Pakapanggana sa mga Kadepisilan sa Pagdara kan Maogmang Bareta

PARANI na an samong trak sa sarong lugar nin inspeksion (checkpoint) na may mga 60 armadong lalaki, babae, asin tinedyer. An nagkapira nakauniporme; an iba nakasibilyan. Dakol an may kapot na automatikong mga armas. Garo baga hinahalat ninda kami. May nangyayaring kariribokan sibil.

Apat na aldaw na kaming nagbibiahe, na dara an sampulong tonelada nin mga literatura sa Biblia. Iniisip mi kun baga papaagihon ninda kami. Mahagad daw sinda nin kuarta? Gurano daw kahaloy na makokombensir sinda na matoninong an samong misyon?

An sarong lalaki na gustong-gustong mambadil nagpaputok kan saiyang riple sa itaas tanganing ipagirumdom sa samo kun siisay an dapat na masunod. Naheling nia an samuyang mga cellular phone asin pinirit nia kaming itao iyan sa saiya. Kan magduwaduwa kaming itao iyan, nagmustra sia na gagadanon nia kami, na malinaw na nagpapaheling kun ano an mangyayari kun magsayuma kaming sumunod. Itinao mi an mga phone sa sainda.

Bigla na sanang kinua nin sarong babaeng nakauniporme an saiyang badil asin nagrani sa samo. Sia an “sekretarya,” asin gusto niang may itao man kami sa saiya. Masakit an buhay, kaya magigin kapakipakinabang sa saiya kun matao kami nin minsan sadit daang “regalo.” Dangan binukasan nin saro pang soldados an samong tangke nin gasolina tanganing panoon an saiyang lalagan (jerrican). Dai iniintindi an samong pagreklamo, sinabi nia na nagsusunod sana sia sa mga pagboot sa saiya. Mayo na kaming magigibo. Naglalaom na sana kami na dai man iyan gigibohon nin iba.

Sa katapustapusi, binukasan an barikada, asin ipinadagos mi na an samong pagbiahe. Nakaginhawa kami kan sakong kaiba. Igwa nin tension, alagad natuod na kami sa nakakatakot na mga lugar na ini nin inspeksion. Sa pag-oltanan nin Abril 2002 asin Enero 2004, nagbiahe kami nin 18 beses hale sa pier nin Douala, Cameroon, pasiring sa Bangui, an kabisera kan Republika nin Aprika Sentral. An 1,600 kilometros na pagbiahe pirmeng igwa nin kaibang mga peligro asin nakakabiglang mga pangyayari. *

“An mga pagbiaheng ini nagtao sa samo nin dakol na leksion,” an paliwanag ni Joseph asin Emmanuel, mga drayber na regular sa mga pagbiaheng ini. “Madonong  na dakol na beses na mamibi nin silensio dangan magdanay na kalmado. ‘Sa Dios ako nagtiwala. Dai ako matatakot,’ an isinurat kan salmista. ‘Ano an magigibo sakuya nin daganon na tawo?’ Pinagmamaigotan mi na magkaigwa nin arog man kaiyan na kaisipan. Nakakasierto kami na aram ni Jehova na an katuyohan kan samong pagbiahe iyo an magdara nin mensahe nin paglaom na kaipuhan na marhay.”—Salmo 56:11.

Sarong Internasyonal na Paghihingoa na Magtao nin Espirituwal na Kakanon

Dakol na tawo sa parteng ini kan Aprika an gustong-gustong makadangog kan maogmang bareta manongod sa Kahadean nin Dios. An mga literatura na dinadara mi dinisenyo tanganing makatabang na panigoan an saindang espirituwal na pangangaipo. (Mateo 5:3; 24:14) An sangang opisina kan Mga Saksi ni Jehova sa Cameroon, na nasa Douala, regular na nagsusuplay nin mga literatura sa labing 30,000 na parahayag kan Kahadean asin sa mga interesadong tawo na nakaistar sa Cameroon asin sa apat na kaharaning nasyon.

An mga literaturang ini nagbiahe na nin halawig. An kadaklan kaiyan inimprenta sa Alemania, España, Finlandia, Inglatera, asin Italia. Dangan ipinaktora iyan paagi sa barko hale sa Pransia. Sa parate, an sarong konteyner nin mga literatura sa Biblia minaabot sa pier nin Douala kada duwang semana.

An konteyner inaalsa asin ibinubugtak sa sarong trak na nagdadara kaiyan pasiring sa sangang opisina. An mga nagtatrabaho sa Departamento sa Pagpaktora grinupo-grupo an mga literatura oyon sa destinasyon kaiyan. Bakong pasil an pagdara kan mga publikasyon sa hararayong lugar na nasa interior. Alagad kabtang ini kan pagdara kan maogmang bareta “sagkod sa kaporoporohi kan daga.” (Gibo 1:8) An sangang opisina nagsasarig sa mapagsakripisyong mga boluntaryo na gikan sa boot na naggigibo nin peligrosong mga pagbiahe sa trak. Sa siring, sarong regular na suplay nin mga literatura sa Biblia an minaabot sa minilyon na tawo sa sentral na parte nin Aprika.

Sarong Normal na Sanang Pagbiahe

An mga literaturang ipinapaktora paagi sa trak dinadara sa Cameroon, Chad, Equatorial Guinea, Gabon, asin sa Republika nin Aprika Sentral. Ibanan niato an sarong trak asin an mga tripulante kaiyan. Imahinara an saindong sadiri na nakatukaw kaiba kan mga drayber, asin mag-andam para sa sarong  pagbiahe na kaipuhan an pagkapusoan, na malawig nin sampulo o labi pang aldaw.

Anom na drayber an nagsasarosalida sa pagmamaneho. Dapat na sinda makosog, may kakayahan, mapasensia, asin marahay an bulos. An sulot ninda magsalang gubing nin mga Aprikano o trobinais asin kurbata. Kan nakaagi, an mga opisyal sa adwana nagkomento: “Helinga an malinig na trak na ini asin an mga drayber na areglado an bulos, siring man sana kan maheheling nindo sa mga retrato sa saindang mga publikasyon.” An mas mahalaga pa ngani kisa sa itsura kan mga drayber iyo an saindang pagigin andam na magduman saen man kaipuhan tanganing maglingkod sa iba.—Salmo 110:3.

Minahale kami nin mga alas sais nin aga sa Douala, pagkasirang sana kan saldang, tanganing malikayan an grabeng trapik sa marikas na nagdadakulang siudad na ini. Pakabalyo sa tulay na harani sa sangang opisina asin pakabagtas sa sibot na siudad, nagpasirangan kami pasiring sa samong enot na destinasyon—an Yaoundé, na kabisera kan Cameroon.

Sasabihon sa saindo kan gabos na anom na drayber kun gurano kadepisil an pagmaneho nin sarong trak na may kargang sampulong tonelada nin mga libro. An enot na tolong aldaw sa kongkretong mga tinampo dikit sana an problema, minsan ngani kaipuhan an lubos na atension asin konsentrasyon. Dangan, bigla na sanang nag-ooran nin makosogon. An tinampo poon digdi bako nang kongkreto. Paorog nang paorog na nagigin masakit na maheling an dalan, mahalnas an tinampo, asin kaipuhan na magluwayluway kami huli sa lubak-lubak na tinampo. Madali nang magdiklom. Panahon nang pumondo, magkakan, asin probaran na magtorog na nakapatong an samong bitis sa dashboard. Siring kaiyan an buhay sa mga pagbiaheng ini!

Amay pagkaaga, ipinadagos mi an samong biahe. An saro sa mga drayber nagtatabang paagi sa maingat na pag-obserbar sa mga kamugtakan kan tinampo. Sia tolos-tolos na nagpapatanid kun nakakarani na kaming marhay sa kali sa gilid kan tinampo. Aram na marhay kan mga drayber na kun mahulog sinda sa kali, puedeng umabot nin pirang aldaw bago makahale dian. Bako man marahay an kamugtakan nin mga tinampo pagbalyo mi sa linderos pasiring sa Republika nin Aprika Sentral. Sa minasunod na 650 kilometros, minaagi kami sa magayon, berde, asin mabulod na lugar sa probinsia. An mga aki, may edad na, asin ina na may mga omboy sa saindang likod gabos nagbababay mantang luway-luway kaming minaagi sa saindang mga baryo. Huli sa kariribokan sibil, pipira sanang auto an nasa mga tinampo sa mga panahon na ini, kaya an mga tawo pinagmamasdan kami na may pagngalas.

Nakakakontentong mga Eksperyensia

Si Janvier, saro sa samong mga drayber, nagsabi na sa ibong nin sibot-sibot na mga iskedyul, parate sindang nagpopondo sa saradit na baryo tanganing magpahingalo nin kadikit asin magdistribwir nin mga literatura sa Biblia. Nagigirumdoman nia: “Sa Baboua pirme ming pinagmamaigotan na kaolayon an sarong attendant sa sarong ospital na nagpaheling nin dakulang interes sa mensahe kan Kahadean, asin nagkokondukta kami sa saiya nin halipot na pag-adal sa Biblia. Sarong aldaw ipinaheling mi pa ngani sa saiya  asin sa saiyang pamilya an videocassette manongod ki Noe. Uminabot an mga katood asin kataraed, dangan dai nahaloy an saiyang harong napano nin mga gustong-gustong magdalan o magheling. An gabos nakadangog na manongod ki Noe, asin ngonyan puede na nindang maheling an saiyang estorya sa telebisyon. Nakakapukaw sa boot na maheling an saindang pag-apresyar. Pagkatapos kaiyan, inareglar ninda na magkaigwa nin espesyal na pagkakan tanganing ipaheling an saindang pagpasalamat, asin kinombensir ninda kami na duman na magtorog. Kaipuhan ming humale tolos asin ipadagos an samong halawig na pagbiahe, alagad maogma kami na ikinapaabot mi an maogmang bareta sa mapakumbabang mga tawong ini.”

Nagigirumdoman nin saro pang drayber, si Israel, an mga pangyayari sa saro pang pagbiahe pasiring sa samong destinasyon, an Bangui. “Mantang nagrarani kami sa Bangui,” an pag-estorya nia, “napapaatubang kami sa mas dakol na barikada. Marahay sana ta an dakol na soldados makikatood asin nagigirumdoman an trak sa nakaaging mga pagbiahe. Inimbitaran ninda kaming magtukaw kaiba ninda, asin maogma sindang nag-ako nin mga literatura sa Biblia. Mahalagang marhay sa sainda an sarong libro, kaya isinusurat ninda dian an saindang ngaran dangan an petsa asin ngaran kan tawong nagtao kaiyan sa sainda. An nagkapirang soldados may mga paryenteng Saksi, asin ini an saro pang dahelan kan saindang pagigin makikatood.”

Si Joseph, an pinakaeksperyensiadong drayber, nag-estorya kun ano an ibinibilang nia na pinakamarahay na kabtang kan siring na mga pagbiahe—an pag-abot sa destinasyon. Mapadapit sa sarong partikular na pagbiahe, nagigirumdoman nia: “Pira na sanang milya pasiring sa Bangui, nag-apod kami sa telepono tanganing sabihon sa samong mga tugang na madali na kaming mag-abot. Inibanan ninda kami sa siudad, na tinatabangan kami sa kinakaipuhan na papeles na hinahagad kan lokal na ley. Pag-abot mi, an gabos sa sangang opisina nagruluwas tanganing taratarahon kami paagi sa mamomoton na pagkugos. Nag-abot an mga matabang hale sa kaharaning mga kongregasyon, asin sa laog sana nin pirang oras, an ginatos na karton nin mga Biblia, libro, bukleta, asin magasin idineskarga asin inistak sa bodega (depot).”

“Kun beses,” an sabi pa ni Joseph, “an samong karga may kaibang idinonar na mga gubing, sapatos, asin bagay na para sa mga aki, na dadarahon sa kaharaning Republika Demokratika nin Congo. Nakakaogma nanggad na maheling an mga huyom kan nagpapasalamat na mga tugang!”

Pakapahingalo nin sarong aldaw, inandam mi an samong trak asin pabalik na kami paagi sa inagihan mi man sanang dalan. May mga problemang mapapaatubang sa samo, alagad huli sa samong nakakakontentong eksperyensia bawi nanggad an ano man na kadepisilan.

An hararayong distansia, makosogon na mga pag-oran, raraot nanggad na tinampo, kupos na mga rueda, asin mga pag-aberiya tibaad nakakapanluya sa boot. Dayaday na kadepisilan an daing disiplina na mga soldados. Pero, mayo nin nagtatao nin orog pang pagkakontento sa mga drayber na ini kisa sa pagdara kan maogmang bareta kan Kahadean sa hararayong parte kan Aprika asin pakaheling sa epekto kaiyan sa buhay nin mga tawo na nag-aako kaiyan.

Halimbawa, huli sa mga pagdarang ini, an sarong taga baryo sa harayong parte kan Republika nin Aprika Sentral na harani sa linderos nin Sudan nakakabasa na ngonyan nin modernong traduksion kan Biblia. Pinag-aadalan kan saiyang agom na babae an bagong mga kopya kan An Torrengbantayan, asin an saindang mga aki nakikinabang sa librong Makanood sa Dakulang Paratokdo. * Sinda asin an dakol na iba pa sa mga komunidad na ini sa probinsia nag-aako nin espirituwal na kakanon, arog kan saindang Kristianong mga tugang sa dakol na dakulang siudad. Ini dahelan nanggad nin dakulang pagkakontento!

[Mga Nota sa Ibaba]

[Mga Mapa/Ritrato sa pahina 9]

(Para sa aktuwal na format, hilingon an publikasyon)

CAMEROON

Douala

REPUBLIKA NIN APRIKA SENTRAL

Bangui

[Ritrato sa pahina 9]

Si Joseph

[Ritrato sa pahina 9]

Si Emmanuel

[Ritrato sa pahina 10]

Sangang opisina sa Republika nin Aprika Sentral, sa Bangui

[Ritrato sa pahina 10]

Pagdeskarga sa trak sa Bangui