Tampok na mga Kabtang sa Libro nin Ezequiel—I
An Tataramon ni Jehova Buhay
Tampok na mga Kabtang sa Libro nin Ezequiel—I
AN TAON 613 B.C.E. Si propeta Jeremias nasa Juda, na mapusong ibinabalangibog an nagdadangadang na pagkalaglag kan Jerusalem asin an pagigin daing tawo kan daga nin Juda. Dakol nang Judio an dinarang bihag ni Hadeng Nabucodonosor kan Babilonya. Kabilang dian an hoben na si Daniel asin an tolo niang kaibaiba, na naglilingkod sa palasyo kan mga Caldeo. An kadaklan kan Judiong desterrado yaon sa may salog nin Kebar sa “daga kan mga Caldeo.” (Ezequiel 1:1-3) Dai pinabayaan ni Jehova an mga bihag na idto na mayo nin mensahero. Ninombrahan nia bilang propeta an 30 anyos na si Ezequiel.
An libro nin Ezequiel, na natapos kan 591 B.C.E., nagsasaysay kan mga pangyayari sa laog nin 22 na taon. Maingat na marhay si Ezequiel sa saiyang pagsurat. Irinekord nia an petsa kan saiyang mga hula, na espesipikong ibinugtak dawa an aldaw asin an bulan kaiba kan taon. An enot na kabtang kan mensahe ni Ezequiel nagkokonsentrar sa pagbagsak asin pagkalaglag kan Jerusalem. An ikaduwang kabtang mga kapahayagan tumang sa nakapalibot na mga nasyon, asin an huring kabtang may koneksion sa pagbabalik kan pagsamba ki Jehova. Tinotokar sa artikulong ini an tampok na mga kabtang sa Ezequiel 1:1–24:27, na isinasaysay an mga bisyon, hula, asin pag-akto may koneksion sa mangyayari sa Jerusalem.
“GINIBO TAKANG BANTAY”
Pagkatapos na tawan nin nakakapukaw nin may pagkangirhat na paggalang na bisyon manongod sa trono ni Jehova, inako ni Ezequiel an sugo sa saiya. “Ginibo takang bantay sa kamag-anakan nin Israel,” an sabi sa saiya ni Jehova, “asin hinanyogon mo nanggad an tataramon kan sakong ngoso asin kaipuhan na patanidan mo sinda hale sa sako.” (Ezequiel 3:17) Tanganing ihula an pagsalikop sa Jerusalem asin an mga epekto kaiyan, pinagbotan si Ezequiel na iakto an duwang mangyayari. Pinapanongdan an daga nin Juda, nagsabi si Jehova paagi ki Ezequiel: “Uya ako! Mapaabot ako sa saindo nin sarong espada, asin lalaglagon ko nanggad an saindong haralangkaw na lugar.” (Ezequiel 6:3) Sa nag-eerok sa daga, sia nagsabi: “An koronang burak [nin kalamidad] kaipuhan na magdatong sa saimo.”—Ezequiel 7:7.
Kan 612 B.C.E., dinara si Ezequiel sa Jerusalem paagi sa sarong bisyon. Makauuyam na mga bagay nanggad an saiyang naheling na nangyayari sa templo nin Dios! Kun isugo na ni Jehova an saiyang langitnon na mga hukbong paragadan (na irinerepresentar kan “anom na lalaki”) tanganing ipahayag an saiyang kaanggotan sa mga apostata, solamenteng an mga nag-ako nin ‘tanda sa angog’ an ililigtas. (Ezequiel 9:2-6) Pero, enot, an “mga baga nin kalayo”—an malaad na mensahe nin Dios manongod sa paglaglag—dapat na iwarak sa bilog na siudad. (Ezequiel 10:2) Mantang ‘ipapaabot ni Jehova sa payo kan mga maraot an saindang sadiring dalan,’ nanunuga sia na titiponon giraray an nagkawararak kan Israel.—Ezequiel 11:17-21.
Ibinalik si Ezequiel sa Caldea paagi sa espiritu nin Dios. Sarong pag-akto an naglaladawan kan pagdulag ni Hadeng Zedequias asin kan banwaan hale sa Jerusalem. Ibinuyagyag an falsong mga propeta asin propetisa. Isinikwal an mga parasamba sa idolo. Iinagid an Juda sa daing halaga na poon nin ubas. An patood dapit sa agila asin poon nin ubas nagpapaheling kan mapait na mga resulta kan pagdolok kan Jerusalem sa Egipto para sa tabang. Tinatapos an patood paagi sa panuga na ‘itatanom ni Jehova an sarong supang na sanga sa halangkaw na bukid.’ (Ezequiel 17:22) Minsan siring, dai magkakaigwa sa Juda nin “setro sa pamamahala.”—Ezequiel 19:14.
Mga Hapot sa Kasuratan na Sinimbag:
1:4-28—Ano an ilinaladawan kan langitnon na karuwahe? An karuwahe nagrerepresentar sa langitnon na kabtang kan organisasyon ni Jehova na kompuesto nin maimbod na espiritung mga linalang. An gikanan nin kapangyarihan kaiyan iyo an banal na espiritu ni Jehova. An Nakasakay sa karuwahe, na nagrerepresentar ki Jehova, labi-labi kamamuraway. An saiyang pagkakalmado iiniilustrar paagi sa magayon na hablondawani.
1:5-11—Sairisay an apat na nabubuhay na linalang? Sa saiyang ikaduwang bisyon manongod sa karuwahe, sinabi ni Ezequiel na an apat na nabubuhay na linalang mga kerubin. (Ezequiel 10:1-11; 11:22) Sa mas huring deskripsion na ini, inapod nia an lalauogon nin toro na “lalauogon nin kerubin.” (Ezequiel 10:14) Angay ini huling an toro simbolo nin kapangyarihan asin kosog, asin an mga kerubin makapangyarihan na espiritung mga linalang.
2:6—Taano si Ezequiel ta paorootrong inapod bilang “aki nin tawo”? Inaapod ni Jehova si Ezequiel sa paaging ini tanganing ipagirumdom sa propeta na sia sarong tawo, sa siring ipinapaheling an dakulang pagkakalaen kan mensaherong tawo asin kan Dios na Ginikanan kan mensahe. An kaparehong pag-apod ipinanongod ki Jesu-Cristo nin mga 80 beses sa Ebanghelyo, na malinaw na nagpapaheling na an Aki nin Dios nag-abot bilang sarong tawo, bakong bilang espiritung persona na nagsulot nin pisikal na hawak.
2:9–3:3—Taano an balumbon nin mga panambitan asin pag-agrotong ta mahamis an namit para ki Ezequiel? An nagpangyaring magin mahamis an namit kan balumbon para ki Ezequiel iyo an saiyang aktitud sa sugo sa saiya. Nagpasalamat si Ezequiel sa saiyang paglilingkod ki Jehova bilang propeta.
4:1-17—Talaga daw na iinakto ni Ezequiel an eksena na naglaladawan kan nagdadangadang na pagsalikop sa Jerusalem? An pakiolay ni Ezequiel na salidahan an panggatong asin an pagtao ni Jehova kan saiyang kahagadan nagpaparisa na talagang iinakto kan propeta an eksena. An paghigda nin tagilid sa walang hirog, para sa 390 taon na kasalan kan sampulong tribong kahadean—poon sa kapinonan kaiyan kan 997 B.C.E. sagkod sa pagkalaglag kan Jerusalem kan 607 B.C.E. An paghigda nin tagilid sa toong hirog, para sa 40 taon na kasalan nin Juda, na an peryodong iyan poon kan nombrahan si Jeremias bilang propeta kan 647 B.C.E. sagkod 607 B.C.E. Durante kan enterong 430 aldaw, nabuhay si Ezequiel sa dikit na suplay nin pagkakan asin tubig, na makahulang nagpaparisa na magkakaigwa nin tiggutom durante kan pagsalikop sa Jerusalem.
5:1-3—Ano an makahulogan manongod sa pagkua ni Ezequiel nin pira sanang buhok sa kabtang na iwawarak nia sa doros asin sa pagpatos kaiyan sa saiyang gayad? Ipinapaheling kaini na may natatada na mabalik sa Juda asin magsasagibo giraray nin tunay na pagsamba pagkatapos kan 70 taon na pagigin daing tawo kan dagang iyan.—Ezequiel 11:17-20.
17:1-24—Sairisay an duwang dakulang agila, paano ginutos an lumbod na mga saringsing nin sarong sedro, asin siisay an “supang” na itinanom ni Jehova? An duwang agila nagrerepresentar sa mga namamahala kan Babilonya asin Egipto. An enot na agila nag-abot sa pinakaporo kan sedro, an boot sabihon, sa namamahala kan gobyerno sa makahadeng linya ni David. Ginutos kan agilang ini an pinakaporo kan lumbod na mga saringsing paagi sa pagsalida ni Zedequias ki Hadeng Joachin kan Juda. Sa ibong kan pagsumpa nin kaimbodan, hinagad ni Zedequias an tabang kan saro pang agila, an namamahala kan Egipto, alagad dai iyan nagin mapanggana. Sia dadarahon na bihag asin magagadan sa Babilonya. Ginutos man ni Jehova an sarong “supang,” an Mesiyanikong Hade. An Sarong ini itinanom sa “halangkaw asin nangingibabaw na bukid,” sa langitnon na Bukid nin Sion, na duman magigin siang “halangkawon na sedro,” sarong gikanan nin tunay na mga bendisyon para sa daga.—Kapahayagan 14:1.
Mga Leksion Para sa Sato:
2:6-8; 3:8, 9, 18-21. Dai kita maninigong matakot sa maraot ni magpondo sa pagbalangibog kan mensahe nin Dios, na kaiba an pagpatanid sa sainda. Kun napapaatubang sa pagkaindiperente o pagtumang, kaipuhan na kita magin arog katagas nin sarong brilyante. Minsan siring, maninigo kitang mag-ingat na dai tumagas an satong puso, magin daing labot, o magin daing herak. May pagmalasakit si Jesus sa mga tawo na saiyang hinuhulitan, asin maninigo man na pahiroon kita nin pagmalasakit na hulitan an iba.—Mateo 9:36.
3:15. Pakaakoa kan sugo sa saiya, si Ezequiel nag-erok sa Tel-abib, na ‘namumungnan sa laog nin pitong aldaw,’ na hinohorophorop an mensahe na ipapahayag nia. Bako daw na maninigo kitang mahigos na mag-adal asin maghorophorop tanganing masabotan an harararom na espirituwal na katotoohan?
4:1–5:4. Kinaipuhan ni Ezequiel an kapakumbabaan asin kosog nin boot tanganing magibo an duwang makahulang pag-akto. Kaipuhan man niatong magin mapakumbaba asin makosog an boot sa paggibo nin ano man na tao nin Dios na asignasyon.
7:4, 9; 8:18; 9:5, 10. Dai kita kaipuhan na maherak sa mga nag-aako nin bakong paborableng paghokom nin Dios o magmalasakit sa sainda.
7:19. Kun gibohon na ni Jehova an saiyang paghokom sa sistemang ini nin mga bagay, an kuarta mayo na nin ano man na halaga.
8:5-18. An apostasiya nakakagadan sa espirituwal. “Paagi sa saiyang ngoso an tawong apostata ipinapahamak an saiyang kapwa.” (Talinhaga 11:9) Madonong na likayan niato dawa an pag-isip na maghinanyog sa mga apostata.
9:3-6. Tanganing makaligtas sa “dakulang kahorasaan,” mahalagang marhay an pag-ako kan tanda—an ebidensia na kita nagdusay, bautisadong mga lingkod nin Dios asin na igwa kita kan Kristianong personalidad. (Mateo 24:21) An linahidan na mga Kristiano, na irinerepresentar kan lalaki na may tintero nin sekretaryo, an nangengenot sa gibohon na pagtanda, an boot sabihon, an paghuhulit kan Kahadean asin paggibo nin disipulo. Kun gusto niatong papagdanayon an satong tanda, dapat na maigot niato sindang tabangan sa gibohon na ini.
12:26-28. Dawa sa mga nagtutuyatuya sa saiyang mensahe, dapat na sabihon ni Ezequiel: “Dai na iooktaba pa an ano man na mga tataramon [ni Jehova].” Dapat na gibohon niato an pinakamakakaya niato tanganing tabangan an iba na magtiwala ki Jehova bago nia taposon an sistemang ini nin mga bagay.
14:12-23. An pagkamit nin kaligtasan personal na paninimbagan niato. Mayo nin makakagibo kaiyan para sa sato.—Roma 14:12.
18:1-29. Responsable kita sa mga resulta kan sato mismong gawe-gawe.
“GAGABAON KO, GAGABAON KO, GAGABAON KO IYAN”
Sa ikapitong taon nin pagkadistiero, kan 611 B.C.E., nagduman ki Ezequiel an kamagurangan nin Israel tanganing ‘makihumapot manongod ki Jehova.’ Nadadangog ninda an halawig na kasaysayan kan pagrebelde nin Israel asin an patanid na ‘lalapnoton ni Jehova an saiyang espada’ tumang sa sainda. (Ezequiel 20:1; 21:3) Kinakaolay an namamayo kan Israel (si Zedequias), si Jehova nagsabi: “Haleon mo an turbante, asin tangkason mo an korona. Ini dai na magigin siring. Ilangkaw mo an hababa, asin ibaba mo an halangkaw. Gagabaon ko, gagabaon ko, gagabaon ko iyan. Asin kun dapit man kaini, dai nanggad iyan magigin sadiri nin siisay man sagkod na magdatong sia na igwa kan legal na deretso [si Jesu-Cristo], asin iyan itatao ko sa saiya.”—Ezequiel 21:26, 27.
Binista an Jerusalem. Ibinuyagyag an pagkakasala ni Ohola (Israel) asin ni Oholiba (Juda). Si Ohola itinao na “sa kamot kan mga namomoot sa saiya, sa kamot kan mga aking lalaki nin Asiria.” (Ezequiel 23:9) An pagkalaglag ni Oholiba nagdadangadang na. Kan 609 B.C.E., nagpoon an 18 bulan na pagsalikop sa Jerusalem. Kun an siudad bumagsak na sa katapustapusi, mamumungnan na gayo an mga Judio na huli kaiyan dai na ninda ikakapahayag an saindang kamondoan. Si Ezequiel dai dapat magtaram kan mensahe nin Dios sa mga desterrado sagkod na akoon nia sa “sarong nakadulag” an report sa pagkalaglag kan siudad.—Ezequiel 24:26, 27.
Mga Hapot sa Kasuratan na Sinimbag:
21:3—Ano an “espada” na lalapnoton ni Jehova sa sarungan kaiyan? An “espada” na ginamit ni Jehova tanganing maghokom sia sa Jerusalem asin sa Juda iyo si Hadeng Nabucodonosor kan Babilonya asin an hukbo kaini. Puede man na kaiba dian an langitnon na kabtang kan organisasyon nin Dios na kompuesto kan makakamhan na espiritung mga linalang.
24:6-14—Ano an irinerepresentar kan takla kan kaldero? An sinalikopan na Jerusalem iinaagid sa sarong kaldero na dakula an bunganga. An takla kaiyan nagrerepresentar sa ati sa moral kan siudad—an pagkamaati, malaswang gawe, asin pagpabolos nin dugo na sia an responsable. Grabeng marhay an pagkamaati kaini na dawa an pagbugtak kaiyan na daing laog sa ibabaw nin mga baga asin pagpainit na marhay kaiyan dai makakahale kan takla.
Mga Leksion Para sa Sato:
20:1, 49. An reaksion kan kamagurangan na lalaki kan Israel nagpapaheling na mapagduda sinda manongod sa sinabi ni Ezequiel. Nungka logod na tumalubo sa sato an pagigin mapagduda sa mga patanid nin Dios.
21:18-22. Dawa ngani naggamit si Nabucodonosor nin pagtoodtood, si Jehova iyo an nagsierto na an paganong namamahala maabot tumang sa Jerusalem. Ipinapaheling kaini na dai maoolang dawa nin mga demonyo an mga paragadan ni Jehova sa paghaman kan saiyang katuyohan.
22:6-16. Ikinakauyam ni Jehova an pagbalobagi, malaswang gawe, pag-abuso sa kapangyarihan, asin an pag-ako nin suhol. Maninigo kitang magin marigon sa satong determinasyon na likayan an siring na maraot na mga gibo.
23:5-49. An politikal na pakikipag-alyansa kan Israel asin Juda suminagkod sa pag-arog ninda sa falsong pagsamba kan saindang mga kaalyado. Magmaan kita sa satong dayupot na pakikiasosyar sa mga kinabanon na puedeng makaraot sa satong pagtubod.—Santiago 4:4.
Sarong Mensahe na Buhay Asin Mapuersa
Marahayon nanggad na mga leksion an nanonodan niato sa enot na 24 kapitulo kan libro sa Biblia na Ezequiel! An mga prinsipyo na sinasambit dian nagpapaheling kun ano an nagigin dahelan kan pagdesaprobar nin Dios, kun paano niato puedeng akoon an saiyang pagkaherak, asin kun taano ta maninigo niatong patanidan an mga maraot. An hula mapadapit sa pagkalaglag kan Jerusalem malinaw na naglaladawan ki Jehova bilang Dios na ‘nagpapaisi sa saiyang banwaan kan bagong mga bagay bago iyan magruluwas.’—Isaias 42:9.
An mga hula na siring kan nakarekord sa Ezequiel 17:22-24 asin 21:26, 27 nagtotokdo sa pagpatindog kan Mesiyanikong Kahadean sa langit. Dai na nanggad mahahaloy, an pamamahalang iyan maresulta sa pagkaotob kan kabotan nin Dios digdi sa daga. (Mateo 6:9, 10) Huling igwa nin makosog na pagtubod asin kombiksion, malalaoman niato an mga bendisyon kan Kahadean. Iyo, “an tataramon nin Dios buhay asin mapuersa.”—Hebreo 4:12.
[Ritrato sa pahina 12]
Ano an ilinaladawan kan langitnon na karuwahe?
[Ritrato sa pahina 14]
An maigot na pakikikabtang sa paghuhulit nakakatabang sa sato na papagdanayon an satong “tanda”