Inaarog daw Nindo si Jehova sa Pagpaheling nin Pagmakolog sa Iba?

‘IBUGTAK nindo an gabos nindong kahaditan sa Dios, huli ta sia may pagmakolog sa saindo.’ (1 Pedro 5:7) Mamomotan nanggad na pangagda iyan! Si Jehova Dios may personal na pagmalasakit sa saiyang banwaan. Puede kitang makamate na tiwasay sa saiyang pag-ataman.

Maninigo niatong kultibaron asin ipaheling an kaagid na pagmakolog sa iba. Huling bakong sangkap, kaipuhan niatong magmaan sa nagkapirang natatagong peligro kun kita nagpapaheling nin personal na interes sa iba. Bago niato tokaron an nagkapira sa mga iyan, helingon niato an pira sa mga paagi na nagmamakolog si Jehova sa saiyang banwaan.

Ginagamit an sarong pastor bilang ilustrasyon, ilinadawan kan salmistang si David an pagmakolog nin Dios: “Si Jehova an sakuyang Pastor. Dai ako magkukulang nin ano man. Sa madoot na mga sabsaban pinapahigda nia ako; dinadara nia ako sa matubig na mga pahingaloan. An sakuyang kalag saiyang pinapaginhawa. . . . Minsan ngani ako maglakaw sa kababan nin mahibog na kadikloman, dai ako natatakot sa ano man na maraot, huli ta ika kaibanan ko.”—Salmo 23:1-4.

Huling si David sarong pastor, aram nia kun ano an kalabot sa pag-ataman sa aripompon. Pinoprotehiran nin pastor an saiyang mga karnero sa naninibang mga hayop, arog baga nin mga leon, lobo, asin oso. Iniingatan nia na dai magkasuruwaysuway an aripompon, hinahanap nia an nalagalag na mga karnero, kinakarga nia sa saiyang daghan an pagal nang mga kordero, asin inaataman nia an mga may helang saka erido. Tinatawan nia aroaldaw nin maiinom na tubig an aripompon. Dai ini nangangahulogan na kinokontrol kan pastor an lambang paghiro kan mga karnero. An mga karnero libreng maghiro alagad protektado.

Arog kaiyan magmakolog si Jehova sa saiyang banwaan. Si apostol Pedro nagpaliwanag: ‘Kamo iniingatan kan kapangyarihan nin Dios.’ Digdi, an “iniingatan” literal na nangangahulogan na “danay na binabantayan.” (1 Pedro 1:5, nota sa ibaba) Huling minomotibar nin tunay na pagmalasakit, si Jehova pirmeng nagbabantay sa sato, na pirmeng andam na magtao nin tabang noarin man niato hagadon iyan. Minsan siring, linalang kita ni Jehova na may sadiring boot, kaya dai sia nakikilabot sa gabos niatong gawe-gawe asin desisyon. Paano niato maaarog si Jehova mapadapit digdi?

Arogon an Dios sa Pag-ataman sa Saindong mga Aki

“An mga aki mana hale ki Jehova.” Huli kaini, maninigong protehiran asin atamanon kan mga magurang an saindang mga aki. (Salmo 127:3) Tibaad kalabot dian an pag-enganyar sa mga aki na ipahayag an saindang kaisipan asin saboot dangan pagkonsiderar kaiyan kun tinatratar sinda. Kun kokontrolon nin mga magurang an lambang hiro kan saindang mga aki, na biyong dai iniintindi an mga kamawotan kan mga ini, iyan garo man sana sarong pastor na nagpoprobar na kontrolon an saiyang mga karnero paagi sa gakod. Mayo nin pastor na tatrataron an saiyang aripompon sa siring na paagi; dai man kita pinapastoran ni Jehova sa paaging iyan.

Inadmitir ni Mariko *: “Sa laog nin dakol na taon  pigpaparasabihan ko sana an sakong mga aki, ‘Ini an gibohon mo’ asin ‘Dai mo paggibohon iyan.’ Naniniwala ako kaidto na ini an sakong katongdan bilang magurang. Dai ko sinda tinawan nin komendasyon, asin mayo ako nin ano man na tunay na komunikasyon sa sainda.” Minsan ngani an aking babae ni Mariko nakikipag-olay nin halawig sa telepono sa saiyang mga katood, an pakikipag-olay nia sa saiyang ina dai naghahaloy. “Dangan naheling ko an pagkakalaen,” an sabi pa ni Mariko. “Kun nakikipag-olay sa saiyang mga katood, ginagamit kan aki ko an mga pananaram na nagpapamate nin pakikidamay, siring kan ‘Iyo man nanggad’ o ‘Iyo man ako.’ Nagpoon akong maggamit nin kaagid na mga pananaram tanganing maenganyar an sakong aki na ipahayag an saiyang mga saboot, asin dai nahaloy nagin mas halawig asin mas nakakaogma an samong mga orolay.” Idinodoon kaini an kahalagahan nin marahay na komunikasyon, na sa parate bako sanang saro an nagtataram, kundi pareho sinda nagtataram asin naghihinanyog.

Kaipuhan nin mga magurang na enganyaron an saindang mga aki na ipahayag an saindang mga saboot, asin kaipuhan na masabotan nin mga aki kun taano ta nagseserbing proteksion an pagmalasakit nin mga magurang. Sinasadol kan Biblia an mga aki na kuyogon an saindang mga magurang; dangan sinasabi kaiyan an dahelan: “Tanganing iyan ikarahay mo asin ika magdanay nin haloy sa daga.” (Efeso 6:1, 3) Mas pasil an pagkuyog para sa mga aki na marigon na kombensido sa mga pakinabang nin pagigin mapagpasakop.

Sa Pag-ataman sa Aripompon ni Jehova

Ipinapabanaag sa Kristianong kongregasyon an mamomoton na pagmalasakit ni Jehova. Bilang Payo kan kongregasyon, sinasabihan ni Jesu-Cristo an kamagurangan na atamanon an saiyang aripompon. (Juan 21:15-17) An Griegong termino para sa paraataman konektado sa sarong berbo na nangangahulogan na “maingat na magbantay.” Idinodoon kun paano ini maninigong gibohon, pinagbotan ni Pedro an kamagurangan: “Pastoran nindo an aripompon nin Dios na nasa saindong pangataman, bakong sa kapiritan, kundi gikan sa boot; ni huli sa pagkamoot sa madayang pakinabang, kundi may pagkagalaga; ni nagpapakangkagurangnan sa mga mana nin Dios, kundi nagigin mga halimbawa sa aripompon.”—1 Pedro 5:2, 3.

Iyo, an gibohon nin kamagurangan kaagid kan sa mga pastor. Dapat na tabangan nin Kristianong kamagurangan an mga may helang sa espirituwal asin pakarhayon giraray sinda tanganing mabanaag sa saindang buhay an matanos na mga pamantayan. Paninimbagan nin kamagurangan an pag-organisar kun paano mapunsionar an kongregasyon, na naggigibo nin mga areglo para sa mga pagtiripon, asin pinagdadanay na areglado an kongregasyon.—1 Corinto 14:33.

Pero, an mga tataramon ni Pedro sa enotan nagpapatanid sa sato dapit sa sarong peligro—an ‘pagpapakangkagurangnan’ kan kamagurangan sa kongregasyon. An sarong bagay na nagpaparisa kaiyan iyo an paggibo nin sarong magurang sa kongregasyon nin dai man kaipuhan na mga susundon. Huli sa  makosog na pakamate nin obligasyon na protehiran an aripompon, tibaad sumobra naman an sarong magurang sa kongregasyon. Sa sarong kongregasyon sa Oriente, naggibo an kamagurangan nin mga susundon kun paano tataratarahon an iba sa Kingdom Hall—arog baga kan kun siisay an maninigong enot na magtaram—na naniniwala na an pagsunod sa mga susundon na ini makakakontribwir sa katoninongan kan kongregasyon. Minsan ngani daing duda na marahay an mga motibo, inaarog daw kan kamagurangan na iyan an pagmakolog ni Jehova sa saiyang banwaan? Makahulogan nanggad, nabanaag an kaisipan ni apostol Pablo sa saiyang mga tataramon: “Bakong dahel sa kami an mga kagurangnan kan saindong pagtubod, kundi kami mga kapwa trabahador para sa saindong kagayagayahan, huli ta paagi sa saindong pagtubod na kamo nagtitindog.” (2 Corinto 1:24) Nagtitiwala si Jehova sa saiyang banwaan.

Apuera sa paglikay na gumibo nin mga susundon na mayong basehan sa Kasuratan, ipinapaheling nin may pagmakolog na kamagurangan an saindang tunay na pagmalasakit paagi sa dai paghayag nin kompidensial na impormasyon. Isinasaisip ninda an patanid nin Dios: “Dai mo ihayag an kompidensial na orolay nin iba.”—Talinhaga 25:9.

Iinagid ni apostol Pablo sa hawak nin tawo an kongregasyon nin linahidan na mga Kristiano: “Binaragay nin Dios an hawak . . . tanganing dai magkaigwa nin pagkabaranga sa hawak, kundi magkaigwa nin pararehong pangataman sa lambang saro an mga kabtang kaiyan.” (1 Corinto 12:12, 24-26) An Griegong pananaram para sa “magkaigwa nin pararehong pangataman sa lambang saro” literal na nangangahulogan na ‘maninigong mahadit sa lambang saro.’ An mga miembro kan Kristianong kongregasyon maninigong magin interesadong marhay sa lambang saro.—Filipos 2:4.

Paano puedeng ipaheling nin tunay na mga Kristiano na sinda ‘nahahadit sa lambang saro’? Puede nindang ipaheling an saindang pagmalasakit sa ibang miembro kan kongregasyon paagi sa saindang mga pamibi asin paagi sa pagtao nin praktikal na tabang sa mga dukha. Nakakatabang ini na mapaluwas an karahayan kan iba. Isipon nindo kun paano natabangan si Tadataka kan siring na mamomoton na pagmalasakit. Kan sia mabautismohan sa edad na 17, sia sana sa saiyang pamilya an naglilingkod ki Jehova. Sia nagsaysay: “May sarong pamilya sa kongregasyon na parate akong inaagda sa saindang harong tanganing magkakan asin makapagtiripontipon. Haros kada aga naghahapit ako sa saindang harong mantang pasiring na ako sa eskuelahan tanganing ipakipag-olay sa sainda an teksto sa Biblia para sa aldaw na iyan. Nag-ako ako nin sadol kun paano maaatubang an mga problema sa eskuelahan, asin iriba kaming namibi manongod sa mga iyan. Sa pamilyang ini, nanodan ko an espiritu nin pagtatao.” Iinaaplikar na ni Tadataka ngonyan an saiyang nanodan paagi sa paglilingkod sa saro sa mga sangang opisina kan Mga Saksi ni Jehova.

Nagpatanid si apostol Pablo manongod sa malinaw asin natatagong peligro mapadapit sa pagpaheling nin interes sa iba. Nasambitan nia an nagkapirang babae na nagin “mga tsismosa asin parapakilabot sa gibo-gibo nin iba, na nag-oorolay sa mga bagay na dai dapat.” (1 Timoteo 5:13) Minsan ngani angay sana na magin interesado sa iba, dapat kitang mag-ingat na dai kita umabot sa pagparapakilabot sa saindang personal na gibo-gibo. An labi-labing interes sa iba puedeng marisa mismo sa ‘pag-orolay sa mga bagay na dai dapat,’ siring kan mapaghusgar na pagkomento.

Maninigo niatong girumdomon na tibaad nagkakalaen an mga Kristiano sa kun paano ninda inaareglar an saindang personal na gibo-gibo, kun ano an gusto nindang kakanon, asin kun arin na klase nin kapakipakinabang na libangan an pinipili ninda. Segun sa mga limitasyon na sinasabi kan mga prinsipyo sa Biblia, an kada saro libreng magdesisyon kun ano an gigibohon nia. Sinadol ni Pablo an mga Kristiano sa Roma: “Dai na kita magpahorokomhokoman. . . . Sunodon niato an mga bagay na nagpapatoninong asin an mga bagay na nagpapakosog sa lambang saro.” (Roma 14:13, 19) An satong sinserong pagmalasakit sa lambang saro sa kongregasyon maninigong ipaheling, bakong paagi sa pagparapakilabot sa gibo-gibo nin iba, kundi paagi sa pagigin andam niato na tumabang. Kun nagmamakolog kita sa lambang saro sa paaging ini, nag-ooswag an pagkamoot asin pagkasararo sa pamilya asin sa kongregasyon.

[Nota sa Ibaba]

[Ritrato sa pahina 19]

Enganyaron an saindong mga aki na ipahayag an saindang mga saboot paagi sa komendasyon asin pakikidamay