Natagboan ni Saulo an Haloy Nang mga Katood Asin Dating mga Kaiwal

SEGURADONG medyo nahandal si Saulo, na kan huri namidbid bilang apostol Pablo, kan sia magbuelta sa Jerusalem sa kaenot-enote poon kan makombertir sia sa Kristianismo. * Tolong taon bago kaidto naghale sia sa siudad na iyan, na nagtataram nin huma asin paggadan tumang sa mga disipulo ni Jesus. May autorisasyon sia na arestaron an siisay man na Kristiano na manompongan nia sa Damasco.—Gibo 9:1, 2; Galacia 1:18.

Kan sia mismo magin sarong Kristiano, pusoan na ipinahayag ni Saulo an saiyang pagtubod sa binuhay liwat na Mesiyas. Bilang resulta, gusto siang gadanon kan mga Judio sa Damasco. (Gibo 9:19-25) Talaga daw na malalaoman nia na maogma siang aakoon kan saiyang dating mga katood na mga Judio sa Jerusalem? Minsan siring, an mas mahalaga ki Saulo iyo na manompongan an mga parasunod ni Cristo sa Jerusalem. Dai magigin pasil iyan.

“Pag-abot sa Jerusalem naghingoa siang makiiba sa mga disipulo; alagad sinda gabos takot sa saiya, huli ta dai sinda nagtubod na sia sarong disipulo.” (Gibo 9:26) Masasabotan nindo iyan. An pinakahuring aram ninda manongod sa saiya iyo na sia  sarong daing herak na persegidor. An pagsabi nia na sia sarong Kristiano tibaad garo baga taktika tanganing makalaog sa kongregasyon. Huli kaini, linilikayan sia kan mga Kristiano sa Jerusalem.

Minsan siring, saro sa sainda an nagtabang ki Saulo. Sinasabi kan Biblia na an dating persegidor dinara ni Bernabe “sa mga apostol,” na minalataw na nanonongod ki Pedro (Cefas) asin Santiago, an tugang kan Kagurangnan. Sinabi ni Bernabe sa sainda an dapit sa pagkakombertir asin paghuhulit ni Saulo sa Damasco. (Gibo 9:27; Galacia 1:18, 19) Dai nakarekord kun paano nagtiwala ki Saulo si Bernabe. Magkamidbid daw an duwa, na nagpahiro ki Bernabe na maingat na baloon si Saulo dangan patunayan an saiyang sinseridad? Si Bernabe daw may midbid na mga Kristiano sa Damasco asin aram daw nia an dapit sa dakulang pagbabago ni Saulo? Ano man an kamugtakan, hinale ni Bernabe an mga suspetsa manongod ki Saulo. Bilang resulta, nagdanay si Saulo kaiba ni apostol Pedro sa laog nin 15 aldaw.

Kinseng Aldaw na Kaiba ni Pedro

Si Jesus mismo an nagsugo ki Saulo, na huli kaiyan dai na kaipuhan an ano man na permiso hale sa mga tawo, siring kan idinoon ni Saulo sa mga taga Galacia. (Galacia 1:11, 12) Alagad daing duwa-duwa na minidbid ni Saulo an kahalagahan nin pagigin dakol nanggad an aram manongod sa ministeryo ni Jesus. An pakikiiba ki Pedro matao ki Saulo nin bastanteng oportunidad  para dian. (Lucas 24:12; 1 Corinto 15:3-8) Dakol pang ihahapot si Saulo ki Pedro asin Santiago, asin may mga hapot sinda ki Saulo mapadapit sa saiyang bisyon asin sa sugo sa saiya.

Ilinigtas sa Dating mga Katood?

Si Esteban inapod na enot na Kristianong martir. Idtong mga dating nakadiskutir ni Esteban hale sa “inaapod na Sinagoga kan mga Pinatalingkas, asin hale sa mga taga Cirene asin Alejandria asin idtong mga hale sa Cilicia asin Asia.” Ngonyan si Saulo “nakikipagdiskutiran sa mga Judiong nagtataram nin Griego,” o “mga Helenista,” na pusoan na nagpapatotoo sa sainda. An reaksion? Gusto nindang gadanon sia!—Gibo 6:9; 9:28, 29, nota sa ibaba.

Natural sana na gusto ni Saulo na ipaliwanag an dakulaon na pagbabago sa saiyang buhay asin pagmaigotan na paliwanagan an dati niang mga katood manongod sa Mesiyas. Minsan siring, an mga Judiong Helenista na ini may antipatikong reaksion sa lalaking ibinibilang nindang traydor.

Narealisar daw ni Saulo an grabeng peligro na inaatubang nia? Mababasa niato na mantang namimibi sia sa templo, pinalipadngan sia asin naheling nia si Jesus, na nagsabi sa saiya: “Maghidali ka asin maghale ka tolos sa Jerusalem, huli ta dai sinda maoyon sa saimong patotoo dapit sa sako.” Nagsimbag si Saulo: “Kagurangnan, sinda mismo nakakaising gayo na ako kaidto nagbilanggo asin naghampak sa lambang sinagoga sa mga nagtutubod sa saimo; asin kan pinapabolos an dugo kan saimong saksing si Esteban, ako mismo nagmamasid man asin nag-ooyon.”—Gibo 22:17-20.

Iniisip nin nagkapira na an simbag ni Saulo nangangahulogan na minidbid nia an peligro. An iba pa nag-iisip na sinasabi nia: ‘Persegidor ako kaidto arog ninda, asin aram ninda iyan. Seguradong seseryosohon ninda an pagkakombertir ko. Tibaad matabangan ko sinda na masabotan an katotoohan.’ Sa ibong kaiyan, aram ni Jesus na an mga Judiong idto dai mahimate sa patotoo nin sarong “apostata.” Sinabihan nia si Saulo: “Lakaw, huli ta susugoon taka sa mga nasyon na harayo.”—Gibo 22:21, 22.

Kan maaraman na kaidto kan mga kapwa Kristiano an peligro, hinidali nindang madara si Saulo sa pier kan Cesarea asin pinabiahe sia nin 500 kilometros pasiring sa Tarso, an saiyang ginikanan na siudad. (Gibo 9:30) Nagkapirang taon an uminagi bago nagbuelta si Saulo sa Jerusalem.

An dali-daling paghaleng iyan puedeng nakaprotehir sa Kristianong kongregasyon. An presensia kan dating persegidor puedeng magin dahelan nin grabeng kariribokan. Pagkahale ni Saulo, “an kongregasyon sa bilog na Judea asin Galilea patin Samaria luminaog sa panahon nin katoninongan, na pinapakosog; asin mantang iyan naglalakaw sa pagkatakot ki Jehova asin sa pagranga kan banal na espiritu padagos iyan na nagdakol.”—Gibo 9:31.

Mga Leksion sa Pagigin Maingat

Siring kan enot na siglo, tibaad may mga situwasyon man ngonyan na dian angay na mag-ingat. Mayo kita nin dahelan na magin labi-labi kasuspetsoso sa mga estranghero. Minsan siring, kun beses, an daing prinsipyo na mga indibiduwal nagprobar na aprobetsaran an banwaan ni Jehova, magsalang para sa personal na pakinabang o may motibong danyaran an kongregasyon. Huli kaini, naggagamit kita nin pakabatid tanganing dai mabiktima nin mga panloloko nin mga impostor.—Talinhaga 3:27; 2 Timoteo 3:13.

An reaksion ni Saulo sa paghuhulit sa Jerusalem nagpapaheling nin saro pang paagi na makakapag-ingat an mga Kristiano. An pagpapatotoo sa nagkapirang pagtaraed o indibiduwal, pati sa dating mga katood, puedeng magin peligroso—sa pisikal, espirituwal, o moral pa ngani. Angay sana na mag-ingat, arog baga nin pagigin mapamili sa panahon asin lugar.—Talinhaga 22:3; Mateo 10:16.

Makakaasa kita na an maogmang bareta kan Kahadean nin Dios ihuhulit bago dumatong an katapusan kan marigsok na sistemang ini. Marahayon nanggad na halimbawa an itinao ni Saulo mapadapit dian, “na pusoan na nagtataram sa ngaran kan Kagurangnan” dawa sa haloy nang mga katood asin dating mga kaiwal!—Gibo 9:28.

[Nota sa Ibaba]

[Ritrato sa pahina 16]

Pakaabot sa Jerusalem, pusoan na nagpatotoo si Saulo sa mga Judiong nagtataram nin Griego