May Pakatagal na Naghahalat sa Aldaw ni Jehova
May Pakatagal na Naghahalat sa Aldaw ni Jehova
“Idagdag sa saindong pagtubod . . . an pakatagal.”—2 PEDRO 1:5, 6.
1, 2. Ano an pakatagal, asin taano ta kaipuhan iyan kan mga Kristiano?
AN DAKULANG aldaw ni Jehova haranihon na. (Joel 1:15; Sofonias 1:14) Bilang mga Kristiano na determinadong papagdanayon an satong integridad sa Dios, maogma niatong hinahalat an panahon na iyan na mabibindikar an soberaniya ni Jehova. Mientras tanto, huli sa satong pagtubod napapaatubang kita sa pagkaongis, pag-olog-olog, persekusyon, asin kagadanan. (Mateo 5:10-12; 10:22; Kapahayagan 2:10) Nangangaipo ini nin pakatagal—an kakayahan na tioson an kasakitan. Si apostol Pedro nagsadol sa sato: “Idagdag sa saindong pagtubod . . . an pakatagal.” (2 Pedro 1:5, 6) Kaipuhan niato an pakatagal, huling si Jesus nagsabi: “An nakatagal sagkod sa katapusan iyo an maliligtas.”—Mateo 24:13.
2 Nakakaeksperyensia man kita nin helang, pagkagadan nin namomotan, asin iba pang kasakitan. Maoogma nanggad si Satanas kun mawara an satong pagtubod! (Lucas 22:31, 32) Paagi sa tabang ni Jehova, makakatagal kita sa manlaenlaen kasakitan. (1 Pedro 5:6-11) Estudyare an nagkapirang aktuwal na eksperyensia na nagpapatunay na puede niatong halaton an aldaw ni Jehova na may pakatagal asin dai nagluluyang pagtubod.
An Helang Dai Nakapapondo sa Sainda
3, 4. Magtao nin halimbawa na nagpapaheling na kita maimbod na makakapaglingkod ki Jehova dawa may helang.
3 An Dios dai milagrosong nagpapaomay sa sato ngonyan, alagad sia talagang nagtatao sa sato nin kosog tangani na tagalan an helang. (Salmo 41:1-3) “Sagkod na nagigirumdoman ko,” an sabi ni Sharon, “pirme na akong nakatukaw sa silyang de rueda. Poon kan ako mamundag, an paralisis huli sa danyos sa hotok (cerebral palsy) nakaolang sa sako na maeksperyensiahan an kagayagayahan nin pagigin aki.” Nagtao nin paglaom ki Sharon an pakanood manongod ki Jehova asin sa saiyang mga panuga dapit sa sangkap na salud. Dawa ngani nadedepisilan siang magtaram asin dai makalakaw, nakanompong sia nin kagayagayahan sa Kristianong ministeryo. Mga 15 taon na an nakaagi, sia nagsabi: “Puedeng padagos na lumuya an sakong salud, alagad an sakong tiwala sa Dios asin an sakong relasyon sa saiya iyo an nagpapakosog sa sako. Maogmahon nanggad ako na mapabilang sa banwaan ni Jehova asin na magkaigwa kan seguradong pagsuportar nia!”
4 Sinadol ni apostol Pablo an mga Kristiano sa Tesalonica na “magtaram na may pagranga sa mga kalag na nagmomondo nin makuri.” (1 Tesalonica 5:14) An mga dahelan na siring kan grabeng pagkadesganar puedeng magresulta sa depresyon. Kan 1993, si Sharon nagsurat: “Huling may pakamate na biyong bigo, ako . . . nag-agi nin tolong taon na grabeng depresyon. . . . Rinanga asin hinatolan ako kan kamagurangan. . . . Paagi sa An Torrengbantayan, si Jehova mapagpadangat na nagtatao nin pakarorop manongod sa grabeng depresyon. Iyo, talagang nagmamakolog sia sa saiyang banwaan asin nasasabotan nia an satong namamatean.” (1 Pedro 5:6, 7) Si Sharon maimbod pa man giraray na naglilingkod sa Dios mantang naghahalat sia sa dakulang aldaw ni Jehova.
5. Ano an katunayan na kayang tagalan nin mga Kristiano an grabeng tension?
5 An nagkapirang Kristiano apektadong marhay nin grabeng tension huli sa nakaaging mga eksperyensia sa buhay. Naeksperyensiahan ni Harley an madahas na marhay na ralaban kan Guerra Mundial II asin nagkaigwa sia nin mga pangum-um manongod sa pakikiguerra. Mantang torog, sia minakurahaw: “Ingat kamo! Hipli kamo!” Kun sia napapagmata, basa-basa na sia nin ganot. Minsan siring, nahimo niang sundon an diosnon na pamumuhay, asin pag-abot nin panahon an siring kaiyan na mga pangatorogan bako nang grabe asin bihira na.
6. Paano napaatubang an sarong Kristiano sa mga problema sa emosyon?
6 An sarong Kristiano na nadiskobreng may sarong klase nin depresyon na inaapod na bipolar disorder nasakitan na gayo na maghulit sa harong-harong. Minsan siring, nagpadagos sia huling napag-isip-isip nia na an ministeryo nangangahulogan nin buhay para sa saiya asin sa mga paborableng nag-aako kaiyan. (1 Timoteo 4:16) Kun beses mayo sia nin kosog nin boot na magtimbre sa pinto, alagad sia nagsabi: “Pakalihis nin dikit na panahon, nahihimo ko nang kontrolon an sakong emosyon, minapasiring sa sunod na harong, asin nagpoprobar giraray. Paagi sa padagos na pakikikabtang sa ministeryo, napagdanay ko an tama sanang espirituwal na salud.” Nagin depisil man an pag-atender sa mga pagtiripon, alagad kombensido an tugang na lalaking ini na mahalaga an espirituwal na asosasyon. Kaya naghingoa sia na magin presente sa mga pagtiripon.—Hebreo 10:24, 25.
7. Minsan ngani an iba natatakot na magtaram sa publiko o mag-atender sa pagtiripon, paano sinda nagpapaheling nin pakatagal?
7 May mga Kristiano na igwa nin mga phobia—an grabeng pagkatakot sa nagkapirang situwasyon o bagay. Halimbawa, tibaad natatakot sinda na magtaram sa publiko o dawa mag-atender sa pagtiripon. Isipon kun gurano kasakit para sa sainda na magkomento sa Kristianong mga pagtiripon o na magtao nin pahayag sa Teokratikong Paadalan sa Pagmiministro! Pero, nagtatagal sinda, asin pinapahalagahan niatong marhay an saindang presensia asin partisipasyon.
8. Ano an nangorognang epektibo kun inaatubang an mga kadepisilan sa emosyon?
8 An dugang na pahingalo asin pagtorog puedeng makatabang sa sarong tawo na tagalan an mga kadepisilan sa emosyon. Tibaad kaipuhan an medikal na tabang. Minsan siring, nangorognang epektibo an mapagngayongayong pagsarig sa Dios. “Tawan ki Jehova mismo an pagabat sa saimo, asin sia mismo matabang sa saimo,” an sabi kan Salmo 55:22. “Noarin man dai nia totogotan na matanyog an matanos.” Kun siring, ‘magtiwala nanggad ki Jehova sa bilog mong puso.’—Talinhaga 3:5, 6.
Nagtatagal sa Pagkagadan nin Namomotan
9-11. (a) Ano an makakatabang sa sato na tagalan an kamondoan kun nagadan an sarong namomotan? (b) Paano an halimbawa ni Ana makakatabang sa sato na tagalan an pagkagadan nin namomotan?
9 Kun pinagsusuruway nin kagadanan an mga miembro kan pamilya, an siring kadakulang pagkawara puedeng magbunga nin grabeng kamondoan. Si Abraham nagtangis sa pagkagadan kan saiyang namomotan na agom, si Sara. (Genesis 23:2) Dawa an sangkap na tawong si Jesus “naghibi” kan magadan an saiyang amigo na si Lazaro. (Juan 11:35) Kaya natural sanang makaeksperyensia nin kamondoan kun magadanan kamo nin sarong namomotan nindo. Minsan siring, aram kan mga Kristiano na magkakaigwa nin pagkabuhay liwat. (Gibo 24:15) Huli kaini, dai sinda ‘namomondo siring kan iba na dai nin paglaom.’—1 Tesalonica 4:13.
10 Paano niato makakaya an pagkagadan nin namomotan? Tibaad makatabang an sarong ilustrasyon. Sa parate, dai kita nakakamate nin halawig na kamondoan kun mabiahe an sarong amigo, huling linalaoman niato na maheheling giraray niato sia pagbalik nia. An pagkaigwa nin kaparehong pagmansay sa kagadanan nin sarong maimbod na Kristiano puedeng makaina sa kamondoan niato huling aram niato na sia siertong bubuhayon liwat.—Eclesiastes 7:1.
11 An lubos na pagsarig sa “Dios nin gabos na karangahan” makakatabang sa sato na tagalan an pagkagadan nin namomotan. (2 Corinto 1:3, 4) Makakatabang man sa sato an paghorophorop sa ginibo kan enot na siglong balo na si Ana. Nabalo sia pakalihis sana nin pitong taon nin pagigin may agom. Alagad sa edad na 84, nagsasagibo pa man giraray sia nin banal na paglilingkod ki Jehova duman sa templo. (Lucas 2:36-38) Daing duda na an siring na debotadong pamumuhay nakatabang sa saiya na atubangon an kamondoan asin kapungawan. An regular na pagpartisipar sa Kristianong mga aktibidad, kaiba an paghuhulit sa Kahadean, makakatabang sa sato na tagalan an mga epekto nin pagkagadan nin namomotan.
Pag-atubang sa Manlaenlaen na Kasakitan
12. Anong kasakitan an tinagalan nin nagkapirang Kristiano may koneksion sa buhay pampamilya?
12 May mga Kristiano na kaipuhan na tagalan an kasakitan may koneksion sa buhay pampamilya. Halimbawa, kun an agom nakaginibo nin pagsambay, nakakapanluya nanggad an mga epekto kaiyan sa pamilya! Huli sa pagkabigla asin kamondoan, an pinagkasalaan na agom tibaad dai makatorog asin tibaad dai mapugolan an paghibi. Tibaad magin nakakatension na gayo an paggibo nin simpleng mga trabaho kaya sia nasasala o naaaksidente. An pinagkasalaan na agom tibaad dai makakakan, tibaad magniwang, asin tibaad magkaproblema sa emosyon. Tibaad magin masakit an pakikikabtang sa Kristianong mga aktibidad. Asin dakula nanggad an puedeng magin epekto sa mga aki!
13, 14. (a) Anong pagparigon sa boot an makukua nindo sa pamibi ni Salomon sa inagurasyon kan templo? (b) Taano ta namimibi kita para sa banal na espiritu?
13 Kun naeeksperyensiahan niato an siring na kasakitan, itinatao ni Jehova an tabang na kaipuhan niato. (Salmo 94:19) Dinadangog nin Dios an mga pamibi kan saiyang banwaan, siring kan ipinapaheling kan pamibi ni Hadeng Salomon sa inagurasyon kan templo ni Jehova. Si Salomon namibi sa Dios: “Ano man na pamibi, ano man na paghagad nin pabor na tibaad gibohon nin siisay man na tawo o kan bilog mong banwaan na Israel, huli ta aram kan kada saro sa sainda an damat kan saiyang sadiring puso, asin talagang ibinuka ninda an saindang mga palad pasiring sa harong na ini, kun siring magdangog ka logod dian sa kalangitan, an saimong marigon na erokan, asin magpatawad ka asin humiro patin magtao sa lambang saro oyon sa gabos niang dalan, huling aram mo an saiyang puso (huling ika sana an lubos na nakakaaram sa puso kan gabos na aki nin katawohan); tanganing matakot sinda sa saimo sa gabos na aldaw na sinda buhay sa ibabaw kan daga na itinao mo sa samong mga apoon.”—1 Hade 8:38-40.
14 Nangorognang nakakatabang an padagos na pamimibi para sa banal na espiritu. (Mateo 7:7-11) Kaiba sa mga bunga kan espiritu an mga kualidad na siring kan kagayagayahan asin katoninongan. (Galacia 5:22, 23) Kanigoan na kaginhawahan an namamatean niato kun sinisimbag kan satong langitnon na Ama an satong mga pamibi—nasasalidahan nin kagayagayahan an kamondoan, asin nasasalidahan nin katoninongan an labi-labing kamondoan!
15. Anong mga teksto an makakatabang sa sato na mainaan an satong kahaditan?
15 Minsan paano lalaoman niato na magkakaigwa nin kahaditan kun tinatagalan niato an grabeng tension. Alagad maiinaan minsan paano an nagkapira sa kapurisawan na ini kun isasaisip niato an mga tataramon na ini ni Jesus: ‘Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon. Kun siring, padagos na hanapon nguna an kahadean asin an katanosan nin Dios, asin ini gabos na ibang bagay idadagdag na sana sa saindo.’ (Mateo 6:25, 33, 34) Sinasadol kita ni apostol Pedro na ‘ibugtak sa Dios an gabos niatong kahaditan, huli ta sia may pagmakolog sa sato.’ (1 Pedro 5:6, 7) Tama sana na gumibo nin mga paghihingoa tanganing resolberan an sarong problema. Minsan siring, pagkatapos na magibo niato an pinakamakakaya niato, an paghadit manongod sa problema dai nakakatabang sa sato, kundi an pamibi an nakakatabang sa sato. “Ipamahala mo ki Jehova an saimong dalan, asin manarig ka sa saiya, asin sia mismo mahiro,” an awit kan salmista.—Salmo 37:5.
16, 17. (a) Taano ta dai kita biyong libre sa kahaditan? (b) Ano an maeeksperyensiahan niato kun iaaplikar niato an Filipos 4:6, 7?
16 Si Pablo nagsurat: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pagpasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:6, 7) Natural sana na an bakong sangkap na mga gikan ni Adan dai makakalibre nin lubos sa kahaditan. (Roma 5:12) An mga Hiteang agom ni Esau an “ginikanan nin kapaitan nin boot” para sa diosnon na mga magurang ni Esau, si Isaac asin Rebeca. (Genesis 26:34, 35) Seguradong ikinahadit kan mga Kristianong si Timoteo asin Trofimo an pagkaigwa ninda nin helang. (1 Timoteo 5:23; 2 Timoteo 4:20) Si Pablo naghadit para sa mga kapagtubod. (2 Corinto 11:28) Alagad an “Paradangog nin pamibi” pirmeng yaon para sa mga namomoot sa saiya.—Salmo 65:2.
17 Mantang naghahalat kita sa aldaw ni Jehova, igwa kita kan suporta asin karangahan na hale sa “Dios nin katoninongan.” (Filipos 4:9) Si Jehova “maheherakon asin maugayon,” sia “marahay asin andam na magpatawad,” asin ‘ginigirumdom nia na kita kabokabo.’ (Exodo 34:6; Salmo 86:5; 103:13, 14) Kaya ‘ipahayag niato sa saiya an satong mga kahagadan,’ huling maresulta ini sa pagkaigwa niato kan “katoninongan nin Dios”—an katrangkilohan na dai kayang saboton nin tawo.
18. Siring kan sinabi sa Job 42:5, paano posible na ‘maheling’ an Dios?
18 Kun sinisimbag an satong mga pamibi, aram niato na kaiba niato an Dios. Pagkatapos na tagalan ni Job an kasakitan nia, sia nagsabi: “Gikan sa iba nabaretaan taka [Jehova], alagad ngonyan naheheling ka kan sako mismong mata.” (Job 42:5) Paagi sa mata nin pakasabot, pagtubod, asin pagpasalamat, makakapaghorophorop kita manongod sa mga pagtratar nin Dios sa sato asin puede niato siang ‘maheling’ nin orog kisa kasuarin man. Kanigoan nanggad na katoninongan sa puso asin isip an itinatao sa sato kan siring na kadayupotan!
19. Ano an mangyayari kun ‘ibinubugtak niato ki Jehova an gabos niatong kahaditan’?
19 Kun ‘ibinubugtak niato ki Jehova an gabos niatong kahaditan,’ kaya niatong tagalan an kasakitan na igwa nin panlaog na pagkakalmado na nag-iingat sa satong puso asin mga pag-isip. Sa kalaoglaogi kan satong piguratibong puso, maeeksperyensiahan niato an katalingkasan sa dai pagkapamugtak, takot, asin kahandalan. An satong isip dai mapupurisaw huli sa pagkaribaraw o paghadit.
20, 21. (a) An kamugtakan ni Esteban nagtatao nin anong prueba nin katrangkilohan kun nakakaeksperyensia nin persekusyon? (b) Magsambit nin halimbawa nin pagigin kalmado kun nagtatagal nin kasakitan sa presenteng panahon.
20 Ipinaheling ni disipulo Esteban an katrangkilohan kan nagtatagal nin grabeng pagbalo sa saiyang pagtubod. Bago nia itao an pangultimong patotoo, an gabos na nasa Sanhedrin ‘naheling an saiyang lalauogon na nakakaagid sa lalauogon nin sarong anghel.’ (Gibo 6:15) An saiyang panlauog kalmado—siring kan sa sarong anghel, sarong mensahero nin Dios. Pagkatapos na ibuyagyag ni Esteban an saindang kasalan sa pagkagadan ni Jesus, an mga hokom ‘nagkarulugad sa saindang puso asin nagpoon na magragot an saindang mga ngipon tumang sa saiya.’ “Pano kan banal na espiritu,” si Esteban “nagtangad sa langit asin naheling an kamurawayan nin Dios asin si Jesus na nagtitindog sa too nin Dios.” Huling napakosog kan bisyon na iyan, nagin maimbod si Esteban sagkod sa kagadanan. (Gibo 7:52-60) Minsan ngani mayo kita nin mga bisyon, puede kitang magkaigwa kan tao nin Dios na katrangkilohan kun pinepersegir.
21 Isipa an sentimiento kan nagkapirang Kristiano na ginadan kan mga Nazi durante kan Guerra Mundial II. Sa pagsaysay sa korte kan saiyang eksperyensia, an saro nagsabi: “Sinentensiahan akong magadan. Naghinanyog ako, dangan pagkatapos na sabihon ko an mga tataramon na ‘Magmaimbod ka sagkod sa kagadanan,’ asin an iba pang tataramon kan satong Kagurangnan, tapos na an pagbalo. Alagad dai na nindo pag-isipon iyan ngonyan. Igwa ako nin katoninongan, katrangkilohan, na dai nindo maiimahinar!” An sarong hoben na Kristiano na napapaatubang sa kagadanan paagi sa pagpugot nagsurat sa saiyang mga magurang: “Lampas na sa matanga. May panahon pa na liwaton ko an sakong isip. A! puede daw akong magin maogma giraray sa kinaban na ini pagkatapos na paindahan ko an satong Kagurangnan? Seguradong dai! Alagad ngonyan makakaseguro kamo na mahale ako sa kinaban na ini na may kaogmahan asin katoninongan.” Daing duwa-duwa na sinusuportaran ni Jehova an saiyang maimbod na mga lingkod.
Puede Kamong Magtagal!
22, 23. Sa ano kamo makakasierto mantang kamo may pakatagal na naghahalat sa aldaw ni Jehova?
22 Tibaad dai kamo napapaatubang sa nagkapirang kadepisilan na pinag-olayan niato. Pero, tama an matatakton sa Dios na si Job kan sia magsabi: “An tawo, na namundag sa babae, halipot an buhay asin pano nin kasakitan.” (Job 14:1) Tibaad saro kamong magurang na nagmamaigot na matawan an saindong mga aki nin espirituwal na paggiya. Kaipuhan nindang tagalan an kasakitan sa eskuelahan, alagad kanigoan an kaogmahan nindo kun sinda naninindogan nin marigon para ki Jehova asin sa saiyang matanos na mga prinsipyo! Posibleng nakakaeksperyensia kamo nin mga kasakitan asin sugot sa saindong pinagtatrabawohan. Minsan siring, matatagalan ini asin an iba pang situwasyon, huling ‘sa aroaldaw dinadara ni Jehova an pasan para sa saindo.’—Salmo 68:19.
23 Tibaad isipon nindo na kamo ordinaryo sanang tawo, alagad girumdomon na nungkang malilingawan ni Jehova an saindong ginigibo asin an pagkamoot na saindong ipinapaheling para sa saiyang banal na ngaran. (Hebreo 6:10) Paagi sa saiyang tabang, kaya nindong tagalan an mga pagbalo sa pagtubod. Kaya iiba sa saindong mga pamibi asin plano an paggibo kan kabotan nin Dios. Sa siring makakasarig kamo sa bendisyon asin suporta nin Dios mantang kamo may pakatagal na naghahalat sa aldaw ni Jehova.
Ano an Isisimbag Nindo?
• Taano ta kaipuhan nin mga Kristiano an pakatagal?
• Ano an makakatabang sa sato na tagalan an helang asin pagkagadan nin namomotan?
• Paano an pamibi nakakatabang sa sato na tagalan an kasakitan?
• Taano ta posible na may pakatagal na halaton an aldaw ni Jehova?
[Mga Hapot Para sa Pag-adal]
[Ritrato sa pahina 29]
An pagsarig ki Jehova nagpapangyari sa sato na tagalan an pagkagadan nin namomotan
[Ritrato sa pahina 31]
An odok sa pusong pamibi nakakatabang sa sato na tagalan an mga pagbalo sa pagtubod