Kapangganahan sa Korte sa mga Deretso nin Tawo sa Europa

KAN Enero 11, 2007, an Korte sa mga Deretso nin Tawo sa Europa sa Strasbourg, Pransia, nagpaluwas nin biyong sararong desisyon apabor sa mga Saksi ni Jehova sa Rusya sa saindang kaso tumang sa Pederasyon sa Rusya. Sinurog kan desisyon an katalingkasan sa relihion para sa mga Saksi ni Jehova asin an deretso ninda na magkaigwa nin makatanosan na bista. Estudyaran niato kun taano ta nagkaigwa nin siring na kaso.

An sarong kongregasyon nin mga Saksi ni Jehova sa siudad nin Chelyabinsk, Rusya, kompuesto haros nin bungog na mga indibiduwal. An tiriponan ninda sarong pasilidad na inarkila ninda sa sarong kolehio para sa pagtokdo nin paghanap-buhay. Kan Domingo, Abril 16, 2000, an saindang pagtiripon pinapondo kan babaeng tsirman o Komisyonado kan rehional na Komisyon sa mga Deretso nin Tawo, saka nin duwang halangkaw na opisyal nin pulis asin sarong nakasibilyan na pulis. Huli sa biribid na paghusgar, nangorogna kan Komisyonado, pinapondo an pagtiripon huli sa sala asin inimbentong mga sahot na sinda nagtitiripon na mayong basehan sono sa ley. Kan Mayo 1, 2000, tinapos an kontrata sa pag-arkila kan auditoryum.

Nagsangat nin reklamo an mga Saksi ni Jehova sa piskal sa Chelyabinsk, alagad mayong resulta iyan. An Konstitusyon kan Rusya saka an Kasundoan Para sa Pagprotehir kan mga Deretso nin Tawo asin Pundamental na mga Katalingkasan naggagarantiya nin katalingkasan sa relihion asin katalingkasan sa pagtiripon. Kaya, isinangat an kaso sibil sa korte sa distrito na may kasunod na apelasyon sa korte sa rehion. Bago kaidto, kan Hulyo 30, 1999, nagdesisyon an korte suprema sa ibang kaso na “segun sa Ley kan Rusya manongod sa katalingkasan sa konsensia asin relihiosong mga pagtiripon, an fraseng ‘mayong pakikiaram’ nangangahulogan na dai kaipuhan an permiso o autorisasyon hale sa sekular na mga autoridad para sa relihiosong mga seremonya sa mga lugar na pinili [para sa katuyohan na iyan].” (Sainda an nasa braket.) Sa ibong kan nakaaging desisyon na ini, inabsuelto an mga kaso sa korte sa distrito asin rehion.

Kan Disyembre 17, 2001, dinara an kaso sa Korte sa mga Deretso nin Tawo sa Europa. Nagkaigwa nin pagbista kan Setyembre 9, 2004. An minasunod mga kotasyon hale sa pinal na desisyon kan Korte:

“Nanompongan kan Korte na pinakiaraman an deretso kan mga nagsangat kan kaso na magkaigwa nin katalingkasan sa relihion sa dahelan na, kan Abril 16, 2000, pinapondo kan mga opisyal kan Estado an saindang relihiosong pagtiripon bago pa an oras na dapat matapos iyan.”

“Risang-risa na mayong legal na basehan na papondohon an relihiosong okasyon sa mga lugar na inaarkila sono sa ley para sa katuyohan na iyan.”

“Kinonsiderar [kan Korte] na an daing liwat-liwat na ley basado sa nakaaging mga kaso sa Korte Suprema kan Rusya nangangahulogan na an relihiosong mga pagtiripon dai nangangaipo nin ano man na autorisasyon hale sa, o abiso sa, mga autoridad.”

“Kun siring, nabalga an Artikulo 9 [katalingkasan sa relihion] kan Kasundoan huli sa pagpapondo kan Komisyonado asin kan saiyang mga kairiba kan Abril 16, 2000 sa relihiosong pagtiripon kan mga nagsangat kan kaso.”

“Nanompongan kan Korte na an mga korte sa distrito asin rehion nagkulang sa saindang obligasyon . . . na patunayan na binista an mga lado sa makatanosan asin rasonableng paagi. . . . Nabalga an Artikulo 6 [deretso na magkaigwa nin makatanosan na bista] kan Kasundoan.”

Nagpapasalamat an mga Saksi ni Jehova sa Dios sa pagtao sa sainda nin kapangganahan sa Korte sa mga Deretso nin Tawo sa Europa. (Salmo 98:1) Gurano kalakop an magigin epekto kan desisyon kan Korte? Nagsabi si Joseph K. Grieboski, presidente kan Institute on Religion and Public Policy: “Ini saro pang mahalaga nanggad na desisyon na nakakaapektar sa katalingkasan sa relihion sa bilog na Europa, huli ta may epekto an desisyon sa relihiosong mga deretso sa gabos na estado na sakop kan Korte sa mga Deretso nin Tawo sa Europa.”