Si Jehova Mamomoton sa Hustisya

“Ako, si Jehova, namomoot sa hustisya.”—ISAIAS 61:8.

1, 2. Ano an boot sabihon kan mga tataramon na “hustisya” asin “inhustisya”? (b) Ano an sinasabi kan Biblia manongod ki Jehova asin sa saiyang kualidad na hustisya?

AN HUSTISYA tinawan nin kahulogan na ‘an kualidad nin pagigin mayong ipinapaorog, rasonable, paggawe oyon sa kun ano an tanos asin marahay sa moral.’ Kalabot sa inhustisya an pagigin bakong rasonable, may pagpalaenlaen, maraot, pagtao nin dai maninigong kakologan sa iba.

² Haros 3,500 na taon na an nakaagi, si Moises nagsurat mapadapit sa Unibersal na Soberano, si Jehova: “An gabos niang dalan hustisya. Dios nin kaimbodan, na dian sa saiya mayo nin inhustisya.” (Deuteronomio 32:4) Pakaagi nin labing pitong siglo, pinasabngan nin Dios si Isaias na isurat an mga tataramon na ini: “Ako, si Jehova, namomoot sa hustisya.” (Isaias 61:8) Dangan kan enot na siglo, si Pablo nagkagsing: “Igwa daw nin inhustisya sa Dios? Nungka logod na mangyari iyan!” (Roma 9:14) Asin kan siglo man sanang iyan, si Pedro nagsabi: “An Dios daing ipinapaorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:34, 35) Iyo, “si Jehova mamomoton sa hustisya.”—Salmo 37:28; Malaquias 3:6.

Nangingibabaw an Inhustisya

3. Paano nagpoon an inhustisya sa daga?

³ An hustisya bakong an nangingibabaw na kualidad ngonyan. Puede kitang magin biktima nin mga gibo nin inhustisya sa gabos na kabtang kan sosyedad—sa satong pinagtatrabahohan, sa eskuelahan, sa pagtratar sa sato kan sekular na mga autoridad, asin sa iba pang mga paagi—dawa sa laog kan pamilya. Siempre, bako nang bago an siring na mga inhustisya. Nangyari iyan sa pamilya nin tawo kan an enot niatong mga magurang magrebelde asin magin tampalasan, na sinutsutan kan rebelde na espiritung linalang na nagin si Satanas na Diablo. Sierto nanggad na pagbalga sa hustisya an ginibo ni Adan, Eva, asin Satanas na gamiton sa salang paagi an makangangalas na balaog nin libreng kabotan na itinao sa sainda ni Jehova. An salang paggawe ninda maresulta sa grabeng kasakitan asin kagadanan para sa bilog na pamilya nin tawo.—Genesis 3:1-6; Roma 5:12; Hebreo 2:14.

4. Gurano na kahaloy na an inhustisya kabtang kan kasaysayan nin tawo?

⁴ Sa laog nin mga 6,000 na taon poon kan pagrebelde sa Eden, an inhustisya nagin kabtang na kan sosyedad nin tawo. Malalaoman nanggad ini huli ta si Satanas iyo an dios kan kinaban na ini. (2 Corinto 4:4) Sia sarong putikon asin an ama kan kaputikan, saro na parabalobagi asin paratumang ki Jehova. (Juan 8:44) Sia pirmeng hayagan na naggigibo nin grabeng mga inhustisya. Halimbawa, sa sarong kabtang, huli sa marompot na impluwensia ni Satanas bago an Baha kan panahon ni Noe, naheling nin Dios na “an karatan nin tawo kadakol na sa daga asin an gabos na tendensia kan mga kaisipan kan saiyang puso danay na maraot na sana.” (Genesis 6:5) An situwasyon na iyan nangibabaw pa man giraray kan panahon ni Jesus. Sia nagsabi: “Igo na para sa kada aldaw an sadiring karatan kaiyan,” an boot sabihon an mismong makamomondong mga problema kaiyan, siring kan inhustisya. (Mateo 6:34) An Biblia tama nanggad na nagsasabi: “An gabos na linalang padagos na nag-aaragrangay nin iriba asin nakokolgan nin iriba sagkod ngonyan.”—Roma 8:22.

5. Taano ta igwa nin orog na inhustisya sa panahon niato kisa kasuarin man?

⁵ Huli kaini, sa bilog na kasaysayan nin tawo nangyayari an maraot na mga bagay na nagreresulta sa grabeng mga inhustisya. An situwasyon ngonyan orog na maraot kisa kasuarin man. Taano? Huli ta sa laog nin dakol na dekada an presenteng bakong diosnon na sistemang ini nin mga bagay nasa “huring mga aldaw” na kaiyan, na nakakaeksperyensia  nin “delikadong mga panahon na masakit pakibagayan” mantang iyan nagrarani na sa katapusan kaiyan. Ihinula kan Biblia na durante kan peryodong ini sa kasaysayan, an mga tawo magigin “mamomoton sa sainda man sana, mga mamomoton sa kuarta, mga nagpapasikat sa sadiri, mga maabhaw, mga paralanghad, . . . mga daing utang na boot, mga bakong maimbod, mga dai nin natural na kapadangatan, mga dai maoyonan, mga parapakaraot, mga mayong pagpupugol sa sadiri, mga maringis, mga mayong pagkamoot sa karahayan, mga parapasaloib, mga matagas an payo, mga maabhaw huli sa pag-orgolyo.” (2 Timoteo 3:1-5) An maraot na mga ugale na arog kaiyan nagbubunga nin gabos na klaseng inhustisya.

6, 7. Anong grabeng mga inhustisya an nagpapasakit sa pamilya nin tawo sa presenteng mga panahon?

⁶ Sa nakaaging sanggatos na taon nagkaigwa nin mga inhustisya sa sokol na dai pa noarin man naeksperyensiahan. An sarong dahelan iyo na an mga taon na ini nakaeksperyensia nin pinakadakol na guerra. Halimbawa, kinakarkulo nin nagkapirang istoryador na kan Guerra Mundial II sana, an nagadan uminabot sa mga 50 milyones sagkod sa 60 milyones, na an mayoriya kaiyan mga sibilyan—inosenteng mga lalaki, babae, asin aki. Poon kan matapos an guerrang iyan, minilyon pa an nagadan sa manlaenlaen na guerra, na sa giraray an mayoriya mga sibilyan. Pinapalakop ni Satanas an siring na mga inhustisya huli ta grabe an saiyang kaanggotan, sa pakaaram na sa dai na mahahaloy biyo siang dadaogon ni Jehova. Siring kaini an pagkasabi kan hula sa Biblia: “Huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.”—Kapahayagan 12:12.

⁷ An ginagastos sa militar sa bilog na globo minaabot na ngonyan sa sarong trilyon na dolyar kada taon. Ginatos na milyon katawo an mayo kan mga pangangaipo sa buhay, kaya horophoropon an pakinabang na ikakatao kan kuartang iyan kun gagastoson iyan sa matoninong na mga aktibidad. Mga sarong bilyon katawo an mayo nin igong kakanon, mantang an iba abunda. Oyon sa sarong reperensia sa Naciones Unidas, mga limang milyon na aki an nagagadan kada taon huli sa gutom. Mayo nanggad nin hustisya! Dangan, isip-isipon man an dakol na inosente na ginagadan paagi sa aborsion. An pagkarkulo nagkakalaenlaen poon  40 milyones sagkod 60 milyones kada taon sa bilog na kinaban! Kanigoan kamakatatakot na inhustisya!

8. Solamente sa anong paagi mangyayari an tunay na hustisya para sa katawohan?

⁸ An namamahalang mga tawo dai nakakanompong nin mga solusyon sa lakop na mga problema na nagpapasakit sa katawohan ngonyan; ni magrarahay man an situwasyon huli sa mga paghihingoa nin tawo. Ihinula kan Tataramon nin Dios na sa panahon niato “an mga maraot asin nandadaya orog na magraraot, na nanlalagalag asin ikinalalagalag.” (2 Timoteo 3:13) An inhustisya nagin pinakapundamental nang marhay na kabtang kan pangaroaldaw na pamumuhay kaya dai na iyan kayang haleon nin mga tawo. Solamenteng an Dios nin hustisya an makakahale kaiyan. Sia sana an makakahale ki Satanas, sa mga demonyo, asin sa maraot na mga tawo.—Jeremias 10:23, 24.

Rasonableng Ikinakapurisaw

9, 10. Taano ta pinanluyahan nin boot si Asaf?

⁹ Kan nakaagi, dawa an nagkapirang kagsurat kan Biblia nag-isip-isip kun taano ta an Dios dai pa nag-iinterbenir sa mga gibo-gibo nin tawo asin nagpapaabot nin tunay na hustisya saka katanosan. Kuanon niatong halimbawa an sarong partikular na lalaki kan mga panahon kan Biblia. Nasa nota sa itaas kan Salmo 73 an ngaran na Asaf, na nanonongod magsalang sa sarong pangenot na Levitang musikero durante kan paghade ni Hadeng David o sa mga musikero kan kamag-anakan na dian si Asaf an minimidbid na namamayo bilang ama. Si Asaf asin an saiyang mga gikan nagsurat nin dakol na komposisyon sa musika na ginamit sa pampublikong pagsamba. Pero, may panahon sa saiyang buhay na an kagsurat kan salmong ini pinanluyahan nin boot may koneksion sa saiyang pagsamba. Naheling nia an materyal na kaginhawahan kan maraot na mga tawo, asin narisa nia na sa parate sinda garo baga kontento sa saindang buhay, na dai nakakaeksperyensia nin ano man na maraot na mga resulta.

¹⁰ Mababasa niato: “Nauri ako sa mga hambogon, kun naheheling ko an katoninongan kan mga maraot. Huli ta dai sinda nagtitios nin kolog nin kagadanan; asin an saindang tulak matataba. Dai  ngani sinda nakakamate kan kasakitan nin magagadanon na tawo, asin dai sinda dinadamat na siring sa ibang tawo.” (Salmo 73:2-8) Alagad pag-abot nin panahon narealisar kan kagsurat na iyan sa Biblia na sala an siring na negatibong punto de vista. (Salmo 73:15, 16) Pinagmaigotan kan salmistang iyan na liwaton an saiyang kaisipan, alagad dai nia lubos na masabotan kun taano ta an mga maraot garo baga nakakalibre sa padusa mantang an mga may tamang tendensia an nagsasakit sa parate.

11. Ano an nasabotan kan salmistang si Asaf?

¹¹ Pag-abot nin panahon, nasabotan kan maimbod na lalaking iyan kan suanoy kun ano an kaaabtan kan mga maraot—na sa katapustapusi huhusayon ni Jehova an mga bagay-bagay. (Salmo 73:17-19) Si David nagsurat: “Maglaom ki Jehova asin otobon an saiyang dalan, asin ika ilalangkaw nia tangani na makasadiri kan daga. Kun pohoon na an mga maraot, maheheling mo iyan.”—Salmo 37:9, 11, 34.

12. Ano an katuyohan ni Jehova mapadapit sa karatan asin inhustisya? (b) Ano an saboot nindo manongod sa solusyon na iyan sa problema nin inhustisya?

¹² Sierto nanggad na katuyohan ni Jehova na haleon sa dagang ini an karatan asin an kaiba kaiyan na mga inhustisya sa saiyang itinalaan na panahon. Iyan an sarong bagay na maninigong regular na ipagirumdom sa saindang sadiri dawa kan maimbod na mga Kristiano. Hahaleon ni Jehova an mga nagkokontra sa saiyang kabotan, asin babalosan nia an mga namumuhay kaoyon kaiyan. “An saiyang mga mata nagmamasid, an saiyang nagliliwanag na mga mata nagsisiyasat sa mga aki nin mga tawo. Si Jehova mismo an nagsisiyasat sa matanos saka sa maraot, asin an siisay man na namomoot sa kadahasan ikinakaongis nanggad kan Saiyang kalag. Papaoranan nia an mga maraot nin mga siod, kalayo asin asupre patin nakakapasong doros . . . Huli ta si Jehova matanos; sia namomoot nanggad sa matanos na mga gibo.”—Salmo 11:4-7.

Sarong Bagong Kinaban na May Hustisya

13, 14. Taano ta mangingibabaw an katanosan asin hustisya sa bagong kinaban?

¹³ Kun laglagon na ni Jehova an daing hustisya na sistemang ini nin mga bagay na kontrolado ni Satanas, poponan na Nia an mamuraway na bagong kinaban. Pamamahalaan iyan kan langitnon na Kahadean nin Dios, na itinokdo ni Jesus sa saiyang mga parasunod na ipamibi. An karatan asin inhustisya sasalidahan nin katanosan asin hustisya, na sa panahon na iyan sisimbagon sa pinakalubos na paagi an pamibi: “Dumatong logod an kahadean mo. Gibohon logod an kabotan mo, kun paano sa langit, siring man sa daga.”—Mateo 6:10.

¹⁴ Sinasabi sa sato kan Biblia kun anong klase nin pamamahala an malalaoman niato, pamamahala na minamawot ngonyan kan gabos na indibiduwal na may tamang kamugtakan nin puso. Kun siring, maootob sa pinakalubos na paagi an Salmo 145:16: “Ibinubuka mo [Jehova Dios] an saimong kamot asin pinapanigoan an mawot nin lambang bagay na may buhay.” Dugang pa, an Isaias 32:1 nagsasabi: “Uya! An sarong hade [si Cristo Jesus sa langit] magrereynar para sa katanosan mismo; asin kun manongod sa mga prinsipe [mga representante ni Cristo sa daga], mamamahala sinda bilang mga prinsipe para sa hustisya mismo.” Mapadapit ki Hadeng Jesu-Cristo, an Isaias 9:7 naghula: “An kadakolan kan sa prinsipeng pamamahala asin an katoninongan magigin daing kasagkodan, sa trono ni David asin sa saiyang kahadean tanganing iyan marigon na patindogon asin tanganing susteniran iyan paagi sa hustisya asin paagi sa katanosan, poon ngonyan asin sagkod sa panahon na daing talaan. An mismong kaigotan ni Jehova nin mga hukbo an magibo kaini.” Naheheling daw nindo an saindong sadiri na namumuhay sa irarom kan may hustisyang pamamahala na iyan?

15. Ano an gigibohon ni Jehova para sa katawohan sa bagong kinaban?

¹⁵ Sa bagong kinaban nin Dios, mayo na kita nin dahelan na ipahayag an mga tataramon na yaon sa Eclesiastes 4:1: “Ako mismo nagbuelta tanganing  maheling ko an gabos na pan-aapi na ginigibo sa sirong kan aldaw, asin, uya! an mga luha kan mga inaapi, alagad mayo sindang pararanga; asin sa kampi kan mga nan-aapi sa sainda igwa nin kapangyarihan, kaya mayo sinda nin pararanga.” Totoo, huling bakong sangkap an satong isip, depisil na imahinaron kun magigin gurano nanggad kamakangangalas an bagong kinaban na iyan na may katanosan. Mayo na an karatan; imbes, an kada aldaw mapapano nin mararahay na bagay. Iyo, itatanos ni Jehova an gabos na sala, na ginigibo iyan sa paagi na labi nanggad sa satong linalaoman. Angay nanggad na pinasabngan ni Jehova Dios si apostol Pedro na sumurat: “Igwa nin bagong kalangitan asin sarong bagong daga na satong hinahalat segun sa saiyang panuga, asin sa mga ini magdadanay an katanosan”!—2 Pedro 3:13.

16. Paano naestablisar an “bagong kalangitan,” asin sa anong paagi inaandam na ngonyan an “bagong daga”?

¹⁶ Tunay nanggad, an “bagong kalangitan,” an langitnon na gobyerno nin Dios sa kamot ni Cristo, naestablisar na. Tinitipon na durante kan huring mga aldaw na ini an mga makompuesto sa pinakasentro kan “bagong daga,” sarong bagong daganon na sosyedad nin mga tawo na may tamang tendensia. Sinda haros pitong milyon na, sa kisuerra 235 kadagaan asin nasa mga 100,000 na kongregasyon. Nanonodan kan minilyon na ini an matanos asin may hustisyang mga dalan ni Jehova, asin bilang resulta, ikinakaogma ninda sa bilog na kinaban an pagkasararo na basado sa Kristianong pagkamoot. An saindang pagkasararo iyo an pinakarisangrisa asin pinakanagdadanay sa kasaysayan kan kinaban, sarong pagkasararo na labi pa sa ano man na naeksperyensiahan kan mga sakop ni Satanas. An siring na pagkamoot asin pagkasararo mga patanaw kan makangangalas na panahon na maabot sa bagong kinaban nin Dios, na pamamahalaan sa katanosan asin hustisya.—Isaias 2:2-4; Juan 13:34, 35; Colosas 3:14.

Dai Magigin Mapanggana an Pagsalakay ni Satanas

17. Taano ta an pangultimong pagsalakay ni Satanas sa banwaan ni Jehova siertong dai magigin mapanggana?

¹⁷ Sa dai na mahahaloy, si Satanas asin an saiyang mga parasunod madatong tumang sa mga parasamba ki Jehova sa pagprobar na laglagon sinda. (Ezequiel 38:14-23) Magigin kabtang iyan kan inapod ni Jesus na “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21) Magigin mapanggana daw an pagsalakay ni Satanas? Dai. Sinisierto sa sato kan Tataramon nin Dios: “Si Jehova mamomoton sa hustisya, asin dai nia papabayaan an saiyang mga maimbod. Sagkod sa panahon na daing talaan sinda babantayan nanggad; alagad kun dapit sa mga aki kan mga maraot, sinda paparaon nanggad. An mga matanos mismo makakasadiri kan daga, asin sinda mag-eerok dian sagkod lamang.”—Salmo 37:28, 29.

18. Paano mahiro an Dios sa nagdadangadang na pagsalakay ni Satanas sa Saiyang banwaan? (b) Taano ta nagin kapakipakinabang sa saindo an pagrepaso sa basado sa Bibliang impormasyon na ini manongod sa kapangganahan nin hustisya?

¹⁸ An pagsalakay ni Satanas asin kan saiyang hukbo sa mga lingkod ni Jehova iyo an magigin pangultimong insulto sa Dios. Ihinula ni Jehova paagi ki Zacarias: “An nagtitikwil sa saindo nagtitikwil sa sakong mata.” (Zacarias 2:8) Iyan garo man sana may nagduduldog nin moro sa mata ni Jehova. Sia tolos-tolos na mahiro asin popohoon an mga naggigibo kaiyan. An mga lingkod ni Jehova an pinakamamomoton, pinakanagkakasararo, pinakamatoninong, pinakamakinuyog sa ley sa bilog na daga. Kaya an pagsalakay na iyan tumang sa sainda magigin biyong bakong makatanosan asin daing hustisya. Dai iyan totogotan kan dakulang “mamomoton sa hustisya.” An saiyang paghiro para sa sainda maresulta sa daing sagkod na pagkalaglag kan mga kaiwal kan saiyang banwaan, sa kapangganahan kan hustisya, asin sa kaligtasan kan mga nagsasamba sa iyo sanang tunay na Dios. Kanigoan kamakangangalas asin kanakakapukaw sa boot kan mga pangyayari na nasa enotan na niato!—Talinhaga 2:21, 22.

Ano an Isisimbag Nindo?

• Taano ta lakop na marhay an inhustisya?

• Paano reresolberan ni Jehova an problema nin inhustisya sa daga?

• Ano an nakapahiro sa saindong boot sa pag-adal na ini manongod sa kapangganahan nin hustisya?

[Mga Hapot Para sa Pag-adal]

[Ritrato sa pahina 23]

Lakop an karatan bago kan Baha, asin lakop iyan sa “huring mga aldaw” na ini

[Ritrato sa pahina 24, 25]

Sa bagong kinaban nin Dios, an karatan sasalidahan nin hustisya asin katanosan