Mga Hapot Hale sa mga Parabasa

Sala daw na magsagin si Jacob na sia si Esau, siring kan nakasurat sa Genesis 27:18, 19?

Tibaad pamilyar kamo sa pagkasaysay na ini. Kan gurang na si Isaac sinabihan nia si Esau na magdakop nin usa, na sinasabi: “Makakan ako, tanganing mabendisyonan ka kan sakong kalag bago ako magadan.” Kan madangog an sinabi kan saiyang agom, nag-andam si Rebeca nin masiram na putahe asin tinawan nin instruksion si Jacob: “Dadarahon mo [an kakanon] sa saimong ama asin kakakanon nia iyan, tanganing mabendisyonan ka nia bago sia magadan.” Dangan si Jacob, na sulot an mga gubing ni Esau asin may anit nin ogbon na mga kanding sa saiyang liog saka mga kamot, nagduman sa saiyang ama na dara an masiram na putahe. Kan hapoton sia ni Isaac, “Siisay ka, aki ko?” nagsimbag si Jacob: “Ako si Esau na saimong panganay.” Naniwala si Isaac sa saiya asin itinao sa saiya an bendisyon.—Genesis 27:1-29.

Dai sinasabi kan Biblia an gabos na detalye kun taano ta arog kaiyan an ginibo ni Rebeca asin Jacob, minsan ngani ipinaparisa na biglang luminataw an situwasyon na iyan. Maninigo niatong mangnohon na dai ipinapangatanosan ni kinokondenar kan Tataramon nin Dios an ginibo ni Rebeca asin Jacob, asin kun siring dai nagtatao nin basehan para sa pagputik asin panloloko. Minsan siring, an Biblia nagtatao nin impormasyon manongod sa situwasyon na iyan.

Enot, malinaw na ipinaparisa kan pagkasaysay na si Jacob may deretso na mag-ako kan bendisyon kan saiyang ama; si Esau mayo kan deretsong iyan. Bago kaidto, legal na binakal ni Jacob an pagkamatua hale sa saiyang daing pagpapahalagang kakambal, na ipinabakal iyan karibay nin sarong pagkakan tanganing panigoan an saiyang pagkagutom. “Pinagmenos ni Esau an pagkamatua.” (Genesis 25:29-34) Kaya sa pagdolok sa saiyang ama, an hinahagad kaidto ni Jacob bendisyon na tama sanang para sa saiya.

Ikaduwa, kan marealisar ni Isaac na itinao nia an bendisyon ki Jacob, dai sia naghingoang bagohon an ginibo nia. Tibaad nagirumdoman nia an sinabi ni Jehova ki Rebeca bago mamundag an kambal: “An matua maglilingkod sa nguhod.” (Genesis 25:23) Mahalaga man na mangnohon na kan mahale na si Jacob pasiring sa Haran, dinagdagan ni Isaac an bendisyon na mas naenot na niang itinao.—Genesis 28:1-4.

Sa katapustapusi, maninigong girumdomon na aram ni Jehova an gabos na nangyayari sagkod interesado sia dian. An bendisyon na itinao ni Isaac may koneksion sa panuga nin Dios ki Abraham. (Genesis 12:2, 3) Kun habo nin Dios na mapasiring ki Jacob an bendisyon, inolang nia kutana iyan. Imbes, sinegurado ni Jehova ki Jacob an bagay na iyan, na sinasabi: “Paagi sa saimong banhi an gabos na pamilya sa daga magbebendisyon nanggad kan saindang sadiri.”—Genesis 28:10-15.