“Nagkakabaranga Huli sa Lenguahe Alagad Nagkakasararo Huli sa Pagkamoot”

Kaligtasan. Katalingkasan. Sa laog nin dakol na siglo, hinidaw nin mga tawo an pakaginhawa sa mga pasanon asin kahaditan. Paano niato makakaya an mga problema sa buhay? Magkakaigwa pa daw nin kaligtasan? Asin kun iyo, paano?

IYAN an tema kan serye nin tolong aldaw na pandistritong kombension, na inorganisar kan Mga Saksi ni Jehova, na nagpoon kan Mayo 2006. An pinakatema iyo an “Harani Na an Kaligtasan!”

An siyam sa mga kombension na ini inatenderan nin rinibong delegado hale sa laen-laen na nasyon. Iyan isinagibo kan Hulyo asin Agosto 2006, sa Prague, na kabisera kan Republikang Czech; sa Bratislava, na kabisera kan Eslovaquia; sa Chorzow asin Poznan, Polandia; * asin sa limang siudad sa Alemania—Dortmund, Frankfurt, Hamburg, Leipzig, asin Munich. Labing 313,000 an pinagsararong bilang nin mga nag-atender sa mga kombension na ini.

Anong klaseng espiritu an lakop sa mga kombension? Ano an sinabi nin publisidad manongod sa sainda? Asin ano an namatean kan mga kombensionista pagkatapos na mag-atender sa mga kombension?

Mga Pag-andam

An mga bisita asin lokal na mga Saksi parareho may makosog na pag-antisipar sa mga kombension na segurado sindang magigin dai malilingawan na espirituwal na mga okasyon. Dakulang trabaho an pag-areglar nin supisyenteng mga dadagosan para sa mga delegado. Halimbawa, para sa kombension sa Chorzow, nag-alok an Polacong mga Saksi na magdagos sa saindang harong an haros 13,000 na bisita hale sa Europa Oriental. Nag-abot an mga grupo nin mga delegado sa kombension na iyan hale sa Armenia, Belarus, Estados Unidos, Estonia, Georgia, Kazakhstan, Kyrgyzstan, Latvia, Lituania, Moldova, Rusya, Tajikistan, Turkmenistan, Ucrania, asin Uzbekistan.

Kinaipuhan nin dakol na delegado na ponan nin dakol na bulan antes pa an pag-andam para sa saindang pagbiahe. Si Tatiana sarong bilog na panahon na ebanghelisador sa Kamchatka, na peninsula sa Rusya na nasa amihanan-sirangan kan Hapon. Nagpoon siang magtipon para sa saiyang biahe sarong taon bago pa kaiyan. Kinaipuhan niang magbiahe nin mga 10,500 kilometros. Enot, nag-eroplano sia nin 5 oras; dangan nagbiahe sia nin haros tolong aldaw sa tren, asin sa katapustapusi naggamit sia nin 30 oras sa bus tanganing makaabot sa Chorzow.

Rinibo an nagboluntaryo para sa gibohon bago an kombension, na ginigibong angay na mga lugar para sa pagsamba an mga istadyum asin an palibot kaiyan. (Deuteronomio 23:14) Sa pagsambit nin saro sanang halimbawa, sa Leipzig marahayon an ginibo nin lokal na mga Saksi sa  paglinig kan istadyum, asin nanuga sinda na gigibohon giraray iyan pagkatapos kan kombension. Bilang resulta, kinanselar nin mga opisyal kan istadyum an sarong kabtang kan kontrata sa pag-arkila na naghagad nin darudakulang bayad para sa paglinig.

Mga Imbitasyon

An mga kongregasyon sa bilog na kinaban nagtao nin mahiwas na publisidad sa “Harani Na an Kaligtasan!” na mga Kombension. An mga indibiduwal na maatender sa espesyal na mga kombension nakikabtang nin entusiastikong marhay sa kampanyang ini. Padagos nindang tinawan nin publisidad an kombension sagkod sa matangang banggi bago magpoon an kombension. Nagbunga daw nin ano man na mararahay na resulta an saindang kaigotan?

An sarong Polacong Saksi na an ngaran Bogdan may nakamidbid na may edad nang lalaki na gustong mag-atender sa kombension alagad nagsabi ini na huling kadikit sana an saiyang pension dai sia makakabiahe nin 120 kilometros pasiring sa Chorzow. Nangyari na igwa palan nin sarong bakanteng tukawan sa bus na inarkila kan lokal na kongregasyon. Isinaysay ni Bogdan: “Sinabi niamo sa lalaking iyan na puede siang umiba sa samo nin daing bayad kun sia maduman nin alas 5:30 nin aga sa lugar na paghahalean.” Inako kan lalaki an imbitasyon asin nag-atender sia sa kombension. Paghaloyhaloy nagsurat sia sa mga tugang, na nagsasabi: “Pakaatender sa kombension na ini, determinado akong magin mas marahay na tawo.”

Sa Prague, sarong lalaki an nagdagos sa saro sa mga hotel na ginamit kan mga delegado hale sa Britania. Sarong banggi, sinabi nia sa mga kombensionista na sia nag-atender man sa mga sesyon kan aldaw na iyan. Ano an nagpahiro sa saiya na mag-atender? Nagsabi an lalaking iyan na pakaresibi nia nin mga imbitasyon hale sa sampulong laen-laen na parahayag na nasa mga tinampo kan siudad, namatean nia na kaipuhan niang magduman! Naghanga siang marhay asin gustong-gusto niang makanood nin orog pa.—1 Timoteo 2:3, 4.

Nakakapakosog na Espirituwal na Programa

Tinokar kan programa kun paano makakaya an laen-laen na problema. Ipinaliwanag kan deretso sa punto na hatol sono sa Kasuratan kun paano mareresolberan o matatagalan an mga problemang ini.

An mga indibiduwal na napupurisaw huli sa paggurang, maluyang salud, pagkagadan nin mga namomotan, o iba pang personal na problema nag-ako nin pamparigon sa boot hale sa Biblia tanganing tabangan sindang magkaigwa nin mas marahay na pagmansay sa buhay. (Salmo 72:12-14) An mga mag-agom asin magurang nakadangog nin hatol basado sa Biblia kun paano magigin maogma bilang mag-agom asin kun paano mapangganang mapapadakula an saindang mga aki. (Eclesiastes 4:12; Efeso 5:22, 25; Colosas 3:21) An hoben na mga Kristiano namemeligro sa nakakaraot na impluwensia nin kairiba sa eskuelahan. Alagad nag-aako sinda sa harong asin sa kongregasyon nin madonong na hatol hale sa Tataramon nin Dios. Nag-ako man sinda nin praktikal na hatol kun paano aatubangon an pangigipit kan saindang mga kaibaiba asin kun paano ‘madulag sa mga mawot na konektado sa pagkahoben.’—2 Timoteo 2:22.

Sarong Totoong Internasyonal na Kasararoan nin Magturugang

An Mga Saksi ni Jehova pirmeng nag-aako nin marahay asin sono sa Kasuratan na paggiya sa saindang mga pagtiripon. (2 Timoteo 3:16) Minsan siring, an nagpangyari na magin laen an mga kombension na ini  iyo an internasyonal na karakteristiko kaiyan. Iprinesentar kan gabos na espesyal na kombension an pararehong espirituwal na programa sa dakol na lenguahe. Kada aldaw, nagtao nin mga pahayag an mga miembro kan Namamahalang Grupo kan Mga Saksi ni Jehova, asin nakadugang nin espesyal na interes an mga report hale sa ibang mga nasyon. An mga pahayag asin report na ini ininterpretar para sa kapakinabangan kan manlaenlaen na grupo nin magkakalenguahe na presente.

Entusiastiko an mga delegado na mamidbid an saindang mga tugang hale sa ibang mga nasyon. “Dai nagtao nin ano man na dakulang mga problema an mga pagkakalaen sa lenguahe,” an sabi nin sarong delegado. “Sa kabaliktaran, iyan nakadugang sa kagayagayahan kan okasyon. An mga bisita hale sa laen-laen na kultura, alagad sinda gabos nagkakasararo huli sa pararehong pagtubod.” An mga nag-atender sa kombension sa Munich nagsabi nin arog kaini: “Nagkakabaranga huli sa lenguahe alagad nagkakasararo huli sa pagkamoot.” Ano man an saindang dagang tinuboan o lenguahe, namatean kan mga nag-atender na sinda nasa tahaw nin tunay na mga katood—mga tugang sa espirituwal.—Zacarias 8:23.

Mga Kapahayagan nin Pagpasalamat

An espiritu asin pagtagal kan mga delegado nabalo huli sa kamugtakan kan panahon durante kan mga kombension sa Polandia. Bako sanang nag-oran sa kadaklan na panahon kundi nagin malipoton man—mga 14 grado Celsio. Nagkomento an sarong tugang na lalaki hale sa Estados Unidos: “Iyan an pinakamaraot na kamugtakan kan panahon asin an pinakahababang temperatura na naeksperyensiahan ko kasuarin man sa sarong kombension, asin dikit sana an nasabotan ko sa programa. Alagad an nakahipno sa gabos na iyan iyo an pambihirang internasyonal na kamugtakan, an marahayon na espiritu, asin an daing kaagid na pagkamapag-istimar. Dai ko malilingawan an kombension na ini!”

An sarong dai malilingawan kan mga kombensionista na an tataramon Polaco iyo an paisi na makukua na an Insight on the Scriptures sa Polaco—sarong marahayon na premyo sa pagtagal ninda kan lipot asin oran. An paisi na makukua na an bagong publikasyon na Live With Jehovah’s Day in Mind nagbunga man nin dakulang kagayagayahan sa gabos na “Harani Na an Kaligtasan!” na mga Kombension.

An kombension magigirumdoman nin dakol sa mga presente huli sa iba pang mga dahelan. Nagigirumdoman ni Kristina, sarong tugang na taga Czechoslovakia na nagboluntaryong ibanan an sarong bus na may grupo nin mga delegado hale sa ibang nasyon: “Kan nagpapaaram na kami sa lambang saro dinara ako nin sarong tugang na babae sa sarong gilid, kinugos nia ako, asin sia nagsabi: ‘Namatean kong inataman akong marhay! Dinarahan nindo kami nin kakanon sa samo mismong mga tukawan asin tinawan pa ngani nindo kami nin tubig na maiinom. Salamat nanggad sa saindong mapagsakripisyong pagkamoot.’” An nasambitan nia iyo an probisyon na pangudtohan para sa mga delegado hale sa ibang nasyon. “Iyan sarong klase nin gibohon na dai mi naeksperyensiahan kan nakaagi,” an paliwanag nin sarong tugang na lalaki. “Kalabot sa gibohon na iyan an paghatod nin haros 6,500 na pangudtohan kada aldaw. Nakakapukaw sa boot na maheling kun gurano kadakol, pati mga aki, an nagboluntaryong tumabang.”

Nagsabi an sarong tugang na babae na nagbiahe pasiring sa Chorzow hale sa Ucrania para sa kombension: “Napahiro kaming marhay kan pagkamoot, pagmakolog, asin pagigin buka an palad na ipinaheling kan samong mga kapagtubod. Kulang an mga tataramon tanganing ipahayag an samong pagpasalamat.” Asin an otso anyos na si Annika hale sa Finlandia nagsurat sa sangang opisina kan Mga Saksi ni Jehova sa Polandia: “Orog na marahayon pa ngani an kombension kisa sa inimahinar ko. Marahayon na mapabilang sa organisasyon ni Jehova, huli ta an saro may mga katood sa bilog na kinaban!”—Salmo 133:1.

 Mga Komento nin mga Nagmamasid

Bago an mga kombension, inareglar an mga pamamasyar para sa nagkapira sa mga delegado. Sa probinsia kan Bavaria, naghapit an mga bisita sa mga Kingdom Hall, na dian maogma sindang inako kan lokal na mga Saksi. An sarong bakong Saksi na naggigiya sa pamamasyar nin sarong grupo naghangang marhay sa kapahayagan na ini nin kapadangatan na sa magturugang. “Sa bus pabalik sa samong hotel,” an ibinareta nin sarong delegado, “an naggigiya sa pamamasyar nagsabi na laen kaming marhay sa ibang mga grupo nin namamasyar. Marahay an samong paggubing, asin an gabos nakipagtabangan sa mga nangengenot sa grupo. Mayo nin pagraway asin mayo nin karibarawan. Nagngalas sia kun paano tolos-tolos na puedeng magin siring karahay na magkakatood an mga dai magkakamidbid.”

Nagsaysay an sarong tugang na lalaki na naglingkod sa News Service Department kan kombension sa Prague: “Kan Domingong aga, dinalaw kami kan opisyal na namamahala sa mga pulis na nakaasignar sa kombension. Naobserbaran nia na igwa nin katoninongan asin sinabi nia na mayo na siang kaipuhan na gibohon. Sinambit man nia na may nagkapirang lokal na residente sa palibot kan istadyum na naghapot mapadapit sa programa. Kun sinasambit nia an Mga Saksi ni Jehova, parate nindang ipinapahayag an saindang pagkadesganar, dangan sasabihon sa sainda kan opisyal: ‘Kun an mga tawo gumawe minsan paano na siring sa Mga Saksi ni Jehova, dai na ngani kaipuhan an mga pulis.’”

Dakol Na an Nakaligtas!

An Tataramon nin Dios, an Biblia, nagseserbing garo tulay sa pag-oltanan nin mga kultura, na pinag-iiriba an mga Kristiano sa katoninongan asin pagkasararo. (Roma 14:19; Efeso 4:22-24; Filipos 4:7) Napatunayan ini kan “Harani Na an Kaligtasan!” na espesyal na mga kombension. Nakaligtas na an Mga Saksi ni Jehova sa dakol sa mga damat na nagpapasakit nin makuri sa kinaban na ini. An pagpalaenlaen, karingisan, asin rasismo—sa pagsambit nin pira sana sa mga problema kan sosyedad—haros nahale na sa tahaw ninda, asin inaantisipar ninda an panahon na an bilog na kinaban mayo na nin siring na mga problema.

Naeksperyensiahan mismo kan mga nag-atender sa mga kombension na ini an pagkasararo sa tahaw nin mga Saksi hale sa laen-laen na nasyon asin kultura. Narisang marhay ini sa pagtatapos kan mga kombension. An gabos nag-uurupak, kinukugos an bagong mga katood, asin nagkukurua nin ultimong mga retrato. (1 Corinto 1:10; 1 Pedro 2:17) Maogma asin kombensido na harani na an kaligtasan sa gabos na problema asin kahaditan, an mga delegado nagbuelta sa saindang harong asin kongregasyon na may napakosog giraray na determinasyon na mangapot nin marigon na marhay sa ‘tataramon nin Dios nin buhay.’—Filipos 2:15, 16.

[Nota sa Ibaba]

[Kahon/Ritrato sa pahina 10]

Beinte Sais na Lenguahe Alagad Nagkakasararo

Sa gabos na siyam na kombension, iprinesentar an programa sa lokal na lenguahe. Durante kan mga kombension sa Alemania, ipinahayag man an mga diskurso sa 18 iba pang lenguahe. Sa Dortmund iprinesentar an mga pahayag sa Arabe, Farsi, Portugues, Kastila, asin Ruso; sa Frankfurt sa Ingles, Pranses, asin Serbiano/Croata; sa Hamburg sa Danes, Holandes, Sueco, asin Tamil; sa Leipzig sa Intsik, Polaco, asin Turco; asin sa Munich sa Griego, Italiano, asin Pagtaram sa Senyas sa Alemania. An gabos na diskurso sa kombension sa Prague ipinahayag sa Czech, Ingles, asin Ruso. Sa Bratislava, may programa sa Eslovaco, Hungario, Ingles, asin Pagtaram sa Senyas sa Eslovaquia. Sa Chorzow, an mga lenguaheng ginamit Polaco, Ruso, Ucrainiano, asin Pagtaram sa Senyas sa Polandia. Asin sa Poznan, mga lenguaheng Polaco asin Finlandes.

Beinte sais na lenguahe gabos! Totoo nanggad, an mga kombensionista nagkakabaranga huli sa lenguahe, alagad sinda nagkakasararo huli sa saindang pagkamoot.

[Ritrato sa pahina 9]

An mga delegado sa Frankfurt na taga Croatia naogmang marhay na mag-ako kan “New World Translation” sa sainda mismong lenguahe