Rumani sa Liwanag

IKINASALBAR nin mga parola an dai mabilang na buhay. Pero, para sa sarong kapoy nang biahero, an liwanag na naheheling sa harayo labi pa an nagigibo kisa sa pagpatanid sana manongod sa peligrosong mga bahura (reef). Ipinapaheling man kaiyan na harani na an saiyang destinasyon. Kaagid kaiyan, an mga Kristiano ngonyan nagrarani na sa katapusan nin sarong garo halawig na pagbiahe, na naggigiya sa sainda sa tahaw nin sarong kinaban na madiklom asin peligroso sa espirituwal. Sa Biblia, an katawohan sa pangkagabsan—mga kadaklan na siblag sa Dios—inaagid sa “dagat na inaapwak, kun iyan dai natotoninong, na an tubig nagpaparapaulanto nin doot sa dagat asin baldok.” (Isaias 57:20) An banwaan nin Dios napapalibotan nin siring na mga kamugtakan. Pero, igwa sinda nin maogmang tinatanaw na kaligtasan, na para sa sainda sarong piguratibo asin masasarigan na liwanag. (Miqueas 7:8) Huli ki Jehova asin sa saiyang nasusurat na Tataramon, “an liwanag suminilyab para sa matanos, asin an kagayagayahan para ngani sa mga tanos an puso.”—Salmo 97:11. *

Pero, tinogotan nin nagkapirang Kristiano an mga disturbo na akiton sinda parayo sa liwanag ni Jehova kaya an saindang pagtubod garo nabagbag sa puede niatong iagid sa peligrosong darakulang gapo—an materyalismo, imoralidad, o apostasiya pa ngani. Iyo, arog kan enot na siglo, an nagkapira ngonyan “nag-agi nin pagkabagbag may koneksion sa saindang pagtubod.” (1 Timoteo 1:19; 2 Pedro 2:13-15, 20-22) An bagong kinaban puedeng iagid sa duongan na dudumanan niato. Huling haranihon na iyan ngonyan, makamomondo nanggad na mawara nin saro an pag-oyon ni Jehova!

Likayan an ‘Pagkabagbag kan Saindong Pagtubod’

Sa nakaaging mga siglo, an sarong barko puedeng ligtas na maglayag sa mahiwas na kadagatan alagad tibaad mabagbag iyan mantang nagdadangadang sa duongan. Sa parate an pinakapeligrosong kabtang kan pagbiahe nangyayari kun an barko parani na sa baybayon. Kaagid kaiyan, para sa dakol, an pinakapeligrosong peryodo sa kasaysayan nin tawo iyo an “huring mga aldaw” kan presenteng sistemang ini nin mga bagay. Tamang-tama na ilinaladawan ini kan Biblia bilang “masakit pakibagayan,” nangorogna para sa nagdusay na mga Kristiano.—2 Timoteo 3:1-5.

Taano ta depisilon an huring mga aldaw na ini? Bueno, aram ni Satanas na sia igwa na sana nin ‘halipot na panahon’ na natatada tanganing makiguerra tumang sa banwaan nin Dios. Huli kaini, pinagrabe nia an saiyang madahas na kampanya tanganing raoton an saindang pagtubod. (Kapahayagan 12:12, 17) Pero, igwa kita nin tabang asin paggiya. Si Jehova padagos na nagigin sarong pailihan para sa mga naghihimate sa saiyang hatol. (2 Samuel 22:31) Tinawan nia kita nin mga panalmingan na nagbubuyagyag kan tuso asin marompot na mga pakana ni Satanas. Repasohon niato ngonyan an duwa kan siring na mga halimbawa na kalabot an nasyon nin Israel mantang nagdadangadang sinda sa Dagang Panuga.—1 Corinto 10:11; 2 Corinto 2:11.

Harani Na sa Dagang Panuga

Paagi sa pangengenot ni Moises, an banwaan nin Israel nakadulag sa Egipto. Dai nahaloy, harani na sinda sa timog na linderos kan Dagang Panuga. Nagsugo si Moises nin 12 lalaki tanganing mag-espiya sa daga. An sampulong daing pagtubod na espiya nagpuli na may darang negatibong bareta, na sinasabing dai magigin mapanggana an Israel tumang sa mga Cananeo huling an mga ini “haralangkawon” asin may makosog na puersa militar. Paano iyan nakaapektar sa mga Israelita? Sinasabi sa sato kan pagkasaysay na nagpoon sindang maggumodgumod  tumang ki Moises asin Aaron, na nagsasabi: “Taano ta dinara pa kami ni Jehova sa dagang ini tanganing mapukan paagi sa espada? An satong mga agom na babae asin an satong saradit na aki magigin samsam. . . . Magnombra kita nin sarong namamayo, asin magbalik kita sa Egipto!”—Bilang 13:1, 2, 28-32; 14:1-4.

Imahinara iyan! Naheling kan iyo man sanang mga tawong ini na sinupog ni Jehova an poderosong Egipto—an pambilog na kinaban na kapangyarihan kan panahon na iyan—paagi sa sampulong mapanlaglag na damat asin nakakapukaw nin may pagkangirhat na paggalang na milagro sa Dagat na Pula. Asin an Dagang Panuga yaon na mismo sa atubangan ninda, kaya kaipuhan na sana nindang rumani dian kun paanong an sarong barko minarani sa liwanag na tanda kan destinasyon kaiyan. Pero, naniwala sinda na dai kaya ni Jehova na daogon an daing halaga asin nagkakabarangang mga kahadean na siudad sa Canaan. Siertong nasudya nanggad an linalaoman nin Dios asin kan duwang makosog an boot na espiya, si Josue saka si Caleb, na nagsaboot na an Canaan siring sa “tinapay [para sa Israel]”! An duwang iyan may impormasyon na direkta nindang nakua, huling nag-espiya sinda sa bilog na Canaan. Kan an banwaan dai makalaog sa Dagang Panuga, kinaipuhan man ni Josue asin Caleb na magdanay sa kaawagan sa laog nin mga dekada, alagad dai sinda nagadan duman kaiba kan mga daing pagtubod. Tunay nanggad, nakatabang si Josue asin Caleb na mangenot sa sunod na henerasyon paluwas sa kaawagan asin pasiring sa Dagang Panuga. (Bilang 14:9, 30) Sa panduwang beses na palaog sinda sa Dagang Panuga, an Israel mapapaatubang sa laen na pagbalo. Ano an mangyayari sa sainda?

Prinobaran kan Moabitang Hade na si Balac na sumpaon an Israel paagi sa falsong propeta na si Balaam. Minsan siring, inolang ni Jehova an pakanang ini paagi sa pagpangyari na si Balaam magsabi nin mga bendisyon imbes na mga sumpa. (Bilang  22:1-7; 24:10) Huling dai nadesganar, pinonan ni Balaam an saro pang maraoton na pakana, na an intension iyo na madiskualipikar an banwaan nin Dios sa pag-ako kan daga. Paano? Paagi sa pag-akit sa sainda sa imoralidad asin pagsamba ki Baal. Minsan ngani sa pangkagabsan dai man nagin mapanggana an estratehiyang ini, nagresulta nanggad iyan na maakit an 24,000 na Israelita. Nagkaigwa sinda nin imoral na relasyon sa mga babaeng Moabita asin nakisumaro sinda ki Baal nin Peor.—Bilang 25:1-9.

Isip-isipa iyan! Dakol sa iyo man sanang mga Israelita an nakaheling na ligtas sindang giniyahan ni Jehova sa “mahiwas asin makangingirhat na kaawagan na idto.” (Deuteronomio 1:19) Pero, kan madali na nindang makamtan an saindang mana, an 24,000 sa banwaan nin Dios nagpadaog sa mga mawot nin laman asin ginadan mismo ni Jehova. Sarong patanid nanggad ini sa mga lingkod nin Dios ngonyan mantang nagdadangadang na sinda sa nakakalabi nanggad na mana!

Sa pangultimo niang pagprobar na olangon an mga lingkod ni Jehova sa presenteng panahon na makamtan an saindang balos, dai kaipuhan ni Satanas an bagong mga estratehiya. Sa sarong estratehiya na nagpapagirumdom sa sato kan nangyari kan enot na palaog an Israel sa Dagang Panuga, parateng pinagmamaigotan ni Satanas na pukawon an pagkatakot asin pagduda, baga man paagi sa mga huma, persekusyon, o pag-olog-olog. An nagkapirang Kristiano nagpadaog sa siring na pananakot. (Mateo 13:20, 21) An saro pang mapangganang pakana iyo an pagraot sa moral kan mga indibiduwal. Kun beses, an nagkapirang nakalaog sa Kristianong kongregasyon nagprobar na raoton an mga maluya sa espirituwal asin an mga dai naglalakaw na may kompiansa oyon sa liwanag nin Dios.—Judas 8, 12-16.

Para sa mga indibiduwal na maygurang sa espirituwal asin alisto, an marikas na pagruro kan kinaban sa moral mapuersang ebidensia nin pagkadesperado ni Satanas. Iyo, aram ni Satanas na dai na mahahaloy, an maimbod na mga lingkod nin Dios dai na nia kayang aboton. Kaya panahon nanggad ini na magdanay kitang alisto sa espirituwal sa mga paghihingoa ni Satanas.

Mga Pantabang sa Pagdadanay na Alisto sa Espirituwal

Ilinadawan ni apostol Pedro an makahulang tataramon nin Dios siring sa “sarong ilawan na nagliliwanag sa madiklom na lugar,” huli ta tinatabangan kaiyan an mga Kristiano na maheling na may pakasabot an pagkaotob kan katuyohan nin Dios. (2 Pedro 1:19-21) Nanonompongan kan mga nagpapatalubo nin pagkamoot sa Tataramon nin Dios asin padagos na nagpapagiya dian na itatanos ni Jehova an saindang mga dalan. (Talinhaga 3:5, 6) Huling pano nin paglaom, an siring na mapag-apresyar na mga tawo ‘nagkukururahaw sa kagayagayahan huli sa marahay na kamugtakan kan puso,’ mantang an mga dai nakakamidbid ki Jehova o nagbabaya sa saiyang dalan sa katapustapusi nakakamate nin “kakologan sa puso” asin “pagkalumbay kan espiritu.” (Isaias 65:13, 14) Huli kaini, paagi sa maigot na pag-adal sa Biblia asin pag-aplikar kan satong nanonodan, mapapagdanay niato na nakaturuhok an satong mata sa seguradong paglaom niato imbes na sa madaling mawara na mga kasingawan kan presenteng sistema nin mga bagay.

An pamibi mahalaga man na marhay sa pagdadanay niatong puka sa espirituwal. Kan nagtataram manongod sa katapusan kan presenteng sistema, si Jesus nagsabi: “Magpuka kamo, kun siring, na sa gabos na panahon nagngangayongayo na magin kamong mapanggana sa pagdulag sa gabos na bagay na ini na nakatalagang mangyari, asin sa pagtindog sa atubangan kan Aki nin tawo.” (Lucas 21:34-36) Mangnohon an paggamit ni Jesus kan terminong ‘pagngayongayo,’ na sarong odok na marhay na porma nin pamibi. Aram ni Jesus na buhay na daing sagkod an nakataya sa delikadong panahon na ini. Ipinapaheling daw kan saindong mga pamibi an makosogon na pagmawot nindo na magdanay na biyong puka sa espirituwal?

Dai niato lingawan na an pinakapeligrosong parte kan garo pagbiahe pasiring sa satong mana tibaad iyo an huring kabtang kan biaheng iyan. Sa siring, mahalaga nanggad na dai mawara sa satong pagheling an liwanag na puedeng maggiya pasiring sa satong kaligtasan.

Magin Alisto sa Falsong mga Liwanag

Kaidtong enot na mga panahon nin paglayag nin mga barko, an sarong partikular na peligro iyo an ginigibo nin maraot na mga tawo, na mas gusto an mga bangging mayo nin bulan, kun an mga paralayag nadedepisilan na maheling an baybayon. An mga tawong ini tibaad magbugtak nin mga ilawan sa kalabaan kan peligrosong mga baybayon tanganing  dayaon an mga kapitan nin barko na magbago nin direksion. An mga nadaya tibaad makaeksperyensia nin pagkabagbag kan saindang mga barko, pagsamsam sa saindang kargamento, asin tibaad magadan.

Sa kaagid na paagi, gusto ni Satanas, an mapandayang “anghel nin liwanag,” na haleon sa banwaan nin Dios an saindang relasyon sa Saiya. Tibaad gamiton kan Diablo an “falsong mga apostol” asin apostatang “mga ministro nin katanosan” tanganing dayaon an mga madaling madaya. (2 Corinto 11:13-15) Alagad kun paanong an alisto asin eksperyensiadong kapitan saka mga tripulante posibleng marhay na dai maloko nin mapandayang mga liwanag, an mga Kristiano na “huli sa paggamit napatuod an saindang kakayahan sa pagrisa na mamidbid an tama sagkod an sala” dai nadadaya kan mga nagpapalakop nin falsong mga katokdoan asin nakakadanyar na mga pilosopiya.—Hebreo 5:14; Kapahayagan 2:2.

An mga marinero may darang listahan kan mga parola na aagihan ninda sa saindang ruta. Yaon sa listahan na iyan an mga karakteristiko kan kada parola, kaiba an napapalaen na ilaw kaiyan. Nagkomento an The World Book Encyclopedia: “Naaaraman kan mga marinero kun arin na parola an naheheling ninda—asin kun siring an saindang lokasyon—paagi sa pag-obserbar sa karakteristiko nin sarong parola saka pagheling sa listahan nin mga parola.” Kaagid kaiyan, tinatabangan kan Tataramon nin Dios an mga tawong sadiosan an puso na mabatid an tunay na pagsamba asin an mga nagmamaigot na gibohon iyan, nangorogna durante kan huring mga aldaw na ini na ilinangkaw nanggad iyan ni Jehova sa falsong relihion. (Isaias 2:2, 3; Malaquias 3:18) Sa pagpaheling nin risang marhay na pagkakalaen kan tunay asin falsong pagsamba, an Isaias 60:2, 3 nagsasabi: “An kadikloman mismo makakalakop sa daga, asin an mahibog na kaduloman sa mga nasyon; alagad sa saimo si Jehova masirang, asin sa saimo an saiyang kamurawayan maheheling. Asin an mga nasyon maduruman nanggad sa saimong liwanag, asin an mga hade sa sinag kan saimong pagsirang.”

Mantang minilyon hale sa gabos na nasyon an padagos na ginigiyahan kan liwanag ni Jehova, dai sinda makakaeksperyensia nin piguratibong pagkabagbag kan saindang pagtubod durante kan huring kabtang na ini kan saindang pagbiahe. Imbes, ligtas sindang garo maglalayag sa natatadang mga aldaw kan presenteng sistema nin mga bagay pasiring sa matoninong na garo duongan kan bagong kinaban.

[Nota sa Ibaba]

[Ritrato sa pahina 15]

Arog kan mga marinero, nag-iingat an mga Kristiano na dai madaya nin falsong mga liwanag