An Dios daw Nagmamasid sa Saindo?

SI Jehova daw, na Ekspertong Kaglalang, igwa nin kakayahan na makaheling? Siempre igwa! An Biblia malinaw na nangangatanosan: “An Saro na nagpoporma kan mata, dai daw sia makakaheling?” (Salmo 94:9) An pagheling ni Jehova nakakalabing marhay kisa sa pagheling kan mga tawo. Bako sanang panluwas na itsura an naheheling nia kundi sia man an “parasiyasat sa puso,” asin kaya niang ‘siyasaton an puso.’ (Talinhaga 17:3; 21:2) Iyo, igwa sia kan kakayahan na siyasaton an satong kaisipan, motibasyon, asin kairairaroming mga pagmawot.

Aram ni Jehova an mga kadepisilan na tibaad atubangon niato sa buhay, asin sinisimbag nia an satong mga pakimaherak. An salmista nagsurat: “An mga mata ni Jehova nakaturuhok sa mga matanos, asin an saiyang mga talinga nagdadangog sa saindang paghagad nin tabang. Si Jehova harani sa mga nalugadan an puso; asin an mga nasasakitan an espiritu saiyang iliniligtas.” (Salmo 34:15, 18) Nakakaranga nanggad na maaraman na nasasabotan ni Jehova an satong mga kamugtakan asin dinadangog nia an satong odok sa pusong mga pagngayongayo!

Aram ni Jehova Dios dawa an mga ginigibo niato sa hilom. Iyo, “an gabos na bagay huba asin hayag na marhay sa mga mata kan satong papanimbagan.” (Hebreo 4:13) Kaya baga man an satong mga gibo marahay o maraot, gabos iyan naheheling nin Dios. (Talinhaga 15:3) Halimbawa, sinasabi kan Genesis 6:8, 9 na “si Noe nakanompong nin pabor sa mga mata ni Jehova” asin na sia “naglakaw na kaibahan kan tunay na Dios.” Iyo, nakamtan ni Noe an pag-oyon asin bendisyon ni Jehova huli ta sia makinuyog asin sinuportaran nia an matanos na mga prinsipyo nin Dios. (Genesis 6:22) Sa kabaliktaran, an mga tawo kan panahon ni Noe madahas asin marigsok sa moral. Naheling nin Dios an situwasyon na ini. “Naheling [Nia] na an karatan nin tawo kadakol na sa daga asin an gabos na tendensia kan mga kaisipan kan saiyang puso danay na maraot na sana.” Sa kahurihurihi, linaglag ni Jehova an mga marigsok alagad iningatan niang buhay si Noe asin an saiyang pamilya.—Genesis 6:5; 7:23.

Si Jehova daw magmamasid sa saindo na may pag-oyon? Tunay nanggad, an mga mata ni Jehova “naglilibot sa bilog na daga tanganing ipaheling an saiyang kosog para duman sa mga kompleto an puso para sa saiya.” (2 Cronica 16:9) Sa dai na mahahaloy hahaleon nia giraray sa daga an gabos na marigsok asin ililigtas nia an mga mahoyo an puso.—Salmo 37:10, 11.