Pinapahalagahan ni Jehova an Pagigin Makinuyog Nindo

“Magpakadonong ka, aki ko, asin pagayagayaha an sakong puso.”—TALINHAGA 27:11.

1. Anong espiritu an lakop sa sosyedad ngonyan?

LAKOP sa kinaban ngonyan an espiritu nin independensia asin kasumbikalan. Ipinapaliwanag ni apostol Pablo an dahelan sa saiyang surat sa mga Kristianong taga Efeso: “Kamo kaidto naglakaw segun sa sistema nin mga bagay kan kinaban na ini, segun sa namamahala sa autoridad kan aire, an espiritu na naghihiro ngonyan sa mga aki nin kasumbikalan.” (Efeso 2:1, 2) Iyo, puede nindong sabihon na inolakitan ni Satanas na Diablo, an “namamahala sa autoridad kan aire,” nin espiritu nin kasumbikalan an bilog na kinaban. Ginigibo na nia iyan kan enot na siglo, asin ginigibo nia iyan nin mas grabe pa ngani magpoon kan sia palayason sa langit kan panahon kan Guerra Mundial I.—Kapahayagan 12:9.

2, 3. Ano an mga dahelan niato na kuyogon si Jehova?

² Minsan siring, bilang mga Kristiano, aram niato na si Jehova Dios an maninigo sa satong odok sa pusong pagkuyog huling sia an satong Kaglalang, an Parasuportar kan satong buhay, an mamomoton na Soberano, asin an satong Paraligtas. (Salmo 148:5, 6; Gibo 4:24; Colosas 1:13; Kapahayagan 4:11) Aram kan mga Israelita kan panahon ni Moises na si Jehova an saindang Paratao nin Buhay asin an saindang Parasalbar. Huli kaiyan, sinabi sa sainda ni Moises: “Dapat na maingat nindong gibohon an siring nanggad sa ipinagboot sa saindo ni Jehova na saindong Dios.” (Deuteronomio 5:32) Iyo, si Jehova an maninigo na kuyogon ninda. Pero, sinda nagin masumbikal tolos sa saindang Soberano.

³ Gurano kahalaga an pagigin makinuyog niato sa Kaglalang kan uniberso? Sarong beses, ginamit nin Dios si propeta Samuel tanganing sabihon ki Hadeng Saul: “An pagkuyog orog na marahay kisa atang.” (1 Samuel 15:22, 23) Taano ta arog kaini?

Kun Paanong an Pagkuyog “Orog na Marahay Kisa Atang”

4. Sa anong sentido na igwa kitang ikakatao ki Jehova?

⁴ Bilang Kaglalang, si Jehova na an may sadiri kan gabos na materyal na bagay na yaon sa sato. Kun siring kaiyan, igwa daw nin ano man na bagay na ikakatao niato sa saiya? Iyo, igwa kita nin ikakatao sa saiya na mahalagang marhay nanggad. Ano iyan? Makukua niato an simbag sa sunod na konseho: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” (Talinhaga 27:11) An ikakatao niato sa Dios iyo an satong pagkuyog. Minsan ngani manlaenlaen an satong kamugtakan asin pinaghalean, paagi sa pagigin makinuyog, an lambang saro sa sato makakasimbag sa maraoton na paghihingako ni  Satanas na Diablo na an mga tawo dai magdadanay na maimbod sa Dios sa atubangan nin mga pagbalo. Pambihirang pribilehio nanggad iyan!

5. Paano nakakaapektar sa Kaglalang an dai pagkuyog? Iilustrar.

⁵ An Dios interesado sa mga desisyon na ginigibo niato. Kun dai niato sia kinukuyog, nakakaapektar iyan sa saiya. Paano? Nakokolgan an boot nia na maheling an siisay man na minagawe nin bakong madonong. (Salmo 78:40, 41) Halimbawa, an sarong may diabetes dai sinusunod an ipinagboot sa saiya na dieta na nakakarahay sa salud asin padagos na kinakakan an mga kakanon na bakong marahay sa saiyang salud. Ano daw an mamamatean kan saiyang nagmamakolog na doktor? Makakasierto kita na nakokolgan an boot ni Jehova kun an mga tawo dai nagkukuyog sa saiya, huling aram nia an mga resulta nin dai pag-intindi sa ipinagboboot nia na ikakarahay kan saindang buhay.

6. Ano an matabang sa sato na magin makinuyog sa Dios?

⁶ Ano an matabang sa sato bilang indibiduwal na magin makinuyog? Tama sana para sa lambang saro sa sato na hagadon sa Dios an “pusong makinuyog,” arog kan ginibo ni Hadeng Salomon. Hinagad nia an siring na puso tangani na “mabatid [nia] kun ano an marahay asin an maraot” asin tanganing makapaghokom sia sa mga kapwa nia Israelita. (1 Hade 3:9) Kaipuhan niato an “pusong makinuyog” kun boot niatong mabatid kun ano an marahay asin an maraot sa sarong kinaban na lakop an espiritu nin kasumbikalan. Itinao sa sato nin Dios an saiyang Tataramon, mga pantabang sa pag-adal sa Biblia, mga Kristianong pagtiripon, asin an may pagmakolog na kamagurangan sa kongregasyon tanganing makultibar niato an “pusong makinuyog.” Inaaprobetsaran daw niato an siring na mamomoton na mga probisyon?

7. Taano ta tinatawan ni Jehova nin orog na pagdodoon an pagkuyog kisa mga atang?

⁷ May koneksion digdi, girumdomon na kan nakaagi, ihinayag ni Jehova sa saiyang suanoy na banwaan na an pagkuyog mas mahalaga pa ngani kisa mga atang na hayop. (Talinhaga 21:3, 27; Oseas 6:6; Mateo 12:7) Taano ta arog kaiyan, mantang si Jehova an nagboot sa saiyang banwaan na magdolot nin siring na mga atang? Bueno, ano an motibo kan saro na nagdodolot kan atang? Ginigibo daw nia iyan tanganing paogmahon an Dios? O sinusunod sana daw nia an sarong ritual? Kun an sarong parasamba talagang nagmamawot na paogmahon an Dios, maingat niang kukuyogon an gabos na pagboot nin Dios. Dai kaipuhan nin Dios an mga atang na hayop, alagad an sarong mahalagang bagay na ikakatao niato sa saiya iyo an satong pagkuyog.

Sarong Nagpapatanid na Halimbawa

8. Taano ta nawara an pabor nin Dios ki Saul bilang hade?

⁸ An rekord kan Biblia manongod ki Hadeng Saul nagdodoon kan dakulang importansia nin pagkuyog. Nagpoon si Saul bilang mapakumbaba asin hababa an boot na namamahala, na ‘sadit sa saiyang sadiring pagheling.’ Pero, pag-abot nin panahon, an pagigin orgolyoso asin falsong pangangatanosan nagpoon nang kontrolon an saiyang mga desisyon. (1 Samuel 10:21, 22; 15:17) Sa sarong okasyon, kaipuhan ni Saul na makipaglaban sa mga Filisteo. Sinabihan ni Samuel an hade na halaton sia kaining mag-abot tanganing magdolot nin mga atang ki Jehova asin magtao nin dugang pang instruksion. Minsan siring, si Samuel dai nag-abot sa oras na sia linalaoman, asin an mga tawo nagpoon nang magsuruwayan. Kan maheling iyan, si Saul an ‘nagdolot kan atang na tinotong.’ Ikinaanggot ini ni Jehova. Kan sa katapustapusi mag-abot si Samuel, nanarahotan an hade sa dai nia pagkuyog, na sinasabi na huling nahuri si Samuel, ‘pinirit nia an saiyang sadiri’ na idolot an atang na tinotong tanganing palumoyon an lalaougon ni Jehova. Para ki Hadeng Saul, an pagdolot kan atang na iyan mas mahalaga kisa pagkuyog sa inako niang instruksion na halaton si Samuel na iyo an mag-atang. Sinabi sa saiya ni Samuel: “Sa rungaw an saimong ginibo. Dai mo kinuyog an togon ni Jehova na saimong Dios na ipinagboot nia sa saimo.” Huli sa pagmasumbikal nia ki Jehova, nawara an pabor nin Dios ki Saul bilang hade.—1 Samuel 10:8; 13:5-13.

9. Paano ipinaheling ni Saul an ugale na pagmasumbikal sa Dios?

⁹ Nakanood daw nin leksion an hade sa eksperyensiang ini? Dai! Sa huri, ipinagboot ni Jehova  ki Saul na pohoon an nasyon nin Amalec, na bago kaidto suminalakay sa Israel na mayo nin pagprobokar. Dai ngani dapat itadang buhay ni Saul an saindang magarong mga hayop. Kinuyog nanggad nia si Jehova paagi sa ‘pagpabagsak sa Amalec hale sa Havila sagkod sa Sur.’ Kan mag-abot si Samuel tanganing tagboon sia, an hade ogmahon huli sa kapangganahan asin nagsabi: “Binendisyonan ka ni Jehova. Inotob ko an tataramon ni Jehova.” Pero, sarongat sa klarong mga instruksion na inako ninda, itinadang buhay ni Saul asin kan saiyang banwaan si Hadeng Agag asin an “pinakamarahay kan aripompon asin kan mga baka asin kan mga matataba asin . . . mga lalaking karnero asin . . . gabos na marahay.” Ipinangatanosan ni Hadeng Saul an pagmasumbikal nia paagi sa pagsabing: “Nagmalasakit an banwaan sa pinakamarahay kan aripompon asin kan mga baka, sa katuyohan na mag-atang ki Jehova na saimong Dios.”—1 Samuel 15:1-15.

10. Anong leksion an dai nanodan ni Saul?

¹⁰ Sa puntong iyan, sinabi ni Samuel ki Saul: “Igwa daw nin dakulang pagkaogma si Jehova sa mga dolot na tinotong asin atang na arog kan sa pagkuyog sa tingog ni Jehova? Uya! An pagkuyog orog na marahay kisa atang, an pag-atento kisa taba nin mga karnero.” (1 Samuel 15:22) Mantang sinabi na ni Jehova na dapat laglagon an mga hayop na idto, dai idto puedeng idolot bilang mga atang.

Magin Makinuyog sa Gabos na Bagay

11, 12. (a) Paano minamansay ni Jehova an satong mga paghihingoa na paogmahon sia paagi sa satong pagsamba? (b) Paano puedeng dayaon nin saro an saiyang sadiri sa pag-isip na ginigibo nia an kabotan nin Dios mantang sa katunayan sia bakong makinuyog?

¹¹ Kanigoan an kaogmahan ni Jehova na maheling an saiyang maimbod na mga lingkod na nagdadanay na marigon sa ibong nin persekusyon, nagbabalangibog kan Kahadean sa ibong nin pagkaindiperente kan mga tawo, asin nag-aatender sa Kristianong mga pagtiripon minsan ngani nasasakitan sa paghanap-buhay! An pagigin makinuyog niato sa siring na mahahalagang aspekto kan satong espirituwal na buhay nagpapagayagaya nanggad sa saiyang puso! An mga paghihingoa niato na sambahon si Jehova mahalagang marhay sa saiya kun ginigibo niato iyan huli sa pagkamoot. Tibaad dai intindihon nin mga tawo an satong pagpapagal, alagad naheheling nin Dios an satong odok sa pusong mga atang asin ginigirumdom nia iyan.—Mateo 6:4.

¹² Minsan siring, tanganing lubos niatong mapaogma an Dios, dapat na magin makinuyog kita sa gabos na aspekto kan satong buhay. Dai niato noarin man dapat na dayaon an satong sadiri sa pag-isip na puede niatong lapason an nagkapirang kahagadan nin Dios basta naggigibo kita nin pagsamba sa saiya sa ibang aspekto kan satong buhay. Halimbawa, puedeng dayaon nin saro an saiyang sadiri sa pag-isip na kun ginigibo nia an nagkapira sa mga kabtang nin pormal na pagsamba,  madudulagan nia an padusa sa pagkomiter nin imoralidad o paggibo nin iba pang magabat na kasalan. Sala nanggad iyan!—Galacia 6:7, 8.

13. Sa pribado, paano puedeng mabalo an pagigin makinuyog niato ki Jehova?

¹³ Huli kaiyan, puede niatong hapoton an satong sadiri, ‘Kinukuyog ko daw si Jehova sa sakong aroaldaw na mga aktibidad, dawa sa garo baga pribadong mga bagay?’ Si Jesus nagsabi: “An maimbod sa pinakakadikit maimbod man sa dakol, asin an bakong matanos sa pinakakadikit bako man na matanos sa dakol.” (Lucas 16:10) Kita daw ‘naglalakaw sa integridad kan satong puso’ dawa ‘sa laog kan satong harong,’ na dai kita naheheling kan iba? (Salmo 101:2) Iyo, mantang nasa laog kita kan satong harong, puedeng mabalo an satong integridad. Sa dakol na nasyon na an komputer ordinaryo na sanang gamit sa harong, pasil sanang magheling nin malaswang mga retrato asin mga eksena. Pira pa sanang taon an nakaagi, an saro dai makakaheling kan mga iyan sagkod na dai sia magduman sa mga lugar na nagtatampok nin imoral na aling-alingan. Kita daw makinuyog na mahimate sa mga tataramon ni Jesus: “An lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso”? Iyo, sasayumahan daw niato dawa an pagheling sana sa imoral na mga retrato? (Mateo 5:28; Job 31:1, 9, 10; Salmo 119:37; Talinhaga 6:24, 25; Efeso 5:3-5) Kumusta an mga programa sa TV na may madahas na mga eksena? Kita daw kaoyon kan satong Dios, na ‘naoongis nanggad sa siisay man na namomoot sa kadahasan’? (Salmo 11:5) O kumusta an sobrang pag-inom sa pribado nin inomon na de alkohol? Kinokondenar kan Biblia an pagbuburat, alagad pinapatanidan man kaiyan an mga Kristiano na dai magin ugale an pag-inom nin “dakol na arak.”—Tito 2:3; Lucas 21:34, 35; 1 Timoteo 3:3, nota sa ibaba.

14. Ano an nagkapirang paagi na ikakapaheling niato an pagigin makinuyog sa Dios sa mga bagay na may koneksion sa kuarta?

¹⁴ An saro pang kamugtakan na kaipuhan kitang magin mapagbantay iyo an mga bagay na may koneksion sa kuarta. Halimbawa, makikilabot daw kita sa mga pakana na biglang pagyaman na haros man sana pandadaya? Natetentaran daw kita na gumamit nin ilegal na mga paagi tanganing makalikay sa pagbayad nin buhis? O, imbes kaiyan, maimbod daw niatong kinukuyog an pagboot na “itao sa gabos an nanonongod sa sainda, sa saiya na naghahagad nin buhis, an buhis”?—Roma 13:7.

Pagkuyog na Naggigikan sa Pagkamoot

15. Taano ta kinukuyog nindo an mga pagboot ni Jehova?

¹⁵ An pagkuyog sa mga tokdo nin Dios nagbubunga nin mga bendisyon. Halimbawa, paagi sa dai paggamit nin tabako, pamumuhay na may marahay na moral, asin paggalang sa kabanalan nin dugo, puede niatong malikayan na magin biktima nin nagkapirang helang. Dugang pa, paagi sa pag-oyon kan iba pang aspekto kan satong pamumuhay sa katotoohan sa Biblia, puedeng makinabang kita sa pinansial asin sosyal na paagi, o makinabang an satong pamilya. (Isaias 48:17) Tama sanang mansayon niato an arin man sa aktuwal na mga pakinabang na iyan bilang mga bendisyon na nagpapatunay sa pagigin praktikal kan mga ley nin Dios. Pero, an pangenot na dahelan sa pagkuyog niato ki Jehova iyo na namomotan niato sia. Dai kita naglilingkod sa Dios huli sa maimot na mga dahelan. (Job 1:9-11; 2:4, 5) Tinawan kita nin Dios kan katalingkasan na pumili kun siisay man an gusto niatong kuyogon. Pinili niatong kuyogon si Jehova huli ta gusto niatong paogmahon sia asin huli ta hinihingoa niatong gibohon an tama.—Roma 6:16, 17; 1 Juan 5:3.

16, 17. (a) Paano ipinaheling ni Jesus an pagigin makinuyog sa Dios huli sa odok sa pusong pagkamoot? (b) Paano niato maaarog si Jesus?

¹⁶ Itinao ni Jesus an sangkap na halimbawa nin pagkuyog ki Jehova huli sa odok sa pusong pagkamoot sa Saiya. (Juan 8:28, 29) Mantang nasa daga, si Jesus “nakanood nin pagkuyog hale sa mga bagay na saiyang tinios.” (Hebreo 5:8, 9) Paano? Si Jesus “nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.” (Filipos 2:7, 8) Minsan ngani nagin makinuyog na si Jesus kan nasa langit, orog pang nabalo an pagigin makinuyog nia kan sia nasa daga. Makakasierto kita na sa gabos na paagi  kualipikadong marhay si Jesus na maglingkod bilang Halangkaw na Saserdote para sa espirituwal na mga tugang nia saka sa iba pang may pagtubod na katawohan.—Hebreo 4:15; 1 Juan 2:1, 2.

¹⁷ Kumusta man kita? Maaarog niato si Jesus paagi sa pagtao nin prioridad na kuyogon an kabotan nin Dios. (1 Pedro 2:21) Puedeng personal kitang makanompong nin pagkakontento kun minomotibar kita kan satong pagkamoot sa Dios na gibohon an ipinagboboot ni Jehova, dawa sa mga panahon na ginigipit o sinusugotan kita na lapason an saiyang pagboot. (Roma 7:18-20) Kalabot digdi an pagigin andam niato na sumunod sa paggiya kan mga nangengenot sa tunay na pagsamba, dawa ngani sinda bakong sangkap. (Hebreo 13:17) Mahalagang marhay sa pagheling ni Jehova an pagkuyog niato sa mga togon nia sa satong pribadong buhay.

18, 19. Ano an resulta kan satong odok sa pusong pagkuyog sa Dios?

¹⁸ Ngonyan, puedeng kalabot sa pagkuyog niato ki Jehova an pagtagal sa persekusyon tanganing papagdanayon an satong integridad. (Gibo 5:29) Siring man, an pagkuyog niato sa pagboot ni Jehova na maghulit asin magtokdo nangangaipo nin pakatagal niato sagkod sa katapusan kan sistemang ini nin mga bagay. (Mateo 24:13, 14; 28:19, 20) Kaipuhan niato an pakatagal tanganing padagos na makipagtipon sa satong mga tugang, dawa ngani tibaad namamatean niato an gabat kan mga pangigipit kan kinaban. Aram nin lubos kan satong mamomoton na Dios an satong mga paghihingoa na magin makinuyog sa siring na mga kamugtakan. Minsan siring, tanganing lubos na magin makinuyog, dapat na labanan niato an satong makasalan na laman asin rayoan an maraot mantang pinapakosog an pagpahalaga sa marahay.—Roma 12:9.

¹⁹ Kun pinaglilingkodan niato si Jehova huli sa pagkamoot asin na may mapag-apresyar na puso, para sa sato “sia nagigin an parabalos sa mga maigot na naghahanap sa saiya.” (Hebreo 11:6) An tamang mga atang kaipuhan asin kawiliwili, alagad an pinakanakakapaogma sa saiya iyo an lubos na pagkuyog huli sa pagkamoot ki Jehova.—Talinhaga 3:1, 2.

Ano an Isisimbag Nindo?

• Taano ta makakapagsabi kita na igwa kitang ikakatao ki Jehova?

• Anong mga sala an nagibo ni Saul?

• Paano nindo ikakapaheling na nagtutubod kamo na an pagkuyog mas marahay kisa atang?

• Ano an nagpapahiro sa saindo na kuyogon si Jehova?

[Mga Hapot Para sa Pag-adal]

[Ritrato sa pahina 26]

Ano an mamamatean nin sarong nagmamakolog na doktor manongod sa sarong pasyente na dai nag-iintindi sa mga rekomendasyon nia?

[Ritrato sa pahina 28]

Taano ta napaanggot ni Hadeng Saul si Jehova?

[Mga Ritrato sa pahina 30]

Kinukuyog daw nindo an mga pagboot nin Dios sa saindong pribadong harong?