Paghanap sa Espirituwalidad

SA SAIYANG bantog na Sermon sa Bukid, si Jesus nagsabi: “Maogma idtong mga nakakamate kan saindang espirituwal na pangangaipo.” (Mateo 5:3) Tibaad oyon kamo sa mga tataramon na iyan. Minimidbid nin mga tawo sa gabos na lugar an pangangaipo para sa espirituwalidad sa saindang buhay asin ipinapamugtak na kun iyan manompongan, matao iyan sa sainda nin kaogmahan. Pero, ano an kahulogan kan terminong “espirituwalidad”?

An sarong diksionaryo tinatawan nin kahulogan an espirituwalidad bilang “pakamate nin pangangaipo o kaimbodan sa relihiosong mga pamantayan” asin bilang “an kualidad o kamugtakan nin pagigin espirituwal.” Sa siring, an mga termino na arog kan “espirituwalidad,” “pagigin espirituwal,” o “pagigin mapag-isip sa espirituwal” minamansay na parareho an kahulogan. Tanganing orog pang linawon an kahulogan kan terminong iyan, isip-isipa an pagkokomparar na ini: An sarong indibiduwal na may abilidad sa negosyo sinasabing mahilig sa negosyo. Kaagid kaiyan, an saro na may dakulang pagpapahalaga sa mga bagay na may koneksion sa espirituwal o relihion inaapod na mapag-isip sa espirituwal.

Kun siring, paano makakamit an tunay na espirituwalidad? Minsan ngani an haros gabos na relihion naghihingako na nakakaaram kan dalan pasiring sa espirituwalidad, an itinataong mga giya haros kapareho kadakol kan mga relihion mismo. An sarong Protestante na nasa sarong pagtiripon na isinasagibo sa pagpukaw nin makosogon na emosyon sa relihion naghihingako na sia ligtas na. An sarong Katoliko na nag-aatender sa Misa naghihingoang makisumaro sa Dios. An sarong Budista nagmamaigot na magkamit nin kaliwanagan paagi sa meditasion. An sarong Hindu nagmamaigot na makabutas sa siklo nin mga pagkamundag liwat paagi sa pagpainda sa sadiri. An gabos daw na ini o an arin man sa mga ini pasiring sa tunay na espirituwalidad?

Para sa dakol, an simbag sa mga hapot na iyan, dai. Hinihingako ninda na an espirituwalidad nangangahulogan na “magtubod dawa dai magin kabilang,” an boot sabihon, magtubod sa sarong dios dawa dai kabilang sa sarong relihion. An iba naniniwala na an espirituwalidad nanonongod, bako sa pagkaigwa nin relihion, kundi sa pagmawot na magkaigwa nin panlaog na katoninongan asin magkaigwa nin kahulogan an buhay. Sinasabi ninda na an mga naghahanap nin espirituwalidad dai na nangangaipo nin relihion. Imbes, an mahalaga sana sa sainda iyo an saindang kairairaroming mga saboot. An sarong parasurat nagsabi: “An tunay na espirituwalidad sarong bagay na nasa boot sana niato. Iyan an saindong paagi nin pagkamoot, pag-ako asin pagkaigwa nin interaksion sa kinaban asin sa mga tawo sa palibot nindo. Dai iyan manonompongan paagi sa pag-ayon sa sarong relihion o paagi sa paniniwala sa nagkapirang katokdoan sa relihion.”

Malinaw nanggad, an mga tawo may laen-laen na marhay na mga ideya manongod sa espirituwalidad. Rinibong libro an naghihingako na ikakapaheling kaiyan an dalan pasiring sa espirituwal na buhay, pero parateng marhay na an mga nagbabasa nakakamate pa man giraray na mayong halaga an saindang buhay asin nariribaraw. Minsan siring, may sarong libro na igwa nanggad nin masasarigan na giya manongod sa espirituwal na mga bagay. Iyan an libro na nagpapaheling kan prueba na iyan ipinasabong nin Dios. (2 Timoteo 3:16) Helingon niato kun ano an sinasabi kan librong iyan, an Biblia, manongod sa kahulogan kan espirituwalidad asin sa kahalagahan kaiyan.

 [Picture Credit Line sa pahina 2]

COVER: Background: © Mark Hamblin/​age fotostock