An Pagtubod nin Sarong Ina Nakapanggana sa Trahedya

“Kun binabasa nindo an surat na ini, iyan nangangahulogan na dai ako nakaligtas sa operasyon asin na dai na nindo ako makakaibanan.”

INI an pambukas na mga tataramon sa surat ni Carmen, na sarong Kristianang ina, sa saiyang tolong aking babae, na an edad 25, 19, asin 16. Siring kan nangyari, dai nagin mapanggana an operasyon, asin makamomondo, nagadan si Carmen.

Makolog nanggad sa boot na mabayaan an tolong aki sa siring na makamomondong kamugtakan. Pero, malinaw na an makosog na pagtubod kan ina na ini ki Jehova asin sa saiyang mga panuga iyo an nakapanggana sa trahedya, na an pagtubod na iyan an nagtao sa saiya nin panlaog na katoninongan na malinaw nanggad na maririsa sa saiyang nakakapukaw sa boot na surat. Mangnohon an sinabi nia sa saiyang mga aki.

“Enot sa gabos, gusto kong sabihon sa saindo na namomotan ko kamo sa bilog kong puso. . . . Kamo an pinakamarahay na aki na mamawoton nin sarong ina, asin ipinag-oorgolyo ko kamong marhay.

“Gusto ko kutana na makaibanan kamo sagkod sa ipinanuga nin Dios na bagong kinaban . . . , alagad huling dai iyan puede, hinagad ko sa saiya na logod tabangan kamo tangani na kamo magin maimbod, arog kan ipinapaheling na nindo. Iriba kitang nagtagal nin dakol na kasakitan, asin nungka kitang pinabayaan ni Jehova. . . . Kaya danay kamong magtiwala sa paggiya na itinatao nia paagi sa saiyang organisasyon, asin padagos nindong suportaran an kongregasyon asin an kamagurangan. Maghulit kamo sa pinakaparate na magigibo nindo, asin mamotan nindo an gabos na tugang.

“Temporaryo sana an satong pagsuhayan. . . . Patawadon nindo ako sa gabos na sala na nagibo ko asin sa gabos na panahon na dai ko kamo nasabotan o dai ko nasabi sa saindo kun gurano ko kamo kanamomotan. . . . Aram ko na an kada saro sa saindo may kanya-kanyang pangangaipo. Mas aram iyan ni Jehova kisa sa saindo, asin itatao nia an gabos nindong kaipuhan asin babalosan nia kamo huli sa gabos na pagtagal nindo.

“Dai nindo paglingawan an saindong pasohan—an buhay sa bagong kinaban—asin padagos kamong magmaigot na makamtan iyan. Logod na bendisyonan asin pakosogon kamo ni Jehova tanganing magin maimbod kamo sagkod sa katapusan. . . . Dai kamo magmondo, padangat kong mga aki. Namomotan ko kamo!”

An trahedya puedeng mangyari sa kiisay man sa ano man na panahon. “An panahon asin pagkanorongod nangyayari sa sainda gabos,” an surat ni Hadeng Salomon kan suanoy. (Eclesiastes 9:11) Minsan siring, an mga may makosog na pagtubod sa Dios puedeng magkaigwa kan kaparehong garantiya na yaon ki apostol Pablo, na nagsabi: “Ako kombensido na ni an kagadanan ni an buhay . . . ni an arin man na ibang linalang dai makakapasuhay sa sato sa pagkamoot nin Dios na yaon dian ki Cristo Jesus na satong Kagurangnan.”—Roma 8:38, 39; Hebreo 6:10.