“Magmaan Kamo sa Gabos na Klase nin Kaaraan”
“Magmaan Kamo sa Gabos na Klase nin Kaaraan”
“Dawa kun an sarong tawo abunda an saiyang buhay dai minagikan sa mga bagay na saiyang nasasadirihan.”—LUCAS 12:15.
1, 2. (a) Ano an naobserbaran nindo manongod sa pinagkakainteresan asin pinagmamaigotan na aboton kan mga tawo ngonyan? (b) Paano kita puedeng maapektaran kan siring na mga saboot?
KUARTA, rogaring, prestihio, mga trabaho na halangkaw an sueldo, pamilya—kabilang ini sa mga bagay na ibinibilang nin kadaklan na sokolan nin kapangganahan o na garantiya sa pagkaigwa nin seguradong ngapit. Risang-risa na sa mga nasyon na mayaman asin pobre, an mga pinagkakainteresan asin pinagmamaigotan na aboton kan dakol na tawo nakasentro sa materyal na mga pakinabang asin pag-asenso. Sa ibong na lado, an saindang interes sa espirituwal na mga bagay—kun igwa man—marikas na nagluluya.
2 Siring nanggad ini kan ihinula kan Biblia. Iyan nagsasabi: “Sa huring mga aldaw maabot an delikadong mga panahon na masakit pakibagayan. Huli ta an mga tawo magigin mga mamomoton sa sainda man sana, mga mamomoton sa kuarta, . . . mga mamomoton sa kasingawan imbes na mga mamomoton sa Dios, na may porma nin diosnon na debosyon alagad nagpapainda sa kapangyarihan kaiyan.” (2 Timoteo 3:1-5) Huling padagos na namumuhay kaiba kan siring na mga tawo, an tunay na mga Kristiano dayaday na iniimpluwensiahan na umarog sa siring kaining klase nin kaisipan asin estilo nin pamumuhay. Ano an makakatabang sa sato na labanan an mga paghihingoa kan kinaban na ‘moldehon kita sa sadiring hormahan kaiyan’?—Roma 12:2, The New Testament in Modern English, ni J. B. Phillips.
3. Anong hatol na itinao ni Jesus an pag-oolayan niato ngonyan?
3 Bilang an “Pangenot na Ahente asin Parasangkap kan satong pagtubod,” si Jesu-Cristo nagtao sa sato nin mapuersang mga leksion sa bagay na ini. (Hebreo 12:2) Sa sarong okasyon kan si Jesus nakikipag-olay sa kadaklan manongod sa nagkapirang bagay na nagtatao nin espirituwal na kaliwanagan, sarong lalaki an suminaliot sa orolay na may kahagadan: “Paratokdo, sabihi man an tugang ko na hirasan ako kan pamana.” Bilang simbag, tinawan ni Jesus an lalaki—asin an gabos na naghihinanyog—nin sarong seryosong hatol. Ipinahayag nia an sarong mapuersang patanid tumang sa kaaraan asin dinugangan nia nin puersa an patanid na iyan paagi sa nakakapukaw sa isip na ilustrasyon. Marahay na maghimate kita sa sinabi ni Jesus sa okasyon na iyan asin helingon niato kun paano kita makikinabang sa pag-aplikar kaiyan sa sato mismong buhay.—Lucas 12:13-21.
Sarong Kahagadan na Bakong Maninigo
4. Taano ta bakong maninigo an pagsaliot kan lalaki sa sinasabi ni Jesus?
4 Bago magsaliot an lalaki, ipinapakipag-olay ni Jesus sa saiyang mga disipulo asin sa iba pa an manongod sa pagigin mapagbantay tumang sa pagsaginsagin, manongod sa pagkaigwa nin kosog nin boot na ituga an pakisumaro sa Aki nin tawo, asin manongod sa pag-ako nin tabang hale sa banal na espiritu. (Lucas 12:1-12) Daing duwa-duwa na mahalagang marhay na mga tema ini na kaipuhan na isapuso kan mga disipulo. Minsan siring, sa tahaw kan nakakapukaw sa isip na pahayag na iyan, an lalaki biglang nagsaliot asin nakiolay ki Jesus na areglohon an garo baga pagpasuruhay nin pamilya manongod sa materyal na mga rogaring. Pero, may manonodan kitang mahalagang leksion sa pangyayaring ini.
5. An kahagadan kan lalaki naghahayag nin ano manongod sa saiya?
5 Sinasabi na “an karakter nin sarong tawo parateng maririsa sa kun ano an iniisip nia mantang naghihinanyog sia sa espirituwal na sadol.” Mantang si Jesus nagtataram manongod sa seryosong espirituwal na mga bagay, nag-iisip gayod an lalaking iyan kun ano an saiyang magigibo tanganing magkaigwa nin pinansial na mga pakinabang. Dai sinabi kun baga igwa sia nin balidong basehan tanganing magreklamo dapit sa pamana. Tibaad gusto niang aprobetsaran an autoridad asin reputasyon ni Jesus bilang sarong madonong na hokom sa gibo-gibo nin tawo. (Isaias 11:3, 4; Mateo 22:16) Ano man an saiyang dahelan, ipinaparisa kan saiyang hapot na may problema sa kamugtakan kan saiyang puso—sarong seryosong kawaran nin pag-apresyar sa espirituwal na mga bagay. Bako daw na marahay na dahelan ini na siyasaton niato an satong sadiri? Halimbawa, sa Kristianong mga pagtiripon, pasil sanang maglagawlagaw an satong isip o mag-isip kun ano an tibaad gigibohon niato pagkatapos kan pagtiripon. Imbes, maninigo kitang magtao nin atension sa kun ano an sinasabi asin mag-isip nin mga paagi na magibo an personal na aplikasyon kan impormasyon tanganing mapaoswag niato an satong relasyon sa satong langitnon na Ama, si Jehova Dios, asin sa satong mga kapwa Kristiano.—Salmo 22:22; Marcos 4:24.
6. Taano ta dai pinanigoan ni Jesus an kahagadan kan lalaki?
6 Ano man an nagmotibar sa lalaki na gibohon an kahagadan na iyan, dai iyan pinanigoan ni Jesus. Imbes, si Jesus nagsabi sa saiya: “Lalaki, siisay an nagnombra sako na magin hokom o parahiras sa saindo?” (Lucas 12:14) Sa pagsabi kaiyan, si Jesus nagtataram manongod sa sarong bagay na nasasabotan kan mga tawo, huli ta oyon sa Ley ni Moises, an mga hokom sa siudad ninombrahan tanganing iyo an magdesisyon sa siring kaiyan na mga bagay. (Deuteronomio 16:18-20; 21:15-17; Rut 4:1, 2) Sa ibong na lado, si Jesus interesado sa mas mahahalagang bagay—an magpatotoo sa katotoohan kan Kahadean asin magtokdo sa mga tawo kan kabotan nin Dios. (Juan 18:37) Huli sa pagsunod sa halimbawa ni Jesus, imbes na madisturbo nin ordinaryong mga problema, ginagamit niato an satong panahon asin kosog tanganing ihulit an maogmang bareta asin ‘gumibo nin mga disipulo sa mga tawo kan gabos na nasyon.’—Mateo 24:14; 28:19.
Magmaan sa Kaaraan
7. Anong may pakarorop na obserbasyon an ipinaheling ni Jesus?
7 Huling nasasabotan an kairairaroming mga intension kan puso, aram ni Jesus na igwa nin mas seryosong bagay na kalabot sa kahagadan kan lalaki ki Jesus na mangoltanan sa personal na bagay. Sa siring, imbes na sayumahan na sana ni Jesus an kahagadan, nasabotan ni Jesus kun ano an motibo kan puso kaini asin sia nagsabi: “Magpuka kamo asin magmaan kamo sa gabos na klase nin kaaraan, huli ta dawa kun an sarong tawo abunda an saiyang buhay dai minagikan sa mga bagay na sadiri nia.”—Lucas 12:15.
8. Ano an kaaraan, asin ano an puedeng ibunga kaiyan?
8 An kaaraan bako sanang kamawotan na magkaigwa nin kuarta o nagkapirang bagay, na puedeng magamit nin tama asin may katuyohan. Oyon sa sarong diksionaryo, iyan an “labi-labing pagmawot sa kayamanan o mga rogaring o sa mga rogaring nin iba.” Puedeng kalabot dian an dai naninigoan asin mahanab na kamawotan na makua an mga bagay—tibaad an mga sadiri nin iba—tangani sanang magkaigwa kaiyan, na dai iniintindi kun kaipuhan nia iyan o kun ano an magigin epekto kaiyan sa iba. An maaraon na tawo tinotogotan an ano man na gusto nia na magdominar sa saiyang kaisipan asin gawe-gawe sagkod na iyan nagigin nang saiyang dios. Girumdomon na ipinapareho ni apostol Pablo an sarong mahanab na tawo sa sarong parasamba sa idolo, na dai magmamana kan Kahadean nin Dios.—Efeso 5:5; Colosas 3:5.
9. Sa anong mga paagi puedeng maheling an kaaraan? Magtao nin nagkapirang halimbawa.
9 Interesante nanggad, si Jesus nagpatanid tumang sa “gabos na klase nin kaaraan.” Dakol na klase an kaaraan. An ultimo sa Sampulong Togon sinarosaro an nagkapira sa mga iyan, na sinasabi: “Dai mo pagmawoton an harong kan saimong kapwa. Dai mo pagmawoton an agom na babae kan saimong kapwa, ni an saiyang oripon na lalaki ni an saiyang oripon na babae ni an saiyang toro ni an saiyang asno ni an ano man na sadiri kan saimong kapwa.” (Exodo 20:17) An Biblia may dakol na halimbawa nin mga indibiduwal na nagkasala nin magabat huli sa manlaenlaen na klase nin kaaraan. Si Satanas iyo an enot na naara sa sarong bagay na sadiri nin iba—an kamurawayan, onra, asin autoridad na para sana ki Jehova. (Kapahayagan 4:11) Naara si Eva sa deretso na magdesisyon para sa saiyang sadiri, asin an pagkadaya sa saiya sa bagay na ini nagbunga nin kasalan asin kagadanan sa mga tawo. (Genesis 3:4-7) An mga demonyo mga anghel na dai nakontento sa “saindang dating katongdan kundi nagbaya sa saindang sadiring tamang erokan” huli sa sarong bagay na bakong maninigo para sa sainda. (Judas 6; Genesis 6:2) Isip-isipon man nindo si Balaam, Acan, Guejazi, asin Judas. Imbes na makontento sa saindang kamugtakan sa buhay, an labi-labing pagmawot sa materyal na mga rogaring an nagin dahelan na gamiton ninda sa salang paagi an saindang katongdan, na nagbunga nin kapahamakan asin kalaglagan ninda.
10. Paano kita maninigong “magpuka,” siring kan sadol ni Jesus?
10 Angay nanggad na inintrodusir ni Jesus an patanid tumang sa kaaraan paagi sa mga tataramon na “magpuka kamo”! Taano? Huling madali na marhay na marisa nin mga tawo na an iba mahanab o maaraon, pero bihira nindang admitiron na sinda mismo mahanab o maaraon man. Pero, sinabi ni apostol Pablo na “an pagkamoot sa kuarta gamot nin gabos na klase nin nakakadanyar na bagay.” (1 Timoteo 6:9, 10) Ipinaliwanag ni disipulo Santiago na an salang pagmawot, “kun iyan nangidam na, nangangaki nin kasalan.” (Santiago 1:15) Kaoyon kan konseho ni Jesus, maninigo kitang “magpuka,” bako na tanganing manmanan an iba kun sinda maaraon, kundi siyasaton an satong sadiri tanganing maheling kun ano an kamawotan kan satong puso, tanganing ‘makapagmaan kita sa gabos na klase nin kaaraan.’
Abundang Buhay
11, 12. (a) Anong patanid an itinao ni Jesus tumang sa kaaraan? (b) Taano ta kaipuhan niatong himateon an patanid ni Jesus?
11 Igwa nin saro pang dahelan kun taano ta dapat kitang magmaan sa kaaraan. Mangnohon an sunod na sinabi ni Jesus: “Dawa kun an sarong tawo abunda an saiyang buhay dai minagikan sa mga bagay na sadiri nia.” (Lucas 12:15) Angay nanggad na pag-isipan ini sa materyalistikong panahon niato, na ikinokonektar nin mga tawo an pagigin may kaya asin pagigin asensado sa kaogmahan asin kapangganahan. Paagi sa mga tataramon na iyan, sinasabi ni Jesus na an talagang makahulogan asin nakakakontentong buhay dai naggigikan o dai nakadepende sa materyal na mga rogaring, gurano man iyan kaabunda.
12 Minsan siring, may mga dai minaoyon. Tibaad mangatanosan sinda na paagi sa materyal na mga rogaring, an buhay nagigin mas komportable asin nakakagayagaya, sa siring nagigin mas kapakipakinabang. Huli kaini, idinudusay ninda an saindang sadiri sa mga aktibidad na makakapagtao sa sainda kan kakayahan na makua an gabos na minamawot nindang rogaring asin mga gamit na mekanikal o elektroniko. Iniisip ninda na magbubunga ini nin marahay na buhay. Alagad sa pag-isip ninda kaiyan, dai ninda nasasabotan an boot sabihon ni Jesus.
13. Ano an timbang na pagmansay manongod sa buhay asin mga rogaring?
13 Imbes na idoon kun baga tama o sala an pagigin abunda, idinodoon ni Jesus na an buhay nin tawo dai minagikan sa “mga bagay na sadiri nia,” an boot sabihon, sa mga bagay na yaon na sa saiya. Mapadapit digdi, aram niato gabos na tanganing mabuhay, o tanganing susteniran an satong buhay, dai man talaga niato kaipuhan an kadakol na bagay. Kaipuhan sana nin dikit na pagkakan, ikakasulot, asin lugar na matotorogan. An mayaman abunda sa mga bagay na ini, asin an dukha kaipuhan na magmaigot tanganing makua an kaipuhan ninda. Minsan siring, magigin pareho an kamugtakan ninda sa kagadanan—an gabos na bagay mayong kamanungdanan. (Eclesiastes 9:5, 6) Sa siring, an pagkaigwa nin materyal na mga rogaring dai gigibohon na makahulogan an satong buhay asin dai man iyan makakatao nin katuyohan sa satong buhay. Magigin malinaw an punto de vistang ini kun sisiyasaton niato kun anong klaseng buhay an sinasabi ni Jesus.
14. Ano an manonodan niato sa termino para sa “buhay” oyon sa pagkasaysay sa Biblia?
14 Kan sabihon ni Jesus na an “buhay dai minagikan sa mga bagay na sadiri nia,” an termino na ginamit digdi sa Ebanghelyo ni Lucas para sa “buhay” (sa Griego, zo·eʹ) nanonongod, bakong sa paagi o estilo nin pamumuhay, kundi sa buhay mismo, an buhay na nasa sato. * Sinasabi ni Jesus na baga man kita mayaman o dukha, baga man kita nabubuhay sa luho o haros igo sana an nakukua tanganing mabuhay, dai niato kontrolado nin lubos kun gurano kita kahaloy na mabubuhay o kun buhay pa ngani kita sa aga. Sinabi ni Jesus sa saiyang Sermon sa Bukid: “Siisay sa saindo na sa paghadit makakadagdag nin sarong sokol sa siko sa lawig kan saiyang buhay?” (Mateo 6:27) Malinaw na sinasabi kan Biblia na si Jehova sana an “burabod nin buhay,” asin sia sana an makakatao sa mga maimbod nin “tunay na buhay,” o “buhay na daing katapusan,” baga man sa langit o sa daga.—Salmo 36:9; 1 Timoteo 6:12, 19.
15. Taano ta dakol an nagtitiwala sa saindang materyal na mga rogaring?
15 Idinodoon kan mga tataramon ni Jesus kun gurano kapasil na magkaigwa an mga tawo nin biko o biribid na pagmansay sa buhay. Baga man mayaman o dukha, an gabos na tawo bakong sangkap asin igwa nin saro sanang kaaabtan. Si Moises kan suanoy nagkomento: “An mga aldaw nin samong mga taon setentang taon; asin kun huli sa espesyal na kakosogan iyan otsentang taon, alagad iyan danay na may kasakitan asin makolog na mga bagay; huli ta iyan kaipuhan na marikas na umagi, asin kami minalupad.” (Salmo 90:10; Job 14:1, 2; 1 Pedro 1:24) Huli kaini, an mga tawo na dai nakapatalubo nin marahay na relasyon sa Dios sa parate nagkakaigwa kan kaisipan na nasambitan ni apostol Pablo na “magkarakan asin mag-irinom kita, huli ta sa aga magagadan kita.” (1 Corinto 15:32) An iba, huling aram na an buhay madaling mawara asin daing kasegurohan, nagmamaigot na magkaigwa nin seguridad asin magin estable paagi sa materyal na mga rogaring. Tibaad naghohona sinda na an pagkaigwa nin dakol na naheheling na materyal na bagay maski paano gigibohon an buhay na mas may kasegurohan. Sa siring, daing ontok sindang nagpapagal tanganing magtipon nin kayamanan asin mga rogaring, na salang ikinokonektar an siring na mga bagay sa seguridad asin kaogmahan.—Salmo 49:6, 11, 12.
Sarong Seguradong Ngapit
16. Sa ano dai nakabasar an tunay na halaga nin buhay?
16 Tibaad totoo na an mas halangkaw na klase nin pamumuhay—na igwa nin abundang kakanon, gubing, istaran, asin iba pang luho—puedeng magtao nin mas komportableng buhay o mas marahay pa ngani na serbisyo medikal asin sa siring lumawig nin pira pang taon an buhay nin saro. Minsan siring, an arog daw kaiyan na buhay talagang mas makahulogan asin mas may seguridad? An tunay na halaga nin buhay dai masosokol sa lawig nin buhay nin saro o sa kadakolan kan materyal na mga bagay na tibaad sadiri o ginagamit nin saro. Idinoon ni apostol Pablo an peligro nin labi-labing pagsarig sa siring na mga bagay. Sia nagsurat ki Timoteo: “Pagbotan mo an mga mayaman sa presenteng sistema nin mga bagay na dai magin mapalangkaw, asin ibugtak an saindang paglaom, bakong sa kayamanan na bakong segurado, kundi sa Dios, na abundang nagtatao sa sato kan gabos na bagay para sa satong ikakaogma.”—1 Timoteo 6:17.
17, 18. (a) Anong marahayon na mga halimbawa mapadapit sa materyal na mga rogaring an maninigo niatong arogon? (b) Anong parabola ni Jesus an pag-oolayan niato sa sunod na artikulo?
17 Bakong madonong na ibugtak nin saro an paglaom sa kayamanan huling an mga iyan “bakong segurado.” An patriarkang si Job mayamanon, alagad kan biglang uminabot an kalamidad, an saiyang kayamanan dai nakatabang sa saiya; biglang nawara iyan. An saiyang marigon na relasyon sa Dios iyo an nag-ingat sa saiya sa gabos na pagsakit asin kahorasaan. (Job 1:1, 3, 20-22) Dai tinogotan ni Abraham na an saiyang abundang materyal na mga rogaring makaolang sa saiya na akoon an masakit na asignasyon hale ki Jehova, asin binendisyonan sia na magin “ama nin dakol na nasyon.” (Genesis 12:1, 4; 17:4-6) Maninigo niatong arogon an mga ini asin an iba pang mga halimbawa. Kita man hoben o gurang, kaipuhan na siyasaton niato an satong sadiri tanganing maheling kun ano an tunay na mahalaga sa satong buhay asin kun saen niato ibinubugtak an satong paglaom.—Efeso 5:10; Filipos 1:10.
18 An pira sanang tataramon na sinabi ni Jesus manongod sa kaaraan asin sa tamang pagmansay sa buhay tunay nanggad na makahulogan asin nakakapagtokdo. Minsan siring, si Jesus may nasa isip pang mga instruksion, asin sia padagos na nagsaysay nin sarong nakakapukaw sa isip na parabola, o ilustrasyon, manongod sa sarong bakong makatanosan na tawong mayaman. Paano aplikado sa satong buhay ngonyan an ilustrasyon na iyan, asin ano an manonodan niato dian? Itatao kan sunod na artikulo an simbag.
[Nota sa Ibaba]
^ par. 14 An saro pang termino sa Griego na trinadusir na “buhay” iyo an biʹos, na pinagkuanan kan mga termino sa Ingles na “biography” asin “biology.” Oyon sa Vine’s Expository Dictionary of Old and New Testament Words, an biʹos nanonongod sa “peryodo o lawig nin buhay,” “an paagi nin pamumuhay,” asin “ikinabubuhay.”
Ano an Simbag Nindo?
• Ano an manonodan niato sa pagsayuma ni Jesus na panigoan an kahagadan nin sarong lalaki na kaiba kan kadaklan?
• Taano ta dapat kitang magmaan sa kaaraan, asin paano niato magigibo iyan?
• Taano ta an buhay dai minagikan sa materyal na mga rogaring?
• Paano an buhay puedeng magin tunay na kapakipakinabang asin may seguridad?
[Mga Hapot Para sa Pag-adal]
[Ritrato sa pahina 23]
Taano ta dai pinanigoan ni Jesus an kahagadan nin sarong lalaki?
[Ritrato sa pahina 23]
An kaaraan puedeng magbunga nin kapahapahamak na mga resulta
[Mga Ritrato sa pahina 25]
Paano ipinaheling ni Abraham an tamang pagmansay sa materyal na mga rogaring?