“Ano an Katotoohan?”

IYAN an mapagtuyang ihinapot ki Jesus kan Romanong Gobernador na si Poncio Pilato. Dai sia interesado sa simbag, asin dai man sia sinimbag ni Jesus. Tibaad para ki Pilato masakiton na masabotan an katotoohan.—Juan 18:38.

Dakol ngonyan an may arog kaining mapagtuyang saboot sa katotoohan, kaiba an mga namomoon sa relihion, edukador, asin politiko. Naniniwala sinda na an katotoohan—nangorogna an moral asin espirituwal na katotoohan—bakong absoluto (absolute) kundi relatibo (relative) asin pirmeng pabarobago. Siempre, ipinaparisa kaini na puedeng determinaran kan mga tawo para sa sadiri ninda kun ano an tama asin kun ano an sala. (Isaias 5:20, 21) Ipinaparisa man kaini na puedeng haboan nin mga tawo bilang lihis na sa uso an mga prinsipyo sa buhay asin mga pamantayan sa moral na sinusunod kan nakaaging mga henerasyon.

Mahalagang mangnohon an mga tataramon na nagin dahelan kan hapot ni Pilato. Si Jesus nagsabi: “Ako namundag dahel kaini, asin dahel kaini ako napadigdi sa kinaban, na ako magpatotoo sa katotoohan.” (Juan 18:37) Para ki Jesus, an katotoohan bakong malibog asin bakong imposibleng masabotan na konsepto. Nanuga sia sa saiyang mga disipulo: “Mamimidbid nindo an katotoohan, asin an katotoohan mapatalingkas sa saindo.”—Juan 8:32.

Saen manonompongan an siring na katotoohan? Sa sarong pangyayari, si Jesus namibi sa Dios: “An saimong tataramon katotoohan.” (Juan 17:17) An Biblia, na isinurat paagi sa pagpasabong nin Dios, naghahayag kan katotoohan na nagtatao nin masasarigan na paggiya sagkod seguradong paglaom para sa ngapit—an buhay na daing katapusan.—2 Timoteo 3:15-17.

May pagkaindiperenteng hinaboan ni Pilato an oportunidad na manodan an siring na katotoohan. Ano man an masasabi mo manongod dian? Taano ta dai mo hapoton an mga Saksi ni Jehova kun manongod sa ano “an katotoohan” na itinokdo ni Jesus? Maoogma sindang sabihon sa saimo an katotoohan na iyan.