‘O Jehova, Baloa Ako’

“SI Jehova an parasiyasat sa mga puso.” (Talinhaga 17:3) Iyan maninigong makarangang marhay sa sato gabos. Taano? Huling bakong arog sa mga tawo, na naghuhusgar sana paagi sa panluwas na itsura, an satong langitnon na Ama ‘nagheheling kun ano an nasa puso.’—1 Samuel 16:7.

An totoo, dawa kita mismo bako an pinakamarahay na paraebalwar kan sato mismong kairairaroming mga motibo asin kalaoglaoging mga tendensia. Taano? Huli ta “madaya an [satong] puso nin labi sa ano pa man na bagay asin desesperado. Siisay an makakamidbid kaiyan?” Minsan siring, aram iyan nin Dios, huli ta sia nagpahayag: “Ako, si Jehova, nagsisiyasat kan puso, nagsisiyasat kan mga bato.” (Jeremias 17:9, 10) Iyo, nasasabotan ni Jehova “an puso”—kaiba an satong panlaog na mga motibo—saka an “mga bato,” an satong kairairaroming mga kaisipan asin emosyon.

Taano ta Binabalo?

Kun siring, masasabotan na si Hadeng David kan suanoy nagsabi sa Dios: “Siyasata ako, O Jehova, asin baloa ako; dalisaya an sakong mga bato asin an sakong puso.” (Salmo 26:2) Si David daw biyong malinig sa gawe-gawe asin pagtaram, kaya mayo sia nin dapat na ikatakot kun baloon sia ni Jehova? Siempre dai! Si David, arog niato gabos, bakong sangkap asin dai makakaabot sa sangkap na paagi sa mga pamantayan nin Dios. Huli sa saiyang mga kaluyahan, si David nakagibo nin nagkapirang magabat na sala, alagad ‘naglakaw pa man giraray sia na may integridad sa puso.’ (1 Hade 9:4) Paano? Paagi sa pag-ako nin pagsagwe asin pagtanos kan saiyang dalan. Paagi kaiyan ipinaheling nia na tunay niang namomotan si Jehova. Lubos an saiyang debosyon sa Dios.

Paano man kita ngonyan? Aram ni Jehova na kita bakong sangkap asin na puede kitang magkasala sa pagtaram asin paggawe. Minsan siring, an satong pamumuhay dai nia dinedeterminaran paagi sa paggamit kan saiyang kakayahan na aramon nin patienot an satong ngapit. Linalang nia kita na may sadiring boot, asin iginagalang nia an satong libreng kabotan—sarong balaog na may kabootan niang itinao sa sato.

Minsan siring, talagang binabalo ni Jehova sa nagkapirang paagi an satong panlaog na pagkatawo, kaiba an satong mga motibo. Puede niang gibohon ini paagi sa pagtogot sa sato na magkaigwa nin mga oportunidad tanganing ihayag an kamugtakan kan satong puso. Puede man niang itogot an manlaenlaen na kamugtakan o problema tanganing ihayag an satong kalaoglaoging mga tendensia. Ini nagtatao sa sato kan oportunidad na ipaheling ki Jehova kun gurano kita kadusay asin kaimbod sa saiya. An siring na mga pagbalo na itinotogot ni Jehova puedeng magpatunay sa kualidad kan satong pagtubod, kun baga kita “lubos asin marigon sa gabos na bagay, na dai nagkukulang nin ano man.”—Santiago 1:2-4.

Sarong Pagbalo sa Pagtubod kan Suanoy

An mga pagbalo sa pagtubod asin mga motibo bakong bago para sa mga lingkod ni Jehova. Isip-isipon an patriarkang si Abraham. “Binalo kan tunay na Dios si Abraham.” (Genesis 22:1) Kan sabihon an mga tataramon na iyan, nabalo na an pagtubod ni Abraham sa Dios. Dakol na taon bago kaini, pinakiolayan ni Jehova si Abraham na bumalyo kaiba an saiyang pamilya hale sa maoswag na siudad nin Ur pasiring sa sarong daga na dai nia aram. (Genesis 11:31; Gibo 7:2-4) Si Abraham—na tibaad sarong kagsadiri nin harong sa Ur—dai nagbakal nin ano man na permanenteng istaran sa Canaan, na duman sia nag-istar sa laog nin mga 100 na taon. (Hebreo 11:9) An situwasyon ni Abraham na nagbabarobalyo nin istaran ibinugtak sia asin an saiyang pamilya sa peligro nin tiggutom, mga  armadong grupo, asin paganong mga namamahala kan lugar na iyan. Sa gabos na ini, an pagtubod ni Abraham napatunayan na makosogon.

Dangan si Abraham ibinugtak ni Jehova sa orog na pagbalo. “Daraha, tabi, an saimong aki, an bugtong mong aki na namomotan mong gayo, si Isaac, asin . . . idolot mo sia bilang dolot na tinotong.” (Genesis 22:2) Para ki Abraham, si Isaac bako sanang sarong ordinaryong aki. Sia an solong aki ni Abraham asin kan saiyang agom na si Sara. Si Isaac an ipinanugang aki, an solamenteng paglaom ni Abraham tanganing an saiyang “banhi” magmana kan daga nin Canaan asin magin sarong bendisyon sa dakol, oyon sa panuga nin Dios. An totoo, si Isaac an linalaoman ni Abraham na magin aki nia asin na namundag pagkatapos nin sarong milagro hale sa Dios!—Genesis 15:2-4, 7.

Maiimahinar nindo kun gurano nanggad kadepisil para ki Abraham na masabotan an pagboot na ini. Si Jehova daw mahagad nin sarong atang na tawo? Taano ta totogotan ni Jehova si Abraham na maeksperyensiahan an dakulang kagayagayahan nin pagkaigwa nin aki sa panahon na sia gurang na, tangani sanang hagadon sa saiya na iatang an mismong aking ini? *

Minsan ngani mayo nin malinaw na simbag sa mga hapot na ini, si Abraham tolos-tolos na nagkuyog. Nagtolong aldaw bago sia nakaabot sa bukid na sinabi nin Dios. Naggibo sia nin altar duman asin nagbugtak sia nin panggatong sa ibabaw kaiyan. Nag-abot ngonyan an kulminasyon kan pagbalo. Kinapotan ni Abraham an kutsilyong pambuno, alagad kan gagadanon na nia an saiyang aki, pinugolan sia ni Jehova paagi sa sarong anghel asin nagsabi: “Ngonyan aram ko nang ika may takot sa Dios ta dai mo man lamang isinayuma an saimong aki, an saimong bugtong na aki, sa sako.” (Genesis 22:3, 11, 12) Isip-isipon kun gurano kaabundang binalosan si Abraham kan madangog nia iyan! Tama an patienot nang pagmansay ni Jehova sa saiyang pagtubod. (Genesis 15:5, 6) Kaidto mismo, nag-atang si Abraham nin sarong lalaking karnero na isinalida ki Isaac. Dangan sinegurado giraray ni Jehova an mga panuga sa tipan manongod sa banhi ni Abraham. Masasabotan na si Abraham namidbid bilang katood ni Jehova.—Genesis 22:13-18; Santiago 2:21-23.

 Binabalo Man an Satong Pagtubod

Aram niato gabos na an mga lingkod nin Dios ngonyan dai makakalikay sa mga pagbalo. Minsan siring, sa satong kamugtakan, an pagbalo tibaad mas nakasentro sa kun ano an itinotogot ni Jehova na mangyari kisa sa kun ano an ipinapagibo nia sa sato.

Si apostol Pablo nagsurat: “An gabos na nagmamawot na mamuhay na may diosnon na debosyon kaibahan ni Cristo Jesus pepersegiron man.” (2 Timoteo 3:12) An siring na persekusyon tibaad maggikan sa mga kaeskuela, kaamigo, paryente, kataed, o mga opisyal nin gobyerno na naimpormaran nin sala. Puedeng kaiba dian an berbal asin pisikal na pag-abuso saka an pag-olang sa paghanapbuhay nin sarong Kristiano. Naeeksperyensiahan man kan tunay na mga Kristiano an mga problema na ordinaryo na sana sa katawohan—an helang, mga pagkadesganar, asin inhustisya. An pagtubod nin saro nababalo kan gabos na kasakitan na iyan.

Idinoon ni apostol Pedro an mga pakinabang kan pagigin nabalo kan pagtubod nin saro: “Kamo nagmondo sa manlaenlaen na pagbalo, tanganing an nabalong kualidad kan saindong pagtubod, na may orog nanggad na halaga kisa bulawan na napapara minsan ngani iyan napatunayan sa kalayo, magin dahelan nin pag-omaw asin kamurawayan patin onra sa pagkahayag ni Jesu-Cristo.” (1 Pedro 1:6, 7) Iyo, an mga epekto nin mga pagbalo ikinokomparar sa pagdalisay sa bulawan paagi sa kalayo. Napapaluwas kan proseso nin pagdalisay kun ano an puro asin hinahale kaiyan an mga ati. An satong pagtubod minaagi man sa kaagid na proseso nin pagdalisay kun kita nakakaeksperyensia nin mga pagbalo.

Halimbawa, an sarong aksidente o natural na kalamidad puedeng magbunga nin kasakitan. Pero, an mga igwa nin tunay na pagtubod dai nagpapadaog sa labi-labing kahaditan. Nararanga sinda kan pagparigon giraray ni Jehova: “Sa ano man na paagi dai taka babayaan ni sa ano man na paagi papabayaan taka.” (Hebreo 13:5) Padagos nindang tinatawan nin prioridad an espirituwal na mga bagay, na nagsasarig na bebendisyonan ni Jehova Dios an saindang mga paghihingoa na makamtan an talagang kinakaipuhan ninda. An saindang pagtubod nagsusustenir sa sainda sa masakit na mga panahon asin nakakatabang sa sainda na dai magin orog na komplikado an saindang situwasyon huli sa dai kinakaipuhan na paghadit.

An bagay na an mga pagbalo puedeng maghayag kan mga kaluyahan kan satong pagtubod puede man na magin kapakipakinabang kun huli kaiyan maheling niato an pangangaipo na gumibo nin mga pagtatanos. Marahay na hapoton nin saro an saiyang sadiri: ‘Paano ko mapapakosog an sakong pagtubod? Kaipuhan ko daw na gumamit nin orog pang panahon sa mapagngayongayong pag-adal asin paghorophorop sa Tataramon nin Dios? Lubos ko daw na inaaprobetsaran an probisyon na umatender sa mga pagtiripon kaiba an mga kapagtubod? Nananarig daw ako sa sakong sadiri mantang dapat kong ipaaram ki Jehova Dios paagi sa pamibi an sakong kapurisawan?’ Minsan siring, kapinonan pa sana an siring na pagsiyasat sa sadiri.

An pagpakosog sa pagtubod nin saro puedeng mangaipo nin pagpaoswag sa espirituwal na gana nin saro, na ipinapaheling an “paghidaw sa daing halong gatas kan tataramon.” (1 Pedro 2:2; Hebreo 5:12-14) Maninigo kitang magmaigot na magin arog kan tawo na ilinadawan kan salmista: “An saiyang pagkaogmang marhay yaon sa ley ni Jehova, asin sa saiyang ley sia nagbabasa nin pahinghing aldaw asin banggi.”—Salmo 1:2.

Nangangaipo ini nin orog pa sa pagbasa kan Biblia. Mahalaga na isip-isipon niato an sinasabi sa sato kan Tataramon nin Dios asin iaplikar an sadol na itinatao kaiyan. (Santiago 1:22-25) Bilang resulta, an satong pagkamoot sa Dios matalubo, an satong mga pamibi magigin mas espesipiko asin personal, asin an satong pagtubod sa saiya magigin mas makosog.

An Kahalagahan nin Nabalong Pagtubod

An pagmidbid na an pagtubod talagang kaipuhan tanganing akoon niato an pag-oyon nin Dios  sarong mapuersang dahelan tanganing pakosogon iyan. Ipinapagirumdom sa sato kan Biblia: “Kun dai nin pagtubod imposible na sia mapanigoan na gayo, huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) Huli kaini, maninigo kitang magkaigwa nin saboot arog kan tawong nakimaherak ki Jesus: “Tabangi ako kun saen ako nangangaipo nin pagtubod!”—Marcos 9:24.

An mga pagbalo sa satong pagtubod puede man na makatabang sa iba. Halimbawa, kun an sarong Kristiano magadanan nin sarong namomotan, makakasustenir sa saiya an saiyang makosog na pagtubod sa panuga nin Dios na pagkabuhay liwat. Namomondo sia, pero sia ‘dai namomondo siring kan iba na dai nin paglaom.’ (1 Tesalonica 4:13, 14) An iba na nakakaobserbar sa nagsusustenir na puersa kan pagtubod nin sarong Kristiano puedeng makarealisar na an Kristianong iyan igwa nin sarong bagay na totoong mahalaga. Puedeng pukawon kaini sa saindang puso an pagmawot na magkaigwa nin kaparehong pagtubod, na nagpapahiro sa sainda na mag-adal kan Tataramon nin Dios asin magin mga disipulo ni Jesu-Cristo.

Aram ni Jehova na an nabalong pagtubod may dakulang halaga. Dugang pa, an mga pagbalo sa pagtubod nagpapangyari sa sato na maheling kun baga an satong pagtubod igwa nin tunay na nagsusustenir na puersa. Natatabangan kita na marisa an mga kaluyahan sa satong pagtubod, na nagpapangyari sa sato na itanos an mga bagay na iyan. Ultimo, an pakapanggana niato sa mga pagbalo puedeng makatabang sa iba na magin mga disipulo ni Jesus. Kaya logod gibohon niato an satong pinakamakakaya na papagdanayon an makosog na pagtubod—an klase nin pagtubod na pakatapos na iyan makaeksperyensia nin sunod-sunod na mga pagbalo “magin dahelan nin pag-omaw asin kamurawayan patin onra sa pagkahayag ni Jesu-Cristo.”—1 Pedro 1:7.

[Nota sa Ibaba]

[Ritrato sa pahina 13]

Huli sa mga gibo nin pagtubod ni Abraham, sia nagin katood ni Jehova

[Mga Ritrato sa pahina 15]

An mga pagbalo puedeng magpatunay na an satong pagtubod igwa nin tunay na nagsusustenir na puersa

[Picture Credit Line sa pahina 12]

Hale sa Illustrated Edition of the Holy Scriptures, ni Cassell, Petter, & Galpin