Igwa daw Kamo nin Imortal na Kalag?

Kompuesto sana daw kita nin laman asin dugo? O igwa pa daw kita nin ibang kabtang apuera sa laman asin dugo? An satong buhay daw temporaryo sana? O kita daw may sarong dai naheheling na kabtang na padagos na nabubuhay pagkagadan?

MINSAN ngani an mga relihion sa kinaban may binilog na kadakol na nakakaribong na paniniwala manongod sa Buhay Pagkagadan, an kadaklan sa mga iyan nagkakaagid sa sarong pundamental na ideya: May sarong bagay na nasa laog nin sarong tawo na imortal asin padagos na nabubuhay pagkagadan. Dakol na tawo an naniniwala na an “sarong bagay” na ini iyo an kalag. Ano an paniniwala nindo? Kita daw may kabtang na laman asin may kabtang na kalag? Ano an kalag? Igwa daw nin imortal na kalag an mga tawo? Mahalaga nanggad na maaraman niato an katotoohan manongod sa kun ano kita!

“An Tawo Nagin Buhay na Kalag”

An “kalag” daw kabtang nin tawo na minasuway sa hawak pagkagadan asin padagos na nabubuhay? Oyon sa Holman Illustrated Bible Dictionary, “sa parate an kalag iyo man sana an kabilogan nin sarong tawo.” Halimbawa, sinasabi kan Genesis 2:7: “Pinorma ni Jehova Dios an tawo hale sa kabokabo kan daga asin hinangosan sia sa saiyang dongo kan hinangos nin buhay, asin an tawo nagin buhay na kalag.” An enot na tawo, si Adan, sarong kalag.

An pakasabot na an terminong “kalag” puedeng mangahulogan na kabilogan nin sarong tawo sinusuportaran nin iba pang mga teksto. Halimbawa, sinasabi kan Biblia na an kalag nagtatrabaho. (Levitico 23:30) An kalag sinasabi na nauuyam, naaanggot, dai napapatorog, natatakot, asin namomondo nin makuri. (Hokom 16:16; Job 19:2; Salmo 119:28; Gibo 2:43; 1 Tesalonica 5:14) Sa pagtaram manongod sa kalag bilang sarong persona, an Roma 13:1 nagsasabi: “An lambang kalag magpasakop sa superyor na mga autoridad.” Asin sa 1 Pedro 3:20, mababasa niato: “Kan mga aldaw ni Noe, . . . pira sana, an boot sabihon, walong kalag, an nakaligtas sa tubig.” An mga tekstong ini dai nagpaparisa na an kalag sarong espiritung kabtang na padagos na nabubuhay pagkagadan.

Kumusta man an mga hayop asin tinanom? Mga kalag daw an mga iyan? Estudyare kun paano  ilinaladawan kan Biblia an paglalang sa mga hayop. “Tumuga an katubigan nin bunyog nin buhay na mga kalag,” an ipinagboot nin Dios. Sa sunod na aldaw nin paglalang, an Dios nagsabi: “Tumuga an daga nin buhay na mga kalag segun sa saindang mga klase, magarong hayop asin naghihirong hayop patin layas na hayop kan daga segun sa klase kaiyan.” (Genesis 1:20, 24) Kun siring, an gabos na nabubuhay na linalang—tawo o hayop—mga kalag. Sa Kasuratan, an mga tinanom dai inaapod na mga kalag.

An terminong “kalag” ginagamit sa saro pang sentido. Sa Job 33:22, mababasa niato: “An saiyang kalag nagrarani sa kotkot, asin an saiyang buhay duman sa mga nanggagadan.” Digdi, an mga terminong “kalag” asin “buhay” ginagamit na pareho man sana an kahulogan, an “kalag” nagdadagdag nin detalye sa kahulogan kan “buhay.” Kun siring, an “kalag” puede man na nanonongod sa buhay nin tawo. Huli kaini, an mga kaiwal ni Moises na naghihingoang gadanon sia inaapod kan Kasuratan na “an gabos na tawo na naghahanap kan [saiyang] kalag.” (Exodo 4:19) Asin may koneksion ki Jesu Cristo, an Biblia nagsasabi: “An Aki nin tawo nagdigdi . . . tanganing itao an saiyang kalag [buhay] bilang pantubos na karibay nin dakol.”—Mateo 20:28.

An pakahulogan kan Biblia sa “kalag” simple asin daing liwat-liwat. An terminong iyan puedeng nanonongod sa tawo o hayop o sa saindang buhay. Arog kan maheheling niato, an pakasabot na ini kaoyon kan sinasabi kan Biblia na nangyayari sa kalag pagkagadan.

‘An Kalag na Nagkakasala Magagadan’

An Biblia nagsasabi: “An kalag na nagkakasala—iyan mismo magagadan.” (Ezequiel 18:4) An napupurisaw na si propeta Elias “nagpoon na maghagad na magadan na logod an saiyang kalag.” (1 Hade 19:4) Kaagid kaiyan, si Jonas ‘nagpaparahagad na magadan na logod an saiyang kalag.’ (Jonas 4:8) Iyo, an kalag nagagadan kun an tawo magadan; iyan bakong imortal. Huling an tawo sarong kalag, an pagsabi na an sarong tawo nagadan kapareho man sana kan pagsabing an saiyang kalag nagadan.

Alagad kumusta man an mga teksto sa Biblia na nagtataram manongod sa pagluwas asin pagbalik kan kalag? May koneksion sa nangyari ki Raquel kan sia mangaki nin sarong aking lalaki, an Biblia nagsasabi: “Mantang minaluwas an saiyang kalag (huli ta sia nagadan) inapod nia an ngaran nia na Ben-oni; alagad inapod sia kan saiyang ama na Benjamin.” (Genesis 35:18) Asin sa pagtaram manongod sa pagkabuhay liwat kan aking lalaki nin sarong babaeng balo, an 1 Hade 17:22 nagsasabi: “Si Jehova naghinanyog sa tingog ni Elias [sa pamibi], kaya an kalag kan aki buminalik sa saiya asin  sia nabuhay.” Ipinaparisa daw kan mga tekstong ini na an kalag sarong dai naheheling, garo aninong kabtang na puedeng lumuwas o lumaog sa hawak?

Bueno, girumdomon na an sarong kahulogan kan terminong “kalag” iyo an “buhay.” Huli kaini, an pananaram na minaluwas an kalag ni Raquel nangangahulogan na an saiyang buhay matatapos na. Sa katunayan, trinadusir nin nagkapirang Biblia an fraseng “minaluwas an saiyang kalag” bilang “nagluluya an saiyang buhay” (Knox) asin “nautsan sia” (Jerusalem Bible). Siring man, sa kamugtakan kan aking lalaki kan babaeng balo, buhay an buminalik sa aki.—1 Hade 17:23.

Kun Ano an Tawo

Malinaw nanggad, ipinapaheling kan Biblia kun ano an tawo. Mayo sia nin kalag; sia sarong kalag. Huli sa kun ano an tawo—an saiyang naturalesa—an ano man na paglaom na buhay sa ngapit para sa mga gadan nakadepende sa pagkabuhay liwat. An Biblia nanunuga: “Dai kamo magngalas kaini, huli ta an oras maabot na an gabos na nasa mga lolobngan na girumdoman makakadangog kan tingog [ni Jesus] asin maruluwas, idtong naggiribo nin marahay sa pagkabuhay liwat sa buhay, idtong naggiribo nin labi-labi karaot sa pagkabuhay liwat sa paghokom.” (Juan 5:28, 29) An siertong panugang iyan na pagkabuhay liwat—bakong an katokdoan na imortalidad kan kalag—iyo an basehan kan tunay na paglaom para sa mga gadan.

Mahalagang marhay nanggad na magkaigwa nin tamang kaaraman manongod sa kun ano an pagkabuhay liwat asin kun ano an kahulogan kaiyan para sa katawohan! Kaipuhan man an kaaraman dapit sa Dios asin ki Cristo, huling sa pamibi si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) An Mga Saksi ni Jehova sa saindong komunidad maoogmang tabangan kamo sa pag-adal sa Biblia tanganing madugangan nindo an saindong kaaraman dapit sa Dios, sa saiyang Aki, asin sa Saiyang mga panuga. Iniimbitaran niamo kamo na kontakon an mga Saksi o sumurat sa mga kagpublikar kan magasin na ini.

[Mga Ritrato sa pahina 4]

Sinda gabos mga kalag

[Credit Line]

Kanding: CNPC—Centro Nacional de Pesquisa de Caprinos (Sobral, CE, Brasil)