Mga Hapot Hale sa mga Parabasa

Ginagarantiyahan daw kan Talinhaga 22:6 na kun an Kristianong mga aki sinanay nin tama, dai sinda masuhay sa dalan ni Jehova?

An bersikulong ini nagsasabi: “Patuodon mo an aki oyon sa dalan para sa saiya; minsan kun sia maggurang dai sia masiko dian.” Kun paanong an pagtiko nin sadit na sanga nakakaimpluwensia sa pagtubo kaiyan na magin kahoy, an mga aki na sinanay nin tama mas may tendensia na padagos na maglingkod ki Jehova kun magdakula na sinda. Arog kan aram nin lambang magurang, an siring na pagsasanay nangangaipo nin darudakulang panahon asin paghihingoa. Tanganing magin Kristianong disipulo an saindang mga aki, an mga magurang dapat na maingat na magtokdo, magsadol, magparigon nin boot, asin magdisiplina sa sainda saka magtao nin marahay na halimbawa. Dapat na daing liwat-liwat asin may pagkamoot na gibohon ninda ini sa laog nin dakol na taon.

Pero, nangangahulogan daw ini na, kun an aki magbaya sa paglilingkod ki Jehova, may pagkukulang sa pagsasanay nin mga magurang? Sa nagkapirang kamugtakan, tibaad nagkulang an mga magurang sa saindang mga paghihingoa na padakulaon an saindang mga aki sa disiplina asin pagtatanos nin isip ni Jehova. (Efeso 6:4) Sa ibong na lado, an talinhagang ini bakong garantiya na magigin maimbod sa Dios an mga aki huli sa marahay na pagsasanay. Dai mamomolde nin mga magurang an saindang mga aki sa ano man na mawoton ninda. An mga aki, kapareho nin mga nasa edad na, may sadiring kabotan asin sa katapustapusi dapat na pumili kan saindang sadiring dalan nin pamumuhay. (Deuteronomio 30:15, 16, 19) Sa ibong kan pinakamaigot na mga paghihingoa nin mga magurang, may mga aki na nagin bakong maimbod, arog ni Salomon, na nagsurat kan bersikulong ineestudyaran niato. Dawa si Jehova nagkaigwa nin mga aki na nagin bakong maimbod.

Huli kaini, an tekstong ini dai nangangahulogan na sa lambang kamugtakan an aki ‘dai masiko dian’ kundi na sa pangkagabsan ini an magigin resulta. Pagparigon nanggad ini sa boot nin mga magurang! Seguradong mapaparigon an boot nin mga magurang sa pakaaram na an saindang maigot na mga paghihingoa na sanayon an saindang mga aki sa dalan ni Jehova magbubunga nin marahay na mga resulta. Mantang mahalaga an saindang kabtang asin dakula an saindang impluwensia, pinaparigon an boot nin mga magurang na seryosohon an saindang kabtang.—Deuteronomio 6:6, 7.

Dawa kun an mga aki magpondo sa paglilingkod ki Jehova, an mga magurang na nagin sadiosan sa pagsasanay sa saindang mga aki puedeng maglaom na makakapag-isip-isip an saindang mga aki. Mapuersa an katotoohan sa Biblia, asin an pagsasanay nin mga magurang dai tolos nalilingawan.—Salmo 19:7.