An Tataramon ni Jehova Buhay

Tampok na mga Kabtang sa Libro nin Ezequiel—II

DISYEMBRE 609 B.C.E. kaidto. Pinonan na kan hade nin Babilonya an saiyang pangultimong pagsalikop sa Jerusalem. Sagkod sa panahon na iyan, an mensahe ni Ezequiel sa mga desterado sa Babilonya nakasentro sa sarong tema: an pagbagsak asin pagkalaglag kan saindang namomotan na siudad, an Jerusalem. Pero ngonyan, an tema kan mga hula ni Ezequiel nagin nang dapit sa kalaglagan kan paganong mga nasyon na maggagayagaya huli sa kapahamakan kan banwaan nin Dios. Kan bumagsak an Jerusalem pakalihis nin 18 bulan, an mensahe ni Ezequiel nagkaigwa giraray nin bagong tema: an mamuraway na pagbabalik sa dati kan tunay na pagsamba.

An Ezequiel 25:1–48:35 may mga hula manongod sa mga nasyon na nakapalibot sa Israel asin sa pagkaligtas kan banwaan nin Dios. * Apuera sa Ezequiel 29:17-20, an pagkasaysay segun sa pagkasunodsunod kan mga pangyayari saka sa pagkaareglar segun sa mga topiko. Minsan siring, an apat na bersikulong ini nakaareglar segun sa mga topiko. Bilang kabtang kan ipinasabong na Kasuratan, an libro nin Ezequiel igwa nin mensahe na “buhay asin mapuersa.”—Hebreo 4:12.

‘AN DAGANG IYAN MAGIGIN SIRING SA HARDIN NIN EDEN’

(Ezequiel 25:1–39:29)

Huling naheheling antes pa an saindang reaksion sa pagbagsak kan Jerusalem, sinugo ni Jehova si Ezequiel na maghula tumang sa Amon, Moab, Edom, Filistea, Tiro, asin Sidon. An Egipto sasamsaman. “Si Faraon na hade nin Egipto asin an saiyang kairiba” inagid sa sarong sedro na papalodon paagi sa “espada kan hade nin Babilonya.”—Ezequiel 31:2, 3, 12; 32:11, 12.

Mga anom na bulan pagkalaglag nin Jerusalem kan 607 B.C.E., sarong dulag an nagdatong asin nagbareta ki Ezequiel: “Ibinagsak na an siudad!” An propeta ‘dai na nagin pula’ sa mga desterado. (Ezequiel 33:21, 22) May ipapahayag siang mga hula mapadapit sa pagbabalik sa dati. Si Jehova may ‘papatindogon na sarong pastor sa tahaw ninda, an saiyang oripon na si David.’ (Ezequiel 34:23) An Edom gagabaon, alagad an daga duman, an Juda, magigin “siring sa hardin nin Eden.” (Ezequiel 36:35) Si Jehova nanunuga na poprotehiran nia an saiyang ibinalik na banwaan sa pagsalakay ni “Gog.”—Ezequiel 38:2.

Mga Hapot sa Kasuratan na Sinimbag:

29:8-12—Kasuarin nagin gaba an Egipto sa laog nin 40 taon? Pagkalaglag nin Jerusalem kan 607 B.C.E., an mga natatada sa Juda nagdurulag pasiring sa Egipto sa ibong kan patanid ni propeta Jeremias. (Jeremias 24:1, 8-10; 42:7-22) Dai man talaga iyan nagserbing madudulagan para sa sainda huli ta si Nabucodonosor nagdatong tumang sa Egipto asin sinakop iyan. Tibaad kasunod kan pagsakop na iyan an 40 taon na pagkagaba nin Egipto. Mantang an sekular na kasaysayan dai nagtatao nin ebidensia kan pagkagabang ini, makakasierto kita na nangyari iyan huli ta si Jehova an Paraotob nin hula.—Isaias 55:11.

29:18—Paanong ‘an gabos na payo nakalbo asin an gabos na abaga nabakbak’? An pagsalikop sa palaog na siudad nin Tiro nagin depisilon asin mapagalon kaya nakalbo an mga payo kan mga soldados ni Nabucodonosor huli sa paggasgas kan saindang kupya asin nabakbak an saindang mga abaga huli sa pagpasan kan materyales para sa pagtogdok nin mga torre asin kuta.—Ezequiel 26:7-12.

Mga Leksion Para sa Sato:

29:19, 20. Huling an mga taga Tiro nagdulag pasiring sa saindang islang siudad na dara an dakol  nindang kayamanan, kakadikit sana an samsam na nakua ni Hadeng Nabucodonosor sa Tiro. Minsan ngani si Nabucodonosor sarong paganong tagapamahala na orgolyoso asin sadiri sana an iniintindi, binalosan sia ni Jehova huli sa saiyang paglilingkod paagi sa pagtao sa saiya kan Egipto bilang “tangdan para sa saiyang puersa militar.” Bako daw na maninigo niatong arogon an tunay na Dios paagi sa pagbayad nin buhis sa mga gobyerno huli sa mga serbisyo ninda para sa sato? An paninimbagan na ini dai kinakanselar huli sa gawe-gawe kan sekular na mga autoridad o huli sa paagi nin paggamit ninda kan mga buhis.—Roma 13:4-7.

33:7-9. An grupong bantay sa presenteng aldaw—an linahidan na natatada—asin an kairiba kaiyan maninigo na dai noarin man mag-alangan na maghulit kan maogmang bareta kan Kahadean asin magpatanid sa mga tawo manongod sa madatong na “dakulang kahorasaan.”—Mateo 24:21.

33:10-20. An satong kaligtasan nakadepende sa satong pagtalikod sa maraot na mga dalan asin pagsunod sa mga kahagadan nin Dios. Tunay nanggad, an dalan ni Jehova “tama.”

36:20, 21. Paagi sa dai pakaotob sa mga kahagadan sa sainda bilang “an banwaan ni Jehova,” linanghadan kan mga Israelita an ngaran nin Dios sa tahaw kan mga nasyon. Dai kita noarin man maninigong magin parasamba ki Jehova sa ngaran sana.

36:25, 37, 38. An espirituwal na paraiso na nakakamtan niato ngonyan pano nin “aripompon nin banal na mga tawo.” Kun siring, maninigo kitang magmaigot na papagdanayon iyan na malinig.

38:1-23. Nakakapakosog nanggad liwat sa boot na maaraman na ililigtas ni Jehova an saiyang banwaan sa pagsalakay ni Gog kan daga nin Magog! Gog an inginaran sa “namamahala sa kinaban na ini,” si Satanas na Diablo, pakatapos kan pagpalayas sa saiya sa langit. An daga nin Magog nanonongod sa palibot kan daga, na dian nalalaom si Satanas asin an saiyang mga demonyo.—Juan 12:31; Kapahayagan 12:7-12.

“ISENTRO MO AN SAIMONG PUSO SA GABOS NA IPINAPAHELING KO SA SAIMO”

(Ezequiel 40:1–48:35)

Ika-14 taon kaidto pagkatapos na pabagsakon an siudad nin Jerusalem. (Ezequiel 40:1) Singkuenta y sais na taon pa nin pagkadistiero an nasa enotan. (Jeremias 29:10) Si Ezequiel madali nang mag-50 anyos. Sa sarong bisyon, dinara sia sa daga nin Israel. Sia sinabihan: “Aki nin tawo, helinga paagi sa saimong mga mata, asin paagi sa saimong mga talinga dangoga, patin isentro mo an saimong puso sa gabos na ipinapaheling ko sa saimo.” (Ezequiel 40:2-4) Siertong napalukso an puso ni Ezequiel kan akoon nia an bisyon nin sarong bagong templo!

An mamuraway na templo na naheling ni Ezequiel igwa nin 6 na tata, 30 komedor, an Banal, an Kabanalbanale, sarong altar na kahoy, asin sarong altar para sa mga dolot na tinotong. “Nagbobolos” hale sa templo an sarong sapa nin tubig na nagigin sarong sapang masulog. (Ezequiel 47:1) Nag-ako man si Ezequiel nin sarong bisyon manongod sa inasignar na daga sa mga tribo—an  kada kabtang nagpopoon sa sirangan pasolnopan na may lugar para sa pag-administrar sa pag-oltanan kan kabtang nin Juda asin Benjamin. “An santuaryo ni Jehova” asin “an siudad” na nginaranan na Jehova-Shamah yaon sa lugar na ini.—Ezequiel 48:9, 10, 15, 35, nota sa ibaba.

Mga Hapot sa Kasuratan na Sinimbag:

40:3–47:12—Ano an irinerepresentar kan templo sa bisyon? An dakulaon na templong ini na naheling ni Ezequiel sa bisyon talagang dai noarin man itinogdok. Ilinaladawan kaiyan an espirituwal na templo nin Dios—an saiyang arog-templong areglo para sa dalisay na pagsamba sa satong aldaw. (Ezequiel 40:2; Miqueas 4:1; Hebreo 8:2; 9:23, 24) An bisyon kan templo maootob durante kan “huring mga aldaw,” kun dalisayon na an kabilogan na grupo nin mga saserdote. (2 Timoteo 3:1; Ezequiel 44:10-16; Malaquias 3:1-3) Minsan siring, igwa iyan nin pangultimong kaotoban sa Paraiso. An templo sa bisyon nagtao nin paglaom sa desteradong mga Judio na ibabalik sa dati an dalisay na pagsamba asin na an lambang pamilyang Judio magkakaigwa nin mana sa daga.

40:3–43:17—Ano an makahulogan manongod sa pagsokol kan templo? An pagsokol kan templo sarong tanda na siertong maootob an katuyohan ni Jehova kun dapit sa dalisay na pagsamba.

43:2-4, 7, 9—Ano an “mga bangkay kan saindang mga hade” na kaipuhan na haleon sa templo? An mga bangkay malinaw na nanonongod sa mga idolo. An templo nin Dios rinamogan kan mga namamahala sa Jerusalem asin kan banwaan kaiyan paagi sa mga idolo—na garo man sana ginigibo an mga iyan na magin mga hade ninda.

43:13-20—Ano an isinisimbolisar kan altar na naheling ni Ezequiel sa bisyon? An simbolikong altar iyo an kabotan nin Dios may koneksion sa atang na pantubos ni Jesu-Cristo. Huli sa probisyon na ini, an mga linahidan ipinahayag na matanos asin an “dakulang kadaklan” malinig asin dalisay sa pagheling nin Dios. (Kapahayagan 7:9-14; Roma 5:1, 2) Tibaad iyan an dahelan kun taano ta “an minoldeng dagat” sa templo ni Salomon—sarong dakulang planggana nin tubig na ginagamit kan mga saserdote para sa paghanaw—mayo sa templo sa bisyon.—1 Hade 7:23-26.

44:10-16—Siisay an irinerepresentar kan grupo nin mga saserdote? An grupo nin mga saserdote nagseserbing anino kan linahidan na mga Kristiano sa satong aldaw. An pagdalisay sa sainda nangyari kan 1918 kan si Jehova tumukaw “bilang paradalisay asin paralinig” sa saiyang espirituwal na templo. (Malaquias 3:1-5) An mga malinig o nagsorolsol makakapagpadagos sa saindang pribilehio nin paglilingkod. Pakatapos kaiyan, kaipuhan sindang maghingoa na papagdanayon an saindang sadiri na “daing digta kan kinaban,” sa siring nagigin mga halimbawa sa “dakulang kadaklan,” na irinerepresentar kan mga tribo na bakong saserdote.—Santiago 1:27; Kapahayagan 7:9, 10.

45:1; 47:13–48:29—Ano an irinerepresentar kan “daga” asin kan pag-asignar kaiyan? An daga nagrerepresentar sa rona nin aktibidad kan banwaan nin Dios. Saen man na lugar namumugtak an sarong parasamba ki Jehova, an sarong iyan nasa dagang ibinalik sa dati sagkod na sinusuportaran nia an tunay na pagsamba. An pagbarangabanga kan daga magkakaigwa nin pangultimong kaotoban sa bagong kinaban kun an lambang maimbod na tawo  magkaigwa na nin lugar bilang saiyang mana.—Isaias 65:17, 21.

45:7, 16—Ano an ilinaladawan kan kontribusyon kan banwaan para sa pagkasaserdote asin namamayo? Sa espirituwal na templo, sa pangenot ini nanonongod sa espirituwal na suporta—pag-alok nin tabang asin pagpaheling nin espiritu nin pakikikooperar.

47:1-5—Ano an ilinaladawan kan tubig kan salog sa bisyon ni Ezequiel? An tubig naglaladawan sa espirituwal na mga probisyon ni Jehova para sa buhay, kaiba an atang na pantubos ni Cristo Jesus asin an kaaraman nin Dios na yaon sa Biblia. (Jeremias 2:13; Juan 4:7-26; Efeso 5:25-27) An salog progresibong nagrararom tanganing tawan nin lugar an paglaog nin mga bagohan na nag-aako kan tunay na pagsamba. (Isaias 60:22) Mabolos sa salog na iyan an pinakamapuersang tubig nin buhay durante kan Milenyo, asin kaiba sa tubig na iyan an dugang pang pakasabot na makukua sa “mga rolyo” na bibikladon sa panahon na iyan.—Kapahayagan 20:12; 22:1, 2.

47:12—Ano an irinerepresentar kan mabungang mga kahoy? An simbolikong mga kahoy naglaladawan sa espirituwal na mga probisyon nin Dios para sa pagbabalik kan katawohan sa pagkasangkap.

48:15-19, 30-35, nota sa ibaba—Ano an irinerepresentar kan siudad sa bisyon ni Ezequiel? An “Jehova-Shamah” namumugtak sa daga na “bakong banal,” na nagpaparisa na iyan seguradong nagrerepresentar sa sarong bagay na daganon. An siudad garo baga nagrerepresentar sa daganon na administrasyon para sa kapakinabangan kan mga makompuesto kan matanos na “bagong daga.” (2 Pedro 3:13) An pagkaigwa nin mga tata sa kada gilid nag-iilustrar kan pagigin bukas kaiyan. An mga paraataman sa banwaan nin Dios dapat na madaling dolokon.

Mga Leksion Para sa Sato:

40:14, 16, 22, 26. An inukit na mga poon nin palma sa lanob na nasa mga entrada kan templo nagpapaheling na idto sanang mga tanos sa moral an totogotan na lumaog. (Salmo 92:12) Itinotokdo kaini sa sato na aakoon sana ni Jehova an satong pagsamba kun kita tanos.

44:23. Nagpapasalamat nanggad kita sa mga paglilingkod na itinatao kan grupo nin mga saserdote sa presenteng aldaw! “An maimbod asin mapagmansay na oripon” an nangengenot sa pagtao nin napapanahon na espirituwal na kakanon na nagtatabang sa sato na mamansayan an pagkakalaen kan maati asin malinig sa pagheling ni Jehova.—Mateo 24:45.

47:9, 11. An kaaraman—sarong mahalagang marhay na kabtang kan simbolikong tubig—nakakagibo nin makangangalas na pagpaomay sa satong panahon. Saen man iyan inomon, binubuhay kaiyan an mga tawo sa espirituwal na paagi. (Juan 17:3) Sa ibong na lado, an mga dai nag-aako kan tubig na nagtatao nin buhay ‘itatao sa asin’—na permanenteng lalaglagon. Mahalagang marhay nanggad na ‘gibohon niato an satong bilog na makakaya na gamiton an tataramon kan katotoohan sa tamang paagi’!—2 Timoteo 2:15.

“Papakangbanalon Ko Nanggad An Sakuyang Dakulang Ngaran”

Pakatapos na haleon an ultimong hade sa linahe ni David, itinogot kan tunay na Dios na umagi an halawig na peryodo nin panahon bago dumatong an Saro “na igwa kan legal na deretso” sa pagkahade. Minsan siring, dai pinabayaan nin Dios an saiyang tipan ki David. (Ezequiel 21:27; 2 Samuel 7:11-16) An hula ni Ezequiel nagtataram manongod sa “sakong oripon na si David,” na magigin “pastor” asin “hade.” (Ezequiel 34:23, 24; 37:22, 24, 25) An sarong ini daing iba kundi si Jesu-Cristo na may kapangyarihan sa Kahadean. (Kapahayagan 11:15) ‘Papakangbanalon ni Jehova an saiyang dakulang ngaran’ paagi sa Mesiyanikong Kahadean.—Ezequiel 36:23.

Dai na nanggad mahahaloy ngonyan, an gabos na naglalanghad sa banal na ngaran nin Dios lalaglagon. Alagad an mga nagpapakangbanal kan ngaran na iyan sa saindang buhay paagi sa pagsamba ki Jehova sa inaakong paagi mag-aako nin buhay na daing katapusan. Kun siring, lubos niatong aprobetsaran an tubig nin buhay na abundang nagbobolos sa satong aldaw asin gibohon niato na pinakasentro kan satong buhay an tunay na pagsamba.

[Nota sa Ibaba]

[Ritrato sa pahina 9]

An mamuraway na templo sa bisyon ni Ezequiel

[Ritrato sa pahina 10]

Ano an irinerepresentar kan salog nin buhay sa bisyon ni Ezequiel?

[Credit Line]

Pictorial Archive (Near Eastern History) Est.