Mga Hapot Hale sa mga Parabasa

Mantang an pag-ani opisyal na nagpoon kan an gabos na lalaking Israelita nag-aatender sa Kapiestahan kan Tinapay na Mayo nin Lebadura, siisay an nag-ani kan enot na mga bunga kan sebada na dinara sa santuaryo?

Pinagbotan kan Ley ni Moises an mga Israelita: “Tolong beses kada taon an gabos na lalaki dian sa saimo maninigong dumolok sa atubangan ni Jehova na saimong Dios sa lugar na saiyang pipilion: sa kapiestahan kan mga tinapay na mayo nin lebadura asin sa kapiestahan nin mga semana patin sa kapiestahan nin mga payag-payag.” (Deuteronomio 16:16) Poon kan panahon ni Hadeng Salomon, an lugar na pinili nin Dios iyo an templo sa Jerusalem.

An enot sa tolong kapiestahan isinagibo sa kapinonan nin tigsoli. Inaapod na Kapiestahan kan Tinapay na Mayo nin Lebadura, nagpoon iyan sa aldaw pakatapos kan selebrasyon nin Paskua kan Nisan 14 asin nagpadagos nin pitong aldaw sagkod Nisan 21. An ikaduwang aldaw kan kapiestahan, Nisan 16, iyo an kapinonan kan enot na pag-ani kan taon basado sa sagradong kalendaryo. Sa aldaw na iyan, an halangkaw na saserdote makua nin “sarong goygoy kan enot na mga bunga” kan inaning sebada asin ‘itatabyon iyan sa atubangan ni Jehova’ sa santuaryo. (Levitico 23:5-12) Huling an gabos na lalaki kaipuhan na magin presente sa Kapiestahan kan Tinapay na Mayo nin Lebadura, siisay an nag-ani kan dolot na ini?

Itinao sa bilog na nasyon an pagboot na idolot ki Jehova an enot na mga bunga kan ani durante kan Kapiestahan kan Tinapay na Mayo nin Lebadura. An lambang indibiduwal dai kaipuhan na magpoon sa pag-ani asin magdara nin enot na mga bunga para sa saiya man sana sa santuaryo. Imbes, an mga indibiduwal na nagrerepresentar sa nasyon iyo an nagsagibo kan pagboot. Huli kaini, an pagputol kan goygoy para sa Kapiestahan kan Tinapay na Mayo nin Lebadura puedeng gibohon nin sarong grupo nin mga representante na isinugo sa kaharaning oma nin sebada. Sa pagkomento manongod digdi, an Encyclopaedia Judaica nagsasabi: “Kun hinog an sebada iyan kinua sa palibot kan Jerusalem; kun dai, puedeng kinua iyan saen man na lugar sa Israel. Inani iyan nin tolong lalaki, na an kada saro may sadiring karit asin basket.” Dangan, an sarong goygoy nin sebada dadarahon sa halangkaw na saserdote, na iyo an nagdodolot kaiyan ki Jehova.

An kahagadan na magdolot nin enot na mga bunga kan ani nagtao sa mga Israelita nin marahayon na oportunidad na ipahayag an saindang pag-apresyar sa bendisyon nin Dios sa saindang daga asin ani. (Deuteronomio 8:6-10) Pero, orog pa dian, an seremonyal na dolot “anino kan marahay na mga bagay na madatong.” (Hebreo 10:1) Makahulogan nanggad, si Jesu-Cristo binuhay liwat kan Nisan 16 kan 33 C.E., an aldaw para sa pagdolot ki Jehova kan enot na mga bunga kan ani. May koneksion ki Jesus, nagsurat si apostol Pablo: “Si Cristo binuhay na liwat hale sa mga gadan, an enot na bunga kan mga nagtorog na sa kagadanan. . . . Alagad an lambang saro sa saiyang sadiring ranggo: si Cristo an enot na bunga, pagkatapos an mga rogaring ni Cristo sa panahon kan saiyang presensia.” (1 Corinto 15:20-23) An goygoy kan enot na mga bunga na itinabyon kan halangkaw na saserdote sa atubangan ni Jehova nagserbing anino kan binuhay liwat na si Jesu-Cristo—an kaenot-enoteng binuhay hale sa mga gadan pasiring sa buhay na daing katapusan. Sa siring, binukasan ni Jesus an dalan para sa pakabutas nin katawohan sa kasalan asin kagadanan.

[Picture Credit Line sa pahina 26]

© 2003 BiblePlaces.com