Puede Mong Maatubang an Inhustisya!

SIISAY an dai pa nakaeksperyensia nin sarong klase nin inhustisya sa bilog niang buhay? Mantang an nagkapirang inhustisya tibaad naririsa o naiimahinar sana, an iba talagang totoo.

Kada makaeksperyensia kita nin inhustisya, kita nakakamate nin emosyonal na kolog asin puede iyan na makadanyar sa satong espirituwalidad. Tibaad igwa kita nin makosog na pagmawot na itanos an situwasyon. Taano? An sarong dahelan iyo na an makosog na pakamate nin hustisya ibinugtak sa mga tawo kan satong Kaglalang, si Jehova Dios, “na dian sa saiya mayo nin inhustisya.” (Deuteronomio 32:4; Genesis 1:26) Minsan siring, tibaad mapaatubang kita sa mga situwasyon na dian an satong pakamate nin hustisya dai napapanigoan. An sarong madonong na tawo nagkomento kaidto: “Ako mismo nagbuelta tanganing maheling ko an gabos na pan-aapi na ginigibo sa sirong kan saldang, asin, uya! an mga luha kan mga inaapi, alagad mayo sindang pararanga; asin sa kampi kan mga nan-aapi sa sainda igwa nin kapangyarihan, kaya mayo sinda nin pararanga.” (Eclesiastes 4:1) Kun siring, paano niato maaatubang an inhustisya?

Ano Talaga an Inhustisya?

An inhustisya iyo an kamugtakan o paggibo nin paglapas sa mga pamantayan nin pagigin makatanosan. Ano an dapat na pamantayan nin hustisya para sa mga tawo? Malinaw nanggad, an satong matanos asin dai nagliliwatliwat na Kaglalang igwa nin deretso na magtao kan pamantayan sa kun ano an may hustisya asin daing hustisya. Sa saiyang punto de vista, kalabot sa paglakaw sa “mismong mga pagboot nin buhay” an “dai paggibo nin inhustisya.” (Ezequiel 33:15) Huli kaini, kan lalangon ni Jehova an enot na tawo, itinadom Nia sa saiya an sarong konsensia—sarong tingog sa laog na makakatabang sa saiya na mamidbid an kalaenan kan tama asin sala. (Roma 2:14, 15) Dugang pa, ibinugtak ni Jehova sa saiyang Tataramon, an Biblia, an mga kapahayagan dapit sa kun ano an may hustisya o daing hustisya.

Paano kun naghohona kita na may inhustisyang ginibo sa sato? Marahay na siyasaton niato an bagay na iyan basado sa mga katunayan tanganing maheling niato kun baga may ginibo man nanggad na inhustisya. Kuanon niatong halimbawa an nagin situwasyon kan Hebreong propeta na si Jonas. Isinugo sia ni Jehova tanganing sabihon sa mga taga Ninive an dapit sa nagdadangadang na kapahamakan. Kan enot, si Jonas nagdulag na dai inootob an saiyang asignasyon. Pero, sa kahurihurihi, sia nagduman sa Ninive asin pinatanidan nia an mga nag-eerok duman dapit sa nagdadangadang na kalaglagan. Kan magpaheling sinda nin paborableng reaksion, nagdesisyon si Jehova na dai laglagon an siudad asin iligtas an mga nag-eerok dian. Ano an nagin saboot ni Jonas? “Para ki Jonas, idto dai nanggad nia nagustohan, asin sia nag-init sa kaanggotan.” (Jonas 4:1) Nagsaboot sia na idto grabeng inhustisya sa kabtang ni Jehova.

 Malinaw nanggad, si Jehova, na nakakabasa nin puso asin “mamomoton sa katanosan asin hustisya,” bakong sala. (Salmo 33:5) Kaipuhan sanang manodan ni Jonas na an paagi kan pagdesisyon ni Jehova kaoyon kan sangkap na hustisya. Kun kita nagsasaboot na may inhustisyang ginibo sa sato, puede niatong hapoton an satong sadiri, ‘Posible daw na laen an punto de vista ni Jehova sa bagay na iyan?’

Pag-atubang sa Inhustisya

An Biblia nagsasaysay nin dakol na pangyayari dapit sa nagkapira na nakaeksperyensia nin inhustisya. Dakol kitang manonodan paagi sa pagsiyasat kun paano ninda inatubang an masakit na mga problema ninda. Isip-isipa si Jose, na ipinabakal sa kaoripnan sa Egipto kan saiyang maimon na mga tugang. Sa Egipto prinobaran na akiton si Jose kan agom na babae kan saiyang kagurangnan, asin kan sayumahan sia ni Jose, putik na inakusaran nia ini nin paggibo nin imoral na mga pan-aakit. Bilang resulta, si Jose nabilanggo. Pero, an saiyang pagtubod mas makosog kisa sa mga kadenang batbat na nakagapos sa saiya. Dai nia tinogotan an inhustisya na paluyahon an saiyang espirituwalidad asin an saiyang pagtitiwala ki Jehova.—Genesis 37:18-28; 39:4-20; Salmo 105:17-19.

An saro pang tawo na napaatubang sa inhustisya iyo si Nabot. Sia nagin biktima nin labi-labi karaot na pagtraydor ni Jezebel, an agom ni Hadeng Acab nin Israel. Hinimuyawot kan hade an minanang daga ni Nabot na nasa kataed kan palasyo. An sarong Israelita pinagbabawalan na permanenteng butasan an saiyang minanang rogaring, kaya sinayumahan ni Nabot an alok kan hade na bakalon an daga. (Levitico 25:23) Sa puntong iyan, inareglar kan maraot na agom ni Acab na magkaigwa nin falsong mga testigo na nag-akusar ki Nabot nin paglanghad sa Dios asin sa hade. Bilang resulta, ginadan si Nabot asin an saiyang mga aki. Imahinara kun ano an seguradong namatean ni Nabot kan an mga tawo nagpupurot nin mga gapo tanganing gadanon sia!—1 Hade 21:1-14; 2 Hade 9:26.

Pero, an nasambitan sa enotan nagigin saditon kun ikokomparar sa mga inhustisya na ginibo ki Cristo Jesus. An sentensiang kagadanan sa saiya may kaibang kaputikan asin ilegal na pagbista. An Romanong gobernador na nasa tukawan sa paghokom mayo nin moral na kosog tanganing  manindogan sa kun ano an aram niang tama. (Juan 18:38-40) Iyo, ginibo ni Satanas ki Cristo Jesus an pinakagrabeng inhustisya na ginibo kasuarin man sa kiisay man!

An mga pangyayari daw na ini nagpaparisa na si Jehova indiperente sa inhustisya? Dai! An mga pangyayaring idto dai minansay ni Jehova sa punto de vista sana nin tawo. (Isaias 55:8, 9) Huling si Jose ipinabakal sa kaoripnan, ikinaligtas nia an saiyang pamilya. Sia an nagin administrador nin kakanon sa Egipto bago nagkaigwa nin grabeng tiggutom na nakaapektar sa saiyang pamilya. Isip-isipa, kun dai itinogot ni Jehova an inhustisya, si Jose dai kutana nabilanggo. Duman nia tinawan nin kahulogan an mga pangatorogan nin duwang bilanggo, na kan huri an saro sa mga iyan an nagsabi ki Faraon manongod ki Jose, na nagin dahelan tanganing si Jose magin administrador nin kakanon.—Genesis 40:1; 41:9-14; 45:4-8.

Paano man si Nabot? Sa giraray, pagmaigotan na mansayon an bagay na iyan siring kan pagmansay ni Jehova. Para ki Jehova, na kayang bumuhay liwat nin mga gadan, si Nabot garo man sana buhay, dawa kun an saiyang bangkay yaon sa daga. (1 Hade 21:19; Lucas 20:37, 38) Si Nabot kaipuhan na maghalat sagkod sa panahon na buhayon sia liwat ni Jehova, alagad an panahon nin paghalat madali sana, huli ta an mga gadan mayo man lamang nin pakaaram. (Eclesiastes 9:5) Apuera kaiyan, si Jehova nagbalos para ki Nabot paagi sa paghokom ki Acab asin sa saiyang pamilya.—2 Hade 9:21, 24, 26, 35, 36; 10:1-11; Juan 5:28, 29.

Sa kamugtakan ni Jesus, sia nagadan. Pero, sia binuhay liwat asin ilinangkaw nin Dios sa posisyon “na mas halangkaw na marhay kisa sa lambang gobyerno asin autoridad asin kapangyarihan asin pagkakagurangnan patin sa lambang ngaran na inginaran.” (Efeso 1:20, 21) An inhustisya na ginibo ni Satanas ki Cristo Jesus dai makakaolang ki Jehova na balosan an saiyang Aki. May kompiansa si Jesus na kaya ni Jehova na tolos-tolos na haleon an epekto nin inhustisya kan sia ilegal na arestaron, kun iyan an Saiyang kabotan. Pero, aram man ni Cristo na si Jehova may itinalaan na panahon tanganing otobon an Kasuratan asin haleon an epekto nin ano man na inhustisya.

Totoo, si Satanas asin an saiyang mga representante naggibo nin inhustisya sa mga matanos, alagad pag-abot nin panahon itinanos iyan ni Jehova asin permanenteng hinale o hahaleon an epekto nin inhustisya. Sa siring, tanganing ikatanos an inhustisya, dapat kitang maghalat sa Dios.—Deuteronomio 25:16; Roma 12:17-19.

Kun Taano ta Puedeng Itogot ni Jehova an Inhustisya

Tibaad may mga dahelan pa ngani si Jehova kun taano ta dai nia itinatanos an sarong situwasyon. Bilang kabtang kan satong Kristianong pagsasanay, puede niang itogot na makaeksperyensia kita nin inhustisya. Siempre, ‘dai binabalo nin Dios an siisay man paagi sa maraot na mga bagay.’ (Santiago 1:13) Pero, puedeng itogot nia na mangyari an sarong situwasyon na dai sia nag-iinterbenir, asin puede niang susteniran an mga naghihimate sa siring na pagsasanay. “Pakapagsakit nindo sa kadikit na panahon,” sinisierto sa sato kan Biblia, “an Dios kan gabos na dai na kutana maninigong kabootan . . . iyo an matapos mismo kan saindong pagsasanay, paparigonon nia kamo, papakosogon nia kamo.”—1 Pedro 5:10.

Apuera kaini, an pagtogot ni Jehova sa sarong inhustisya tibaad magtao nin panahon sa mga parakasala na magsolsol. Pirang semana sana pakalihis na gadanon si Jesus, an nagkapirang Judio na naghinanyog sa sadol ni Pedro “nagkarulugad sa puso.” Bilog na puso nindang inako an tataramon nin Dios asin sinda nabautismohan.—Gibo 2:36-42.

Totoo, bakong gabos na paragibo nin inhustisya masolsol. An nagkapira tibaad mapahiro pa ngani na gumibo nin grabeng inhustisya. Pero, an Talinhaga 29:1 nagsasabi: “An tawo na paorootrong sinasagwe alagad ta pinapatagas an saiyang liog biglang mababari, asin iyan dai na nin kaomayan.” Sa katunayan, pag-abot nin panahon si Jehova mahiro asin lalaglagon nia an mga nagpapadagos sa bakong tamang paggawe.—Eclesiastes 8:11-13.

Gurano man kahaloy na panahon an kaipuhan tanganing makabawi sa epekto nin inhustisya, makakasierto kita na aram ni Jehova kun paano kita tatabangan na makabawi. Asin siertong hahaleon nia an epekto nin ano man na inhustisya na tibaad naeksperyensiahan niato sa maraot na sistemang ini nin mga bagay. Apuera kaini, ipinanuga nia sa sato an pangultimong balos, an buhay na daing katapusan sa bagong kinaban na dian “magdadanay an katanosan.”—2 Pedro 3:13.

[Ritrato sa pahina 16, 17]

Ano an seguradong namatean ni Nabot kan mapaatubang sia sa grabeng inhustisya?