“Hinangaan Ko an Saiyang Pambihirang Determinasyon”

SI Günter Grass, Aleman na autor na nanggana kan Premyong Nobel Para sa Literatura kan 1999, nagpublikar kan 2006 kan saiyang estorya nin buhay na sia mismo an nagsurat (autobiography). Ilinadawan nia dian an panahon kan sia inapod sa serbisyo sa depensa sibil nin Alemania. Sa iyo man sanang libro, inestorya nia an manongod sa sarong lalaki na nagkaigwa nin dakulang epekto sa saiya, kaya dai nia iyan nalingawan sa laog nin labing 60 taon. Solo sana siang nanindogan para sa saiyang pagtubod sa irarom nin pagpersegir.

Sa sarong interbio na ipinublikar sa diaryong Frankfurter Allgemeine Zeitung, nagirumdoman ni Grass an ekstraordinaryong tawong ini, na nagsayumang magkapot nin armas. Sinabi ni Grass na an tawong iyan “dai uminoyon sa ano man na lakop na mga ideolohiya, huling bako siang Nazi, ni Komunista, ni Sosyalista. Saro sia sa Mga Saksi ni Jehova.” Dai nagigirumdoman ni Grass an ngaran kan Saksing iyan, na inapod nia sa Aleman na ‘Wirtunsowasnicht’ na an boot sabihon, Dai mi ginigibo an siring na mga bagay. Sinasabi kan mga parasiyasat kan Mga Saksi ni Jehova na an lalaking iyan iyo si Joachim Alfermann. Paorootro siang binugbog asin pinasupog, dangan ibinilanggo sia nin solo. Alagad si Alfermann nagdanay na marigon asin nagsayumang magkapot nin armas.

“Hinangaan ko an saiyang pambihirang determinasyon,” an komento ni Grass. “Hinapot ko an sakong sadiri: Paano nia natatagalan an gabos na iyan? Paano nia nagigibo iyan?” Pagkatapos na tagalan an halawig na mga paghihingoa na raoton an saiyang integridad sa Dios, kan huri ipinadara si Alfermann sa kampo de konsentrasyon nin Stutthof kan Pebrero 1944. Huling pinatalingkas kan Abril 1945, sia nakaligtas sa guerra asin nagdanay na maimbod na Saksi ni Jehova sagkod na sia magadan kan 1998.

Si Alfermann saro sa mga 13,400 na Saksi—sa Alemania asin sa mga nasyon na sinakop kan mga Nazi—na pinadusahan huli sa saindang pagtubod. Sinunod ninda an paggiya kan Biblia, na nagdadanay na neutral sa politika asin nagsasayumang magkapot nin armas. (Mateo 26:52; Juan 18:36) An mga 4,200 na Saksi ibinilanggo sa mga kampo de konsentrasyon, asin 1,490 an nagadan. Dawa ngonyan, an paninindogan ninda nakakapahanga sa dakol na bako nindang kapareho an pagtubod alagad naghahanga sa saindang karigonan.

[Ritrato sa pahina 32]

Joachim Alfermann