa Mateo 10:28?
15 Si Jesus nagsabi: “Dai kamo matakot duman sa mga minagadan kan hawak alagad dai nakakagadan kan kalag; kundi imbes matakot kamo sa saiya na nakakalaglag kan kalag sagkod kan hawak sa Gehenna.” (Mateo 10:28) Dai kita kaipuhan na matakot nin grabe ki Satanas o sa saiyang mga representanteng tawo. Totoo, an iba tibaad may kakayahan na magpangyari nin danyos asin kagadanan pa ngani. Minsan siring, an pinakamaraot na magigibo ninda temporaryo pa man giraray. Kayang gibohon asin talagang gigibohon ni Jehova na haleon an ano man na danyos sa maimbod na mga lingkod nia asin bubuhayon pa ngani sinda. Si Jehova sana an maninigo sa satong pagkatakot—an satong hararom na may pagkangirhat na paggalang. Sia sana an may kapangyarihan na taposon an buhay asin haleon an gabos na oportunidad para sa buhay sa ngapit, na linalaglag an hawak sagkod an kalag sa Gehenna. Marahay sana ta habo ni Jehova na mangyari iyan sa saindo. (2 Pedro 3:9) Huli kan paglaom na pagkabuhay liwat, kita bilang mga lingkod nin Dios pirmeng makakasegurado na kita ligtas. Buhay na daing katapusan an naghahalat sa sato basta maimbod kita, asin mayong magigibo manongod dian si Satanas o an mga sakop nia.—Salmo 118:6; Hebreo 13:6.
16. Paanong an punto de vista niato sa pagkabuhay liwat nakakaapektar sa mga prioridad na ginigibo niato?
16 Kun an paglaom na pagkabuhay liwat tunay para sa sato, mababago kaiyan an satong aktitud manongod sa buhay. Narerealisar niato na “baga man kita mabuhay o magadan, sadiri kita ni Jehova.” (Roma 14:7, 8) Kun siring, sa paggibo nin mga prioridad, iinaaplikar niato an hatol ni Pablo: “Dai na kamo magpamolde sa sistemang ini nin mga bagay, kundi maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.” (Roma 12:2) Dakol na tawo an apurado nanggad na panigoan an lambang mawot, lambang ambisyon, lambang kagustohan. Huling minamansay ninda na an buhay halipot sana, sinda garo haros desesperado na sa saindang paghanap nin kawilihan, asin kun may porma man sinda nin pagsamba, dai nanggad iyan kaoyon kan “sangkap na kabotan nin Dios.”
17, 18. (a) Paano minimidbid kan Tataramon ni Jehova an kahalipotan kan buhay nin tawo, alagad ano an gusto nin Dios para sa sato? (b) Taano ta napapahiro kitang omawon si Jehova aroaldaw?
17 Totoo, an buhay talagang halipot. “Iyan kaipuhan na marikas na umagi, asin [kita] minalupad,” tibaad sa laog nin 70 o 80 taon. (Salmo 90:10) An mga tawo garo minalataw asin nawawara sana siring sa berdeng doot, siring sa anino na minaagi sana, siring sa alisngaw. (Salmo 103:15; 144:3, 4) Alagad bakong katuyohan nin Dios na gamiton niato an pira sanang dekada sa pagtalubo asin pagkua nin dikit na kadonongan asin eksperyensia, tangani sanang sa masunod na nagkapirang dekada magluya asin maghelang patin magadan. Linalang ni Jehova an mga tawo na may kamawotan na mabuhay sagkod lamang. “An panahon na daing talaan ibinugtak nia sa saindang puso,” an sabi sato kan Biblia. (Eclesiastes 3:11) An Dios daw maringis, na tinatawan kita kan siring na kamawotan dangan ginigibong imposible an pagkaotob kaiyan? Bako nanggad, huli ta “an Dios pagkamoot.” (1 Juan 4:8) Gagamiton nia an pagkabuhay liwat tanganing an buhay na daing katapusan magin posible para sa mga tawo na nagadan na.
18 Huli sa paglaom na pagkabuhay liwat, puede kitang magkaigwa nin seguradong ngapit. Dai kita kaipuhan na mag-apura, na pinipirit na maabot nin lubos an mga bagay na dai man kaipuhan na aboton ngonyan mismo. Dai niato kaipuhan na gamiton “nin lubos” an naghihingagdan na kinaban na ini. (1 Corinto 7:29-31; 1 Juan 2:17) Bakong arog kan mga mayong tunay na paglaom, igwa kita kan makangangalas na regalo na maaraman na kun magdadanay kitang maimbod ki Jehova Dios, oomawon niato sia asin ikakaogma niato an buhay sa bilog na panahon na daing sagkod. Kun siring, aroaldaw nanggad niatong omawon si Jehova, na ginigibo na sarong kasiertohan an paglaom na pagkabuhay liwat!
Ano an Isisimbag Nindo?
• Ano an maninigong magin saboot niato manongod sa pagkabuhay liwat?
• Anong mga dahelan an nagpapagin sarong kasiertohan an paglaom na pagkabuhay liwat?
• Paano kamo nararanga kan paglaom na pagkabuhay liwat?
• Paano puedeng makaapektar sa saindong paagi nin pamumuhay an paglaom na pagkabuhay liwat?
[Mga Hapot Para sa Pag-adal]
[Ritrato sa pahina 28]
Aram ni Job na hinihimuyawot ni Jehova na buhayon liwat an mga matanos
[Ritrato sa pahina 29]
“Helinga, buhay an saimong aki”