‘Nagtatalubo sa Panahon nin Pagkaubanon’

DAKOL na tawo sa kadagaan nin Mediteraneo an nagtatanom nin palmang datiles (date palms) sa saindang patyo. An mga poon na ini midbid sa kagayonan asin managom na bunga kaiyan. Dugang pa, padagos iyan na nagtatalubo sa laog nanggad nin labing sanggatos na taon.

Poetikong ilinadawan ni Hadeng Salomon kan suanoy na Israel an tindog nin sarong magayon na daragang Sulamita bilang nakakaagid sa poon nin palma. (Awit ni Salomon 7:7) An librong Plants of the Bible nagsasabi: “An Hebreong termino para sa palmang datiles iyo an ‘tàmâr.’ . . . Iyan nagin simbolo kan mga Judio para sa gayon nin hiro saka gayon nin tindog asin parateng ginagamit ninda na ngaran para sa mga babae.” Halimbawa, Tamar an ngaran kan magayon na tugang sa ama ni Salomon. (2 Samuel 13:1) May mga magurang na tinatawan pa man giraray kan ngaran na iyan an saindang mga aking babae.

Bako sanang an magagayon na babae an inaagid sa poon nin palma. An salmista nag-awit: “An matanos mamumurak arog kan poon nin palma; arog kan sedro sa Libano, sia madakula. An mga nakatanom sa harong ni Jehova, sa mga patyo kan samong Dios, sinda mamumurak. Sinda padagos pang magtatalubo sa panahon nin pagkaubanon, sinda magpapadagos na mataba asin presko.”—Salmo 92:12-14.

Sa piguratibong pagtaram, an mga maimbod na naglilingkod sa Dios sa panahon kan saindang pagkagurang may dakol na pagkakaagid sa magayon an tindog na poon nin palma. “An pagkaigwa nin uban korona nin kagayonan kun iyan yaon sa dalan nin katanosan,” an sabi kan Biblia. (Talinhaga 16:31) Minsan ngani tibaad lumuya an saindang pisikal na kosog huli sa naglalangkaw na edad, puedeng mapagdanay kan mga may edad na an saindang espirituwal na kosog paagi sa regular na pag-adal sa Tataramon nin Dios, an Biblia. (Salmo 1:1-3; Jeremias 17:7, 8) Huli sa saindang nakakaakit na mga tataramon asin marahayon na halimbawa, an maimbod na mga mas may edad na gikanan nin dakulaon na pagparigon nin boot para sa iba asin padagos sindang namumunga sa laog nin dakol na taon. (Tito 2:2-5; Hebreo 13:15, 16) Arog kan palmang datiles, an mga may edad na puedeng magtalubo sa saindang pagkagurang.