Pagmamaigot na Magibo an Katuyohan nin Dios Ngonyan

“[Si Cristo] nagadan para sa gabos tanganing idtong mga nabubuhay dai na mabuhay para sa sainda man sana.”—2 CORINTO 5:15.

1. Isaysay an nagin eksperyensia nin sarong misyonero sa saiyang teritoryo.

“AN SAMONG lunadan iyo an enot na pangsibilyan na lunadan na naglaog sa harayong baryo sa Aprika pagkatapos kan guerra sibil,” an paggirumdom nin sarong misyonero na an ngaran Aaron. * “Mayo na kami nin komunikasyon sa sadit na kongregasyon duman, asin kaipuhan na asikasohon mi an mga pangangaipo kan mga tugang duman. Apuera sa kakanon, gubing, asin mga literatura sa Biblia, nagdara kami kan video na Jehovah’s Witnesses—The Organization Behind the Name. * Dakolon na interesadong tawo an nagtiripon tanganing helingon iyan sa ‘sinehan’ kan baryo—sarong dakulang kubo na gibo sa gugon na igwa nin VCR asin TV—kaya kaipuhan ming ipasale iyan nin duwang beses. Bilang resulta, dakol na pag-adal sa Biblia an naponan sa kada pagpasale. Malinaw nanggad, bawi an gabos na paghihingoa niamo.”

2. (a) Taano ta determinado an mga Kristiano na gamiton an saindang buhay sa paglilingkod sa Dios? (b) Anong mga hapot an pag-oolayan niato ngonyan?

² Taano ta ginibo ni Aaron asin kan saiyang kairiba an siring na depisil na misyon? Huli ta mapagpasalamat sinda sa atang na pantubos ni Jesu-Cristo, idinusay ninda an saindang buhay sa Dios asin boot nindang gamiton iyan kaoyon kan katuyohan nin Dios. Arog ninda, an gabos na nagdusay na Kristiano nagdesisyon na “dai na mabuhay para sa sainda man sana” kundi na gibohon an bilog na makakaya ninda “para sa maogmang bareta.” (2 Corinto 5:15; 1 Corinto 9:23) Aram ninda na kun matapos na an sistemang ini nin mga bagay, an gabos na kuarta asin prestihio sa kinaban mawawaran na nin halaga. Kaya gusto nindang gamiton an saindang buhay asin marahay na salud kaoyon kan katuyohan nin Dios. (Eclesiastes 12:1) Paano niato magigibo ini? Saen kita makakakua kan kinakaipuhan na rigon nin boot asin kosog tanganing gibohon iyan? Asin anong mga paagi nin paglilingkod an bukas para sa sato?

Paggibo nin Progresibo Asin Praktikal na mga Lakdang

3. Anong pundamental na mga lakdang an kalabot sa paggibo kan kabotan nin Dios?

³ Para sa tunay na mga Kristiano, an paggibo kan kabotan nin Dios sarong bilog na buhay na paghihingoa. Sa parate, nagpopoon iyan paagi sa pundamental na mga lakdang siring kan pagbasa sa Biblia aroaldaw, pagpalista sa Teokratikong Paadalan sa Pagmiministro, pakikikabtang sa paghuhulit, asin pag-oswag pasiring sa bautismo. Mantang nag-ooswag, ginigirumdom niato an mga tataramon ni apostol Pablo: “Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.” (1 Timoteo 4:15) An siring na pag-oswag bakong pagpamuraway sa sadiri kundi pagpabanaag kan satong determinasyon na daing kaimotan na gibohon an kabotan nin Dios. An paggibo kaiyan nagpapaheling na tinotogotan niato an Dios na giyahan an satong mga lakad sa gabos na aktibidad sa buhay, asin ginigibo nia iyan nin mas marahay nanggad kisa sa ano man na magigibo niato.—Salmo 32:8.

4. Paano niato puedeng ipagilid an satong mga kinakatakotan?

⁴ Minsan siring, an pagduwaduwa o sobra nanggad na pagparaisip sa sadiri puedeng magin olang sa pag-oswag niato sa satong paglilingkod sa Dios. (Eclesiastes 11:4) Sa siring, bago kita makanompong nin tunay na kagayagayahan sa paglilingkod sa Dios asin sa iba, dapat nguna niatong pangganahan an sato mismong mga kinakatakotan. Halimbawa, pinag-iisipan kaidto ni Erik na maglingkod sa sarong kongregasyon na iba an lenguahe. Alagad nahahadit sia: ‘Magigibo ko daw na makibagay sa  kongregasyon? Magugustohan ko daw an mga tugang? Magugustohan man daw ninda ako?’ Inestorya nia: “Sa katapustapusi narealisar ko na kaipuhan kong magin orog na interesado sa mga tugang kisa sa sadiri ko. Nagdesisyon ako na dai na magparahadit asin gibohon na sana nin daing kaimotan an ano man na magigibo ko. Namibi ako para sa tabang asin ginibo ko an sakong mga plano. Ngonyan, ikinakaogma kong marhay an sakong paglilingkod duman.” (Roma 4:20) Iyo, mientras na orog niatong pinaglilingkodan nin daing kaimotan an Dios asin an iba, orog man kitang nagigin magayagaya asin kontento.

5. Taano ta kaipuhan an maingat na pagpaplano sa pagmamaigot na magibo an katuyohan nin Dios? Iilustrar.

⁵ Tanganing mapangganang magibo an katuyohan nin Dios kaipuhan man an maingat na pagplano sa satong mga aktibidad. Madonong niatong linilikayan na magkaigwa nin dakol na utang na puedeng makaoripon sa sato sa sistemang ini nin mga bagay asin makalimitar sa satong katalingkasan sa paggibo kan gibohon nin Dios. An Biblia nagpapagirumdom sa sato: “An nangutang surugoon kan tawo na nagpautang.” (Talinhaga 22:7) An pagtitiwala ki Jehova asin pag-enot sa espirituwal na mga bagay nagtatabang sa sato na magdanay na nakapokus sa mga bagay na iyan. Halimbawa, si Guoming asin an duwa niang tugang na babae nakaistar kaiba kan saindang ina sa sarong lugar na mahal an pagbakal o pag-arkila nin harong saka masakit na makahanap nin regular na trabaho. Paagi sa maingat na paggamit nin kuarta asin pagtinabangan sa mga gastos, nakukua ninda an saindang mga pangangaipo dawa sa mga panahon na bakong gabos sa sainda may trabaho. “Kun beses, bakong gabos sa samo naggaganar,” an sabi ni Guoming. “Pero, nakakapagpadagos kami sa ministeryong pagpapayunir asin naaasikaso mi man an samong ina. Nagpapasalamat kami na dai nagtotogot si Nanay na isakripisyo mi an espirituwal na mga aktibidad tangani sanang itao sa saiya an mga luho sa buhay.”—2 Corinto 12:14; Hebreo 13:5.

6. Anong halimbawa an nagpapaheling kun paano niato ikakaoyon an satong buhay sa katuyohan nin Dios?

⁶ Kun kamo okupadong marhay sa sekular na mga aktibidad—sa pinansial o iba pang aktibidad—an pag-enot sa katuyohan nin Dios tibaad mangaipo nin dakulang mga pagliliwat. An siring na mga pagbabago dai magigibo nin biglaan, asin kun napapasala kamo sa enot na mga pagprobar nindo dai iyan nangangahulogan na nasudya kamo. Isip-isipa si Koichi, na nagkaigwa nin problema sa paggamit nin sobrang oras sa pag-aling-aling. Si Koichi nag-adal sa Biblia kan sia tinedyer pa, alagad sa laog nin dakol na taon, nabangkag sia sa mga kawat sa video. Sarong aldaw sinabi ni Koichi sa saiyang sadiri: ‘Anong ginigibo ko? Labi na akong 30 anyos, pero mayo akong ginigibong ano man na may katuyohan sa sakong buhay!’ Ipinagpadagos ni Koichi an saiyang pag-adal sa Biblia asin nag-ako nin tabang sa kongregasyon. Minsan ngani luway-luway an nagin pagbabago, dai sia suminuko. Paagi sa dakol na pamibi asin mamomoton na tabang kan iba, sa katapustapusi nakatalingkas sia sa saiyang kinababangkagan. (Lucas 11:9) Si Koichi maogmang naglilingkod ngonyan bilang ministeryal na lingkod.

Makanood na Magin Timbang

7. Taano ta kaipuhan na magin timbang kita sa paghaman kan gibohon nin Dios?

⁷ An pagmamaigot na magibo an katuyohan nin Dios maninigo sa satong bilog na kalag na paghihingoa. Dai niato noarin man maninigong pagianan an satong sadiri o magin hugakon sa paggibo kaiyan. (Hebreo 6:11, 12) Pero, habo ni Jehova na mapagal kitang gayo—sa pisikal, mental, o emosyonal. An may kababaan nin boot na pag-admitir na dai niato mahahaman an gibohon nin Dios sa sadiri sana niatong kosog nagpapamuraway sa saiya asin nagpapaheling man na kita timbang. (1 Pedro 4:11) Nanunuga si Jehova na itatao nia sa sato an kinakaipuhan na kosog tanganing magibo an saiyang kabotan, alagad dai niato dapat piriton an satong sadiri na gibohon an mga bagay na dai niato kaya, na nagmamaigot na gibohon an mga bagay na dai nia inaasahan sa sato. (2 Corinto 4:7) Tanganing padagos na makapaglingkod sa Dios na dai napapagal nin sobra, kaipuhan na gamiton niato an satong kosog sa madonong na paagi.

8. Ano an nangyari kan an sarong hoben na Kristiano magprobar na itao sa kinaban sagkod ki Jehova an pinakamakakaya nia, asin anong pagliliwat an saiyang ginibo?

⁸ Halimbawa, sa laog nin duwang taon, si Ji Hye na nag-iistar sa Sirangan na Asia, nagkaigwa nin trabaho na nakakaubos nin dakol na panahon asin kosog mantang sia nagpapayunir. “Pinagmaigotan ko na itao an pinakamakakaya ko ki Jehova sagkod sa sakong trabaho,” an pag-estorya nia, “alagad limang oras sana akong nagtotorog kada banggi. Sa kahurihurihi, garo mayo na akong natatadang mental na  kosog para sa katotoohan, asin bako nang gayo akong magayagaya sa paglilingkod ki Jehova.” Tanganing makapaglingkod ki Jehova ‘sa bilog niang puso, kalag, isip, asin kosog,’ naghanap si Ji Hye nin trabaho na dai nakakaubos nin dakol na panahon asin kosog. (Marcos 12:30) “Sa ibong kan pangigipit kan sakong pamilya na magmaigot akong magganar nin dakol na kuarta, pinagmaigotan kong enoton an katuyohan nin Dios,” an sabi nia. “Naggaganar pa man giraray ako nin igong kuarta para sa pundamental na mga pangangaipo ko, siring kan presentableng gubing. Asin marahay an pagmate na magkaigwa nin bastanteng torog! Nakanompong ako nin kagayagayahan sa sakong ministeryo, asin mas makosog ako ngonyan sa espirituwal. Iyan huli ta mayo na akong gayong panahon para sa mga pan-akit asin pandisturbo kan kinaban.”—Eclesiastes 4:6; Mateo 6:24, 28-30.

9. Paano an satong mga paghihingoa puedeng makaapektar sa mga tawo sa ministeryo sa langtad?

⁹ Bakong gabos makakapaglingkod sa Dios bilang bilog na panahon na ebanghelisador. Kun kaipuhan nindong pangganahan an pagkagurang, maluyang salud, o iba pang limitasyon, girumdomon na mamomoton na pinapahalagahan ni Jehova an saindong kaimbodan asin an ano man na paglilingkod na bilog na puso nindong ikakatao sa saiya. (Lucas 21:2, 3) Kun siring, maninigo na dai pagmenoson nin siisay man sa sato an epekto sa iba kan satong mga paghihingoa, dawa kun limitado iyan. Halimbawa, ipamugtak na nagsongko kita sa pira sanang harong asin mayo ni saro na garo baga interesado sa satong mensahe. Pagkahale niato, tibaad pag-olayan kan mga kagharong sa laog nin dakol na oras o aldaw an satong pagdalaw, dawa kun mayo nin nagbukas nin pinto sa sato! Dai niato linalaoman na an gabos na makakadangog sa maogmang bareta mahimate nin paborable, alagad may mga mahimate. (Mateo 13:19-23) An iba tibaad maghimate sa huri kun magbago an mga kamugtakan sa kinaban o sa saindang buhay. Sa paano man, paagi sa paggibo kan pinakamakakaya niato sa pampublikong ministeryo, hinahaman niato an gibohon nin Dios. Kita “mga kapwa trabahador nin Dios.”—1 Corinto 3:9.

10. Anong mga oportunidad an bukas sa gabos na nasa kongregasyon?

¹⁰ Dugang pa, gabos kita makakatabang sa mga miembro kan satong pamilya asin sa espirituwal na mga tugang niato. (Galacia 6:10) An marahay na impluwensia niato sa iba puedeng magin hararom asin naghahaloy. (Eclesiastes 11:1, 6) Kun mahigos na ginigibo kan kamagurangan asin ministeryal na mga lingkod an saindang obligasyon, nakakakontribwir sinda sa espirituwal na salud asin karigonan kan kongregasyon, saka minakosog an Kristianong aktibidad. Sinisierto sa sato na kun ‘dakol an gigibohon niato sa gibohon kan Kagurangnan,’ an satong pagpapagal “bakong sayang sana.”—1 Corinto 15:58.

 Pagmamaigot na Magibo an Katuyohan nin Dios Bilang Karera

11. Apuera sa paggibo kaiba kan lokal na kongregasyon, tibaad magkaigwa kita nin ano pang ibang oportunidad?

¹¹ Bilang mga Kristiano, ikinakaogma niato an buhay, asin minamawot niatong pamurawayon an Dios sa gabos na ginigibo niato. (1 Corinto 10:31) Kun maimbod kitang nakikikabtang sa paghuhulit kan maogmang bareta kan Kahadean asin nagtotokdo sa iba na otobon an gabos na ipinagboot ni Jesus, makakanompong kita nin dakol na nakakakontentong paagi nin paglilingkod na bukas sa sato. (Mateo 24:14; 28:19, 20) Apuera sa paggibo kaiba kan lokal na kongregasyon, tibaad magkaigwa kita nin mga oportunidad na maglingkod kun saen mas dakula an pangangaipo, baga man sa ibang teritoryo, lenguahe, o nasyon. An kualipikadong kamagurangan asin ministeryal na mga lingkod na mayo pang agom tibaad imbitaran na mag-atender sa Paadalan sa Ministeryal na Pagsasanay, na pakatapos kaiyan puede sindang imbitaran na maglingkod sa mga kongregasyon na igwa nin pangangaipo para sa tabang nin maygurang na mga Kristiano, magsalang sa sadiri nindang nasyon o sa ibang nasyon. An mga mag-agom na nasa bilog na panahon na ministeryo tibaad makualipikar na umako nin pagsasanay sa misyonero sa Gilead asin idestinong maglingkod sa ibang nasyon. Asin igwa nin nagpapadagos na pangangaipo para sa mga boluntaryo tanganing maggibo nin manlaenlaen na trabaho sa Bethel saka sa pagtogdok patin pagmantenir nin mga pinagtitiriponan na lugar, siring man mga sangang opisina.

12, 13. (a) Paano kamo makakapagdesisyon kun arin na mga paagi nin paglilingkod an pipilion nindo? (b) Iilustrar kun paanong an nakuang eksperyensia sa sarong asignasyon puedeng magin kapakipakinabang sa iba pang asignasyon.

¹² Arin na mga paagi nin paglilingkod an maninigong pilion nindo? Bilang sarong nagdusay na lingkod ni Jehova, pirmeng maglaom sa saiya asin sa saiyang organisasyon para sa paggiya. Matabang sa saindo an saiyang “marahay na espiritu” sa paggibo nin tamang desisyon. (Nehemias 9:20) An sarong asignasyon parateng nagsasanay sa sato para sa saro pang asignasyon, asin an eksperyensia saka abilidad na nakua niato sa sarong paagi nin paglilingkod puedeng magin kapakipakinabang sa saro pang asignasyon sa huri.

¹³ Halimbawa, regular na nagtatabang si Dennis asin an agom niang si Jenny sa mga proyekto nin pagtogdok nin Kingdom Hall. Pagkatapos na tamaan kan Bagyong Katrina an timog kan Estados Unidos, nagboluntaryo sinda para sa gibohon na pag-ayuda. Si Dennis nagbabareta: “An paggamit kan mga abilidad na samong napatalubo sa pagtogdok nin mga Kingdom Hall tanganing tabangan an samong mga tugang nagtao sa samo nin dakulang kagayagayahan. An pag-apresyar na ipinaheling kan mga tinabangan niamo talagang nakakapukaw sa boot. Limitado sana an nagin kapangganahan sa pagtogdok liwat kan kadaklan sa ibang grupo sa pag-ayuda. An mga Saksi ni Jehova nakapaghirahay na o nakapagtogdok na liwat nin labi sa 5,300 na harong asin kadakol na Kingdom  Hall. Naoobserbaran ini kan mga tawo asin sinda nagpapaheling na ngonyan nin orog na dakulang interes sa samong mensahe.”

14. Ano an magigibo nindo kun minamawot nindong lumaog sa bilog na panahon na ministeryo?

¹⁴ Puede daw nindong pagmaigotan na magibo an katuyohan nin Dios paagi sa pagpili sa bilog na panahon na ministeryo bilang karera nindo? Kun iyo, seguradong mag-aako kamo nin dakol na bendisyon. Kun dai iyan itinotogot kan presenteng mga kamugtakan nindo, tibaad puedeng gumibo nin pagliliwat. Mamibi arog ni Nehemias kan minamawot nia na gibohon an sarong importanteng asignasyon: “A, Jehova, . . . magtao ka tabi nin kapangganahan sa saimong lingkod.” (Nehemias 1:11) Dangan, nagtitiwala sa “Paradangog nin pamibi,” humiro kaoyon kan saindong pamibi. (Salmo 65:2) Tanganing bendisyonan ni Jehova an saindong mga paghihingoa na paglingkodan sia nin mas lubos, kaipuhan ngunang gibohon nindo an mga paghihingoang iyan. Sa oras na magdesisyon kamo na lumaog sa bilog na panahon na ministeryo, magdanay kamo sa saindong desisyon. Mantang minalihis an panahon, maoswag an saindong kabatidan, asin madudugangan an saindong kagayagayahan.

Buhay na Talagang Kapakipakinabang

15. (a) Paano kita makikinabang sa pakikipag-olay sa haloy nang mga lingkod nin Dios asin pagbasa manongod sa sainda? (b) Magsambit nin sarong estorya nin buhay na nanompongan nindo na partikularmenteng nakakaparigon sa boot.

¹⁵ Anong mga resulta an malalaoman nindo sa pagmamaigot na magibo an katuyohan nin Dios? Makipag-olay sa haloy nang mga lingkod ni Jehova, nangorogna sa mga naglingkod nin dakol nang taon sa bilog na panahon na ministeryo. Kanigoan kanakakakontento asin kamakahulogan kan buhay ninda! (Talinhaga 10:22) Sasabihon ninda sa saindo na nungkang nagkulang si Jehova sa pagtabang sa sainda na makua an talagang kaipuhan ninda asin dakol pang iba dawa sa masakit na mga kamugtakan. (Filipos 4:11-13) Poon 1955 sagkod 1961, nagpublikar an The Watchtower nin sarong serye nin mga estorya nin buhay manongod sa mga maimbod, na may titulong “Pursuing My Purpose in Life.” Poon kaidto, ginatos na iba pang estorya nin buhay an ipinublikar. Ipinapaheling kan kada estorya nin buhay an espiritu nin kaigotan asin kagayagayahan na nagpapagirumdom sa sato kan mababasa sa libro sa Biblia na Gibo. An pagbasa kan siring na nakakapukaw sa boot na mga pagkasaysay mapahiro sa saindo na magsabi, ‘Iyan an klase nin buhay na gusto ko!’

16. Ano an nagpapangyari na magin makahulogan asin maogma an buhay nin sarong Kristiano?

¹⁶ Ginigirumdom ni Aaron, na nasambitan sa kapinonan: “Sa Aprika, parate akong nakakanupar nin mga hoben na naglalagawlagaw sa bilog na nasyon tanganing maghanap nin katuyohan sa buhay. An kadaklan sa sainda nungkang nakanompong nin katuyohan sa buhay. Alagad uya kami, na nagmamaigot na magibo an katuyohan nin Dios paagi sa pagpalakop kan maogmang bareta kan Kahadean, asin igwa kami nin nakakaogma saka makahulogan na buhay. Naeksperyensiahan niamo mismo na igwa nin orog na kaogmahan sa pagtao kisa sa pag-ako.”—Gibo 20:35.

17. Taano ta dapat niatong pagmaigotan na magibo an katuyohan nin Dios ngonyan?

¹⁷ Kumusta man kamo? Anong katuyohan an pinagmamaigotan nindong magibo? Kun mayo kamo nin malinaw na espirituwal na pasohan, mauubos tolos nin ibang mga aktibidad an panahon asin kosog nindo. Taano ta sasayangon nindo an saindong mahalagang marhay na buhay sa inaalok kan kinaban ni Satanas? Sa dai na mahahaloy, kun umabot na an “dakulang kahorasaan,” an materyal na kayamanan asin kinabanon na mga katongdan magigin daing halaga. An magigin mahalaga iyo an satong relasyon ki Jehova. Kanigoan nanggad an pagpasalamat niato na pinaglingkodan niato an Dios asin an iba patin lubos na pinagmaigotan na magibo an katuyohan nin Dios sa satong buhay!—Mateo 24:21; Kapahayagan 7:14, 15.

[Mga Nota sa Ibaba]

Ikakapaliwanag daw Nindo?

• Ano an saboot ni Jehova manongod sa paglilingkod niato sa saiya?

• Paano an pagigin praktikal asin timbang nakakatabang sa sato na paglingkodan an Dios asin an iba?

• Anong mga oportunidad sa paglilingkod an bukas sa sato?

• Paano kita magkakaigwa nin tunay na makahulogan na buhay ngonyan?

[Mga Hapot Para sa Pag-adal]

[Mga Ritrato sa pahina 23]

Kaipuhan an pagigin timbang tanganing padagos kitang makapaglingkod ki Jehova nin bilog na kalag

[Mga Ritrato sa pahina 24]

Igwa nin manlaenlaen na paagi an paglilingkod sa Dios