Kamo daw “Mayaman sa Pagheling nin Dios”?
Kamo daw “Mayaman sa Pagheling nin Dios”?
“Siring an nangyayari sa tawo na nagtitipon nin kayamanan para sa saiya man sana alagad bakong mayaman sa pagheling nin Dios.”—LUCAS 12:21.
1, 2. (a) Para sa ano na an mga tawo andam na gumibo nin dakulaon na mga pagsasakripisyo? (b) Anong kadepisilan asin peligro an kaipuhan na atubangon nin mga Kristiano?
AN PAGHANAP nin kayamanan bako sanang sarong kawat na gustong kawaton nin mga aki; iyan aktuwal man na nangyayari nin paorootro sa dakol na henerasyon asin nasyon. Halimbawa, an paghanap nin bulawan kan ika-19 siglo sa Australia, Aprika del Sur, Canada, asin Estados Unidos nakaakit sa mga tawo hale sa hararayong lugar na andam na bayaan an saindang istaran asin mga namomotan tanganing maghanap nin kayamanan sa mga lugar na bakong pamilyar asin kun beses masakit an kamugtakan. Iyo, dakol na tawo an andam na atubangon an grabeng mga peligro asin gumibo nin dakulaon na mga pagsasakripisyo tanganing makamit an mga kayamanan na minamawot kan saindang puso.
2 Minsan ngani an kadaklan na tawo ngonyan dai nakikikabtang sa literal na paghanap nin kayamanan, kaipuhan talaga nindang magtrabaho nin mahigos tanganing mabuhay. Puedeng depisil, nakakaubos nin kosog saka panahon, asin nakakapagabat an paggibo kaiyan sa presenteng sistema nin mga bagay. Madali sanang mapurisaw na gayo manongod sa kakanon, gubing, asin istaran kaya napapabayaan o nalilingawan pa ngani an mas importanteng mga bagay. (Roma 14:17) Si Jesus nagtao nin ilustrasyon, o parabola, na eksaktong naglaladawan sa tendensiang ini nin tawo. Mababasa iyan sa Lucas 12:16-21.
3. Isaysay sa halipot an ilustrasyon ni Jesus na nakarekord sa Lucas 12:16-21.
3 An ilustrasyon ni Jesus itinao sa iyo man sanang okasyon na sia nagtaram manongod sa pangangaipo na magmaan tumang sa kaaraan, na siniyasat niato nin detalyado sa naenot na artikulo. Pagkatapos na magtao nin patanid manongod sa kaaraan, si Jesus nagtaram manongod sa sarong tawong mayaman na dai kontento sa mga tambobong na pano nin marahay na bagay na sadiri na nia kundi ginaraba iyan asin nagtogdok nin orog na darakula tanganing makatipon nin dakol pang marahay na bagay. Kan iniisip na nia na sia andam nang magpahorohayahay asin ikaogma an marahay na buhay, sinabi nin Dios sa saiya na magagadan na sia asin an gabos na marahay na bagay na tinipon kan tawong iyan mapapaduman sa ibang tawo. Dangan idinugang ni Jesus an pantapos na mga tataramon: “Siring an nangyayari sa tawo na nagtitipon nin kayamanan para sa saiya man sana alagad bakong mayaman sa pagheling nin Dios.” (Lucas 12:21) Anong leksion an manonodan niato sa parabolang ini? Paano niato ikakaaplikar an leksion na iyan sa sato mismong buhay?
Sarong Tawo na May Problema
4. Masasabi niato na anong klaseng tawo an ilinaladawan sa parabola ni Jesus?
4 Pamilyar an ilustrasyon na itinao ni Jesus. Maririsa niato na inintrodusir ni Jesus an estorya paagi sana sa pagsabi: “An daga nin sarong tawong mayaman marahay an produkto.” Dai sinabi ni Jesus na nakua kan tawong iyan an saiyang kayamanan sa tuso o ilegal na paagi. Sa ibang pagtaram, dai sia ilinaladawan bilang sarong maraot na tawo. Sa katunayan, huli sa sinabi ni Jesus, rasonableng isipon na an tawong ilinaladawan sa parabola nagtrabaho nin mahigos. Minsan paano masasabotan na sia sarong tawo na nagplano asin nagtipon para sa ngapit, na tibaad nasa isip nia an ikakarahay kan saiyang pamilya. Sa siring, sa kinabanon na punto de vista, puede siang mansayon bilang sarong mahigos na tawo na sineseryoso an saiyang mga obligasyon.
5. Anong problema an napapaatubang sa tawo sa parabola ni Jesus?
5 Sa ano man na kamugtakan, inapod ni Jesus an tawong iyan sa parabola na tawong mayaman, na an boot sabihon saro na may abunda nang materyal na bagay. Minsan siring, arog kan pagkaladawan ni Jesus, an tawong mayaman may problema. Labi nanggad kisa sa linalaoman nia an nagin produkto kan saiyang daga, na sobrang marhay sa kaipuhan o maaasikaso nia. Ano kutana an maninigo niang gibohon?
6. Anong mga pagpili an napapaatubang sa dakol sa mga lingkod nin Dios ngonyan?
6 Dakol sa mga lingkod ni Jehova ngonyan an napapaatubang sa mga situwasyon na kaparehong marhay kan sa tawong mayaman. An tunay na mga Kristiano nagmamaigot na magin onesto, mahigos, asin sadiosan na mga trabahador. (Colosas 3:22, 23) Baga man sinda empleyado o may sadiring negosyo, sa parate sinda nagigin mapanggana, na nagigin eksperto pa ngani sa saindang ginigibo. Kun inaalokan nin halangkaw na mga posisyon sa trabaho o nin bagong mga oportunidad sa negosyo, kaipuhan nindang gumibo nin desisyon. Maninigo daw nindang akoon an halangkaw na posisyon asin magganar nin mas dakol na kuarta? Siring man, sa eskuelahan dakol na hoben na Saksi an nakakalabi sa iba an abilidad. Bilang resulta, tibaad alokan sinda nin libreng pag-eskuela para sa dugang pang edukasyon sa prestihiosong mga eskuelahan. Maninigo daw na arogon na sana ninda an ginigibo kan kadaklan asin akoon an inaalok sa sainda?
7. Paano tinawan nin atension kan tawo sa parabola ni Jesus an problema kaini?
7 Sa pagbalik sa ilustrasyon ni Jesus, ano an ginibo kan tawong mayaman kan an saiyang daga magkaigwa nin abundang produkto na huli kaiyan mayo na siang masasarayan kan saiyang inani? Nagdesisyon siang gabaon an dati niang mga tambobong asin magtogdok nin orog pa kadarakula tanganing sarayon an gabos na sobrang tipasi asin marahay na mga bagay. Minalataw na an planong iyan nagtao sa saiya nin pakamate nin seguridad asin satispaksion kaya inisip-isip nia: “Masabi ako sa sakong kalag: ‘Kalag, dakol ka nang marahay na bagay na naririmpos para sa dakol na taon; magpaginhawa ka na sana, magkakan ka, uminom ka, magpasiramsiram ka.’”—Lucas 12:19.
Taano ta “Bakong Makatanosan”?
8. Anong mahalagang marhay na bagay an nalingawan kan tawo sa parabola ni Jesus?
8 Minsan siring, arog kan pagkapresentar kaiyan ni Jesus, an plano kan tawong mayaman nagtao sana nin bakong totoo na pakamate nin seguridad. Minsan ngani garo baga praktikal iyan, dai kaiba dian an sarong mahalagang marhay na bagay—an kabotan nin Dios. An iniisip sana kan tawong iyan iyo an saiyang sadiri, kun paano sia magpapaginhawa na sana, makakan, mainom, asin magpapasiramsiram. Inisip nia na huling igwa sia nin ‘dakol na marahay na bagay,’ sia magkakaigwa man nin “dakol na taon.” Alagad makamomondo para sa saiya, dai nangyari an mga bagay siring sa gusto nia. Arog kan mas naenot na sinabi ni Jesus, “dawa kun an sarong tawo abunda an saiyang buhay dai minagikan sa mga bagay na sadiri nia.” (Lucas 12:15) Kan banggi man sanang idto, an gabos na pinagpagalan kan tawong iyan biglang nawaran nin kamanungdanan, huli ta an Dios nagsabi sa saiya: “Ika na bakong makatanosan, ngonyan na banggi hahagadon ninda sa saimo an saimong kalag. Kun siring, siisay an magkakamit kan mga bagay na saimong tinipon?”—Lucas 12:20.
9. Taano ta inapod na bakong makatanosan an tawo sa parabola?
9 Digdi, nasabotan niato an mahalagang marhay na punto kan ilustrasyon ni Jesus. Inapod nin Dios na bakong makatanosan an tawong iyan. An Exegetical Dictionary of the New Testament nagpapaliwanag na an mga porma kan ginamit na termino sa Griego “pirmeng nangangahulogan nin kawaran nin pakasabot.” Sinasabi kaiyan na sa parabolang ini, an Dios irinerepresentar na naggagamit kan terminong iyan tanganing ihayag an “pagigin daing halaga kan mga plano kan mga mayaman para sa ngapit.” An terminong iyan nanonongod, bakong sa saro na mayo nin intelihensia, kundi sa “saro na nagsasayumang admitiron an pagsarig nia sa Dios.” Ipinapagirumdom kan pagkaladawan ni Jesus sa tawong mayaman an sinabi nia kan huri sa mga Kristiano kan enot na siglong kongregasyon sa Laodicea, Asia Minor: “Ika nagsasabi: ‘Ako mayaman asin nagkaigwa nin mga kayamanan patin dai na nagkakaipo nin ano man,’ alagad dai mo aram na ika miserable asin makaheherak asin dukha asin buta patin huba.”—Kapahayagan 3:17.
10. Taano ta an pagkaigwa nin ‘dakol na marahay na bagay’ bakong garantiya sa pagkaigwa nin “dakol na taon”?
10 Maninigo niatong isapuso an leksion na iyan. Puede daw kitang magin arog kan tawo sa parabola—na naghihigos na marhay sa trabaho tanganing masierto na magkakaigwa kita nin ‘dakol na marahay na bagay’ pero dai ginigibo kun ano kaipuhan tanganing kamtan an oportunidad na magkaigwa nin “dakol na taon”? (Juan 3:16; 17:3) An Biblia nagsasabi: “An mahahalagang bagay magigin daing kamanungdanan sa aldaw nin kabangisan,” asin “an saro na nananarig sa saiyang kayamanan—sia mismo mahuhulog.” (Talinhaga 11:4, 28) Kun siring, idinagdag ni Jesus an ultimong konsehong ini sa parabola: “Siring an nangyayari sa tawo na nagtitipon nin kayamanan para sa saiya man sana alagad bakong mayaman sa pagheling nin Dios.”—Lucas 12:21.
11. Taano ta daing kamanungdanan na isentro nin saro an saiyang paglaom asin seguridad sa materyal na mga rogaring?
11 Kan sabihon ni Jesus na “siring an nangyayari,” idinodoon nia na an nangyari sa tawong mayaman sa ilustrasyon mangyayari man sa mga isinesentro an saindang buhay—an saindang paglaom asin seguridad—solamente sa materyal na mga rogaring. An sala bako nanggad sa ‘pagtipon nin kayamanan para sa saiya man sana’ kundi sa pagigin bakong “mayaman sa pagheling nin Dios.” An disipulong si Santiago nagtao nin kaparehong patanid kan sia magsurat: “Madia, ngonyan, kamo na nagsasabi: ‘Ngonyan o sa aga kami maduman sa siring na siudad asin maontok duman nin sangtaon, asin magnenegosyo kami patin maggaganansia,’ mantang dai nindo aram kun ano an magigin buhay nindo sa aga.” Ano an maninigo nindang gibohon? “Imbes, magsarabi kamo: ‘Kun bobooton ni Jehova, mabubuhay kami asin gigibohon man niamo ini o iyan.’” (Santiago 4:13-15) Gurano man tibaad kayaman an sarong tawo o gurano man tibaad kadakol kan saiyang mga rogaring, an gabos na iyan magigin daing kamanungdanan kun sia bakong mayaman sa pagheling nin Dios. Kun siring, ano an boot sabihon kan pagigin mayaman sa pagheling nin Dios?
An Pagigin Mayaman sa Pagheling nin Dios
12. Magigin mayaman kita sa pagheling nin Dios huli sa paggibo nin ano?
12 Sa mga tataramon ni Jesus, an pagigin mayaman sa pagheling nin Dios kabaliktaran kan pagtipon nin kayamanan para sa saiya man sana, o pagpayaman sa sadiri sa materyal na mga bagay. Sa siring, sinasabi ni Jesus na an pangenot sa satong buhay maninigo na bakong an pagtipon nin materyal na kayamanan o pagpasiramsiram sa kun ano an tibaad igwa kita. Imbes, maninigo niatong gamiton an satong kayamanan sa paagi na makakapaoswag, o makakapakosog kan satong relasyon ki Jehova. An paggibo kaiyan siertong makakapayaman sa sato sa pagheling nin Dios. Taano? Huli ta nagbubukas iyan nin pinto sa dakol na bendisyon hale sa saiya. An Biblia nagsasabi sa sato: “An bendisyon ni Jehova—iyan an nakakapayaman, asin dai nia iyan dinadagdagan nin kakologan.”—Talinhaga 10:22.
13. Paano “nakakapayaman” an bendisyon ni Jehova?
13 Kun si Jehova nagtatao nin mga bendisyon sa saiyang banwaan, pirme niang itinatao sa sainda an pinakamarahay. (Santiago 1:17) Halimbawa, kan tinawan ni Jehova nin istaran an mga Israelita, iyan “sarong daga na nagbobolos nin gatas asin tangguli.” Minsan ngani an daga nin Egipto ilinaladawan man sa paaging iyan, an daga na itinao ni Jehova sa mga Israelita may kalaenan sa kisuerra sarong mahalagang marhay na bagay. Iyan “sarong daga na inaataman ni Jehova na saimong Dios,” an sabi ni Moises sa mga Israelita. Sa ibang pagtaram, sinda magigin mapanggana huli ta aatamanon sinda ni Jehova. Sagkod na an mga Israelita nagdadanay na maimbod ki Jehova, sinda tinatawan nia nin nagsosopay na bendisyonan asin nagkakaigwa nin pamumuhay na heling-heling na nakakalabi kisa sa gabos na nasyon na nasa palibot ninda. Iyo, an bendisyon ni Jehova an “nakakapayaman”!—Bilang 16:13; Deuteronomio 4:5-8; 11:8-15.
14. Ano an nakakamtan kan mga mayaman sa pagheling nin Dios?
14 An pananaram na “mayaman sa pagheling nin Dios” trinadusir man na “mayaman dapit sa Dios” (Magna Banal na Kasuratan) o “mayaman sa atubang nin Dios.” (Marahay na Bareta Biblia) Sa pangkagabsan an mga mayaman sa materyal interesado sa kun ano an tibaad pagheling sa sainda kan iba. Sa parate maheheling ini sa saindang pamumuhay. Gusto nindang pahangaon an mga tawo paagi sa inaapod kan Biblia na “pagpaabaw-abaw kan kaya sa buhay.” (1 Juan 2:16) Sa kabaliktaran, an mga mayaman sa pagheling nin Dios nagkakamit kan abundang pag-oyon, pabor, asin dai na kutana maninigong kabootan nin Dios asin nagkakaigwa nin maogmang personal na relasyon sa saiya. An pagigin nasa mahalagang marhay na kamugtakan na iyan siertong nagtatao sa sainda nin pakamate nin maogmang pagkakontento asin seguridad, na labi pa kisa ikakatao nin ano man na materyal na kayamanan. (Isaias 40:11) An saro pang hapot iyo an, Ano an dapat niatong gibohon tanganing magin mayaman sa pagheling nin Dios?
Mayaman sa Pagheling nin Dios
15. Ano an dapat niatong gibohon tanganing magin mayaman sa pagheling nin Dios?
15 Sa ilustrasyon ni Jesus, an tawo nagplano asin nagtrabaho nin mahigos tangani sanang payamanon an saiyang sadiri, asin sia inapod na bakong makatanosan. Kun siring, tanganing magin mayaman sa pagheling nin Dios, kaipuhan na hingoahon niatong magin mahigos asin makikabtang nin lubos sa mga aktibidad na totoong mahalaga asin kapakipakinabang sa pagheling nin Dios. Kabilang digdi an ipinagboot ni Jesus: “Kun siring, paduman kamo asin gumibo kamo nin mga disipulo sa mga tawo kan gabos na nasyon.” (Mateo 28:19) An paggamit kan satong panahon, kosog, asin abilidad, na bakong para sa sadiring pag-asenso, kundi sa paghuhulit kan Kahadean asin paggibo nin disipulo puedeng iagid sa pangangapital. An mga naggibo kaiyan nag-ako nin abundang pakinabang sa espirituwal, arog kan ipinapaheling kan minasunod na mga eksperyensia.—Talinhaga 19:17.
16, 17. Anong mga eksperyensia an ikakasaysay nindo tanganing ipaheling an paagi nin pamumuhay na nagpapayaman sa saro sa pagheling nin Dios?
16 Helingon niato an nangyari sa sarong Kristiano sa sarong nasyon sa Asia. Halangkaw an sueldo nia sa saiyang trabaho bilang parahirahay nin komputer. Minsan siring, an saiyang trabaho nakakaubos kan haros gabos niang panahon na nagin dahelan na mamatean nia na sia dukha na sa espirituwal. Sa katapustapusi, imbes na magmaigot na magin mapanggana sa saiyang trabaho, naghale sia sa saiyang trabaho asin pinonan an negosyo na paggibo nin ice cream saka pagtinda kaiyan sa tinampo tanganing magkaigwa sia nin mas dakol na panahon sa pag-asikaso sa saiyang espirituwal na mga pangangaipo asin paninimbagan. Pinagngisihan sia kan dati niang mga katrabaho, alagad ano an nagin resulta? “An totoo, mas dakula an ginaganar ko kisa kan naghihirahay ako nin mga komputer,” an sabi nia. “Nagin mas maogma ako huli ta dai na ako natetension asin nahahadit na arog kan sa dati kong trabaho. Asin an pinakamahalaga, ngonyan namamatean ko na mas dayupot ako ki Jehova.” Huli sa pagbabagong iyan nagin posible na an Kristianong ini lumaog sa bilog na panahon na ministeryo, asin ngonyan naglilingkod na sia sa sangang opisina kan Mga Saksi ni Jehova sa saiyang nasyon. Tunay nanggad na “nakakapayaman” an bendisyon ni Jehova.
17 An saro pang halimbawa iyo an dapit sa sarong babae na nagdakula sa pamilya na labi-labi an pagpahalaga sa edukasyon. Nag-eskuela sia sa mga unibersidad sa Pransia, Mejico, patin Switzerland asin sia may oportunidad na magkaigwa nin mapangganang karera. “Nagin mapanggana ako; irinespeto ako asin nag-ako nin espesyal na mga oportunidad,” an sabi nia, “alagad namamatean ko na igwa nin kulang, mayo nanggad ako nin satispaksion.” Dangan namidbid ko si Jehova. Sia nagsabi: “Mantang nag-ooswag ako sa espirituwal, an sakong pagmawot na mapaogma si Jehova asin mabalosan nin kadikit an mga itinao nia sa sako nakatabang sa sako na maheling nin malinaw an dalan na lalakawan ko—an paglingkodan sia nin bilog na panahon.” Naghale sia sa saiyang sekular na trabaho asin dai nahaloy sia nabautismohan. Sa nakaaging 20 taon, sia maogmang naglingkod sa bilog na panahon na ministeryo. “May mga nag-iisip na sinayang ko an sakuyang mga abilidad,” an pagsaysay nia, “alagad naheling ninda na maogma ako, asin hinahangaan ninda an mga prinsipyo na sinusunod ko sa sakong buhay. Aroaldaw akong namimibi ki Jehova na tabangan ako na magin mapakumbaba tanganing kamtan ko an saiyang pag-oyon.”
18. Arog ni Pablo, paano kita puedeng magin mayaman sa pagheling nin Dios?
18 Si Saulo, na nagin si apostol Pablo, may potensial na magkaigwa nin mapangganang karera. Pero, kan huri sia nagsurat: “Tunay na ibinibilang ko man an gabos na bagay na kapierdihan huli sa daing kaagid na halaga kan kaaraman manongod ki Cristo Jesus na sakong Kagurangnan.” (Filipos 3:7, 8) Para ki Pablo, an kayamanan na nakua nia paagi ki Cristo nakakalabi sa ano pa man na bagay na ikakaalok kan kinaban. Siring man, paagi sa pagbutas sa ano man na maimot na mga ambisyon asin pagsunod sa buhay na may diosnon na debosyon, puede man niatong makamit an buhay na mayaman sa pagheling nin Dios. Sinisierto sa sato kan Tataramon nin Dios: “An bunga nin kapakumbabaan asin pagkatakot ki Jehova kayamanan asin kamurawayan patin buhay.”—Talinhaga 22:4.
Ikakapaliwanag daw Nindo?
• Ano an problema kan tawo sa ilustrasyon ni Jesus?
• Taano ta inapod na bakong makatanosan an tawo sa parabola?
• Ano an boot sabihon kan pagigin mayaman sa pagheling nin Dios?
• Paano kita magigin mayaman sa pagheling nin Dios?
[Mga Hapot Para sa Pag-adal]
[Ritrato sa pahina 26]
Taano ta inapod na bakong makatanosan an tawong mayaman?
[Ritrato sa pahina 27]
Paano puedeng magin totoong pagbalo an mga oportunidad para sa pag-asenso?
[Ritrato sa pahina 28]
“An bendisyon ni Jehova—iyan an nakakapayaman”