Mga May Edad Na—Sarong Bendisyon Para sa mga Hoben
Mga May Edad Na—Sarong Bendisyon Para sa mga Hoben
“Minsan sagkod sa kagurangan asin pagkaubanon, O Dios, dai mo ako pabayaan, sagkod na ikasabi ko sa kapag-arakian an manongod sa saimong takyag, sa gabos na maarabot pa, an manongod sa saimong kakosogan.”—SALMO 71:18.
1, 2. Ano an maninigong masabotan kan may edad nang mga lingkod nin Dios, asin ano an eestudyaran niato ngonyan?
SARONG Kristianong magurang sa kongregasyon sa Solnopan na Aprika an nagbisita sa sarong may edad nang linahidan na tugang na lalaki asin hinapot ini, “Kumusta ka na?” An tugang na lalaki nagsimbag, “Kaya kong magdalagan, kaya kong maglukso, kaya kong magkiki,” na pinoprobaran na iakto an saiyang mga sinasabi. “Alagad dai ko kayang maglayog,” an idinagdag nia. Nasabotan kan magurang sa kongregasyon an boot niang sabihon. ‘An kaya kong gibohon, ginigibo ko nin gikan nanggad sa boot, alagad an dai ko kayang gibohon, dai ko ginigibo.’ An magurang na iyan sa kongregasyon na nagbisita labi nang 80 anyos ngonyan, asin may kaogmahan na ginigirumdom nia an kualidad kan tugang na ini na magpangisi asin an kaimbodan kaini.
2 An diosnon na mga kualidad na ipinapaheling nin sarong may edad na puedeng magbunga nin nagdadanay nanggad na impresyon sa iba. Siempre, an kadonongan asin arog-Cristong mga kualidad dai automatikong nakukua huli sa paggurang. (Eclesiastes 4:13) An Biblia nagsasabi: “An pagkaigwa nin uban korona nin kagayonan kun iyan yaon sa dalan nin katanosan.” (Talinhaga 16:31) Kun kamo halangkaw na an edad, nasasabotan daw nindo kun paano na an saindong mga tataramon asin gibo nakakaapektar nanggad sa iba sa kapakipakinabang na paagi? Estudyare an nagkapirang halimbawa sa Biblia na nagpapaheling kun paanong an mga may edad na nagin tunay na bendisyon para sa mga hoben.
Pagtubod na May Nagdadanay na mga Epekto
3. Paano nakaapektar sa gabos na nabubuhay ngonyan an kaimbodan ni Noe?
3 An pagtubod asin karigonan ni Noe nagtao nin mga pakinabang na namamatean dawa sa panahon na ini. Si Noe madali nang mag-600 anyos kan itogdok nia an arka, tiriponon nia an mga hayop, asin maghulit sia sa saiyang kataraed. (Genesis 7:6; 2 Pedro 2:5) Huli sa saiyang diosnon na takot, si Noe, kaiba an saiyang pamilya, nakaligtas sa dakulang Baha asin nagin apoon kan gabos na tawo na nabubuhay sa daga ngonyan. Totoo, nabuhay si Noe kaidtong an buhay sa pangkagabsan mas halawig. Pero, dawa sa pinakahalangkaw niang edad, nagdanay na maimbod si Noe, asin nagresulta iyan sa dakulang mga bendisyon. Sa anong paagi?
4. Paano an karigonan ni Noe nagtaong pakinabang sa mga lingkod nin Dios ngonyan?
4 Haros 800 anyos na si Noe kan ponan ni Nimrod an pagtogdok kan Torre nin Babel bilang paglaban sa pagboot ni Jehova na ‘panoon an daga.’ (Genesis 9:1; 11:1-9) Minsan siring, dai nakikabtang si Noe sa pagrebelde ni Nimrod. Sa siring, may posibilidad na dai naliwat an saiyang lenguahe kan rinibaraw an lenguahe kan mga rebelde. An pagtubod asin karigonan ni Noe, na naheling bako sanang kan sia gurang na kundi sa bilog na halawig niang buhay, tunay nanggad na maninigong arogon kan mga lingkod nin Dios na laen-laen an edad.—Hebreo 11:7.
Impluwensia sa Pamilya
5, 6. (a) Kan si Abraham 75 anyos, ano an ipinagibo sa saiya ni Jehova? (b) Ano an nagin reaksion ni Abraham sa pagboot nin Dios?
5 An impluwensia na ikakatao kan mga may edad na sa pagtubod kan mga miembro kan saindang pamilya puedeng maheling sa buhay kan mga patriarka pagkatapos ni Noe. Mga 75 anyos si Abraham kan sabihon sa saiya nin Dios: “Humale ka sa saimong daga asin sa saimong mga paryente patin sa harong kan saimong ama pasiring sa daga na ipapaheling ko sa saimo; asin magibo ako nin dakulang nasyon hale sa saimo asin ika bebendisyonan ko.”—Genesis 12:1, 2.
6 Imahinaron na sinabihan kamo na bayaan an saindong harong, an saindong mga amigo, an nasyon na namundagan nindo, asin an seguridad kan saindong mga paryente tanganing magduman sa sarong nasyon na dai nindo aram. Si Abraham sinabihan na gibohon nanggad iyan. Sia “huminale siring sa isinabi sa saiya ni Jehova,” asin sa bilog niang buhay, nag-istar sia sa mga tolda bilang residente na dayo asin pabarobalyo sa daga nin Canaan. (Genesis 12:4; Hebreo 11:8, 9) Minsan ngani sinabi ni Jehova na si Abraham magigin “dakulang nasyon,” nagadan sia haloy pa bago magdakol an saiyang mga gikan. An saiyang agom, si Sara, nagkaaki sa saiya nin saro sanang aking lalaki, si Isaac, pagkatapos sana na temporaryong mag-istar si Abraham sa dagang panuga sa laog nin 25 taon. (Genesis 21:2, 5) Pero, si Abraham dai nanluya asin dai nagbalik sa siudad na pinaghalean nia. Kanigoan na halimbawa nin pagtubod asin pakatagal!
7. Ano an nagin epekto kan pakatagal ni Abraham sa saiyang aking si Isaac, asin may anong resulta sa katawohan?
7 An pakatagal ni Abraham nagkaigwa nin mapuersang epekto sa saiyang aki na si Isaac, na ginamit an bilog niang buhay—180 taon—bilang residente na dayo sa daga nin Canaan. An pakatagal ni Isaac nakabasar sa pagtubod sa panuga nin Dios, pagtubod na itinadom sa saiya kan saiyang may edad nang mga magurang asin sa huri pinasarig kan mismong tataramon ni Jehova sa saiya. (Genesis 26:2-5) May mahalagang papel an karigonan ni Isaac sa kaotoban kan panuga ni Jehova na an “banhi” para sa pagbendisyon sa bilog na katawohan maabot paagi sa pamilya ni Abraham. Pakalihis nin ginatos na taon, pinagin posible ni Jesu-Cristo, an pangenot na kabtang kan ‘banhing’ iyan, na an gabos na nagtutubod sa saiya makipag-ulian sa Dios asin magkamit nin buhay na daing katapusan.—Galacia 3:16; Juan 3:16.
8. Paano ipinaheling ni Jacob an makosog na pagtubod, asin may anong epekto?
8 Dangan, tinabangan ni Isaac an saiyang aking si Jacob na kultibaron an makosog na pagtubod na padagos na nakatabang sa paggurang kaini. Si Jacob 97 anyos kan sia makigumolan nin bilog na banggi sa sarong anghel para sa bendisyon. (Genesis 32:24-28) Bago sia nagadan sa edad na 147, si Jacob nagtipon nin igong kosog tanganing bendisyonan an lambang saro sa saiyang 12 aking lalaki. (Genesis 47:28) An propetikong mga tataramon na saiyang sinabi, na nakarekord ngonyan sa Genesis 49:1-28, napatunayan na totoo asin naootob pa sagkod ngonyan.
9. Ano an masasabi manongod sa impluwensia sa saindang pamilya kan maygurang sa espirituwal na mga may edad na?
9 Malinaw nanggad, an may edad nang mga lingkod nin Dios puedeng magkaigwa nin nakakapakosog na impluwensia sa mga miembro kan saindang pamilya. An sono sa Kasuratan na pagtotokdo kaiba an madonong na sadol asin an halimbawa nin pakatagal makakatabang na marhay sa sarong hoben na tumalubo na may masarig na pagtubod. (Talinhaga 22:6) Maninigo na nungkang pagmenoson kan mga may edad na an magigin kapakipakinabang na impluwensia ninda para sa ikakarahay kan saindang pamilya.
Impluwensia sa mga Kapwa Parasamba
10. Ano an ‘pagboot ni Jose manongod sa saiyang mga tolang,’ asin ano an epekto kaiyan?
10 An mga may edad na puede man na magkaigwa nin marahay na impluwensia sa mga kapagtubod. Kan sia may edad na, an aki ni Jacob na si Jose naggibo nin simpleng akto nin pagtubod na nagkaigwa nin dakulang epekto sa minilyon na tunay na parasamba na nabuhay pagkagadan nia. Sia kaidto 110 anyos na kan “sia nagtao nin pagboot manongod sa saiyang mga tolang,” arin na baga, na kun sa katapustapusi magharale an mga Israelita sa Egipto, kaipuhan nindang darahon an saiyang mga tolang paghale ninda. (Hebreo 11:22; Genesis 50:25) An pagboot na iyan nagtao nin dahelan na maglaom an Israel durante kan dakol na taon nin masakit na pagkaoripon pagkagadan ni Jose, na nagtatao nin garantiya na maabot an saindang pagkakalda.
11. Ano an posibleng marhay na nagin impluwensia kan may edad nang si Moises ki Josue?
11 Kabilang si Moises sa mga napakosog kan kapahayagan nin pagtubod ni Jose. Kan si Moises 80 anyos, nagkapribilehio sia na magdara kan mga tolang ni Jose paluwas sa daga nin Egipto. (Exodo 13:19) Kan panahon man na idto, nakamidbid nia si Josue, na mas hoben na marhay kisa saiya. Sa suminunod na 40 taon, naglingkod si Josue bilang personal na katabang ni Moises. (Bilang 11:28) Inibanan nia si Moises sa pagtukad sa Bukid nin Sinai asin naghalat sia sa bukid sagkod na magbaba si Moises sa bukid dara an mga tabla kan Pagpatotoo. (Exodo 24:12-18; 32:15-17) Kanigoan kaabundang gikanan nin maygurang na hatol asin kadonongan an may edad nang si Moises para ki Josue!
12. Paano si Josue sagkod na sia nabubuhay nagin impluwensia para sa ikakarahay kan nasyon nin Israel?
12 Dangan, pinarigon ni Josue an nasyon nin Israel sagkod na sia nabubuhay. An Hokom 2:7 nagsasabi sa sato: “An banwaan padagos na naglingkod ki Jehova sa gabos na aldaw ni Josue asin sa gabos na aldaw kan kamagurangan na lalaki na naglawig pa an mga aldaw pakatapos ni Josue asin na nakaheling kan gabos na dakulang gibo ni Jehova na ginibo nia para sa Israel.” Minsan siring, kan magadan si Josue asin an iba pang kamagurangan na lalaki, nagpoon an 300 na taon nin pag-urong-sulong sa pag-oltanan kan tunay asin falsong pagsamba, na suminagkod sa panahon kan propetang si Samuel.
Si Samuel “Nakapangyari nin Katanosan”
13. Ano an ginibo ni Samuel tanganing ‘makapangyari nin katanosan’?
13 Dai sinasabi kan Biblia kun pira an edad ni Samuel kan ini magadan, alagad an mga pangyayari na sinasambit sa libro nin Enot na Samuel nangyari sa laog nin mga 102 na taon, asin naheling mismo ni Samuel an kadaklan sa mga pangyayaring iyan. Sa Hebreo 11:32, 33, mababasa niato na an tanos na mga hokom asin propeta “nakapangyari nin katanosan.” Iyo, naimpluwensiahan ni Samuel an nagkapira sa mga katemporanyo nia na likayan o bayaan an maraot na gibo. (1 Samuel 7:2-4) Sa anong paagi? Sia nagin maimbod ki Jehova sa bilog niang buhay. (1 Samuel 12:2-5) Dai sia natakot na magtao nin makosog na hatol dawa sa hade. (1 Samuel 15:16-29) Dugang pa, si Samuel, kan “gurang na asin ubanon na,” nagin arogan mismo sa pamimibi manongod sa iba. Sia nagsabi na ‘dai lamang nia pepensaron na sia magkasala ki Jehova paagi sa pag-ontok sa pagpamibi’ para sa kapwa nia mga Israelita.—1 Samuel 12:2, 23.
14, 15. Paano puedeng arogon si Samuel kan mga may edad na ngonyan kun dapit sa pamibi?
14 An gabos na ini nagtatampok nin mahalagang marhay na paagi kun paano an mga may edad na makakaimpluwensia para sa ikakarahay kan mga kapwa lingkod ni Jehova. Sa ibong nin mga limitasyon huli sa salud o iba pang mga kamugtakan, an mga halangkaw na an edad makakapamibi para sa iba. Kamong mga may edad na, nasasabotan daw nindo kun gurano nanggad nakikinabang an kongregasyon huli sa saindong mga pamibi? Huli sa saindong pagtubod sa pinabolos na dugo ni Cristo, nakakamtan nindo an inooyonan na kamugtakan sa atubangan ni Jehova, asin huli sa saindong rekord nin pakatagal, an saindong pagtubod nagkaigwa nin “nabalong kualidad.” (Santiago 1:3; 1 Pedro 1:7) Nungka nindong lingawan: “An pagngayongayo nin matanos na tawo, kun iyan ginigibo, may dakulang puersa.”—Santiago 5:16.
15 Kaipuhan an saindong mga pamibi bilang pagsuportar sa gibohon kan Kahadean ni Jehova. May mga tugang kita na nabibilanggo huli sa saindang Kristianong neutralidad. An iba nagin biktima nin natural na mga kalamidad, guerra, asin sibil na iriwal. An iba pa, sa mismong mga kongregasyon niato, napapaatubang sa mga sugot o pagtumang. (Mateo 10:35, 36) Kaipuhan man kan mga nangengenot sa paghuhulit asin pagdirehir sa mga kongregasyon an saindong regular na mga pamibi para sa sainda. (Efeso 6:18, 19; Colosas 4:2, 3) Marahay nanggad na sambiton sa saindong mga pamibi an mga kapagtubod, siring kan ginibo ni Epafras!—Colosas 4:12.
Pagtotokdo sa Maarabot na Henerasyon
16, 17. Ano an ihinula sa Salmo 71:18, asin paano ini nagigin totoo?
16 An pakikiasosyar sa mga maimbod kan “sadangoton na aripompon,” an mga may langitnon na pag-apod, nagtatao nin mahalagang marhay na pagsasanay para sa mga kabilang sa “ibang mga karnero,” na igwang paglaom na mabuhay sagkod lamang digdi sa daga. (Lucas 12:32; Juan 10:16) Ihinula ini sa Salmo 71:18, na nagsasabi: “Minsan sagkod sa kagurangan asin pagkaubanon, O Dios, dai mo ako pabayaan, sagkod na ikasabi ko sa kapag-arakian an manongod sa saimong takyag, sa gabos na maarabot pa, an manongod sa saimong kakosogan.” An mga linahidan nin espiritu gustong-gustong sanayon an kairiba nindang ibang karnero para sa orog pang mga paninimbagan bago sinda magsakat sa langit tanganing mag-ako nin kamurawayan kaiba ni Jesu-Cristo.
17 Sa pundamental, an sinasabi sa Salmo 71:18 manongod sa pagtotokdo “sa gabos na maarabot pa” puede man na iaplikar sa ibang mga karnero, na nag-aako nin pagtotokdo sa mga linahidan nin Dios. Pinaniwalaan ni Jehova an mga may edad na kan pribilehio na magpatotoo manongod sa saiya sa mga maogmang nag-aako na ngonyan kan tunay na pagsamba. (Joel 1:2, 3) Namamatean kan ibang mga karnero na binebendisyonan sinda huli sa saindang nanodan sa mga linahidan asin napapahiro sinda na sabihon sa iba pa, na nagmamawot na paglingkodan si Jehova, an pagtotokdo na inaako ninda sono sa Kasuratan.—Kapahayagan 7:9, 10.
18, 19. (a) Anong mahalagang marhay na impormasyon an ikakatao kan dakol na may edad nang lingkod ni Jehova? (b) Sa ano maninigong magin kompiado an may edad nang mga Kristiano?
18 An nabubuhay pang may edad nang mga lingkod ni Jehova, mga linahidan sagkod ibang mga karnero, makakapagpatotoo sa mahalaga asin makasaysayan na mga pangyayari. An nagkapira na nabubuhay pa ngonyan, presente kaidto para sa naenot na mga pagpasale kan “Photo-Drama of Creation.” An nagkapirang may edad na, personal na midbid an nangengenot na mga tugang na nabilanggo kan 1918. An iba nakikabtang sa pagbrodkast sa istasyon nin radyo kan Watchtower, an WBBR. Dakol an makakapagsabi manongod sa panahon na ipinakipaglaban sa mga korte suprema an mga kaso may koneksion sa relihiosong katalingkasan kan Mga Saksi ni Jehova. An iba pa marigon na nanindogan para sa tunay na pagsamba mantang nabubuhay sa irarom nin diktatoryal na mga rehimen. Iyo, ikakasaysay kan mga may edad na kun paano progresibong ihinayag an pakasabot sa katotoohan. Pinaparigon kita kan Biblia na makinabang sa kadakoldakol na eksperyensiang ini.—Deuteronomio 32:7.
19 Sinasadol an may edad nang mga Kristiano na magin marahay na halimbawa para sa mga hoben. (Tito 2:2-4) Tibaad dai nindo naheheling ngonyan an epekto sa iba kan saindong pakatagal, mga pamibi, asin hatol. Posibleng marhay na dai aram ni Noe, Abraham, Jose, Moises, asin iba pa an lubos na epekto kan saindang kaimbodan sa mga henerasyon na maarabot. Pero, an saindang rekord nin pagtubod asin integridad na puedeng ipamana may dakulang epekto; iyo man an halimbawa nindo.
20. Anong mga bendisyon an naghahalat sa mga pinapagdadanay na marigon an saindang pagtubod sagkod sa katapusan?
20 Baga man kamo makaligtas sa “dakulang kahorasaan” o kamo mag-ako nin pagkabuhay liwat, magigin dakulang kaogmahan nanggad na maeksperyensiahan an “tunay na buhay”! (Mateo 24:21; 1 Timoteo 6:19) Imahinaron an panahon durante kan Sangribong Taon na Paghade ni Cristo na dian hahaleon na ni Jehova an mga epekto nin paggurang. Imbes na maeksperyensiahan an padagos na pagluya kan satong hawak, mapapagmata kita aroaldaw na luway-luway na nagrarahay an satong hawak—mas makosog, mas malinaw an pagheling, mas alisto an pandangog, mas marahay an itsura! (Job 33:25; Isaias 35:5, 6) An mga binendisyonan na mag-erok sa bagong kinaban nin Dios magigin pirmeng hoben kun ikokomparar sa panahon na daing sagkod na maeeksperyensiahan pa. (Isaias 65:22) Kun siring, papagdanayon logod niato gabos na marigon an satong paglaom sagkod sa katapusan asin padagos na paglingkodan si Jehova nin bilog na kalag. Makakapagkompiar kita na ootobon ni Jehova an gabos na ipinanuga nia asin na an ano man na gigibohon nia malalabihan nanggad an ano man na tibaad linalaoman niato.—Salmo 37:4; 145:16.
Ano an Isisimbag Nindo?
• Paano an karigonan kan may edad nang si Noe nagresulta sa mga bendisyon para sa gabos na katawohan?
• Ano an nagin epekto kan pagtubod kan mga patriarka sa saindang mga gikan?
• Sa halangkaw na edad ninda, paano pinakosog ni Jose, Moises, Josue, asin Samuel an saindang mga kapwa parasamba?
• Ano an halimbawa na puedeng ipamana kan mga may edad na?
[Mga Hapot Para sa Pag-adal]
[Ritrato sa pahina 26]
An pakatagal ni Abraham nagkaigwa nin mapuersang epekto ki Isaac
[Ritrato sa pahina 28]
An maygurang na hatol ni Moises nakaparigon sa boot ni Josue
[Ritrato sa pahina 29]
An saindong mga pamibi para sa iba dakula an magigibong karahayan
[Ritrato sa pahina 30]
Makikinabang an mga hoben paagi sa paghinanyog sa maimbod na mga may edad na