Mamuhay na Tinatanaw an Ngapit

“DAI kamo maghadit dapit kan sa aga,” an sabi ni Jesu-Cristo sa saiyang bantog na diskurso sa gilid kan bukid sa Galilea. Oyon sa traduksion sa The New English Bible, si Jesus nagsabi pa: “Bahala an sa aga sa saiyang sadiri.”—Mateo 6:34.

Ano daw sa paghona nindo an kahulogan kan mga tataramon na iyan, “bahala an sa aga sa saiyang sadiri”? Nagpaparisa daw iyan na maninigo kamong mamuhay para sa presente sana asin dai pag-intindihon an ngapit? Kaoyon daw talaga iyan kan tinutubod ni Jesus asin kan saiyang mga parasunod?

“Dai Na Kamo Magparahadit”

Basahon mo mismo an mga tataramon ni Jesus sa kabilogan kaiyan na manonompongan sa Mateo 6:25-32. Sa sarong kabtang sia nagsabi: “Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon. . . . Masdan nindo nin odok an mga gamgam sa langit, huli ta sinda dai nagsasabwag nin banhi o nag-aani o nagtitipon sa mga tambobong; pero pinapakakan sinda kan saindong langitnon na Ama. . . . Siisay sa saindo an sa paghadit makakadagdag nin sarong sokol sa siko sa lawig kan saiyang buhay? Siring man, manongod sa paggubing, taano ta nahahadit kamo? Makanood kamo nin leksion sa mga liryo sa oma, kun paano sinda nagtutubo; dai sinda nagpapagal, ni naghahabol man sinda . . . Kaya dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakakaaram na kaipuhan nindo an gabos na bagay na ini.”

Tinapos ni Jesus an kabtang na ini kan saiyang diskurso paagi sa duwang sadol. An enot: “Kun siring, padagos na hanapon nguna an kahadean [nin Dios] asin an saiyang katanosan, asin ini gabos na ibang bagay idadagdag na sana sa saindo.” An ikaduwa: “Kaya, dai kamo noarin man maghadit manongod  sa masunod na aldaw, huli ta an masunod na aldaw magkakaigwa kan sadiring mga kahaditan kaiyan. Igo na para sa kada aldaw an sadiring karatan kaiyan.”—Mateo 6:33, 34.

An Saindong Ama Nakakaaram kan Kaipuhan Nindo

Sa paghona daw nindo dinedesganar ni Jesus an saiyang mga disipulo, pati na an mga paraoma, na ‘magsabwag, mag-ani, o magtipon kan saindang mga pananom sa mga tambobong’? O na ‘magpagal asin maghabol’ tanganing magkaigwa kan mga gubing na kaipuhan ninda? (Talinhaga 21:5; 24:30-34; Eclesiastes 11:4) Dai nanggad. Kun mapondo sinda sa pagtrabaho, siertong ‘makikilimos sinda sa panahon nin pag-ani,’ na mayo nin kakakanon o gugubingon.—Talinhaga 20:4.

Paano man an paghadit? An boot daw sabihon ni Jesus iyo na an mga nagdadangog sa saiya puedeng biyong makalikay sa paghadit? Iyan harayo sa katunayan. Si Jesus mismo nakaeksperyensia nin grabeng emosyonal na kasakitan asin kahaditan kan banggi na sia inarestar.—Lucas 22:44.

Sinasabi sana ni Jesus an sarong pundamental na katotoohan. An sobrang paghadit nungkang makakatabang sa saindo na maresolberan an ano man na problema na napapaatubang sa saindo. Halimbawa, dai iyan makakatabang sa saindo na mabuhay nin mas halawig. Dai iyan “makakadagdag nin sarong sokol sa siko sa lawig kan [saindong] buhay,” an sabi ni Jesus. (Mateo 6:27) Sa katunayan, an grabe asin halawig na paghadit mas posibleng marhay na makapalipot sa saindong buhay.

An saiyang sadol risang marhay na praktikal. An dakol sa mga ikinakahadit niato dai man talaga nangyayari. Narealisar ini kan Britanong estadista (statesman) na si Winston Churchill manongod sa makamomondong mga panahon kan Guerra Mundial II. Mapadapit sa nagkapira sa saiyang mga kahaditan kan panahon na iyan, sia nagsurat: “Kun ginigirumdom ko an gabos na kahaditan na ini, nagigirumdoman ko an estorya kan gurang na lalaki na nagsabi kan madali na siang magadan na nagkaigwa sia nin kadakol na kapurisawan sa saiyang buhay, na an kadaklan kaiyan dai noarin man nangyari.” Tunay nanggad, madonong na atubangon sa kada aldaw an mga bagay-bagay na para sana sa aldaw na iyan, nangorogna kun an mga panggigipit asin problema na napapaatubang sa sato madali sanang magin dahelan nin grabeng kahaditan sa sato.

“Padagos na Hanapon Nguna an Kahadean”

An totoo, an nasa isip ni Jesus bako sanang an pisikal asin emosyonal na ikakarahay kan mga  naghihinanyog sa saiya. Aram nia na an paghadit manongod sa pagkaigwa kan mga pangangaipo sa buhay, saka an labi-labing pagmawot sa mga rogaring asin kasingawan, puedeng agawan nin lugar an mas importanteng mga bagay. (Filipos 1:10) ‘Ano pa daw an mas importante kisa sa pagkaigwa kan mga pangangaipo sa buhay?’ an tibaad isipon nindo. An simbag iyo an espirituwal na mga bagay na may koneksion sa satong pagsamba sa Dios. An pangenot na bagay sa satong buhay, an idinoon ni Jesus, maninigo na an ‘paghanap nguna sa kahadean nin Dios asin sa saiyang katanosan.’—Mateo 6:33.

Kan panahon ni Jesus, dakol na tawo an nagmamaigot na gayo na kamtan an materyal na mga bagay. An pagtipon nin kayamanan iyo an pangenot na ipinapaorog ninda. Minsan siring, sinadol ni Jesus an mga naghihinanyog sa saiya na magkaigwa nin laen na punto de vista. Bilang banwaan na dusay sa Dios, an saindang “bilog na katongdan” iyo na ‘matakot sa tunay na Dios asin otobon an saiyang mga togon.’—Eclesiastes 12:13.

An pagigin bangkag sa materyal na mga bagay—“an kahaditan kan sistemang ini nin mga bagay asin an mapandayang kapangyarihan nin kayamanan”—puede kutanang makaraot sa espirituwalidad kan mga naghihinanyog sa saiya. (Mateo 13:22) “Idtong mga determinadong yumaman,” an isinurat ni apostol Pablo, “nahuhulog sa sugot asin sa siod patin sa dakol na daing kuenta asin nakakaraot na mawot, na nagdadara sa mga tawo sa kalaglagan asin kapahamakan.” (1 Timoteo 6:9) Tanganing tabangan sindang makalikay sa “siod” na ini, ipinagirumdom ni Jesus sa saiyang mga parasunod na aram kan saindang langitnon na Ama na kaipuhan ninda an gabos na bagay na ini. Aatamanon sinda nin Dios kun paanong inaataman nia “an mga gamgam sa langit.” (Mateo 6:26, 32) Imbes na togotan an kahaditan na pagabatan sinda, kaipuhan nindang gibohon an gabos na makakaya ninda tanganing asikasohon an mga bagay-bagay dangan may kompiansang ipabaya iyan sa kamot ni Jehova.—Filipos 4:6, 7.

Kan magsabi si Jesus na “bahala an sa aga sa saiyang sadiri,” an boot sana niang sabihon iyo na maninigo na dai niato pagtogotan na makadagdag sa satong mga problema ngonyan an sobrang paghadit manongod sa kun ano an tibaad mangyari sa ngapit. Ini an pagkatradusir sa saiyang mga tataramon kan saro pang bersion kan Biblia: “Dai kamo maghadit dapit sa masunod na aldaw; huli ta igwa man iyan nin sadiring kahaditan. Tama na an mga problema para sa ngunyan na aldaw.”—Mateo 6:34, Marahay na Bareta Biblia.

“Dumatong Logod an Kahadean Mo”

Minsan siring, igwa nin dakulang kalaenan an dai paghadit nin labi-labi manongod sa ngapit asin an biyong dai pag-intindi kaiyan. Nungkang dinagka ni Jesus an saiyang mga disipulo na dai pag-intindihon an ngapit. Sa kabaliktaran, sinadol nia sinda na magin interesadong marhay sa ngapit. Angay sanang ipamibi ninda an mga pangangaipo ninda sa presente—an saindang tinapay sa aroaldaw. Alagad maninigo ngunang ipamibi ninda an mga bagay na sa ngapit pa—na dumatong logod an Kahadean nin Dios asin gibohon an kabotan nin Dios sa daga.—Mateo 6:9-11.

Maninigo na dai kita magin arog kan mga tawo kan panahon ni Noe. Sibot-sibot sinda na “nagkakarakan asin nag-iirinom, an mga lalaki nag-aaragom asin an mga babae nagpapaaragom” kaya “dai sinda nagmangno” kun ano an madali nang mangyari. May anong resulta? ‘Duminatong an baha asin inanod sinda gabos.’ (Mateo 24:36-42) Ginamit ni apostol Pedro an makasaysayan na pangyayaring iyan tanganing ipagirumdom sa sato an pangangaipo na mamuhay na tinatanaw an ngapit. “Mantang an gabos na bagay na ini tutunawon nin siring,” an isinurat nia, “isipon kun dapat na magin anong klase kamong tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!”—2 Pedro 3:5-7, 11, 12.

Magtipon nin mga Kayamanan sa Langit

Iyo, papagdanayon niato na “harani sa isip” an aldaw ni Jehova. An paggibo kaiyan magkakaigwa nin dakulang epekto sa kun paano niato ginagamit an satong panahon, kosog, mga kakayahan, materyal na mga bagay, asin mga abilidad. Dai kita maninigong mabangkag na gayo sa pagmamaigot na kamtan an materyal na mga bagay—magsalang an mga pangangaipo o an mga kasingawan sa buhay—kaya dikit na sana an satong panahon para sa mga gibo na nagpapaheling nin “diosnon na debosyon.” An pagkonsentrar sana sa presente tibaad garo baga matao nin ensegidang mga resulta, alagad dawa an marahay na mga resulta temporaryo sana an mga pakinabang. Orog nanggad na madonong, an sabi ni Jesus, na “magtipon [kita] nin mga kayamanan sa langit” imbes na sa daga.—Mateo 6:19, 20.

 Idinoon ni Jesus an puntong iyan sa saiyang ilustrasyon manongod sa sarong tawo na labi-labi kadakol an plano para sa ngapit. Iyan mga plano na dai kaiba an Dios. An daga kan tawong iyan mabungang marhay. Nagdesisyon siang gabaon an saiyang mga tambobong asin magtogdok nin orog pa kadarakula tanganing makapamuhay sia nin maginhawa, magkakan, mag-inom, asin magpasiramsiram. Ano an sala dian? Nagadan sia bago nia mapakinabangan an saiyang pinagalan. Pero, an mas maraot pa ngani, dai sia nakapatalubo nin relasyon sa Dios. Si Jesus nagkonklusyon: “Siring an nangyayari sa tawo na nagtitipon nin kayamanan para sa saiya man sana alagad bakong mayaman sa pagheling nin Dios.”—Lucas 12:15-21; Talinhaga 19:21.

Ano an Magigibo Nindo?

Dai na pag-otrohon an sala kan tawo na ilinadawan ni Jesus. Aramon kun ano an katuyohan nin Dios para sa ngapit, asin isentro an saindong buhay dian. Dai pinabayaan nin Dios na an mga tawo daing aram manongod sa gigibohon nia. “An Soberanong Kagurangnan na Jehova,” an isinurat kan suanoy na propetang si Amos, “dai magibo nin ano man sagkod na dai pa nia ikinakahayag an saiyang kompidensial na bagay sa saiyang mga lingkod na propeta.” (Amos 3:7) An ihinayag ni Jehova paagi sa saiyang mga propeta makukua na nindo ngonyan sa saiyang ipinasabong na Tataramon, an Biblia.—2 Timoteo 3:16, 17.

An sarong bagay na ihinahayag kan Biblia iyo an mangyayari sa harani nang ngapit na makakaapektar sa bilog na daga sa hiwas na dai pa noarin man nangyari. Si Jesus nagsabi: “Magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan.” (Mateo 24:21) Mayong tawo na makakaolang sa pangyayaring iyan. Tunay nanggad, mayo nin dahelan kun taano ta gugustohon kan tunay na mga parasamba na olangon iyan. Taano? Huli ta an pangyayaring ini an mahale kan gabos na karatan sa daga, saka an magdadara nin “sarong bagong langit asin sarong bagong daga,” na nangangahulogan nin sarong bagong langitnon na gobyerno patin sarong bagong sosyedad sa daga. Sa bagong kinaban na iyan, “papahidon [nin Dios] an gabos na luha sa . . . mga mata [nin mga tawo], asin dai na magkakaigwa nin kagadanan, ni magkakaigwa pa man nin pagmondo o pagtangis o kolog.”—Kapahayagan 21:1-4.

Kun siring, bako daw makatanosan na tawan nin panahon ngonyan an pagsiyasat kun ano an sinasabi kan Biblia manongod sa mangyayaring iyan? Kaipuhan daw nindo nin tabang sa paggibo kaiyan? Makiolay sa mga Saksi ni Jehova na tabangan kamo. O sumurat sa mga kagpublikar kan magasin na ini. Iyo nanggad, seguradohon nindong mamuhay bakong para sa presente sana kundi patin para sa makangangalas na ngapit.

[Mga Ritrato sa pahina 7]

“Dai na kamo magparahadit . . . An masunod na aldaw magkakaigwa kan sadiring mga kahaditan kaiyan”