An Kapangyarihan kan Dila

AN DILA nin giraffe minaabot sa 45 sentimetros an laba asin marikas maghiro saka igo an puersa na magbutong nin mga dahon sa mga sanga nin kahoy. An dila nin balyena na inaapod na blue whale may gabat na haros kapareho kan gabat nin elepante. Imahinara an kosog na kaipuhan tangani sanang mahiro iyan!

Kun ikokomparar an sokol, gabat, asin kosog, garo bakong mahalaga an dila nin tawo. Pero, iyan mas makapangyarihan nanggad. “An kagadanan asin buhay nasa kapangyarihan kan dila,” an sabi kan Biblia manongod sa sadit na kabtang na ini kan hawak nin tawo. (Talinhaga 18:21) Sa katunayan, pirang beses na daw niatong nadangog na ginagamit an nakakagadan na kapangyarihan kan dila nin tawo sa pag-imbento nin mga kaputikan asin falsong patotoo na nagbunga nin danyos, kagadanan pa ngani, sa daing kasalan na mga biktima?

Siring man, naraot an relasyon nin haloy nang magkakatood huli sa makolog na mga pagtaram. May mga biyong pinanluyahan nin boot huli sa maringis na mga tataramon. “Sagkod noarin nindo papaanggoton an sakong kalag asin papamondoon ako nin mga tataramon?” an pag-agrangay ni Job na pinapakaraot nin grabe kan saiyang kairiba. (Job 19:2) An disipulong si Santiago nagtao nin malinaw na paglaladawan kan mapanlaglag na kapangyarihan kan garo daing prenong dila: “An dila sarong sadit na kabtang alagad naggigibo nin darakulang pananagsag. Uya! Saditon sanang kalayo an kaipuhan tanganing masolo an mahiwason na kadlagan! Bueno, an dila sarong kalayo.”—Santiago 3:5, 6.

Sa ibong na lado, an kapangyarihan kan dila makakatao man nin buhay. Huli sa may pakikidamay asin nakakarangang mga tataramon, an nagkapira ikinaligtas sa makuring kamondoan asin paghugot. Huli sa paghimate sa madonong na sadol, ikinaligtas kaiyan sa dai pa napapanahon na kagadanan an dakol na nag-aabuso sa droga asin maringis na mga kriminal. Totoo nanggad, an bunga kan dila nin saro na matanos “sarong kahoy nin buhay,” asin “siring sa mga mansanas na bulawan sa mga inukit na pirak an tataramon na itinaram sa tamang kapanahonan kaiyan.”—Talinhaga 15:4; 25:11.

Minsan siring, an pinakamarahay na paggamit kan dila iyo an pag-omaw ki Jehova Dios, pagpahayag kan maogmang bareta kan Kahadean nin Dios, asin pagtokdo sa iba kan mahalagang marhay na mga katotoohan sa Biblia. Taano? Nagsabi si Jesus: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”—Juan 17:3; Mateo 24:14; 28:19, 20.