Kun Taano ta Madali Nang Matapos an Gabos na Pagsakit
Kun Taano ta Madali Nang Matapos an Gabos na Pagsakit
“An Gapo, sangkap an saiyang gibo.”—DEUTERONOMIO 32:4.
1, 2. (a) Taano ta pinakamamahal nindo an paglaom na mabuhay sagkod lamang? (b) Ano an nakakaolang sa dakol na magtubod sa Dios na may marahayon na mga panuga para sa ngapit?
IKINAKAOGMA daw nindong imahinaron an buhay sa Paraiso? Tibaad naiimahinar nindo an sadiri nindo na sinisiyasat an makangangalas na planetang ini asin inaadalan an manongod sa haros daing katapusan na pagkalaenlaen kan nabubuhay na mga bagay dian. O tibaad iniisip-isip nindo an satispaksion na mamamatean nindo mantang nagtatrabaho kamo kaibanan nin iba pa tanganing atamanon an daga asin tumabang sa paggibo kaiyan na magin sarong lakop sa globong parke. O tibaad hinohorophorop nindo an mga abilidad na puede nindong paoswagon sa arte, arkitektura, musika, o iba pang gibohon na mayo kamo nin panahon huli sa sibot na buhay ngonyan. Sa paano man, pinakamamahal nindo an paglaom na buhay na inaapod sa Biblia na “tunay na buhay”—an klase nin buhay na iyo an katuyohan ni Jehova para sa sato, na tinatanaw an panahon na daing sagkod.—1 Timoteo 6:19.
2 Bako daw na nakakaogma asin mahalagang marhay na pribilehio an pagsabi sa iba kan paglaom na iyan na basado sa Biblia? Minsan siring, hinahaboan nin dakol an siring na paglaom. Sinasabi ninda na iyan sarong imahinasyon, pangatorogan na bakong realistiko para sa mga tawo na madaling maloko. Tibaad masakitan pa ngani sindang magtubod sa Dios na nanunuga nin buhay na daing katapusan sa Paraiso. Taano? Para sa nagkapira, kalabot sa olang an inaapod sa parate na problema nin karatan. Naniniwala sinda na kun nag-eeksister an Dios asin sia makakamhan sa gabos patin mamomoton, dai ikakapaliwanag kun taano ta igwa nin karatan asin kasakitan sa kinaban. Dai nag-eeksister an Dios na nagtotogot nin karatan, an pangangatanosan ninda—o kun sia nag-eeksister, magsalang bako siang makakamhan sa gabos o mayo siang pagmakolog sa sato. Para sa nagkapira, an arog kaining pangangatanosan garo baga nakakakombensir. Daing duwa-duwa na si Satanas nagin eksperto na sa pagbuta kan isip nin mga tawo.—2 Corinto 4:4.
3. Matatabangan niato an mga tawo na masimbag an anong depisil na hapot, asin taano ta igwa kita nin daing kaagid na kamugtakan na gibohon iyan?
3 Bilang Mga Saksi ni Jehova, igwa kita nin daing kaagid na kamugtakan na tabangan an mga tawo na dinadaya ni Satanas asin kan kadonongan kan kinaban na ini. (1 Corinto 1:20; 3:19) Nasasabotan niato kun taano ta dakol an dai nagtutubod sa mga panuga kan Biblia. Talagang dai ninda midbid si Jehova. Tibaad dai ninda aram an ngaran nia o an kahulogan kaiyan, asin posibleng marhay na kadikit o mayo sindang aram manongod sa saiyang mga kualidad o sa pag-otob nia kan saiyang mga panuga. Biniyayaan kita na magkaigwa kan siring na kaaraman. Sa panapanahon, marahay na analisaron niato kun paano niato matatabangan an mga tawo na “nasa kadikloman sa isip,” na makua an simbag sa saro kan pinakadepisil na mga hapot nin mga tawo, “Taano ta tinotogotan nin Dios an karatan asin pagsakit?” (Efeso 4:18) Pag-oolayan nguna niato kun paano niato iyan sisimbagon sa nakakakontentong paagi. Dangan pag-oolayan niato kun paanong an mga kualidad ni Jehova risang-risa sa paagi kan pagresolber nia sa karatan.
An Tamang Paagi nin Pagsimbag Kun May Maghapot
4, 5. Ano an tibaad kaipuhan nguna niatong gibohon kun may maghapot kun taano ta tinotogotan nin Dios an pagsakit? Ipaliwanag.
4 Kun may naghahapot kun taano ta tinotogotan nin Dios an pagsakit, paano kita minasimbag? Tibaad may tendensia kita na tolos na itao sa sainda an detalyadong paliwanag, na minapoon sa nangyari sa hardin nin Eden. Sa nagkapirang kamugtakan, tibaad angay man iyan. Pero, dapat na mag-ingat. Tibaad kaipuhan an nagkapirang mapagbabasehan nin orolay. (Talinhaga 25:11; Colosas 4:6) Estudyaran niato an tolong punto na puedeng makatabang sa sato sa pagtabang sa sarong tawo bago niato itao an simbag sa hapot.
5 Enot, kun an tawong iyan napupurisaw nanggad sa pagigin lakop kan karatan sa kinaban, posibleng marhay na sia o an saiyang mga namomotan personal na naapektaran nin karatan. Kun siring, tibaad madonong na pumoon paagi sa pagpaheling nin tunay na empatiya. Hinatolan ni apostol Pablo an mga Kristiano: “Makitangis sa mga tawong nagtatangis.” (Roma 12:15) Tibaad makamotibar sa tawong iyan an pagpaheling nin empatiya, o “pakikipagkapwa.” (1 Pedro 3:8) Kun nasasabotan nia na may pagmakolog kita sa saiya, mas posibleng marhay na mahinanyog sia sa sasabihon niato.
6, 7. Taano ta angay sanang tawan niato nin komendasyon an sinserong tawo na may nakakapurisaw na hapot manongod sa espirituwal na bagay?
6 Ikaduwa, puede niatong tawan nin komendasyon an pagigin sinsero kan tawong iyan sa pagpalataw kan hapot na iyan. May mga nag-iisip na huling ikinakapurisaw ninda an siring na mga hapot, sinda mga daing pagtubod o daing galang sa Dios. Tibaad iyan pa ngani an sinabi sa sainda nin sarong klerigo. Minsan siring, bako man pirmeng arog kaiyan an kamugtakan. Sa katunayan, an maimbod na mga tawo kan mga panahon kan Biblia nagpalataw nin kaagid na mga hapot. Halimbawa, an salmistang si David naghapot: “Taano, O Jehova, ta pirme kang nakatindog sa harayo? Taano ta nagtatago ka sa mga panahon nin kasakitan?” (Salmo 10:1) Kaagid kaiyan, si propeta Habacuc naghapot: “Sagkod noarin, O Jehova, na ako dapat na magkurahaw para sa tabang, asin dai ka nagdadangog? Sagkod noarin ako mag-aarang sa saimo nin tabang sa kadahasan, asin dai ka nagliligtas? Taano ta pinapaheling mo ako sa nakakadanyar, asin nagpaparaheling ka sa kariribokan? Asin taano ta igwa nin pananalakat asin kadahasan sa atubangan ko, asin taano ta nangyayari an pag-iriwal, patin taano ta may mapait na paglalaban?”—Habacuc 1:2, 3.
7 An mga ini maimbod na mga tawo na may dakula nanggad na paggalang sa Dios. Sinda daw inanggotan huli sa pagpalataw nin siring na nakakapurisaw na mga hapot? Sa kabaliktaran, naheling ni Jehova na angay na isurat sa Tataramon nia an sinserong mga hapot ninda. Ngonyan, an tawong napupurisaw sa pagigin lakop nin karatan tibaad sa katunayan nagugutom sa espirituwal—na hinihidaw an mga simbag na Biblia sana an makakatao. Girumdomon, marahay an sinabi ni Jesus manongod sa mga nagugutom sa espirituwal, o “nakakamate kan saindang espirituwal na pangangaipo.” (Mateo 5:3) Kanigoan nanggad na pribilehio na matabangan an mga siring na manompongan an kaogmahan na ipinanuga ni Jesus!
8. Anong nakakaribaraw na mga katokdoan an nagmotibar sa mga tawo na maniwala na an Dios an responsable sa pagsakit, asin paano niato sinda matatabangan?
8 Ikatolo, tibaad kaipuhan niatong tabangan an tawong iyan na masabotan na bako an Dios an responsable sa karatan na lakop na marhay sa kinaban. Natokdoan an dakol na an Dios an namamahala sa kinaban na ini na iniistaran niato, na kaidtong haloy nang panahon itinalaga na nin Dios an gabos na mangyayari sa sato, asin na sia may misteryoso, dai ikapaliwanag na mga dahelan sa pagpasakit sa katawohan. Putik an mga katokdoan na ini. Linalapastangan kaiyan an Dios asin pinapaluwas na sia an responsable sa karatan asin pagsakit sa kinaban. Kaya tibaad kaipuhan niatong gamiton an Tataramon nin Dios tanganing husayon an mga bagay na iyan. (2 Timoteo 3:16) An namamahala sa maraot na sistemang ini nin mga bagay bakong si Jehova kundi si Satanas na Diablo. (1 Juan 5:19) Dai patienot na itinatalaga ni Jehova an saiyang madonong na mga linalang; tinatawan nia an lambang saro nin katalingkasan asin mga oportunidad na pumili sa pag-oltanan nin marahay asin maraot, tama asin sala. (Deuteronomio 30:19) Asin si Jehova dai noarin man nagin gikanan nin karatan; ikinakaongis nia an karatan asin may pagmakolog sia sa mga nagsasakit sa bakong makatanosan na paagi.—Job 34:10; Talinhaga 6:16-19; 1 Pedro 5:7.
9. Ano an nagkapirang publikasyon na itinao kan “maimbod asin mapagmansay na oripon” tanganing tabangan an mga tawo na masabotan kun taano ta tinotogotan ni Jehova Dios an pagsakit?
9 Kun ikinabugtak na nindo an siring na mapagbabasehan nin orolay, manonompongan nindo na an naghihinanyog sa saindo andam nang makanood kun taano ta tinotogotan nin Dios na magpadagos an pagsakit. Tanganing tabangan kamo, “an maimbod asin mapagmansay na oripon” nagtao nin dakol na publikasyon. (Mateo 24:45-47) Halimbawa, sa “Diosnon na Pagkuyog” na Pandistritong Kombension kan 2005/06, ilinuwas an sarong pulyeto na may titulong Madali Nang Matapos an Gabos na Pagdusa! Taano ta dai magin pamilyar sa laog kaiyan? Siring man, an librong Ano Man Nanggad an Itinotokdo kan Biblia?, na ngonyan makukua na sa 157 lenguahe, tinotokar sa sarong kapitulo an mahalagang hapot na ini. Gamiton na marhay an siring na mga publikasyon. Malinaw na ipinapaliwanag kaiyan an mga basehan na sono sa Kasuratan kun taano ta naglataw sa Eden an isyu dapit sa unibersal na soberaniya asin kun taano ta rinesolberan ni Jehova an isyung iyan siring kan ginibo nia. Girumdomon man na mantang ipinapakipag-olay nindo an temang ini, ihinahayag nindo sa naghihinanyog sa saindo an pinakaimportanteng klase nin kaaraman na makukua. Iyan an kaaraman dapit ki Jehova asin sa saiyang marahayon na mga kualidad.
Itampok an mga Kualidad ni Jehova
10. Ano an depisil na masabotan kan dakol manongod sa pagtogot nin Dios sa pagsakit, asin anong kaaraman an puedeng makatabang sa sainda?
10 Mantang tinatabangan nindo an mga tawo na masabotan kun taano ta tinotogotan ni Jehova an mga tawo na pamahalaan an sadiri ninda sa pan-iimpluwensia ni Satanas, pagmaigotan na darahon an atension sa marahayon na mga kualidad ni Jehova. Aram kan dakol na tawo na an Dios makapangyarihan; nadadangog na nindang inaapod siang Makakamhan sa Gabos na Dios. Minsan siring, tibaad nadedepisilan sindang masabotan kun taano ta dai nia ginagamit an saiyang dakulang kapangyarihan tanganing taposon tolos an inhustisya asin pagsakit. Posibleng dai ninda nasasabotan an iba pang kualidad ni Jehova, siring kan saiyang kabanalan, hustisya, kadonongan, asin pagkamoot. Ipinapaheling ni Jehova an mga kualidad na ini sa sangkap asin timbang na paagi. Huli kaini, an Biblia nagsasabi: “Sangkap an saiyang gibo.” (Deuteronomio 32:4) Paano nindo ikakadoon an mga kualidad na ini mantang sinisimbag nindo an mga hapot na parateng pinapalataw manongod sa isyung ini? Estudyaran niato an pira sanang halimbawa.
11, 12. (a) Taano ta bakong posible an pagpapatawad kan magkasala si Adan asin Eva? (b) Taano ta dai itotogot ni Jehova an kasalan sagkod lamang?
11 Puede daw kutanang pinatawad na sana ni Jehova si Adan asin Eva? Sa kasong ini, nungkang nagin posible an pagpapatawad. Bilang sangkap na mga tawo, tuyong pinili ni Adan asin Eva na isikwal an soberaniya ni Jehova asin imbes inako an paggiya ni Satanas. Bakong makangangalas, mayong naheling na pagsolsol sa mga rebeldeng idto. Minsan siring, kun naghahapot an mga tawo kun taano ta dai nia sinda pinatawad, an totoo tibaad iniisip-isip ninda kun taano ta dai na sana ibinaba ni Jehova an saiyang pamantayan asin pinabayaan na mag-eksister an kasalan asin pagrebelde. An simbag may koneksion sa sarong kualidad na pundamental sa mismong naturalesa ni Jehova—an saiyang kabanalan.—Exodo 28:36; 39:30.
12 Kadakol na beses na idinodoon kan Biblia an kabanalan ni Jehova. Pero, an makamomondo ta pira sanang tawo sa maraot na kinaban na ini an nakakasabot sa kualidad na iyan. Si Jehova malinig, dalisay, asin siblag sa gabos na pagkamakasalan. (Isaias 6:3; 59:2) Kun mapadapit sa kasalan, iinareglo nia an paagi tangani na mabayadan iyan, na hinahale iyan, alagad dai nia iyan totogotan sagkod lamang. Kun itotogot ni Jehova na magdanay nin daing sagkod an kasalan, mayo na kitang paglaom para sa ngapit. (Talinhaga 14:12) Sa saiyang itinalaan na panahon, ibabalik ni Jehova an gabos na linalang sa pagigin banal. Segurado iyan, huling iyan an kabotan kan Banal na Saro.
13, 14. Taano ta pinili ni Jehova na dai gadanon an mga rebelde sa Eden?
13 Puede daw kutanang ginadan na sana ni Jehova an mga rebelde sa Eden asin nagpoon giraray? Tunay nanggad na igwa sia nin kapangyarihan na gibohon iyan; madali na niang gamiton an kapangyarihan na iyan tanganing gadanon an gabos na maraot. Tibaad nag-iisip-isip an nagkapira, ‘Taano ta dai nia iyan ginibo kan tolo pa sana an nagkasala sa uniberso? Bako daw na nalikayan kutana an paglakop nin kasalan asin an gabos na kamondoan na naheheling niato sa kinaban?’ Taano ta bako iyan an piniling gibohon ni Jehova? An Deuteronomio 32:4 nagsasabi: “An gabos niang dalan hustisya.” Si Jehova igwa nin dakulaon na pagpapahalaga sa hustisya. Sa katunayan, “si Jehova mamomoton sa hustisya.” (Salmo 37:28) Huli sa pagkamoot nia sa hustisya, dai ginadan ni Jehova an mga rebelde sa Eden. Taano?
14 An pagrebelde ni Satanas nagpalataw nin sarong hapot mapadapit sa pagigin tama kan soberaniya nin Dios. Huli sa pakamate nin hustisya ni Jehova, kaipuhan na an angat ni Satanas masimbag sa makatanosan na paagi. An paggadan tolos sa mga rebelde, minsan ngani maninigo, dai makakatao nin makatanosan na simbag. Makakatao iyan nin dugang na patotoo dapit sa nangongorog sa gabos na kapangyarihan ni Jehova, alagad bako man an kapangyarihan nia an kinukuestion. Apuera kaini, sinabi ni Jehova ki Adan asin Eva an saiyang katuyohan. Sinda magkakaigwa nin mga aki asin papanoon ninda an daga, sasakopon iyan, asin sasakopon man ninda an gabos na linalang dian. (Genesis 1:28) Kun basta sana ginadan ni Jehova si Adan asin Eva, an sinabi niang katuyohan mapadapit sa mga tawo magigin dai nang kamanungdanan. An hustisya ni Jehova nungkang matogot sa siring na resulta, huling an katuyohan nia pirmeng naootob.—Isaias 55:10, 11.
15, 16. Kun may mga tawong nagtatao nin alternatibong “mga solusyon” sa isyu na naglataw sa Eden, paano niato sinda matatabangan?
15 Igwa daw nin siisay man sa uniberso na may orog na kadonongan kisa ki Jehova na makakaresolber sa pagrebeldeng iyan? May mga tawo na tibaad magtao nin sadiri nindang “mga solusyon” sa pagrebelde sa Eden. Minsan siring, sa paggibo ninda kaiyan, bako daw na garo baga isinusuherir ninda na may naiisip sindang mas marahay na mga paagi sa pagresolber sa isyung iyan? Tibaad dai man ninda ginigibo iyan huli ta maraot an saindang motibo, kundi mayo sinda nin pakasabot manongod ki Jehova asin manongod sa saiyang kadonongan na nakakapukaw nin may pagkangirhat na paggalang. Sa pagsurat sa mga Kristiano sa Roma, hararom na siniyasat ni apostol Pablo an kadonongan nin Dios, kaiba an “sagradong hilom” mapadapit sa katuyohan ni Jehova na gamiton an Mesiyanikong Kahadean tanganing pangyarihon an pagbalukat sa maimbod na katawohan asin pakangbanalon an Saiyang ngaran. Ano an saboot ni Pablo manongod sa kadonongan kan Dios na nagmukna kan katuyohan na ini? Tinapos kan apostol an saiyang surat sa mga tataramon na ini: “Logod na mapasa Dios, na iyo sana an madonong, an kamurawayan paagi ki Jesu-Cristo sagkod lamang. Amen.”—Roma 11:25; 16:25-27.
16 Nasabotan ni Pablo na si Jehova “iyo sana an madonong”—an may nakakalabi sa gabos na kadonongan sa uniberso. Siisay na bakong sangkap na tawo an posibleng makakaisip nin mas marahay na paagi tanganing resolberan an ano man na problema—dai na baga sabihon an pinakadepisil na angat kasuarin man sa kadonongan nin Dios? Kun siring, kaipuhan na tabangan niato an mga tawo na mamatean man ninda an satong may pagkangirhat na paggalang sa Dios na “madonong sa puso.” (Job 9:4) Kun mas nasasabotan niato an kadonongan ni Jehova, mas lubos man kitang magtitiwala na an saiyang paagi sa pagresolber kan mga bagay-bagay iyo an pinakamarahay.—Talinhaga 3:5, 6.
Pag-apresyar sa Pinakalataw na Kualidad ni Jehova
17. Paanong an pagkaigwa nin orog na pakasabot sa pagkamoot ni Jehova makakatabang sa mga napupurisaw huli sa pagtogot nin Dios sa pagsakit?
17 “An Dios pagkamoot.” (1 Juan 4:8) Paagi sa nakakaapod nin atension na mga tataramon na iyan, sinasabi kan Biblia an pinakalataw na kualidad ni Jehova, an pinakanakakaakit sa gabos na kualidad asin an pinakanakakaranga para sa mga napupurisaw huli sa lakop na karatan. Ipinaheling ni Jehova an pagkamoot sa gabos na aspekto kan pagresolber nia kan grabeng danyos na ibinunga kan kasalan sa saiyang mga linalang. Pagkamoot an nagpahiro ki Jehova na magtao nin paglaom sa makasalan na mga aki ni Adan asin Eva, na itinatao sa sainda an paagi tanganing makarani sinda sa Saiya asin magkaigwa nin inooyonan na relasyon sa Saiya. Pagkamoot an nagpahiro sa Dios na magtao nin pantubos na mabukas kan dalan para sa lubos na kapatawadan nin mga kasalan saka pakabalik sa pagkasangkap asin buhay na daing katapusan. (Juan 3:16) Asin pagkamoot an nagpahiro sa saiya na magin mapasensia sa katawohan, na nagtatao sa pinakadakol na tawong mapupuede nin oportunidad na isikwal si Satanas asin pilion si Jehova bilang saindang Soberano.—2 Pedro 3:9.
18. Maogma kita na magkaigwa nin anong pakarorop, asin ano an totokaron niato sa sunod na artikulo?
18 Kan magtaram an sarong pastor sa atubangan kan mga nag-atender tanganing girumdomon an anibersaryo kan mapanlaglag na pag-atake nin mga terorista, sia nagsabi: “Dai niato aram an dahelan kun taano ta itinotogot nin Dios na magpadagos an karatan asin pagsakit.” Makamomondo nanggad! Bako daw na nakakaogma na igwa kita nin pakarorop sa temang ini? (Deuteronomio 29:29) Asin mantang si Jehova madonong, makatanosan, asin mamomoton, aram niato na sa dai na mahahaloy tataposon nia an gabos na pagsakit. Sa katunayan, nanuga sia na gigibohon nia iyan. (Kapahayagan 21:3, 4) Pero, kumusta an gabos na nagadan sa bilog na nakaaging mga siglo? An paagi daw ni Jehova sa pagresolber sa isyu na ini sa Eden binabayaan sinda na mayong paglaom? Dai. Pagkamoot an nagpahiro sa saiya na magtao man nin probisyon para sa sainda, paagi sa pagkabuhay liwat. Iyan an tema kan sunod na artikulo.
Ano an Isisimbag Nindo?
• Ano an puede niatong sabihon sa saro na naghahapot kun taano ta tinotogotan nin Dios an pagsakit?
• Paanong an kabanalan ni Jehova asin an hustisya nia naheheling sa paagi kan pagtao nia nin atension sa mga rebelde sa Eden?
• Taano ta maninigong tabangan niato an mga tawo na magkaigwa nin orog na pakasabot sa pagkamoot ni Jehova?
[Mga Hapot Para sa Pag-adal]
[Ritrato sa pahina 21]
Maghingoang tabangan an mga napupurisaw huli sa pagsakit sa kinaban
[Mga Ritrato sa pahina 23]
Hinapot an Dios kan maimbod na si David asin Habacuc nin sinserong mga hapot