Kun Paano Mapapatalubo sa Puso kan Saindong Aki an Pagkamoot sa Dios

NGONYAN, sarong tunay na angat para sa saro na mapatalubo an dayupot na relasyon ki Jehova Dios. (Salmo 16:8) Siring kan ihinula, nabubuhay na kita sa “delikadong mga panahon na masakit pakibagayan.” An kadaklan na tawo “mga mamomoton sa kasingawan imbes na mga mamomoton sa Dios.” (2 Timoteo 3:1-5) Iyo, an tunay na pagkamoot sa Dios bihira nanggad sa kinaban ngonyan.

Kun gusto niato na mapatalubo sa puso nin aki an pagkamoot sa Dios, kaipuhan na talagang maghingoa kita na gibohon iyan. An pagkamoot ki Jehova Dios dapat na pataluboon sa puso kan satong mga aki. Paano niato magigibo ini?

Sinserong Pakikipag-olay

Puede niatong mapatalubo sa puso kan satong mga aki an pagkamoot sa Dios kun an sato mismong puso pano nin pagkamoot sa saiya. (Lucas 6:40) Ipinaparisa ini kan Biblia kan magsabi iyan: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong kosog. Asin an mga tataramon na ini na ipinagboboot ko sa saimo ngonyan dapat na mamugtak sa saimong puso; asin dapat na itadom mo an mga iyan sa saimong aki.”—Deuteronomio 6:4-7.

Paano niato mapapatalubo sa puso kan satong aki an pagkamoot sa Dios? Enot, dapat na mamansayan niato kun ano an nasa puso kan satong aki. Ikaduwa, dapat na ihayag niato kun ano an nasa sato mismong puso.

Sa dalan pasiring sa Emaus kaiba an duwa sa saiyang mga disipulo, pinarigon nguna ni Jesu-Cristo an boot kan saiyang mga disipulo na ipahayag an saindang mga linalaoman asin kinakatakotan. Pakalihis na maghinanyog sa sainda sa laog nin harohalawig na panahon, dangan sana itinanos ni Jesus an saindang kaisipan paagi sa pagpaliwanag kan Kasuratan. Paghaloyhaloy sinda nagkomento: “Bakong naglaad an satong puso mantang nagtataram sia sa sato?” An pag-oolay na iyan sarong halimbawa nin sinserong pakikipag-olay. (Lucas 24:15-32) Paano niato maaaraman an mga saboot kan satong aki?

Kasuarin pa sana, hinapot manongod sa sinserong pakikipag-olay an nagkapirang magurang na an mga aki nasa edad na o madali nang umabot sa pagkanasa edad na asin marahay na mga halimbawa sa kongregasyon. Halimbawa, si Glen, sa Mejico, may apat na nasa edad nang aki. * Sia nagkomento: “An komportableng pag-oolay nin mga magurang asin mga aki dai basta na sana nangyayari. Dikit sanang panahon an ginagamit ming mag-agom sa bakong gayong importanteng mga bagay tanganing mas dakol kaming panahon na makaibanan an samuyang mga aki. Kan sinda tinedyer pa, kun beses bilog na banggi kaming magkairibanan, na nag-eerestoryahan manongod sa ano man na magsabong sa saindang isip. Siring man sa mga oras nin pagkakan, paagi sa paghinanyog sa saindang pag-orolay, namamansayan niamo an mga problema asin may kabootan na itinatanos an salang tendensia, na sa parate dai ninda naririsa iyan.”

Kalabot man sa sinserong pakikipag-olay an paghayag kun ano an nasa puso mismo niato. Si Jesus nagsabi: “An marahay na tawo minapaluwas nin marahay gikan sa marahay na kayamanan kan saiyang puso, . . . huli ta gikan sa kapanoan kan puso an saiyang ngoso nagtataram.” (Lucas 6:45) Si Toshiki, na may tolong aki na bilog na panahon na mga ministro sa Hapon, nagsabi: “Dakol na beses na sinabi ko sa sainda kun taano ta nagtubod ako ki Jehova—kun paano ako nagtubod sa bilog kong puso na igwa nin Dios asin kun paano an sako mismong eksperyensia sa buhay nakakakombensir sa sako na an Biblia totoo saka iyo an pinakamarahay na giya sa buhay.” Sa Mejico, si Cindy nagsabi: “An sakong agom pirmeng namimibi kaiba kan mga aki. Kun nadadangog ninda an odok sa puso na mga kapahayagan nia, aram ninda na si Jehova bakong imahinasyon sana.”

An Makosog na Impluwensia kan Satong Halimbawa

Mas makosog pa ngani an impluwensia kan satong paggawe kisa sa mga tataramon, huli ta ipinapaheling kaiyan sa satong mga aki kun gurano kadakula kan pagkamoot niato sa Dios. Paagi sa pagrisa sa pagkuyog ni Jesu-Cristo ki Jehova, mamamansayan kan mga tawo an rarom kan saiyang pagkamoot sa  Dios. “Tangani na maaraman kan kinaban na namomotan ko an Ama,” an sabi ni Jesus, “kun ano an itinaong togon sako kan Ama, iyan an ginigibo ko.”—Juan 14:31.

Si Gareth, saro sa Mga Saksi ni Jehova sa Wales, nagkomento: “Dapat na maheling kan samong mga aki na namomotan mi si Jehova asin na nagmamaigot kami na gibohon an mga bagay oyon sa saiyang kabotan. Halimbawa, naheheling kan sakong mga aki na bilang pagkuyog sa sinasabi sa sato nin Dios, inaadmitir ko an sakong mga sala. Ngonyan nagmamaigot an sakong mga aki na gibohon man iyan.”

Si Greg, sarong Australiano, nagsabi: “Gusto ming maheling kan samong mga aki na an katotoohan iyo an pinakaimportante sa samong buhay. Kun nagdedesisyon kami manongod sa trabaho o pag-aling-aling, iniisip nguna niamo kun paano maaapektaran an samong Kristianong mga obligasyon. Naoogma kami na maheling na ginigibo man iyan kan samong 19 anyos na aking babae sa saiyang paglilingkod bilang auxiliary payunir.”

Pagtabang sa Satong mga Aki na Masabotan an Dios

Dai niato mamomotan o mapagtitiwalaan an saro na dai niato nasasabotan. Kan gusto ni apostol Pablo na an mga Kristiano sa Filipos tumalubo sa saindang pagkamoot ki Jehova, sia nagsurat: “Ini an padagos kong ipinapamibi, na an saindong pagkamoot paorog nang paorog na umabunda na may tamang kaaraman asin lubos na pakabatid.” (Filipos 1:9) Si Falconerio, na nagpapadakula nin apat na aki sa Peru, nagsabi: “An regular na pagbasa asin pag-adal sa Biblia kaiba ninda nagpapakosog kan saindang pagtubod. Kun beses napapabayaan ko an pag-adal kaiba ninda, asin naheheling ko na nagluluya an pagkamoot ninda sa Dios.” Si Gary, na taga Australia, nagsabi: “Parate kong ipinapaheling sa sakong mga aki an ebidensia na naootob an mga hula sa Biblia. Idinodoon ko man an mga pakinabang kan pag-aplikar sa mga prinsipyo sa Biblia. An pagigin regular kan samong pampamilyang pag-adal sa Biblia nagin mahalagang marhay sa pagpatalubo kan saindang pagtubod.”

An kaaraman makakaabot sa puso nin aki sa pinakaepektibong paagi kun impormal pero magalang an kamugtakan na dian nakakagayagaya an pakanood. (Santiago 3:18) “Durante kan pampamilyang pag-adal sa Biblia, pinagmamaigotan mi na dai pag-anggotan an samong mga aki, dawa kun medyo nagigin makosog an ngirisihan ninda,” an sabi ni Shawn asin Pauline na taga Britania, na may apat na aki. “Naggagamit kami nin laen-laen na paagi sa  pag-adal. Kun beses inaagda mi an mga aki na pumili nin tema. Ginagamit mi an mga video na ginibo kan organisasyon ni Jehova. Kun beses hineheling mi giraray an sarong kabtang kan video o pinopondo nguna an video tanganing mapag-olayan mi iyan.” Hale man sa Britania, an sarong ina na an ngaran Kim nagsabi: “Maingat akong nag-aandam para sa pampamilyang pag-adal tanganing makatao ako nin mga hapot na magpapaisip sa sakong mga aki. Ikinakaogma mi an pag-adal. Nagpaparangirisi kami.”

Pagpili nin Kairiba

An pagkamoot ki Jehova asin pag-apresyar sa tunay na pagsamba puedeng orog na tumalubo sa satong mga aki kun napapalibotan sinda nin mga tawo na katood nin Dios. Tibaad kaipuhan an paghihingoa sa pag-areglar na may makaasosyar an satong mga aki na puede nindang makaolay asin makaibanan sa pag-aling-aling sa kapakipakinabang na paagi. Alagad bawi man an pakinabang sa paggibo kaiyan! Dugang pa, kapakipakinabang na gumibo nin mga oportunidad para sa satong mga aki na mamidbid an mga Saksi ni Jehova na ginibong karera sa saindang buhay an bilog na panahon na ministeryo. Pinili iyan kan dakol na naglaog sa karerang iyan huli sa pakikiasosyar sa maigot na mga lingkod nin Dios. An sarong Kristiana na nagin misyonero nagsabi: “Dakol na beses na inimbitaran kan sakong mga magurang an mga payunir para sa sarong pagkakan. Risang-risa na ogmahon sinda sa saindang ministeryo kaya gusto ko man na maglingkod sa Dios sa kaparehong paagi.”

Siempre, an ugale kan satong mga aki puedeng maimpluwensiahan sa marahay sagkod maraot na paagi. Kun siring, an mga peligro nin maraot na pag-iriba binabalo an satong kakayahan bilang mga magurang. (1 Corinto 15:33) Sarong abilidad na tokdoan an mga hoben na likayan an pakikibarkada sa mga dai namomoot ki Jehova asin sa mga dai nakakamidbid sa saiya. (Talinhaga 13:20) Si Shawn, na sinambit sa enotan, nagsabi: “Tinokdoan mi an samong mga aki na makiibaiba sa makikatood na paagi sa mga kaeskuela alagad sagkod na sana iyan sa eskuelahan. Nasabotan kan samong mga aki kun taano ta dai sinda maninigong magpartisipar sa ekstrakurikular na mga aktibidad o karawat sa eskuelahan.”

An Kahalagahan nin Pagsasanay

Paagi sa pagsasanay sa satong mga aki na ipaliwanag an saindang pagtubod, tinatabangan niato sinda na ikaogma an pagpahayag kan saindang pagkamoot sa Dios. An sabi ni Mark, na nakaistar sa Estados Unidos: “Gusto mi na mamatean kan samong mga aking lalaki na puede nindang ikaogma an pagsabi sa iba kan saindang pagtubod ano man na oras, bako sanang kun sinda pormal na nakikikabtang sa samong pampublikong ministeryo. Kaya kun kami minaduman sa sarong lugar para sa pag-aling-aling, arog baga nin sarong parke, gilid nin dagat, o kadlagan, nagdadara kami nin mga Biblia asin literatura sa Biblia, asin nakikipag-olay kami sa mga tawo duman manongod sa mga bagay na tinutubod mi. Talagang ikinakaogma kan samong mga aki an impormal na pagpapatotoo kaiba mi sa paaging iyan. Nagpapartisipar sinda sa pag-orolay asin sinasabi an manongod sa saindang pagtubod.”

Tinabangan kan gurang nang si apostol Juan an dakol na tawo na tumalubo sa saindang pagkamoot sa Dios. Mapadapit sa sainda, sia nagsurat: “Dai na ako nin orog pa kadakulang dahelan sa pagpasalamat kisa sa mga bagay na ini, na madangog ko na an sakong [espirituwal na] mga aki padagos na naglalakaw sa katotoohan.” (3 Juan 4) Kun mapapatalubo niato sa puso kan satong mga aki an pagkamoot sa Dios, siertong magkakaigwa man kita nin kagayagayahan na arog kaiyan.

[Nota sa Ibaba]

[Mga Ritrato sa pahina 9]

An sinserong pakikipag-olay manongod sa mga bagay na may koneksion sa pagtubod dai basta na sana nangyayari

[Ritrato sa pahina 10]

Sanayon an saindong mga aki na ipahayag an saindang pagkamoot sa Dios

[Credit Line]

Sa karahayan nin boot kan Green Chimneys Farm