Pagtalubo sa Espirituwal sa Panahon nin Pagkaubanon
Pagtalubo sa Espirituwal sa Panahon nin Pagkaubanon
“An mga nakatanom sa harong ni Jehova . . . padagos pang magtatalubo sa panahon nin pagkaubanon.”—SALMO 92:13, 14.
1, 2. (a) Paano parateng ilinaladawan an paggurang? (b) Ano an ipinapanuga kan Kasuratan mapadapit sa mga epekto kan minanang kasalan ki Adan?
PAGGURANG—ano an minalaog sa isip nindo sa tataramon na iyan? Kurubot na kublit? Maluyang pagdangog? Maluluyang mga takyag asin tabay? O iba pang aspekto kan “kapahapahamak na mga aldaw” na malinaw na ilinaladawan nin detalyado sa Eclesiastes 12:1-7? Kun iyo, mahalagang tandaan na an deskripsion na yaon sa Eclesiastes kapitulo 12 naglaladawan sa paggurang, bakong bilang orihinal na katuyohan kan Kaglalang na si Jehova Dios, kundi bilang epekto sa hawak nin tawo kan kasalan na minana ki Adan.—Roma 5:12.
2 An paggurang mismo bakong sarong sumpa, huli ta tanganing padagos na mabuhay kaipuhan na umagi an mga taon. Sa katunayan, an pag-oswag asin pagkamaygurang kawiliwiling mga karakteristiko kan gabos na nabubuhay na bagay. An maraot na mga epekto nin anom na ribong taon na kasalan asin pagkabakong sangkap na satong naheheling sa palibot niato madali nang magin kabtang kan nakaagi, asin kakamtan kan gabos na makinuyog na tawo an tunay na katuyohan nin buhay, na mayo kan kakologan nin paggurang asin kagadanan. (Genesis 1:28; Kapahayagan 21:4, 5) Sa panahon na iyan, “mayo nin nag-eerok na masabi: ‘Naghehelang ako.’” (Isaias 33:24) An mga may edad na mabalik sa mga aldaw kan saindang “bagsik nin pagkahoben,” asin an saindang kublit ‘magigin mas lumbod kisa kaidtong pagkahoben.’ (Job 33:25) Minsan siring, sa presente kaipuhan na atubangon kan gabos an makasalan na kamugtakan na minana ki Adan. Pero, an mga lingkod ni Jehova binebendisyonan sa espesyal na mga paagi mantang naggugurang sinda.
3. Sa anong mga paagi na an mga Kristiano “padagos pang magtatalubo sa panahon nin pagkaubanon”?
3 Sinisierto sa sato kan Tataramon nin Dios na “an mga nakatanom sa harong ni Jehova . . . padagos pang magtatalubo sa panahon nin pagkaubanon.” (Salmo 92:13, 14) Sa piguratibong pananaram, sinasabi kan salmista an pundamental na katotoohan na an maimbod na mga lingkod nin Dios puedeng padagos na umoswag asin tumalubo sa espirituwal, dawa kun sinda nagluluya na sa pisikal. Dakol na halimbawa sa Biblia asin sa presenteng aldaw an nagpapatunay kaini.
“Dai Noarin Man Nagpapalta”
4. Paano ipinaheling kan may edad nang propetisa na si Ana an saiyang debosyon sa Dios, asin paano sia binalosan?
4 Isip-isipa an propetisang si Ana. Sa edad na 84, sia “dai noarin man nagpapalta sa templo, na nagtatao nin sagradong paglilingkod banggi-aldaw na may mga pag-ayuno asin pagngayongayo.” Bilang sarong babae na an ama gikan sa bakong Levitang “tribo ni Aser,” si Ana dai literal na makakapag-istar sa templo. Imahinara kun anong paghihingoa an ginibo nia tanganing aroaldaw siang nasa templo poon sa pagdolot nin mga tinotong sa aga sagkod sa banggi! Minsan siring, igong binalosan si Ana huli sa saiyang debosyon. Nagkapribilehio sia na maheling mismo an omboy na si Jesus kan ini darahon ni Jose asin Maria sa templo tanganing ipresentar ki Jehova oyon sa ipinagboboot kan Ley. Kan maheling si Jesus, si Ana “nagpoon na magpasalamat sa Dios asin magtaram dapit sa omboy sa gabos na naghahalat sa pagkaligtas kan Jerusalem.”—Lucas 2:22-24, 36-38; Bilang 18:6, 7.
5, 6. Sa anong mga paagi na an dakol na may edad na ngonyan nagpapaheling nin espiritu na kapareho kan ki Ana?
5 Dakol na may edad na sa tahaw niato ngonyan an kapareho ni Ana sa saindang regular na pag-atender sa pagtiripon, sa saindang odok na pagngayongayo para sa pag-oswag kan tunay na pagsamba, asin sa saindang odok na pagmawot na ihulit an maogmang bareta. An sarong tugang na lalaki na labi nang 80 anyos na regular na nag-aatender sa Kristianong mga pagtiripon kaiba an saiyang agom nagsabi: “Kinultibar niamo an ugaleng pag-atender sa mga pagtiripon. Habo niamong magduman sa iba pang lugar. Kun haen an banwaan nin Dios, dian man an gusto mi. Dian kami nakakamate nin katiwasayan.” Kanigoan kanakakaparigon sa boot na halimbawa para sa gabos!—Hebreo 10:24, 25.
6 “Ano man na bagay na may koneksion sa tunay na pagsamba na puede akong makikabtang dian, gusto kong gibohon iyan.” Iyan an sarabihon ni Jean, sarong balong Kristiana na labi nang 80 anyos. “Siempre, may mga panahon na mamondo ako,” an sabi pa nia, “alagad taano ta kaipuhan na magin mamondo an mga nasa palibot ko kun mamondo ako?” Nababanaag sa saiyang mga mata an kagayagayahan huli sa pagbisita sa ibang nasyon para sa nakakapakosog sa espirituwal na pakikiasosyar. Sa dai pa sana nahahaloy na pagbiahe, sinabihan nia an saiyang mga kaibaiba sa pagbiahe, “Habo ko nang mamasyar sa mga lugar na panturista; gusto kong lumuwas sa ministeryo sa langtad!” Maski ngani dai nia aram an lenguahe sa lugar na iyan, napukaw ni Jean an interes kan mga tawo sa mensahe kan Biblia. Dugang pa, sa laog nin nagkapirang taon, nakipagtabangan sia sa sarong kongregasyon na nangangaipo nin tabang, dawa ngani nangahulogan ini nin pag-adal nin bagong lenguahe asin pagbiahe nin sarong oras kada pagduman sa mga pagtiripon.
Pinapagdadanay na Aktibo an Isip
7. Durante kan halangkaw nang edad nia, paano ipinahayag ni Moises an pagmawot nia na umoswag an saiyang relasyon sa Dios?
7 Nakakamtan an eksperyensia sa buhay paagi sa pag-agi nin panahon. (Job 12:12) Sa ibong na lado, an espirituwal na pag-oswag dai automatikong nakakamtan sa pag-agi nin panahon. Kun siring, imbes na magsarig sana sa kaaraman na nakua kan nakaagi, an maimbod na mga lingkod nin Dios nagmamaigot na ‘dagdagan an pakanood’ mientras na nag-aagi an mga taon. (Talinhaga 9:9) Kan si Moises nombrahan ni Jehova, sia 80 anyos na. (Exodo 7:7) Kan panahon nia, an pakaabot sa edad na iyan minalataw na kinokonsiderar na pambihira, huli ta sia nagsurat: “An mga aldaw nin samong mga taon setentang taon; asin . . . huli sa espesyal na kakosogan iyan otsentang taon.” (Salmo 90:10) Sa ibong kaiyan, nungkang namatean ni Moises na gurang na siang marhay tanganing makanood. Pakalihis nin mga dekada nin paglilingkod sa Dios, na ikinakaogma an dakol na pribilehio, asin inootob an magabat na mga paninimbagan, nakimaherak si Moises ki Jehova: “Paaraman sa sako, tabi, an saimong mga dalan, tanganing mamidbid taka.” (Exodo 33:13) Minamawot pirme ni Moises na umoswag an saiyang relasyon ki Jehova.
8. Paano pinapagdanay ni Daniel na aktibo an saiyang isip sagkod na sia 90 anyos, asin may anong mga resulta?
8 An propetang si Daniel, na posibleng marhay na labi nang 90 anyos, maingat pa giraray na sinisiyasat an banal na kasuratan. An namansayan nia huli sa saiyang pag-adal sa “mga libro”—na posibleng kaiba an Levitico, Isaias, Jeremias, Oseas, asin Amos—nagpahiro sa saiya na hanapon si Jehova paagi sa odok na pamibi. (Daniel 9:1, 2) Sinimbag an pamibing iyan paagi sa ipinasabong na impormasyon mapadapit sa pagdatong kan Mesiyas asin sa kaaabtan kan dalisay na pagsamba.—Daniel 9:20-27.
9, 10. Ano an ginibo nin nagkapira tanganing papagdanayon na aktibo an isip?
9 Kapareho ni Moises asin Daniel, puede kitang magmaigot na pagdanayon na aktibo an satong isip paagi sa pagkonsentrar sa espirituwal na mga bagay sagkod na kaya niato. Dakol an naggigibo nanggad kaiyan. Hinihingoa ni Worth, sarong Kristianong magurang sa kongregasyon na labi nang 80 anyos, na danay na magkakan nin espirituwal na mga bagay na itinatao kan “maimbod asin mapagmansay na oripon.” (Mateo 24:45) Sia nagsabi, “Pinakamamahal ko nanggad an katotoohan, asin naoogma akong marhay na maheling kun paanong an liwanag kan katotoohan paorog nang paorog na nagliliwanag.” (Talinhaga 4:18) Kaagid kaiyan, nanompongan ni Fred, na naggamit nin labing 60 taon sa bilog na panahon na ministeryo, na nakakapahiro sa espirituwal an pagpoon nin orolay na basado sa Biblia sa mga kapagtubod. “Kaipuhan na papagdanayon kong buhay sa sakong isip an Biblia,” an sabi nia. “Kun mahihimo nindong magin buhay an Biblia—gibohon iyan na makahulogan—asin kun ikakaoyon nindo an saindong nanonodan sa ‘arogan nin ikakarahay na mga tataramon,’ kun siring bako sanang suruwaysuway na mga kabtang nin impormasyon an yaon sa saindo. Maheheling nindo kun paanong garo nagkikilyab an lambang kabtang sa tamang lugar kaiyan.”—2 Timoteo 1:13.
10 An pagigin may edad na dai man talaga nakakaolang sa saro na makanood nin bago asin depisil na mga ideya. May mga tawong labi nang 60, 70, asin 80 anyos pa ngani an napangganahan an dai pakabasa asin pakasurat o nakanood nin bagong mga lenguahe. Ginibo iyan kan nagkapira sa Mga Saksi ni Jehova na may katuyohan na ipahayag an maogmang bareta sa mga tawo na laen-laen an nasyonalidad. (Marcos 13:10) Si Harry asin an saiyang agom magsesetenta na kan magdesisyon sinda na tumabang sa mga tawo na nagtataram nin Portugues. “Admitiron niato,” an sabi ni Harry, “na nagigin mas masakit an ano man na trabaho kun nagkakaedad na.” Sa ibong kaiyan, huli sa paghihingoa asin pagkadesidido, nagibo nindang makapagkondukta nin mga pag-adal sa Biblia sa lenguaheng Portugues. Sa laog nin dakol nang taon sagkod ngonyan, nakapagpahayag na man si Harry sa mga pandistritong kombension sa lenguaheng Portugues.
11. Taano ta dapat na konsideraron an mga nagibo kan maimbod na mga may edad na?
11 Siempre, bakong gabos igwa nin angay na salud o mga kamugtakan tanganing gibohon iyan. Kun siring, taano ta kaipuhan na konsideraron an nagibo kan nagkapirang may edad na? Iyan bako nanggad na tanganing magsuherir na an gabos maninigong maghingoa na aboton an siring na mga bagay. Imbes, oyon iyan sa kahulogan kan surat ni apostol Pablo sa Hebreong mga Kristiano may koneksion sa maimbod na kamagurangan sa kongregasyon: “Mantang pinaghohorophorop nindo an resulta kan saindang gawe-gawe aroga nindo an saindang pagtubod.” (Hebreo 13:7) Kun hinohorophorop niato an siring na mga halimbawa nin kaigotan, mapaparigon an satong boot na arogon an makosog na pagtubod na iyo an nagtutulod sa mga may edad nang ini sa saindang paglilingkod sa Dios. Ipinapaliwanag kun ano an nakakamotibar sa saiya, si Harry, na 87 anyos na ngonyan, nagsabi: “Gusto kong gamiton sa madonong na paagi an natatada ko pang mga taon asin magin kapakipakinabang sa paglilingkod ki Jehova sagkod na posible.” Si Fred, na nasambitan sa enotan, nakanompong nin dakulang pagkakontento sa pag-asikaso kan saiyang asignasyon sa Bethel. Sia nagkomento, “Dapat nindong maaraman kun paano nindo paglilingkodan si Jehova sa pinakamarahay na paagi asin magdanay dian.”
Dedikado sa Ibong nin Nagbabagong mga Kamugtakan
12, 13. Paano nagpaheling nin diosnon na debosyon si Barzilai sa ibong kan saiyang nagbagong mga kamugtakan?
12 An pisikal na mga pagbabago puedeng magin depisil na akoon asin atubangon. Minsan siring, posibleng makapagpaheling nin diosnon na debosyon sa ibong kan siring na mga pagbabago. Si Barzilai na Galaadita sarong marahay na halimbawa sa bagay na ini. Sa edad na 80, ipinaheling nia an ekstraordinaryong pag-istimar ki David asin sa hukbo kaini, na tinawan sinda nin pagkakan asin dadagosan sa panahon kan pagrebelde ni Absalon. Kan pabalik na si David sa Jerusalem, ihinatod ni Barzilai an grupong iyan sa Salog nin Jordan. Inalok ni David si Barzilai na magin kabtang kan mga nasa palasyo nia. Ano an nagin simbag ni Barzilai? “Otsenta anyos na ako ngonyan. . . . Mananamitan pa daw kan saimong lingkod an sakong kinakan asin an sakong ininom, o madadangog ko pa daw an tingog kan mga parakantang lalaki asin babae? . . . Uya an saimong lingkod na si Kimham. Togoti siang bumalyo kaiba kan kagurangnan kong hade; asin gibohon mo sa saiya an ano man na pagmarahayon mo.”—2 Samuel 17:27-29; 19:31-40.
13 Sa ibong kan saiyang nagbagong mga kamugtakan, ginibo ni Barzilai an magigibo nia tanganing suportaran an nombradong hade ni Jehova. Minsan ngani minimidbid nia na an saiyang pagnamit asin pagdangog bako nang arog kan dati, dai sia nagin mapaghinanakit. Imbes, paagi sa daing kaimotan na pagrekomendar na si Kimham an umako kan mga pakinabang na iinaalok, ipinahayag ni Barzilai kun ano an saiyang tunay na pagkatawo. Kapareho ni Barzilai, dakol na may edad na ngonyan an nagpapaheling nin espiritu nin kadaihan nin kaimotan asin pagigin buka an palad. Ginigibo ninda an saindang magigibo tanganing suportaran an tunay na pagsamba, na nakakaaram na “sa siring na mga atang naoogmang gayo an Dios.” Kanigoan na bendisyon na makaibanan an mga maimbod!—Hebreo 13:16.
14. Paano an halangkaw na edad ni David nagtataong kahulogan sa mga tataramon na nakarekord sa Salmo 37:23-25?
14 Minsan ngani nagin pabarobago an kamugtakan ni David sa laog nin dakol na taon, nagdanay siang kombensido na nungkang nagbabago an pag-asikaso ni Jehova sa maimbod niang mga lingkod. Kan madali na siang magadan, kinomponer ni David an awit na midbid ngonyan bilang Salmo 37. Imahinara na sana na si David naghohorophorop, na nagtutugtog nin arpa asin nag-aawit kan mga tataramon na ini: “Paagi ki Jehova an mismong mga lakad nin pusog na lalaki inandam, asin sa saiyang dalan Sia nawiwili. Minsan pa sia matumba, dai sia ikakaapon, huli ta kinakabit ni Jehova an saiyang kamot. Ako dati hoben na lalaki, naggurang man ako, alagad ta dai ako nakaheling nin siisay man na matanos na lubos na pinabayaan, ni an saiyang mga aki na naghahanap nin tinapay.” (Salmo 37:23-25) Pinagmarahay ni Jehova na sambiton an edad ni David sa ipinasabong na salmong ini. Kanigoan na rarom nin saboot na nakadagdag sa odok sa pusong mga tataramon na idto!
15. Paano si apostol Juan nagtao nin marahay na halimbawa nin kaimbodan sa ibong nin nagbagong mga kamugtakan asin pagigin may edad na?
15 Si apostol Juan saro pang marahay na halimbawa nin kaimbodan sa ibong nin nagbagong mga kamugtakan asin halangkaw na edad. Pakapaglingkod sa Dios nin haros 70 taon, idinistiero si Juan sa isla nin Patmos “huli sa pagtaram manongod sa Dios asin pagpatotoo ki Jesus.” (Kapahayagan 1:9) Pero, dai pa tapos an saiyang gibohon. Sa katunayan, an gabos na surat ni Juan sa Biblia isinurat nia sa huring mga taon kan saiyang buhay. Mantang nasa Patmos, itinao sa saiya an nakakapukaw nin hararom na paggalang na bisyon sa Kapahayagan, na maingat niang isinurat. (Kapahayagan 1:1, 2) Sa pangkagabsan, hinohona na pinatalingkas sia sa pagkadistiero durante kan pagreynar kan Romanong Emperador na si Nerva. Pakatapos kaiyan, kan mga 98 C.E., kan sia posibleng 90 o 100 anyos na, isinurat ni Juan an Ebanghelyo asin an tolong surat na inginaran sa saiya.
An Dai Napaparang Rekord nin Pakatagal
16. Paano an mga nagkadiperensia sa saindang kakayahan na makikomunikar makakapaheling kan saindang debosyon ki Jehova?
16 Dakol na klase an limitasyon asin laen-laen an sokol kaiyan. Halimbawa, an nagkapirang indibiduwal nagkaigwa nin diperensia dawa sa saindang kakayahan na makikomunikar. Minsan siring, pinakamamahal pa man giraray ninda an maogmang mga memorya kan pagkamoot asin dai na kutana maninigong kabootan nin Dios. Dawa ngani limitado an saindang masasabi, sa saindang puso sinasabi ninda ki Jehova: “Kanigoan an sakong pagkamoot sa saimong ley! Sa bilog na aldaw iyan an sakong inaatoman.” (Salmo 119:97) Sa saiyang kabtang, aram ni Jehova an mga “naghohorophorop sa saiyang ngaran,” asin inaapresyar nia kun paanong an mga arog ninda napapalaen sa kadaklan kan katawohan, na dai nagpapaheling nin interes sa saiyang mga dalan. (Malaquias 3:16; Salmo 10:4) Nakakaranga nanggad na maaraman na naoogma si Jehova sa paghorophorop kan satong puso!—1 Cronica 28:9; Salmo 19:14.
17. Anong bagay na talagang pambihira an nagibo kan haloy nang mga lingkod ni Jehova?
17 Dai man dapat lingawan an bagay na an mga maimbod na naglilingkod ki Jehova sa laog nin dakol nang dekada nakagibo nin sarong bagay na talagang pambihira asin dai makakamtan sa ano man na iba pang paagi—an dai napaparang rekord nin pakatagal. Si Jesus nagsabi: “Huli sa saindong pakatagal makakamtan nindo an saindong kalag.” (Lucas 21:19) Mahalagang marhay an pakatagal sa pagkamit nin buhay na daing katapusan. Kamo na ‘nakagibo kan kabotan nin Dios’ asin nagpatunay kan saindong kaimbodan paagi sa saindong pamumuhay makakalaom na umako kan “kaotoban kan panuga.”—Hebreo 10:36.
18. (a) Ano an ikinakaogmang marhay na maheling ni Jehova kun dapit sa mga may edad na? (b) Ano an totokaron niato sa sunod na artikulo?
18 Pinapahalagahan ni Jehova an saindong bilog na kalag na paglilingkod gurano man kadakula o kadikit kan saindong magigibo. Apisar kan tibaad nangyayari sa “pagkatawo sa luwas” mantang nagkakaedad na an saro, an “pagkatawo sa laog” puedeng nababago aroaldaw. (2 Corinto 4:16) Daing duwa-duwa na inaapresyar ni Jehova an nagibo nindo kan nakaagi, alagad malinaw nanggad na inaapresyar man nia an saindong ginigibo ngonyan mismo para sa saiyang ngaran. (Hebreo 6:10) Sa sunod na artikulo, totokaron niato an nagdadanay na mga epekto kan siring na kaimbodan.
Ano an Isisimbag Nindo?
• Anong marahay na halimbawa an itinao ni Ana para sa may edad nang mga Kristiano ngonyan?
• Taano an edad ta dai pirmeng nagigin limitasyon sa magigibo nin saro?
• Paano an mga may edad na makakapagpadagos na ipaheling an diosnon na debosyon?
• Paano minamansay ni Jehova an paglilingkod sa saiya kan mga may edad na?
[Mga Hapot Para sa Pag-adal]
[Ritrato sa pahina 23]
Paagi sa “mga libro” namansayan kan may edad nang si Daniel an lawig kan pagkadistiero kan Juda
[Mga Ritrato sa pahina 25]
Dakol na may edad na an arogan sa saindang regular na pag-atender sa pagtiripon, maigot na paghuhulit, asin pagigin interesado na makanood