Ibinuyagyag an Ginigikanan nin Karompotan!

KAN enot na siglo, dakol sa mga Judio an naghahalat sa pagdatong kan ipinanugang Mesiyas. (Juan 6:14) Kan dumatong si Jesus, nagtao sia nin karangahan asin kaliwanagan. Pinaomayan nia an mga may helang, pinakakan nia an mga nagugutom, kinontrol nia an kamugtakan nin panahon, binuhay pa ngani nia an mga gadan. (Mateo 8:26; 14:14-21; 15:30, 31; Marcos 5:38-43) Sinabi man nia an mga tataramon ni Jehova asin iinalok nia an panuga na buhay na daing katapusan. (Juan 3:34) Paagi sa sinabi asin ginibo nia, biyong pinatunayan ni Jesus na sia an Mesiyas, an saro na mapatalingkas sa katawohan hale sa kasalan asin sa gabos na marompot na epekto kaiyan.

Rasonable sana, an Judiong mga namomoon sa relihion kutana an enot na maogmang nag-ako ki Jesus, naghinanyog sa saiya, asin magayagayang nag-ako sa saiyang paggiya. Pero, dai ninda ginibo iyan. Imbes, ikinaongis ninda sia, pinersegir sia, asin nakipagkasapakat na gadanon sia!—Marcos 14:1; 15:1-3, 10-15.

Angay sana na kondenaron ni Jesus an may sala na mga tawong idto. (Mateo 23:33-35) Minsan siring, minidbid nia na may iba pang dapat na manimbag sa karompotan sa puso ninda. Sinabi nia sa sainda: “Gikan kamo sa saindong ama na Diablo, asin boot nindo na gibohon an mga mawot kan saindong ama. An sarong iyan sarong paragadan kan sia pumoon, asin dai sia nagdanay sa katotoohan, huli ta mayo sa saiya an katotoohan. Kun sia nagtataram nin putik, sia nagtataram oyon sa saiyang sadiring boot, huli ta sia sarong putikon asin iyo an ama kan kaputikan.” (Juan 8:44) Minsan ngani minidbid ni Jesus na may kakayahan an mga tawo na gumibo nin marigsok, sinabi nia an mismong ginigikanan nin karompotan—si Satanas na Diablo.

Paagi sa pagsabing si Satanas “dai . . . nagdanay sa katotoohan,” ihinayag ni Jesus na an espiritung linalang na ini maimbod na lingkod nin Dios kaidto alagad suminuway sa tamang dalan na iyan. Taano ta nagrebelde si Satanas ki Jehova? Huli ta pinatalubo nia an saboot na pagpaimportante sa sadiri sagkod sa punto na minawot nia an pagsamba na para sana sa Dios. *—Mateo 4:8, 9.

An pagrebelde ni Satanas nahayag sa hardin nin Eden kan dayaon nia si Eva na kakanon an ipinapangalad na prutas. Paagi sa pagsabi kan enot na kaputikan kasuarin man asin paagi sa pagpakaraot ki Jehova, ginibo ni Satanas an saiyang sadiri na “ama kan kaputikan.” Apuera kaini, paagi sa pagtentar ki Adan asin Eva na magmasumbikal, pinangyari nia na makontrol sinda kan kasalan, na nagbunga sa katapustapusi kan kagadanan ninda asin kan sunod na mga henerasyon. Huli kaini, ginibo man ni Satanas an saiyang sadiri na “sarong paragadan”—sa katunayan, an pinakamaraot na paragadan kasuarin man!—Genesis 3:1-6; Roma 5:12.

An marompot na impluwensia ni Satanas nakaabot pa ngani sa rona nin mga espiritu, na duman sinutsutan nia an iba pang mga anghel na umiba sa saiya sa pagrebelde. (2 Pedro 2:4) Arog ni Satanas, an marigsok na mga espiritung ini nagkaigwa nin salang interes sa mga tawo. Minsan siring, sa saindang  kamugtakan, iyan bikong seksuwal na interes, na may kapahapahamak asin marompot na mga epekto.

Napano nin Karompotan an Daga

Sinasabi sa sato kan Biblia: “Kan magpoon na magdakol an mga tawo . . . asin nangaki sinda nin mga aking babae, sa panahon na iyan an mga aki kan tunay na Dios nagpoon na makamangno sa mga aking babae nin mga tawo, na sinda magagayon; asin nagkua sinda nin magigin mga agom ninda, arin na baga, an gabos nindang napili.” (Genesis 6:1, 2) Sairisay idtong “mga aki kan tunay na Dios”? Sinda espiritung mga linalang, bakong mga tawo. (Job 1:6; 2:1) Paano niato naaaraman? Sarong bagay, an pag-agoman nin mga tawo nangyayari na sa laog nin mga 1,500 na taon asin mayo nin dahelan na espesyal na sambiton iyan. Kaya paagi sa pagdara kan atension sa seksuwal na pakikidorog kan “mga aki kan tunay na Dios” na nagsulot nin pisikal na hawak asin nagkua nin “mga aking babae nin mga tawo,” malinaw nanggad na an pagkasaysay nagtataram manongod sa sarong bagay na dai pa nangyari kaidto asin bakong normal.

An pagigin bakong normal na ini pinapatunayan kan klase nin mga aki na nagresulta sa mga pakikidorog na ini. Inaapod na Nefilim, sinda mga mestiso na nagin mga higante. Sinda madahas man na mga maton. Sa katunayan, an “Nefilim” nangangahulogan na “mga Paratumba,” o “an mga nagpapatumba sa iba.” An mga maringis na ini ilinaladawan bilang “an mga makokosog kan suanoy, an mga lalaking bantog.”—Genesis 6:4.

An mga Nefilim asin an saindang mga ama nagin marigsok na daing kaagid. “An daga nagin raot sa pagheling kan tunay na Dios asin . . . napano nin kadahasan,” an sabi kan Genesis 6:11. Iyo, inarog nin mga tawo an madahas asin bikong mga ugale kan mga Nefilim sa tahaw ninda.

Paano nagkaigwa an mga Nefilim asin an saindang mga ama nin siring na mapuersa saka marompot na impluwensia sa mga tawo? Paagi sa pagpukaw sa makasalan na tendensia asin horot nin katawohan. An resulta? “Rinaot nin gabos na laman an dalan kaiyan sa ibabaw nin daga.” Sa katapustapusi, linaglag ni Jehova an kinaban na iyan sa sarong Delubyo na lakop sa globo, na an matanos na si Noe asin an saiyang pamilya sana an ilinigtas. (Genesis 6:5, 12-22) Minsan siring, an mga anghel na nagsulot nin pisikal na hawak makasusupog na nagbuelta sa rona nin mga espiritu. Bilang marigsok na mga demonyo, padagos nindang kinontra an Dios asin an saiyang matanos na pamilya nin maimbod na mga anghel. Minalataw na poon kan panahon na iyan, pinagbawalan nin Dios an marigsok na mga espiritung ini na magsulot nin pisikal na hawak. (Judas 6) Minsan siring, nagdanay sindang makapangyarihan na puersa sa mga gibo-gibo nin tawo.

Biyong Ibinuyagyag an Saro na Marompot!

An hiwas kan marompot na impluwensia ni Satanas ihinayag sa 1 Juan 5:19, na nagsasabi: “An bilog na kinaban namumugtak sa kapangyarihan kan saro na marigsok.” Minamaniobra kan Diablo an katawohan pasiring sa garo unos na pag-orog nin mga kasakitan. Sa katunayan, mas determinado siang mandanyar kisa kasuarin man. Taano? Huli ta sia asin an saiyang mga demonyo pinahale sa langit pakaestablisar kan Kahadean nin Dios kan 1914. Mapadapit sa pagpahaleng ini, ihinula kan Biblia: “Herak man kan daga . . . , huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:7-12) Kun siring, paano ginagamit ni Satanas an saiyang impluwensia sa katawohan ngonyan?

Sa pangenot ginagamit iyan ni Satanas paagi sa pagpalakop nin sarong klase nin espiritu na nagkokontrol sa pag-iisip asin paggawe nin mga tawo. Huli kaiyan, inaapod kan Efeso 2:2 an Diablo na “namamahala sa autoridad kan aire, an espiritu [o, nangingibabaw na kaisipan] na naghihiro ngonyan  sa mga aki nin kasumbikalan.” Imbes na palakopon an diosnon na takot asin karahayan, an sa demonyong “aire” na ini nagbubunga nin pagrebelde sa Dios asin sa saiyang mga pamantayan. Sa siring, pinapalakop asin pinapagrabe ni Satanas asin kan saiyang mga demonyo an karompotan na ginigibo nin mga tawo.

“Ingatan Mo an Saimong Puso”

An sarong kapahayagan kan “aire” na ini iyo an damat nin pornograpiya, na nagpapalaad nin seksuwal na mga horot asin ginigibong garo kaakit-akit an bakong normal na gawe-gawe. (1 Tesalonica 4:3-5) An panlulupig, pagpanigo sa sekso paagi sa pangongolog sa iba, panlulugos nin sarong gang, pakikidorog sa hayop, asin an seksuwal na pagmaltrato sa mga aki nagkapira sa mga temang itinatampok nin pornograpiya na nakakalibang. Dawa sa daing gayo nakakadanyar na mga porma kaiyan, an pornograpiya puedeng magin nakakaadiktong gayo asin dinadanyaran an mga nagdadalan o nagbabasa kaiyan, na nagigin ugale na ninda an pagdalan para sa seksuwal na kaogmahan. * Iyan an karompotan na nakakaraot sa mga relasyon nin tawo sagkod relasyon nin saro sa Dios. Ipinapabanaag nin pornograpiya an marigsok na kaisipan kan mga demonyo na nagpapalakop kaiyan—mga rebelde na may seksuwal na mga horot na nagpoon bago pa an Baha kan panahon ni Noe.

May marahay na dahelan na nagsadol an madonong na tawong si Salomon: “Orog sa gabos na maninigong ingatan, ingatan mo an saimong puso, huli ta gikan dian an mga burabod nin buhay.” (Talinhaga 4:23) Sa katunayan, an pag-iingat sa saindong puso na dai masiod nin pornograpiya puedeng mangahulogan nin pagbalyo kan channel nin TV o paggadan sa komputer kun lumataw an malaswang mga ladawan, asin mahalagang humiro nin marikas asin desidido! Isipon nindo na kamo garo soldados na nagmamaigot na sagangon an busog na nakapunteriya sa saindong puso. Pinupunteriya ni Satanas an saindong piguratibong puso—an saindong sentro nin motibasyon asin kamawotan—saka naghihingoang raoton iyan.

Kaipuhan man nindong protehiran an saindong puso na dai mamoot sa kadahasan, huli ta aram kan Diablo na “an siisay man na namomoot sa kadahasan ikinakaongis nanggad” ni Jehova. (Salmo 11:5) Dai na kaipuhan ni Satanas na gibohon kamong kriminal na paha sa dugo tanganing magin kaiwal kamo nin Dios; kaipuhan nia sanang pataluboon sa saindo an pagkamoot sa kadahasan. Bakong pagkanorongod sana na pano-pano nin kadahasan an popular na media, na sa parate may mga tema dapit sa okulto. An mga Nefilim gadan na asin dai na nag-eeksister, alagad buhay pang marhay an saindang mga ugale asin gawe-gawe! Ipinapaheling daw kan saindong pagpili nin aling-alingan na linalabanan nindo an mga pakana ni Satanas?—2 Corinto 2:11.

 Kun Paano Lalabanan an Marompot na Impluwensia ni Satanas

An mga puersa nin karompotan tibaad garo masakit daogon. Sinasabi kan Biblia na an mga nagmamaigot na paogmahon an Dios “nakikipaggumolan . . . tumang sa marigsok na mga puersang espiritu,” apuera sa pakikipagtusayan sa sainda mismong bakong sangkap na laman. Tanganing manggana sa pakikipagtusayan asin magkamit kan pabor nin Dios, kaipuhan niatong aprobetsaran an dakol na probisyon hale sa Dios.—Efeso 6:12; Roma 7:21-25.

Kaiba sa mga probisyon na ini an banal na espiritu nin Dios, an pinakamakapangyarihan na puersa sa uniberso. Nagsurat si apostol Pablo sa mga Kristiano kan enot na siglo: “Inako niato, bakong an espiritu kan kinaban, kundi an espiritu na gikan sa Dios.” (1 Corinto 2:12) An mga ginigiyahan kan espiritu nin Dios namomoot sa namomotan nin Dios asin naoongis sa ikinakaongis nin Dios. (Amos 5:15) Paano maako nin banal na espiritu an saro? Sa pangenot paagi sa pamibi, pag-adal sa Biblia—an Biblia mismo na nagibo huli sa banal na espiritu—asin kapakipakinabang na pakikiasosyar sa mga talagang namomoot sa Dios.—Lucas 11:13; 2 Timoteo 3:16; Hebreo 10:24, 25.

Paagi sa pag-aprobetsar sa mga probisyon na ini nin Dios, pinoponan nindong isulog an “bilog na pangalasag hale sa Dios,” an solamenteng seguradong proteksion tumang sa “mga pakana kan Diablo.” (Efeso 6:11-18) An lubos na paggamit kan mga probisyon na ini mas kaipuhan na marhay ngonyan kisa kasuarin pa man. Taano man?

Harani Na an Katapusan nin Karompotan!

“Kun an mga marigsok nagsusupang na garo mga pananom asin an gabos na paragibo nin nakakadanyar namumurak, iyan tanganing sinda paraon sagkod lamang,” an sabi kan salmista. (Salmo 92:7) Iyo, arog kan panahon ni Noe, an pagdakol nin karompotan ngonyan tanda na nagdadangadang na an paghokom nin Dios, bako sanang tumang sa marigsok na mga tawo kundi tumang man ki Satanas asin sa saiyang mga demonyo. Bilang kapinonan kan saindang pagkalaglag sa huri, sinda ihuhulog sa sarong bungaw na duman mayo na sindang magigibo. (2 Timoteo 3:1-5; Kapahayagan 20:1-3, 7-10) Siisay an magsasagibo kan paghokom na iyan? Mayong iba kundi si Jesu-Cristo, na manongod sa saiya mababasa niato: “Sa katuyohan na ini an Aki nin Dios ipinahayag, na iyo, tanganing laglagon an mga gibo kan Diablo.”—1 Juan 3:8.

Hinihimuyawot daw nindo an katapusan nin karompotan? Kun iyo, mararanga kamo kan mga panuga na nasa Biblia. Mayo nin ibang libro na nagbubuyagyag kan mismong ginigikanan nin karompotan, si Satanas, asin mayo nin ibang libro na nagsasabi kun paano sia asin an gabos niang marigsok na gibo popohoon sa katapustapusi. Sinasadol niamo kamo na kumua nin tamang kaaraman sa Biblia tanganing maprotehiran an saindong sadiri tumang sa marompot na mga impluwensia ni Satanas ngonyan asin tanganing masegurado an paglaom na mabuhay sa sarong kinaban na mayo nin karompotan.—Salmo 37:9, 10.

[Mga Nota sa Ibaba]

[Kahon/Ritrato sa pahina 6]

Suanoy na mga Estorya na Medyo Totoo

Sa bilog na kinaban may mga estorya sa suanoy na mga mitolohiya manongod sa mga medyo may pagkadios, higante, asin sarong kapahapahamak na baha. Halimbawa, sinasambit kan Akadianong Epiko nin Gilgames an sarong baha, barko, asin mga natadang buhay. Si Gilgames mismo ilinadawan bilang malaswa, madahas asin medyo may pagkadios, o kabangang dios, kabangang tawo. An mitolohiya nin mga Aztec nagsasaysay manongod sa suanoy na kinaban na inistaran nin mga higante asin sa sarong dakulang delubyo. An suanoy na estorya hale sa amihanan na Europa ilinaladawan an sarong rasa nin mga higante asin an madonong na si Bergelmir na naggibo nin dakulang barko saka ilinigtas an saiyang sadiri patin an agom nia. An pinagsarong patotoo kan gabos na siring na suanoy na estorya nagsusuportar sa patotoo kan Biblia na an gabos na tawo naggikan sa mga natadang buhay sa delubyo na naglaglag sa suanoy na marigsok na kinaban.

[Ritrato]

Tabla na inukitan kan Epiko nin Gilgames

[Credit Line]

The University Museum, University of Pennsylvania (neg. # 22065)

[Ritrato sa pahina 5]

An mga ugale kan mga Nefilim naheheling sa mga tawo ngonyan

[Ritrato sa pahina 7]

An tamang kaaraman nagpapasarig sa sato tumang sa marompot na mga impluwensia