Tokdoan an Saindong mga Aki na Mamotan si Jehova
Tokdoan an Saindong mga Aki na Mamotan si Jehova
“Siring sa mga pana sa kamot nin sarong tawong makosog, iyo man an mga aki sa pagkahoben.”—SALMO 127:4.
1, 2. Paano an mga aki nakakaagid sa “mga pana sa kamot nin sarong tawong makosog”?
AN SARONG parapana nag-aandam nang patamaon an pana sa target kaiyan. Maingat niang ibinubugtak iyan sa pisi kan busog, asin mantang minaignit an saiyang kalamnan, ikinukurba nia an saiyang busog. Sa ibong kan mapuersang pag-ignit nia, maingat asin mapasensia niang inaasentar an pana. Dangan binutasan nia iyan! Matama daw an pana sa target kaiyan? May nagkapirang nakakakontribwir na bagay an nagdedeterminar sa simbag, kaiba an abilidad kan parapana, an epekto kan doros, asin an kamugtakan kan pana.
2 Inagid ni Hadeng Salomon an mga aki sa “mga pana sa kamot nin sarong tawong makosog.” (Salmo 127:4) Helingon niato kun paano puedeng iaplikar an ilustrasyon na ini. Medyo halipot sanang panahon na an pana nasa busog nin sarong parapana. Tanganing tumama iyan sa target, kaipuhan na butasan nia tolos iyan. Siring man, medyo halipot sana an panahon kan mga magurang tanganing mapatalubo sa saindang mga aki an odok sa pusong pagkamoot ki Jehova. Pakalihis nin garo baga halipot sanang panahon, an mga aki minadakula asin minahale sa harong. (Mateo 19:5) Matama daw sinda sa target—an boot sabihon, an mga aki daw padagos na mamomoot asin maglilingkod sa Dios paghale ninda sa harong? Dakol na nakakakontribwir na bagay an nakakaapekto sa simbag. An tolo kaiyan iyo an abilidad kan magurang, an kamugtakan na dian pinadakula an mga aki, asin an paagi na an ‘pana,’ o aki, naghihimate sa pagsasanay na inaako nia. Siyasaton niato nin mas detalyado an kada saro sa nakakakontribwir na mga bagay na ini. Enot, pag-oolayan niato an nagkapira sa mga karakteristiko nin sarong maabilidad na magurang.
An Maabilidad na mga Magurang Nagtatao nin Marahay na Halimbawa
3. Taano ta an sinasabi kan mga magurang kaipuhan na may gibo?
3 Si Jesus nagtao nin halimbawa sa mga magurang paagi sa pagsagibo nia kan saiyang itinokdo. (Juan 13:15) Sa ibong na lado, kinondenar nia an mga Fariseo, na “nagtataram” alagad “dai naggigibo.” (Mateo 23:3) Tanganing mamotibar an saindang mga aki na mamotan si Jehova, an sinasabi kan mga magurang kaipuhan na kaoyon kan saindang ginigibo. An mga tataramon na mayo nin gibo daing serbi na arog kan busog na mayo nin pisi.—1 Juan 3:18.
4. Ano an marahay na ihapot nin mga magurang sa saindang sadiri, asin taano?
4 Taano ta mahalagang marhay an halimbawa kan mga magurang? Kun paanong an mga nasa edad na nakakanood na mamotan an Dios paagi sa pagheling sa halimbawa ni Jesus, an mga aki nakakanood na mamotan si Jehova paagi sa pagsunod sa marahay na halimbawa kan saindang mga magurang. An mga kaibaiba kan aki magsalang makakapakosog o ‘makakaraot sa marahay na mga ugale’ kan aki. (1 Corinto 15:33) An dakol na kabtang kan buhay nin aki, asin siertong sa panahon nin mahalagang mga taon nin pagtalubo, an pinakadayupot asin pinakamaimpluwensiang kaibaiba nin sarong aki iyo an saiyang mga magurang. Kun siring, marahay na hapoton kan mga magurang an saindang sadiri: ‘Anong klaseng kaibaiba ako? An sakuya daw na halimbawa nagdadagka sa sakong aki na mapatalubo an marahay na mga ugale? Anong halimbawa an ipinapaheling ko sa mahalagang marhay na kabtang nin pagpamibi asin pag-adal sa Biblia?’
An Maabilidad na mga Magurang Namimibi Kaiba kan Saindang mga Aki
5. Ano an manonodan nin mga aki sa pamibi kan saindang magurang?
5 Dakol an manonodan kan saindong mga aki manongod ki Jehova paagi sa paghinanyog sa saindong mga pamibi. Kun nadadangog ninda kamo na nagpapasalamat sa Dios sa mga oras nin pagkakan asin namimibi durante nin mga pag-adal sa Biblia, ano an magigin konklusyon ninda? Posibleng marhay na manonodan ninda na si Jehova an nagtatao kan satong pisikal na mga pangangaipo—na huli kaiyan maninigo niato siang pasalamatan—asin na sia an nagtotokdo sa sato nin espirituwal na mga katotoohan. Mahalagang mga leksion ini.—Santiago 1:17.
6. Paano matatabangan kan mga magurang an saindang mga aki na mamatean na si Jehova interesado sa sainda bilang mga indibiduwal?
6 Minsan siring, kun namimibi kamo kaiba kan saindong pamilya sa mga panahon apuera sa mga oras nin pagkakan saka pampamilyang pag-adal sa Biblia asin kun ipinapamibi nindo an manongod sa espesipikong mga bagay na nakakaapektar sa saindo asin sa mga aki nindo, orog pa ngani an magigibo nindo. Matatabangan nindo an saindong mga aki na mamatean na si Jehova kabtang kan saindong pamilya, na sia may hararom na pagmakolog sa saindo bilang indibiduwal. (Efeso 6:18; 1 Pedro 5:6, 7) An sarong ama nagsabi: “Poon kan mamundag an samong aking babae, namimibi kami kaiba nia. Mantang sia nagdadakula, ipinapamibi mi an manongod sa angay na pakikiasosyar asin iba pang bagay na nakakaapektar sa saiya. Sagkod na dai pa sia naghahale tanganing mag-agom, aroaldaw kaming namimibi kaiba sia.” Puede man daw kamong mamibi aroaldaw kaiba kan saindong mga aki? Matatabangan daw nindo sinda na mansayon si Jehova bilang sarong Katood, na bako sanang nagtatao kan saindang pisikal asin espirituwal na mga pangangaipo kundi may pagmakolog man sa saindang emosyonal na mga pangangaipo?—Filipos 4:6, 7.
7. Tanganing magin espesipiko an mga pamibi kan mga magurang, ano an kaipuhan nindang maaraman?
7 Siempre, tanganing magin espesipiko kamo sa saindong mga pamibi, kaipuhan na maaraman nindo an nangyayari sa buhay kan saindong aki. Mangnohon an mga komento nin sarong ama na nagpadakula nin duwang aki: “Sa katapusan kan kada semana, duwa an ihinahapot ko sa sakong sadiri: ‘Nagin sibot sa anong mga bagay an sakong mga aki ngonyan na semana? Anong marahay na mga bagay an nangyari sa sainda?’” Mga magurang, puede daw nindong ihapot sa saindong sadiri an siring na mga hapot dangan iiba an nagkapira sa mga simbag sa saindong mga pamibi kaiba an saindong mga aki? Kun gigibohon nindo iyan, tinotokdoan nindo sinda na bako sanang mamibi ki Jehova—an Paradangog nin pamibi—kundi na mamoot man sa saiya.—Salmo 65:2.
An Maabilidad na mga Magurang Nagdadagka nin Marahay na Ugale sa Pag-adal
8. Taano ta kaipuhan na tabangan kan mga magurang an saindang mga aki na pataluboon an ugale nin pag-adal sa Tataramon nin Dios?
8 Paano an saboot nin magurang manongod sa pag-adal sa Biblia makakaimpluwensia sa relasyon nin aki sa Dios? Tanganing umoswag asin magdanay an ano man na relasyon, an kalabot na mga indibiduwal kaipuhan na bako sanang nag-oolay kundi naghihinanyog man. An saro sa mga paagi na naghihinanyog kita ki Jehova iyo an pag-adal sa Biblia sa tabang kan mga publikasyon na itinatao kan ‘maimbod na oripon.’ (Mateo 24:45-47; Talinhaga 4:1, 2) Kun siring, tanganing matabangan an saindang mga aki na mapatalubo an nagdadanay asin mamomoton na relasyon ki Jehova, marahay na dagkahon sinda kan mga magurang na pataluboon an ugale na pag-adal sa Tataramon nin Dios.
9. Paano matatabangan an mga aki na mapatalubo an marahay na ugale sa pag-adal?
9 Paano matatabangan an mga aki na mapatalubo an marahay na ugale sa pag-adal? Sa giraray, an halimbawa nin magurang an pinakamarahay na paagi nin pagtotokdo. Regular daw kamong naheheling kan saindong mga aki na ikinakaogma an personal na pagbasa o pag-adal sa Biblia? Totoo, posibleng marhay na sibot-sibot kamo sa pag-asikaso sa saindong mga aki, asin tibaad nag-iisip kamo kun noarin kamo magkakaigwa nin panahon na magbasa asin mag-adal. Alagad hapoton an saindong sadiri, ‘Naheheling daw ako kan sakong mga aki na regular na nagheheling nin telebisyon?’ Kun iyo, puede daw nindong gamiton an ibang panahon para dian tanganing magtao nin marahay na halimbawa sa sainda kun dapit sa personal na pag-adal?
10, 11. Taano ta an mga magurang maninigong magkaigwa nin regular na pampamilyang pag-orolay sa Biblia?
10 An saro pang praktikal na paagi na matotokdoan nin mga magurang an mga aki na maghinanyog ki Jehova iyo an pagkaigwa nin regular na pampamilyang pag-orolay sa Biblia. (Isaias 30:21) Pero, tibaad mag-isip-isip an nagkapira, ‘Taano ta kaipuhan pa nin mga aki an pampamilyang pag-adal kun regular man sindang iniiba kan saindang mga magurang sa mga pagtiripon kan kongregasyon?’ Igwa nin nagkapirang marahay na dahelan. Ipinagkatiwala ni Jehova sa mga magurang an pangenot na paninimbagan na tokdoan an saindang mga aki. (Talinhaga 1:8; Efeso 6:4) An pampamilyang pag-adal sa Biblia nagtotokdo sa mga aki na an pagsamba bakong pormal na ritual na ginigibo sana sa publiko, kundi kabtang iyan kan pribadong buhay kan pamilya.—Deuteronomio 6:6-9.
11 Dugang pa, an pampamilyang pag-adal na pinapangenotan sa marahay na paagi puedeng magtao sa mga magurang nin oportunidad na masabotan an iniisip kan saindang mga aki manongod sa espirituwal asin moral na mga bagay. Halimbawa, kun saradit pa an mga aki, puedeng gamiton kan mga magurang an mga publikasyon na siring kan Makanood sa Dakulang Paratokdo. * Sa haros kada parapo kan pantabang na ini sa pag-adal sa Biblia, hinahagad sa mga aki na ipahayag ninda an saindang opinyon sa mga temang pinag-oolayan. Paagi sa pangangatanosan basado sa mga teksto na nasambitan sa libro, matatabangan kan mga magurang an saindang mga aki na mapatalubo an saindang kakayahan sa pagrisa “na mamidbid an tama sagkod an sala.”—Hebreo 5:14.
12. Paano puedeng ibagay kan mga magurang an pampamilyang pag-adal sa mga pangangaipo nin aki, asin ano an nanompongan nindong epektibo sa bagay na ini?
12 Mantang nagdadakula an saindong mga aki, ibagay an pag-adal sa saindang mga pangangaipo. Mangnohon kun paano tinabangan nin sarong mag-agom an saindang tinedyer na mga aki na mangatanosan sa sarong imbitasyon na umatender sa baraylehan sa eskuelahan. An ama nagsabi: “Sinabihan mi an samong mga aki na durante kan sarong kabtang kan sunod ming pampamilyang pag-adal, kaming mag-agom an maaktong mga aki, asin an samong mga aking babae an magsasagin na mga magurang. Minsan siisay sa sainda puedeng mag-aktong Tatay o Nanay, alagad an mga aki kaipuhan na magtarabangan sa pagsiyasat kan tema asin pagtao nin paggiya manongod sa baraylehan sa eskuelahan.” Ano an nagin resulta? “Nagngalas kami na responsable nanggad an samong mga aking babae (sa saindang pag-akto bilang mga magurang) kan ipinapaliwanag ninda sa samo (bilang mga aki) an saindang mga dahelan na basado sa Biblia kun taano ta bakong madonong na umatender sa baraylehan,” an sabi pa kan ama. “An nakapangalas pa sa samo iyo an mga suhestion na itinao ninda na puedeng pansalida sa aktibidad na ini. Nagtao ini sa samo nin mahalagang pakarorop sa saindang kaisipan asin kamawotan.” Totoo, nangangaipo nin pagmamaigot asin imahinasyon tanganing mapagdanay na regular asin angay an pampamilyang pag-adal, alagad an paghihingoa bawi man sa mga balos.—Talinhaga 23:15.
Papangyarihon na Magkaigwa nin Matoninong na Kamugtakan
13, 14. (a) Paano papangyayarihon kan mga magurang na magkaigwa nin matoninong na kamugtakan sa harong? (b) Ano an puedeng magin kapakipakinabang na resulta kun inaadmitir nin sarong magurang na sia nakagibo nin sala?
13 An pana posibleng marhay na tumama sa target kun iyan inaasentar asin binubutasan kan parapana sa kalmadong mga kamugtakan. Kaagid kaiyan, an mga aki posibleng marhay na makakanood na mamotan si Jehova kun pinapangyayari nin mga magurang na magkaigwa nin matoninong na kamugtakan sa harong. “An bunga nin katanosan isinasabwag an banhi kaiyan sa irarom nin matoninong na mga kamugtakan para sa mga nakikipagkatoninongan,” an isinurat ni Santiago. (Santiago 3:18) Paano papangyayarihon nin mga magurang na magkaigwa nin matoninong na kamugtakan sa harong? Kaipuhan na papagdanayon nin mag-agom an makosog na bogkos nin pag-agoman. An mag-agom na may pagkamoot asin paggalang sa lambang saro igwa nin mas marahay na oportunidad na matokdoan an saindang mga aki na mamotan asin igalang an iba, kaiba na si Jehova. (Galacia 6:7; Efeso 5:33) An pagkamoot asin paggalang nagpapaoswag nin katoninongan. Asin an mag-agom na may matoninong na relasyon sa lambang saro mas maaatubang an mga dai pagkakaoyon na puedeng maglataw sa laog kan pamilya.
14 Siempre, kun paanong mayo nin sangkap na mga pag-agoman, mayo man nin sangkap na mga pamilya sa daga sa presente. An mga magurang tibaad kun beses dai ikinakapaheling an mga bunga kan espiritu sa pagtratar sa saindang mga aki. (Galacia 5:22, 23) Kun mangyari iyan, ano an maninigong gibohon kan mga magurang? Kun aakoon ninda an saindang sala, maiinaan daw kaiyan an paggalang sa sainda kan saindang aki? Helingon niato an halimbawa ni apostol Pablo. Sia garo sarong espirituwal na ama para sa dakol. (1 Corinto 4:15) Pero, hayag na inadmitir nia na sia nakagibo nin mga sala. (Roma 7:21-25) Dawa siring, an saiyang kapakumbabaan asin pagkaonesto nagpakosog sa satong paggalang sa saiya imbes na nagpaluya kaiyan. Sa ibong kan saiyang mga pagkukulang, may kompiansang ikinasurat ni Pablo sa kongregasyon sa Corinto: “Magin kamong mga paraarog sa sako, siring na ako paraarog ki Cristo.” (1 Corinto 11:1) Kun inaadmitir man nindo an saindong mga sala, posibleng marhay na papalampason kan saindong mga aki an saindong mga pagkukulang.
15, 16. Taano ta maninigong sanayon kan mga magurang an saindang mga aki na mamotan an saindang Kristianong mga tugang, asin paano ini magigibo?
15 Ano pa an puedeng gibohon kan mga magurang tanganing papangyarihon na magkaigwa nin sarong kamugtakan na mapapaoswag kan saindang mga aki an pagkamoot ki Jehova? Si apostol Juan nagsurat: “Kun an siisay man nagsasabi: ‘Namomoot ako sa Dios,’ alagad ta naoongis sia sa saiyang tugang, sia putikon. Huli ta an dai namomoot sa saiyang tugang, na saiyang naheheling, dai puede na namomoot sa Dios, na dai nia naheheling.” (1 Juan 4:20, 21) Kun siring, kun sinasanay nindo an saindong mga aki na mamotan an saindang Kristianong mga tugang, tinotokdoan nindo sindang mamotan an Dios. Marahay na hapoton kan mga magurang an saindang sadiri, ‘An nangingibabaw daw na bagay sa sakong pakikipag-olay manongod sa kongregasyon nakakaparigon sa boot o mapagkritika?’ Paano nindo iyan maaaraman? Maingat na hinanyogon an sinasabi kan saindong mga aki manongod sa mga pagtiripon asin manongod sa mga miembro kan kongregasyon. Posibleng marhay na madangog nindo an saindong mga saboot sa saindang mga komento.
16 Ano an magigibo kan mga magurang tanganing matabangan an saindang mga aki na mamotan an saindang espirituwal na mga tugang? Si Peter, na ama nin duwang tinedyer na lalaki, nagsabi: “Poon kan saradit pa an samong mga aki, regular kaming nag-iimbitar nin mga maygurang sa espirituwal tanganing magkakan kaiba mi asin makaibanan mi sa samong harong, asin ikinakaogma ming marhay an paggibo kaiyan. An samong mga aki nagdakula na nakikiibaiba sa mga tawo na namomoot ki Jehova, asin naheheling ninda ngonyan na an paglilingkod sa Dios sarong nakakaogmang paagi nin pamumuhay.” Si Dennis, na ama nin limang aking babae, nagsabi, “Dinadagka mi an samong mga aki na magin makikatood sa mas may edad nang mga payunir sa kongregasyon, asin basta posible nagpapaheling kami nin pagkamapag-istimar sa nagbibiaheng mga paraataman asin sa saindang agom.” Puede man daw kamong mangenot sa pagtabang sa saindong mga aki na mansayon an kongregasyon bilang ekstension kan saindong pamilya?—Marcos 10:29, 30.
An Paninimbagan nin Sarong Aki
17. Anong desisyon an kaipuhan na gibohon nin mga aki pag-abot nin panahon?
17 Pag-olayan giraray niato an ilustrasyon kan parapana. Minsan ngani tibaad sia maabilidad, harayo an posibilidad na tamaan nia an target kun an pana na gagamiton nia natiko o nabiribid. Siempre, pagmamaigotan nanggad kan mga magurang na itanos an tikong pana, sabi ngani, paagi sa paghihingoa na itanos an salang kaisipan kan aki. Alagad maabot an panahon na an mga aki an madesisyon para sa sadiri ninda kun baga totogotan ninda an kinaban na ini na moldehon sinda sa kabotan kaiyan o totogotan si Jehova na ‘itanos an saindang mga dana.’—Talinhaga 3:5, 6; Roma 12:2.
18. Ano an puedeng magin epekto sa iba kan pagpili nin aki?
18 Mantang an mga magurang igwa nin magabat na paninimbagan na padakulaon an saindang mga aki sa “disiplina asin paggiya sa isip gikan ki Jehova,” an ultimong desisyon kun magigin anong klase siang tawo pagdakula nia nakadepende sa aki mismo. (Efeso 6:4) Kun siring, mga aki, hapoton an saindong sadiri, ‘Aakoon ko daw an mamomoton na pagsasanay na itinatao kan sakong mga magurang?’ Kun gigibohon nindo iyan, pinipili nindo an pinakamarahay na paagi nin pamumuhay. Mapapaogma nindong marhay an saindong mga magurang. An pinakamahalaga, mapapagayagaya nindo an puso ni Jehova.—Talinhaga 27:11.
[Nota sa Ibaba]]
^ par. 11 Ipinublikar kan Mga Saksi ni Jehova.
Nagigirumdoman daw Nindo?
• Paano an mga magurang makakatao nin marahay na halimbawa kun dapit sa pamibi asin pag-adal sa Biblia?
• Paano an mga magurang makakapangyari na magkaigwa nin matoninong na kamugtakan sa harong?
• Anong pagpili an napapaatubang sa mga aki, asin paano makakaapektar sa iba an ginigibo nindang pagpili?
[Mga Hapot Para sa Pag-adal]
[Ritrato sa pahina 28]
Nagtatao daw kamo sa saindong aki nin marahay na halimbawa kun dapit sa personal na pag-adal?
[Ritrato sa pahina 29]
An matoninong na kamugtakan sa pamilya nakakakontribwir sa kaogmahan