An Pagtotokdo sa Biblia Nagpaparigon sa Pagtubod

“MAHALAGANG marhay nanggad an pribilehio na gamiton an nakaaging limang bulan sa pagtao nin atension sa mga kaisipan kan satong Kaglalang asin sa pakanood na mansayon an mga bagay nin siring sa pagmansay nia!” an sabi nin sarong representante kan ika-122 na klase kan Paadalan sa Biblia kan Watchtower sa Gilead sa aldaw kan gradwasyon. An Marso 10, 2007, sarong aldaw na dai malilingawan kan 56 na miembro kan klase, na sa dai na mahahaloy mapoon nang maglingkod bilang misyonero sa 26 na nasyon kun saen sinda iinasignar.

Pagkatapos nin maogmang pag-ako sa 6,205 nagdadangog, si Theodore Jaracz, miembro kan Namamahalang Grupo, nagsabi: “Kompiado kami na mapapakosog kamo sa espirituwal asin mapaparigon an saindong pagtubod bilang resulta kan pag-atender sa programa sa gradwasyon na ini.” Sunod-sunod niang iinintrodusir an apat na ispiker na matao sa mga estudyante nin napapanahon na pamparigon sa boot asin hatol na basado sa Biblia tanganing tabangan sindang magin mapanggana sa saindang asignasyon bilang mga misyonero.

Nakakaparigon na mga Tataramon Tanganing Parigonon an Pagtubod nin Iba

Si Leon Weaver, miembro kan Komite kan Sangang Opisina sa Estados Unidos, nagpahayag sa temang “Magpadagos sa Paggibo nin Karahayan.” Ipinagirumdom nia sa mga estudyante na an kada saro sa sainda naggamit na sa promedyo nin 13 taon sa bilog na panahon na paglilingkod, na pinapaoswag an pagtotokdo sa Biblia na nakakaparigon sa pagtubod. Sia nagsabi: “Iyan marahay na gibo huli ta kalabot dian an pagliligtas nin buhay nin mga tawo, asin an mas mahalaga, iyan marahay na gibo huli ta ibinabantog kaiyan an kadakulaan kan satong langitnon na Ama, si Jehova.” Dangan pinarigon ni Tugang na Weaver an boot kan mga estudyante na padagos na ‘magtanom sa espiritu’ asin dai “mag-ontok sa paggibo nin karahayan.”—Galacia 6:8, 9.

Si David Splane, miembro kan Namamahalang Grupo, nagtao nin praktikal na mga pagirumdom mientras na ipinapaliwanag nia an temang “Siertohon na Magibo an Pinakamarahay sa Kapinonan Pa Sana.” Pinarigon ni Tugang na Splane an boot kan bagong mga misyonero na mapangganang ponan an saindang mga asignasyon paagi sa paggibo kan minasunod: “Papagdanayon an positibong aktitud. Dai tolos magkonklusyon. Magin makikatood. Dai magin mapagkritika. Magin mapakumbaba, asin igalang an mga tugang sa lokal.” Dangan sinabi pa nia: “Pagbaba nindo sa eroplano, gibohon nindo an pinakamarahay sa kapinonan pa sana, asin bendisyonan logod ni Jehova an saindong magayon na mga bitis mientras na dinadara kaiyan sa mga tawo an ‘maogmang bareta dapit sa bagay na orog karahay.’”—Isaias 52:7.

 “Sarong Seguradong Pamana” an temang ipinahayag kan instruktor sa Gilead na si Lawrence Bowen. Ipinagirumdom ni Tugang na Bowen sa mga estudyante na an pagkaestablisar kan Paadalan nin Gilead durante kan Guerra Mundial II nakabasar sa lubos na pagtitiwala sa kaotoban kan makahulang Tataramon ni Jehova. (Hebreo 11:1; Kapahayagan 17:8) Poon kaidto, an Gilead nagtatao na nin oportunidad sa mga estudyante na pakosogon an saindang pagtubod. An makosog na pagtubod nagtutulod sa mga naggradwar na magpadagos, na maigot na ibinabalangibog an katotoohan.

Si Mark Noumair, saro pang instruktor sa Gilead, nagpahayag manongod sa nakakapukaw nin interes na temang “May Nagigirumdoman Ako na Kaagid Nindo.” Dinara nia an atension sa halimbawa ni propeta Eliseo, na nagpaheling nin  pagtubod asin kosog nin boot sa saiyang asignasyon. Ibinabasar an saiyang mga komento sa 1 Hade 19:21, si Tugang na Noumair nagsabi: “Andam si Eliseo na gumibo nin mga pagliliwat sa saiyang buhay, gibohon na sekondaryo an saiyang personal na intereses, asin surogon an katuyohan ni Jehova.” Tinawan nia nin komendasyon an mga naggradwar huli sa pagpaheling ninda nin kaparehong espiritu asin pinarigon an boot ninda na padagos na gibohon iyan sa saindang bagong mga asignasyon.

An Pagtubod Nagbubunga nin Katalingkasan sa Pagtaram

Mantang pinaparigon kan magigin mga misyonero an saindang pagtubod durante kan pag-adal, inaprobetsaran ninda an mga katapusan kan semana tanganing ihulit sa iba an maogmang bareta. Nagbunga ini nin marahayon na mga eksperyensia na isinaysay asin iinakto sa sarong kabtang kan programa na pinamayohan ni Wallace Liverance, saro pang instruktor sa Gilead. An tema kan saiyang kabtang, “Kami Nagtutubod Asin Kun Siring Kami Nagtataram,” nagpapagirumdom kan mga tataramon ni apostol Pablo na yaon sa 2 Corinto 4:13.

Kasunod kan kabtang na ini, si Daniel Barnes asin Charles Woody, mga miembro kan pamilyang Bethel, nag-interbio nin mga misyonero sa presente asin dating mga misyonero. Itinampok kaini an pagmakolog asin bendisyon ni Jehova sa mga maimbod na naglilingkod sa saiya. (Talinhaga 10:22; 1 Pedro 5:7) An sarong misyonero nagkomento: “Kaming mag-agom nakaeksperyensia nanggad kan pagmakolog ni Jehova paagi sa pagtotokdo na inako niamo sa Gilead. Talagang pinarigon kaiyan an samong pagtubod. Mahalaga an pagtubod huli ta an gabos na lingkod nin Dios, pati an mga misyonero, magkakaigwa nin mga pagbalo, problema, asin kahaditan.”

Padagos na Palakopon an Pagtotokdo sa Biblia na Nagpaparigon sa Pagtubod

Bilang angay na kulminasyon kan programa sa gradwasyon, si Samuel Herd, miembro kan Namamahalang Grupo, nagpahayag sa mga nagdadangog kan temang “Padagos na Parigonon an Saindong mga Tugang.” Ano an katuyohan kan pagtotokdo na inako kan mga estudyante? “An katuyohan kaiyan iyo na tokdoan kamo kun paano gagamiton an saindong dila sa pag-omaw ki Jehova, sa pagtokdo sa iba kan saiyang mga katotoohan sa bagong iinasignar sa saindo na teritoryo, asin sa pagparinigonan nin pagtubod,” an sabi ni Tugang na Herd. Minsan siring, ipinagirumdom nia sa mga estudyante na an dila puede man na magpalakop nin mga bagay na dai nakakaparigon. (Talinhaga 18:21; Santiago 3:8-10) Pinarigon nia an boot kan mga estudyante na arogon an halimbawa ni Jesus sa paggamit kan saindang dila. Sarong beses, pagkatapos na hinanyogon si Jesus, an saiyang mga disipulo nagsabi: “Bakong naglaad an satong puso . . . mantang lubos niang binubuksan sa sato an Kasuratan?” (Lucas 24:32) Si Tugang na Herd nagsabi: “Kun an saindong mga tataramon nakakaparigon, matataros kaiyan an puso kan saindong mga tugang sa saindong destino.”

Sunod, inako kan mga naggradwar an saindang diploma. Dangan binasa an sarong surat nin apresasyon hale sa klase. Iyan nagsabi: “Igwa kami nin dakulang paninimbagan na gamiton an nanodan niamo tanganing maimbod na gibohon an samong asignasyon bilang mga misyonero. Mantang kami andam nang magduman sagkod sa kaporoporohi kan daga, ipinapamibi niamo na logod na an samong mga paghihingoa magbunga nin makosog na kurahaw nin pag-omaw sa satong Kaharohalangkaweng Paratokdo, si Jehova Dios.” An mga nagdadangog suminimbag paagi sa odok sa pusong pag-upak. Tunay nanggad, an programa sa gradwasyon nagparigon sa pagtubod kan gabos na nag-atender.

[Blurb sa pahina 17]

“Kun an saindong mga tataramon nakakaparigon, matataros kaiyan an puso kan saindong mga tugang sa saindong destino”

[Kahon sa pahina 15]

ESTADISTIKA KAN KLASE

Bilang nin mga nasyon na irinepresentar: 9

Bilang nin mga nasyon na inasignaran: 26

Bilang nin mga estudyante: 56

Promedyong edad: 33.4

Promedyong taon sa katotoohan: 16.8

Promedyong taon sa bilog na panahon na ministeryo: 13

[Ritrato sa pahina 16]

Ika-122 na Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala sagkod sa too sa kada raya.

(1) Howitt, R.; Smith, P.; Martinez, A.; Pozzobon, S.; Kitamura, Y.; Laud, C. (2) Fiedler, I.; Beasley, K.; Matkovich, C.; Bell, D.; Lippincott, W. (3) Sites, W.; Andersen, A.; Toevs, L.; Fusano, G.; Rodríguez, C.; Yoo, J. (4) Sobomehin, M.; Thomas, L.; Gasson, S.; Dauba, V.; Bertaud, A.; Winn, C.; Dobrowolski, M. (5) Yoo, J.; Dauba, J.; Mixer, H.; Newton, M.; Rodríguez, F.; Mixer, N. (6) Laud, M.; Lippincott, K.; Martinez, R.; Haub, A.; Schamp, R.; Pozzobon, L.; Toevs, S. (7) Howitt, S.; Kitamura, U.; Newton, D.; Haub, J.; Sites, J.; Thomas, D. (8) Sobomehin, L.; Matkovich, J.; Fusano, B.; Winn, J.; Schamp, J.; Andersen, D.; Dobrowolski, J. (9) Fiedler, P.; Bell, E.; Beasley, B.; Smith, B.; Bertaud, P.; Gasson, M.