Maninigo daw Kamong Mamuhay Para sa Presente Sana?

“NUNGKA kong iniisip an ngapit. Iyan tolos-tolos na minaabot.” An parateng kinokotar na mga tataramon na iyan sinabi kan bantog na sientistang si Albert Einstein. Dakol na tawo an nagpapahayag nin arog man kaiyan na saboot. “Taano ta maghadit manongod sa ngapit?” an tibaad sabihon ninda. O tibaad nadangog na nindo an mga tawo na nagsasabi nin siring kaini: “Ipagpadagos mo sana an ginigibo mo sa buhay.” “Mamuhay ka para sa presente.” “Lingawan mo an ngapit.”

Siempre, bako nang bago an pangkagabsan na kaisipan na iyan. “Magkakan ka, mag-inom ka, magpasiramsiram ka. Bako nang importante an iba pang bagay.” Ini an sarabihon kan mga Epicureo kan suanoy. An nagkapirang katemporanyo ni apostol Pablo may arog man kaiyan na pagmansay. An saindang pagmansay iyo an “magkarakan asin mag-irinom kita, huli ta sa aga magagadan kita.” (1 Corinto 15:32) Naniwala sinda na an halipot na buhay na ini iyo sana an makakamtan niato, kaya pinalakop ninda an ideya na maninigo niatong aprobetsaran an buhay na iyan.

Para sa minilyon na nag-eerok sa daga, an pag-aprobetsar sa buhay na ini dai nanggad nangangahulogan nin pagigin mamomoton sa kasingawan. Huli sa makamomondong mga kamugtakan nin dakol, sinda namumuhay sana sa daing ontok asin grabeng pagmamaigot na mabuhay. Taano ta maninigo nindang isipon an manongod sa ngapit, sarong “aga” na sa parate garo baga grabe kamakamomondo asin dai nang paglaom?

Magplano Para sa Ngapit?

An pagplano para sa ngapit parateng ibinibilang na daing kamanungdanan dawa kan mga tawo na an mga kamugtakan bakong gayong depisil. “Taano ta magplano pa?” an tibaad ihapot ninda. An nagkapira tibaad mangatanosan na pag-abot nin panahon an mga nagpaplano madedesganar asin masusudya an linalaoman. Dawa an patriarkang si Job kan suanoy na mga panahon nakaeksperyensia nin grabeng kawaran nin paglaom kan maheling nia na an saiyang mga plano “naraot” sana, na naraot an matao kutana nin maogmang ngapit para sa saiya asin sa saiyang pamilya.—Job 17:11; Eclesiastes 9:11.

Inagid kan poetang taga Scotland na si Robert Burns an masakit na situwasyon niato sa sarong sadit na kino sa oma na an istaran dai tinutuyong naraot ni Burns huli sa tarom kan saiyang arado. An kino nagdalagan tanganing makaligtas pagkatapos na mabaliktad an saiyang kinaban. ‘Iyo,’ an inisip-isip kan poeta, ‘gurano kaparate na nakakamate kita na mayo kitang maginibo kun napapaatubang sa  mga pangyayari na biyong dai niato kontrolado kaya dawa an mga planong pinag-isipan na marhay parateng dai nagigin mapanggana.’

Kaya dai daw nin kamanungdanan na magplano para sa ngapit? An totoo iyo na an kawaran nin igong pagplano puedeng magkaigwa nin nakakalunos na mga resulta kun umabot an mga bagyo o iba pang natural na kalamidad. Totoo, mayo nin makakapapondo, halimbawa, kan Bagyong Katrina. Alagad bako daw na dakula kutana an nagibo kan mas marahay na pag-andam para sa ngapit asin pagplano tanganing mainaan an mga epekto sa lugar na tinamaan kaiyan asin sa mga nag-eerok dian?

Ano sa paghona nindo? Makatanosan daw talaga na mamuhay para sa presente sana asin dai pag-intindihon an ngapit? Isip-isipa an sasabihon kan sunod na artikulo manongod sa temang ini.

[Mga Ritrato sa pahina 3]

“Magkakan ka, mag-inom ka, magpasiramsiram ka. Bako nang importante an iba pang bagay”

[Ritrato sa pahina 4]

Nainaan daw kutana an mga epekto kan Bagyong Katrina huli sa pag-andam para sa ngapit asin pagplano?

[Credit Line]

U.S. Coast Guard Digital