Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga isyu kan An Torrengbantayan? Bueno, helingon kun masisimbag nindo an minasunod na mga hapot:

• Sa anong apat na paagi inaaplikar kan Kristianong Griegong Kasuratan an terminong “kongregasyon”?

An pangenot na pag-aplikar iyo an sa grupo na binibilog nin dakol na miembro kan linahidan na mga Kristiano (sa nagkapirang teksto kaiba si Cristo). May beses na an “kongregasyon nin Dios” minaaplikar sa gabos na Kristianong nabubuhay sa sarong depinidong panahon. An ikatolong pag-aplikar iyo an sa gabos na Kristiano sa sarong geograpikong lugar. Ultimo, puedeng iaplikar an terminong iyan sa mga minabilog sa sarong lokal na kongregasyon.—4/15, pahina 21-3.

• Noarin matatapos an pag-apod sa mga Kristiano para sa langitnon na paglaom?

An Biblia dai nagtatao nin eksaktong simbag. Nagpoon an pag-apod na iyan kan 33 C.E. asin nagpadagos sagkod sa presenteng mga panahon. Pakalihis kan 1935 an katuyohan kan paggibo nin mga disipulo iyo na an pagtipon kan dakulang kadaklan. An nagkapirang nabautismohan pakalihis kan 1935 nagkaigwa nin patotoo kan banal na espiritu na sinda may langitnon na paglaom, kaya dai niato madedesisyonan an espesipikong petsa kan katapusan nin pag-apod na iyan. Dai nakakalabi an banal na espiritu na yaon sa totoong mga linahidan, ni inaasahan man ninda na tatawan sinda nin espesyal na tratamiento. Ano man an saindang paglaom, an mga Kristiano kaipuhan na magin maimbod asin padagos na gumibo kan kabotan nin Dios.—5/1, pahina 30-1.

• Kan manuga si Jefte, andam daw sia na idolot sa Dios an saiyang aking babae bilang dolot na tinotong?

Dai. Intension ni Jefte na italaga an saro na masabat sa saiya para sa ekslusibong paglilingkod sa Dios, na sarong areglo sa Ley ni Moises. (1 Samuel 2:22) Sa pag-otob kan kapanugaan, an aking babae ni Jefte padagos na naglingkod sa tabernakulo, sarong dakulang sakripisyo huli ta nangangahulogan iyan na nungka siang mapaagom.—5/15, pahina 9-10.

• Ano an nagin kabtang kan kodise sa enot na Kristianismo?

Minalataw na sa kadaklan ginamit kan mga Kristiano an rolyo kisuerra sagkod sa pagtatapos kan enot na siglo C.E. Durante kan sunod na siglo, nagkaigwa nin iriwal sa pag-oltanan kan mga parasuportar sa paggamit kan kodise asin mga parasuportar sa paggamit kan rolyo. Naniniwala an mga eksperto na an paggamit kan mga Kristiano nin kodise dakula an nagin kabtang sa lakop na pag-ako kaiyan.—6/1, pahina 14-15.

• Ano an Kalendaryong Gezer?

Iyan sarong sadit na tabla na gibo sa gapong puti (limestone) na nadiskobre kan 1908 sa lugar kan siudad nin Gezer. Sinasabi nin dakol na an tabla isinurat nin sarong aking lalaki bilang kabtang nin leksion sa eskuelahan. An tabla naglaladawan nin sarong pinasimpleng bersion nin sarong agrikultural na taon, o siklo, na nagpopoon sa pagtipon nin ani sa bulan na katimbang kan kabtang nin Setyembre asin kabtang nin Oktubre, asin iyan nagsasambit nin manlaenlaen na pananom asin agrikultural na mga aktibidad.—6/15, pahina 8.

• Ano an kahulogan kan pagkakasala tumang sa banal na espiritu?

Posible na magkasala tumang sa banal na espiritu ni Jehova, sarong kasalan na dai ipapatawad. (Mateo 12:31) An Dios an nagdedeterminar kun baga kita nakagibo nin kasalan na daing kapatawadan, asin puede niang haleon sa sato an saiyang espiritu. (Salmo 51:11) Kun namomondo kitang gayo sa sarong kasalan, posibleng marhay na talagang nagsosolsol kita asin huli kaini dai kita nagkasala tumang sa espiritu.—7/15, pahina 16-17.

• Mantang nakaasosyar na ni Hadeng Saul si David bago kaidto, taano ta naghapot sia kun kiisay na aki si David? (1 Samuel 16:22; 17:58)

Si Saul bako sanang interesado na maaraman an ngaran kan ama ni David. Pakatapos na maheling na si David sarong tawo na may dakulang pagtubod asin kosog nin boot na duminaog pa sana ki Goliat, gustong maaraman ni Saul kun anong klaseng lalaki an nagpadakula sa siring na aki. Tibaad inisip ni Saul na iiba sa hukbo si Jese o an iba pang miembro kan saiyang pamilya.—8/1, pahina 31.