Pagsurat​—An Kahalagahan Kaiyan sa Suanoy na Israel

NABASA na daw nindo an nagkapirang kabtang kan Iliad o Odyssey, duwang bantog na epiko kan suanoy na Grecia na isinurat sa pormang berso? Pinapaniwalaan na an mga iyan kinomponer durante kan ikasiyam o ikawalong siglo B.C.E. Paano an mga isinurat na ini ikakakomparar sa Biblia, na pinonan na isurat dakol na siglo bago pa kaiyan? An tomong The Jewish Bible and the Christian Bible nagkokomento: “An Biblia may kisuerra 429 pagkasambit sa pagsurat asin sa nakasurat na mga dokumento. Mahalaga ini kun gigirumdomon na an Iliad may saro sanang pagkasambit sa pagsurat asin mayo kaiyan an Odyssey.”

An The Oxford Encyclopedia of Archaeology in the Near East nagpapaliwanag na “sa suanoy na Israel an pagsurat garo baga mahalagang kabtang kan relihion.” Halimbawa, an tipan nin Ley isinurat asin kan huri regular na binasa sa publiko sa atubangan nin gabos na lalaki, babae, asin aki. Iyan binasa man asin pinag-adalan nin mga tawo bilang grupo sagkod sa pribado. Pagkatapos na isip-isipon an nagkapirang kabtang kan Ley, si Alan Millard, mayor na paratokdo sa Unibersidad nin Liverpool, nagkonklusyon: “Minalataw na an pagbasa asin pagsurat hinohona na may epekto sa buhay kan kadaklan.”—Deuteronomio 31:9-13; Josue 1:8; Nehemias 8:13-15; Salmo 1:2.

Ipinaliwanag ni apostol Pablo kun paano maninigong mansayon kan mga Kristiano an banal na kasuratan: “An gabos na bagay na isinurat kaidto isinurat sa pagtokdo sa sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” Personal daw nindong ipinapaheling an pag-apresyar sa Biblia paagi sa regular na pagbasa kaiyan?—Roma 15:4.