Tunay na Espirituwalidad—Paano Nindo Manonompongan Iyan?

“AN MAPAG-ISIP manongod sa laman nangangahulogan nin kagadanan; alagad an mapag-isip sa espirituwal nangangahulogan nin buhay asin katoninongan,” an isinurat ni apostol Pablo. (Roma 8:6, King James Version) Paagi sa mga tataramon na iyan, sinabi kan apostol na an pagigin espirituwal na tawo bako sanang personal na gusto o saboot. An totoo, iyan puedeng mangahulogan nin buhay asin kagadanan. Pero, sa anong paagi na an sarong espirituwal na tawo minaako nin “buhay asin katoninongan”? Oyon sa Biblia, an siring na tawo nagkakamit nin katoninongan ngonyan—sa saiyang sadiri asin sa Dios—asin bebendisyonan nin buhay na daing katapusan sa ngapit. (Roma 6:23; Filipos 4:7) Bakong makangangalas na nagkomento si Jesus: “Maogma idtong mga nakakamate kan saindang espirituwal na pangangaipo”!—Mateo 5:3.

An bagay na binabasa nindo an magasin na ini nagpaparisa na interesado kamo sa espirituwalidad—asin madonong nanggad ini. Pero, nagkakalaenlaen na marhay an pagmansay sa temang ini, kaya tibaad mag-isip-isip kamo: ‘Ano an tunay na espirituwalidad? Asin paano iyan nakakamit nin saro?’

‘An Kaisipan ni Cristo’

Apuera sa pagsabi kan kahalagahan asin mga pakinabang nin pagigin mapag-isip sa espirituwal, dakol an masasabi ni apostol Pablo manongod sa kun ano an tunay na espirituwalidad. Sa mga Kristiano sa suanoy na siudad nin Corinto, ipinaliwanag ni Pablo an kalaenan kan pisikal na tawo, an boot sabihon, saro na nagsusunod sa kamawotan kan laman, asin kan espirituwal na tawo, saro na nagpapahalaga sa espirituwal na mga bagay. Nagsurat si Pablo: “An pisikal na tawo dai nag-aako kan mga bagay kan espiritu nin Dios, huli ta an mga iyan kalolongan para sa saiya.” Sa ibong na lado, ipinaliwanag ni Pablo na an espirituwal na tawo namimidbid sa pagkaigwa ‘kan kaisipan ni Cristo.’—1 Corinto 2:14-16.

An pagkaigwa ‘kan kaisipan ni Cristo’ sa pangenot nangangahulogan nin pagkaigwa kan “kaparehong kaisipan na yaon ki Cristo Jesus.” (Roma 15:5; Filipos 2:5) Sa ibang pagtaram, an espirituwal na tawo saro na nag-iisip na kapareho ni Jesus asin naglalakaw sa Saiyang mga lakad. (1 Pedro 2:21; 4:1) Mantang an kaisipan nin sarong tawo orog na nagigin kapareho kan ki Cristo, mas nagigin makosog an saiyang espirituwalidad asin mas nagigin harani sia sa pagkamit nin “buhay asin katoninongan.”—Roma 13:14.

Kun Paano Maaaraman ‘an Kaisipan ni Cristo’

Minsan siring, tanganing magkaigwa kan kaisipan ni Cristo, dapat na maaraman nguna nin saro kun paano sia mag-isip. Kun siring, an enot na lakdang sa pagpatalubo nin espirituwalidad iyo an maaraman kun paano mag-isip si Jesus. Alagad paano nindo maaaraman an kaisipan nin saro na nabuhay sa daga kaidtong 2,000 na taon na an nakaagi? Bueno, bilang halimbawa, paano nindo naaraman an manongod sa makasaysayan na mga tawo sa saindong nasyon? Posibleng marhay na paagi sa pagbasa manongod sa sainda. Kaagid kaiyan, an pagbasa nin nasusurat na kasaysayan ni Jesus sarong mahalagang paagi tanganing maaraman an kaisipan ni Cristo.—Juan 17:3.

Sa kamugtakan ni Jesus, may apat na malinaw na rekord sa kasaysayan—an mga Ebanghelyo na isinurat ni Mateo, Marcos, Lucas, asin Juan. An maingat na pagbasa kan mga pagkasaysay na ini matabang sa saindo na masabotan kun paano mag-isip si Jesus, an pinakasaboot nia, asin an nagmomotibar sa saiyang paggawe. Kun nagtatao kamo nin panahon tanganing horophoropon an nababasa nindo manongod ki Jesus, naiimahinar nindo kun anong klaseng persona sia. Dawa kun ibinibilang na nindo an saindong sadiri na parasunod ni Cristo, an siring na pagbasa asin paghorophorop matabang sa saindo na “padagos na magtalubo sa dai na kutana maninigong kabootan asin kaaraman kan satong Kagurangnan asin Paraligtas na si Jesu-Cristo.”—2 Pedro 3:18.

Isinasaisip iyan, siyasaton niato an nagkapirang teksto sa mga Ebanghelyo tanganing maheling kun paano si Jesus nagin siring na espirituwal na persona.  Dangan, ihapot sa sadiri kun paano nindo maaarog an itinao niang arogan.—Juan 13:15.

Espirituwalidad Asin “an mga Bunga kan Espiritu”

An kagsurat kan Ebanghelyo na si Lucas nagsabi na an banal na espiritu nin Dios ibinubo ki Jesus sa saiyang bautismo asin na si Jesus “pano kan banal na espiritu.” (Lucas 3:21, 22; 4:1) Dangan, idinoon ni Jesus sa saiyang mga parasunod an importansia kan pagigin ginigiyahan kan banal na espiritu, o “puersa aktiba” nin Dios. (Genesis 1:2; Lucas 11:9-13) Taano ta importanteng marhay iyan? Huli ta an espiritu nin Dios may kapangyarihan na bagohon an kaisipan nin saro, kaya an kaisipan kaini nagpopoon na makapareho kan kaisipan ni Cristo. (Roma 12:1, 2) An banal na espiritu nagpapangyari na ikapaheling nin saro an mga kualidad na siring kan “pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpupugol sa sadiri.” An mga kualidad na ini—na inaapod kan Biblia na “mga bunga kan espiritu”—iyo an tanda nin sarong tunay na espirituwal na persona. (Galacia 5:22, 23) Sa simpleng pagtaram, an tawong mapag-isip sa espirituwal iyo an saro na ginigiyahan kan espiritu nin Dios.

Ipinaheling ni Jesus an mga bunga kan espiritu sa bilog na ministeryo nia. An mga kualidad na arog kan pagkamoot, kabootan, asin karahayan heling-heling nanggad sa saiyang pagtratar sa mga ibinibilang na hamak na mga miembro kan sosyedad. (Mateo 9:36) Halimbawa, mangnohon an sarong pangyayari na isinaysay ni apostol Juan. Mababasa niato: “Kan [si Jesus] minaagi naheling nia an sarong lalaking buta poon kan mamundag.” Naheling man kan mga disipulo ni Jesus an lalaki alagad an pagmansay ninda sa saiya sarong parakasala. “Siisay an nagkasala,” an ihinapot ninda, “an tawong ini o an saiyang mga magurang?” An lalaki naheling man kan saiyang kataraed, alagad an pagheling sana ninda sa saiya sarong parapakilimos. “Ini an lalaking nagtutukaw asin nakikilimos kaidto, bako daw?” an sabi ninda. Minsan siring, naheling ni Jesus an lalaking buta bilang sarong indibiduwal na nangangaipo nin tabang. Kinaolay nia an lalaking buta asin pinaomayan ini.—Juan 9:1-8.

Ano an sinasabi kan pangyayaring ini sa saindo manongod sa kaisipan ni Cristo? Enot, tinawan ni Jesus nin atension an mga hamak asin trinatar sinda na may mamomoton na pagmalasakit. Ikaduwa, nagsadiring boot sia na tabangan an iba. Sa paghona nindo sinusunod daw nindo an arogan na ini na ipinaheling ni Jesus? Minamansay daw nindo an mga tawo siring kan pagmansay ni Jesus sa sainda, na itinatao sa sainda an tabang na kaipuhan ninda tanganing mapakarhay an saindang buhay asin magkaigwa sinda nin marahay na ngapit? O may tendensia daw kamong paboran an mga prominente asin dai pag-intindihon an mga bakong prominente? Kun an pagmansay nindo kapareho kan ki Jesus, sinusunod nanggad nindo an halimbawa nia.—Salmo 72:12-14.

Espirituwalidad Asin Pamibi

An mga pagkasaysay sa Ebanghelyo nagpapaheling na si Jesus parateng minadolok sa Dios sa pamibi. (Marcos 1:35; Lucas 5:16; 22:41) Durante kan saiyang ministeryo digdi sa daga, si Jesus talagang nagtagama nin panahon tanganing mamibi. Nagsurat an disipulong si Mateo: “Kan mapahale na an mga kadaklan, solo [si Jesus na] nagtukad sa bukid  tanganing mamibi.” (Mateo 14:23) Paagi sa siring na mga panahon na ginamit nia sa pribadong pakikipag-olay sa saiyang langitnon na Ama, nagkaigwa si Jesus nin kosog. (Mateo 26:36-44) Ngonyan, an mga tawong tunay na mapag-isip sa espirituwal naghahanap man nin mga oportunidad na makikomunikar sa Dios, sa pakaaram na mapakosog ini sa saindang relasyon sa Kaglalang asin matabang sa sainda na magin mas arog-Cristo an saindang kaisipan.

Si Jesus parateng naggagamit nin halawig na mga panahon sa pamimibi. (Juan 17:1-26) Halimbawa, bago nia pinili an 12 lalaki na magigin mga apostol nia, si Jesus “nagtukad sa bukid tanganing mamibi, asin sia magdamlag na namibi sa Dios.” (Lucas 6:12) Minsan ngani dai man talaga magdamlag na namimibi, an mga tunay na mapag-isip sa espirituwal nagsusunod sa halimbawa ni Jesus. Bago gumibo nin darakulang desisyon sa buhay, naggagamit sinda nin dakol na panahon tanganing mamibi sa Dios, na hinahagad an paggiya kan banal na espiritu sa ginigibong mga pagpili na mapaoswag sa saindang espirituwalidad.

Sa saiyang mga pamibi, ipinaheling man ni Jesus an sinseridad na dapat niatong arogon sa satong mga pamibi. Mangnohon kun ano an isinurat ni Lucas manongod sa kun paano namibi si Jesus kan banggi bago sia magadan. “Huling nasa labi-labing kasakitan padagos siang namibi nin odok pa logod; asin an saiyang ganot nagin siring sa mga toro nin dugo na nagdadalahay sagkod sa daga.” (Lucas 22:44) Namibi na si Jesus nin odok bago pa kaiyan, alagad sa pangyayaring ini, na sia napapaatubang sa pinakagrabeng pagbalo sa saiyang daganon na buhay, sia namibi nin “odok pa logod”—asin sinimbag an saiyang pamibi. (Hebreo 5:7) An mga tawong tunay na mapag-isip sa espirituwal nagsusunod sa halimbawa ni Jesus. Kun napapaatubang sa mga pagbalo na masakiton nanggad, sinda namimibi sa Dios nin “odok pa logod” para sa banal na espiritu, paggiya, asin suporta.

Huling si Jesus tawo na ugale na an pamimibi, bakong makangangalas na an saiyang mga disipulo gustong umarog sa saiya sa bagay na ini. Kun siring, hinagad ninda sa saiya: “Kagurangnan, tokdoi kami kun paano mamibi.” (Lucas 11:1) Siring man ngonyan, an mga tunay na nagpapahalaga sa espirituwal na mga bagay asin gustong magpagiya sa banal na espiritu nin Dios nagsusunod sa halimbawa ni Jesus sa kun paano sinda namimibi sa Dios. An tunay na espirituwalidad asin pamibi konektadong marhay.

Espirituwalidad Asin an Paghuhulit kan Maogmang Bareta

Sa Ebanghelyo ni Marcos, manonompongan niato an sarong pagkasaysay na dian pinaomayan ni Jesus an dakol na may helang, na ginigibo iyan sagkod sa matangang banggi. Kan sumunod na amay na aga kan sia solong namimibi, nag-abot an saiyang mga apostol asin nagsabi sa saiya na dakol na tawo an naghahanap sa saiya, na tibaad gustong maomayan. Minsan siring, sinabihan sinda ni Jesus: “Magduman pa kita sa ibang lugar, sa mga baryo sa harani, tanganing makapaghulit man ako duman.” Dangan ipinaliwanag ni Jesus kun taano: “Sa katuyohan na ini na ako napadigdi.” (Marcos 1:32-38; Lucas 4:43) Minsan ngani mahalaga ki Jesus an pagpaomay sa mga tawo, an paghuhulit kan maogmang bareta manongod sa Kahadean nin Dios an pangenot na gibohon ni Jesus.—Marcos 1:14, 15.

Ngonyan, an pagsabi sa iba manongod sa Kahadean nin Dios iyo pa man giraray an sarong nagpapamidbid na tanda kan mga igwa kan kaisipan ni Cristo. Sa gabos na gustong magin parasunod nia, si Jesus nagtao kan pagboot: “Kun siring, paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:19,  20) Dugang pa, ihinula ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Huling ipinaparisa kan Tataramon nin Dios na an paghuhulit nahahaman paagi sa kapangyarihan kan banal na espiritu, an pagkaigwa nin makahulogan na kabtang sa gibohon na iyan sarong tanda nin tunay na espirituwalidad.—Gibo 1:8.

An paghuhulit kan mensahe manongod sa Kahadean sa mga tawo sa bilog na kinaban nangangaipo nin sararong paghihingoa kan minilyon na tawo. (Juan 17:20, 21) An mga nakikikabtang sa gibohon na ini kaipuhan na bako sanang tunay na mapag-isip sa espirituwal kundi organisado man na marhay sa bilog na kinaban. Mamimidbid daw nindo an mga tawo na nagsusunod sa mga lakad ni Cristo asin naghuhulit kan maogmang bareta manongod sa Kahadean sa bilog na kinaban?

Naootob Mo daw an mga Kahagadan Para sa Espirituwal na Tawo?

Siempre, may iba pang karakteristiko na nagpapamidbid sa sarong tunay na espirituwal na tawo, alagad ikinakapaheling mo daw an tinokar nang mga karakteristiko? Tanganing maaraman, ihapot mo sa saimong sadiri: ‘Regular ko daw na binabasa an Tataramon nin Dios, an Biblia, asin hinohorophorop an sakong nabasa? Ipinapaheling ko daw an mga bunga kan espiritu sa sakong buhay? Ako daw regular na namimibi? Gusto ko daw na makiasosyar sa mga tawo na naggigibo kan pambilog na kinaban na paghuhulit kan maogmang bareta manongod sa Kahadean nin Dios?’

An sadiosan na pagsiyasat sa sadiri puedeng makatabang sa saimo na madeterminaran an rarom kan saimong espirituwalidad. Sinasadol ka niamo na gibohon an kinakaipuhan na mga lakdang ngonyan tanganing kamtan mo an “buhay asin katoninongan.”—Roma 8:6; Mateo 7:13, 14; 2 Pedro 1:5-11.

[Kahon/Mga Ritrato sa pahina 7]

MGA TANDA NIN ESPIRITUWALIDAD

◆ Pagkaigwa nin pagkamoot sa Tataramon nin Dios

◆ Pagpaheling kan mga bunga kan espiritu

◆ Regular asin sinserong pamimibi sa Dios

◆ Pagsabi sa iba kan maogmang bareta manongod sa Kahadean

[Ritrato sa pahina 5]

An Biblia nagtatabang sa saindo na maaraman ‘an kaisipan ni Cristo’