Naggagayagaya sa “Kapangganahan Kaiba kan Kordero”

SA SARO niang surat kan 1971, hinorophorop ni Carey W. Barber an saiyang enot na 50 taon nin paglilingkod sa tunay na Dios: “An mga taon sa paglilingkod ki Jehova nagin pambihira karahay. An pakikiasosyar sa saiyang banwaan; an proteksion tumang sa mga paragibo nin karatan sa kinaban ni Satanas; an tinatanaw na kapangganahan kaiba kan Kordero, si Jesu-Cristo; asin an ebidensia kan pagkamoot ni Jehova iribang nagpapangyari na magkaigwa nin nakakaogmang katoninongan patin panlaog na pagkakontento na nag-iingat sa puso saka nagtatao nin seguradong paglaom kan pangultimong kapangganahan.”

Pakalihis nin anom na taon, si Tugang na Barber, sarong Kristiano na linahidan nin espiritu, nagpoon na maglingkod bilang miembro kan Namamahalang Grupo kan Mga Saksi ni Jehova. Sa katongdan na iyan durante kan suminunod na 30 taon, padagos niang inantisipar an “kapangganahan kaiba kan Kordero.” Nagibo nia iyan paagi sa pagigin maimbod sagkod na sia magadan sa edad na 101 kan Domingo, Abril 8, 2007.—1 Corinto 15:57.

Namundag sa Inglatera kan 1905, nabautismohan si Carey Barber sa Winnipeg, Canada, kan 1921. Pakalihis nin duwang taon sindang duwa kan saiyang kakambal, si Norman, nagbalyo sa Brooklyn, Nueva York, tanganing magtabang sa sarong bagong proyekto. Kan panahon na iyan, madali nang ponan kan banwaan ni Jehova an pagprodusir kan sadiri nindang mga libro para sa pagpalakop kan maogmang bareta kan Kahadean “sa bilog na ineerokan na daga.” (Mateo 24:14) An saro sa enot na mga asignasyon ni Tugang na Barber iyo an pagpadalagan nin sadit na imprentahan. Kabilang sa mga inimprenta an mga dokumento manongod sa sumaryo kan mga kasong inapelar sa Korte Suprema kan Estados Unidos. Pag-abot nin panahon, nagtrabaho si Tugang na Barber sa Departamento sa Paglilingkod, na nagkokonsentrar sa mga bagay manongod sa kongregasyon asin sa paghuhulit sa bilog na nasyon.

Huling igwa kan eksperyensiang iyan, si Tugang na Barber kualipikadong marhay kan sia iasignar bilang nagbibiaheng ministro kan 1948, na nagdadalaw sa mga asamblea asin kongregasyon sa bilog na solnopan na parte kan Estados Unidos. Sia nagsabi na partikularmenteng ikinaogma nia an pagigin pirmeng nasa luwas sa pampublikong paghuhulit. Huli sa asignasyon na ini dakol na tugang an nakamidbid ni Tugang na Barber. An saiyang alistong isip asin kaigotan para sa ministeryo nagin kapakipakinabang na marhay kan sa huri sia mag-adal sa ika-26 na klase kan Paadalan sa Biblia kan Watchtower sa Gilead. Durante kan pag-eskuela, nakamidbid nia an sarong kapwa estudyante na taga Canada, si Sydney Lee Brewer. Pagkatapos kan gradwasyon, sinda nagpakasal asin nag-honeymoon sa halipot na pagbiahe ninda tanganing maglingkod sa mga kongregasyon sa mga lugar sa Chicago, Illinois. An agom ni Tugang na Barber nagin mahalagang kaibaiba asin dayaday na gikanan nin suporta para sa saiyang agom durante kan duwang dekada ninda sa ministeryong nagbibiahe.

An mga pahayag asin buhay na buhay na mga komento ni Tugang na Barber dai malilingawan kan mga nakaolay nia saka kamidbid sia durante kan mga dekada na sia paraataman sa distrito o sirkito o durante kan 30 taon na ginamit nia sa paglilingkod patin pagbiahe bilang miembro kan Namamahalang Grupo. Igwa nanggad kita nin dahelan na maggayagaya sa saiyang “kapangganahan kaiba kan Kordero.”