Inaaprobetsaran daw Nindo an mga Oportunidad na Sabihon sa Iba an Saindong mga Tinutubod?

“IGWA daw nin absolutong (absolute) katotoohan?” Iyan an tema nin sarong nasyonal na kontest sa pagsurat nin komposisyon sa Polandia. An mga instruksion para sa pagsurat nin komposisyon nagsabi: “Dai niato kaipuhan an absolutong katotoohan. Dai iyan kaipuhan nin siisay man. Sa bagay mayo man nin absolutong katotoohan.” Si Agata, sarong 15 anyos na estudyante sa haiskul asin saro sa Mga Saksi ni Jehova, nagdesisyon na gamiton an oportunidad na ini na sabihon sa iba an saiyang mga tinutubod sa relihion nia.

Sa pag-andam para sa pagsurat nin komposisyon, namibi nguna si Agata para sa paggiya ni Jehova dangan pinonan an pagtipon nin impormasyon manongod sa temang iyan. Nakakua sia nin konektadong impormasyon sa An Torrengbantayan na Hulyo 1, 1995. Kinotar nia an hapot ni Poncio Pilato ki Jesus: “Ano an katotoohan?” (Juan 18:38) Sinabi nia na an hapot na iyan nagparisa nin mapagtuyang saboot, na garo baga sinasabing: ‘Katotoohan? Ano iyan? Mayo nin siring kaiyan na bagay!’ “An hapot ni Pilato,” an isinurat ni Agata, “nagpapagirumdom sa sako kan mga instruksion para sa pagsurat nin komposisyon.”

Sunod tinokar nia an pagtalubo nin kanya-kanyang pamantayan (relativism)—an ideya na an totoo para sa sarong tawo tibaad bakong totoo para sa saro pa asin na tibaad pareho iyan “tama.” Nagbangon sia nin arog kaining mga hapot, “Siisay sa sato an mangangahas na maglunad sa sarong eroplano kun dai kita nagtutubod na an mga ley nin aerodinamika (aerodynamics) absolutong mga katotoohan?” Dangan sinambit nia an Biblia, na sinasabi: “An pagsarig sa Tataramon nin Dios marigon na nakabasar sa mapapatunayan na mga impormasyon.” Ipinahayag nia na naglalaom sia na an mga sinserong naghahanap nin absolutong katotoohan magkaigwa nin igong pasensia tanganing manompongan iyan.

Nanggana si Agata nin special diploma asin nagkaigwa nin oportunidad na magtao nin sarong presentasyon sa atubangan kan bilog na klase. Nagkapira sa saiyang mga kaeskuela an nag-ako kan alok nia sa sainda na magkondukta nin pag-adal sa Biblia. Nagpapasalamat si Agata na ginamit nia an oportunidad na ini na sabihon sa dakol na iba pa an saiyang mga tinutubod. Iyo, an pagigin alisto sa oportunidad na sabihon sa iba an manongod sa saindong pagtubod puedeng magbunga. Anong mga oportunidad an puede nindong aprobetsaran?