‘Isulog Nindo an Kababaan nin Isip’

AN TAWONG iyan hale sa sarong bantog na siudad. Igwa sia kan prestihio nin saro na namundag bilang siudadano kan Roma asin posibleng marhay na hale sia sa prominenteng pamilya. An tawong iyan, si Saulo, nag-ako kan pinakamarahay na edukasyon na makukua kan enot na siglo C.E. Sia nakakataram nin kisuerra duwang lenguahe asin kabilang sa sarong midbid na marhay na grupo sa Judiong relihion—an mga Fariseo.

Posibleng minenos ni Saulo an ordinaryong mga tawo asin nagin orgolyoso huli sa sadiri niang katanosan. (Lucas 18:11, 12; Gibo 26:5) An mga kapwa Fariseo ni Saulo naniwala na nakakalabi sinda sa iba asin gustohon nindang marhay an pagigin prominente saka an mga titulong nagpapataba sa puso. (Mateo 23:6, 7; Lucas 11:43) An pakikiasosyar sa siring na mga tawo posibleng nagresulta sa pagigin arogante ni Saulo. Aram niato na sia sarong maigot na parapersegir kaidto sa mga Kristiano. Pakalihis nin dakol na taon, bilang si apostol Pablo, sinabi nia na sia nagin “paralanghad asin parapersegir patin tawong daing galang.”—1 Timoteo 1:13.

Iyo, si Saulo nagin sarong Kristiano, si apostol Pablo, asin biyong nabago an saiyang personalidad. Bilang Kristianong apostol, mapakumbaba niang ipinahayag na sia “tawong mas hababa sa pinakahababa sa gabos na banal.” (Efeso 3:8) Sia mapangganang ebanghelisador, alagad dai nia kinua an ano man na kredito para sa bagay na ini. Imbes, itinao nia an gabos na onra sa Dios. (1 Corinto 3:5-9; 2 Corinto 11:7) Si Pablo an nagsadol sa mga kapwa Kristiano: “Isulog nindo an mamomoton na mga pagmate nin pagmalasakit, kabootan, kababaan nin isip, kahoyoan, asin pakatios.”—Colosas 3:12.

An sadol daw na iyan minaaplikar sa satong ika-21 siglo? May pakinabang daw sa pagigin mapakumbaba? Talaga daw na an kapakumbabaan puedeng magin tanda nin kakosogan?

 Mapakumbaba daw an Makakamhan sa Gabos na Kaglalang?

Kaipuhan na konsideraron an punto de vista nin Dios sa ano man na pagtokar manongod sa kapakumbabaan. Taano? Huli ta sia an satong Soberano asin an satong Kaglalang. Bakong arog nia, kaipuhan niatong midbidon an sadiri niatong mga limitasyon. Nakadepende kita sa saiya. “Kun dapit sa Makakamhan sa Gabos, dai niato sia narororop; sia halangkaw sa kapangyarihan,” an sabi kan sarong suanoy na madonong na tawo na an ngaran Eliu. (Job 37:23) Tunay nanggad, nakakapakumbabang eksperyensia an paghorophorop sana sa mahiwason na uniberso sa palibot niato! “Tingagan an saindong mga mata asin helinga nindo,” an pag-imbitar ni propeta Isaias. “Siisay an naglalang kan mga bagay na ini? Iyan iyo an Saro na nagpapaluwas kan saindang hukbo nin oyon sa bilang, na gabos inaapod nia sa mismong ngaran. Huli sa abundansia nin dinamikong enerhiya, mantang sia man makosog an kapangyarihan, ni saro sa sainda mayong nawawara.”—Isaias 40:26.

Apuera sa pagigin makakamhan sa gabos, si Jehova Dios mapakumbaba. Si Hadeng David namibi sa saiya: “Itatao mo sa sako an saimong kalasag nin kaligtasan, asin an saimong kapakumbabaan an minagibo sa sako na dakula.” (2 Samuel 22:36) Masasabi na an Dios mapakumbaba huli ta sia nagmamakolog sa hamak na mga tawo na nagmamaigot na paogmahon sia, asin sia naheherak sa sainda. Hale sa kalangitan garo baga ibinababa ni Jehova an saiyang sadiri tanganing trataron nin may kabootan an mga matatakton sa Dios.—Salmo 113:5-7.

Dugang pa, pinapahalagahan ni Jehova an kapakumbabaan kan saiyang mga lingkod. Si apostol Pedro nagsurat: “Tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.” (1 Pedro 5:5) Mapadapit sa pagmansay nin Dios sa pagigin orgolyoso, nagkomento an sarong kagsurat sa Biblia: “An gabos na orgolyoso sa puso makauuyam nin makuri ki Jehova.” (Talinhaga 16:5) Pero, paano an kapakumbabaan puedeng magin tanda nin kakosogan?

Kun Ano an Bakong Kahulogan kan Kapakumbabaan

An kapakumbabaan bakong kapareho nin pagigin menos. Sa nagkapirang suanoy na kultura, an tawo na naturalesa na an pagigin mapakumbaba sarong oripon—hamak, miserable, kaherakherak na indibiduwal. Sa kabaliktaran, idinodoon kan Biblia na an kababaan nin isip nagbubunga nin onra. Halimbawa, an sarong madonong na tawo nagsurat: “An bunga nin kapakumbabaan asin pagkatakot ki Jehova kayamanan asin kamurawayan patin buhay.” (Talinhaga 22:4) Asin sa Salmo 138:6,  mababasa niato: “Si Jehova halangkaw, alagad naheheling nia an mapakumbaba; alagad sa harayo sana nia midbid an mapalangkaw.”

An pagigin mapakumbaba dai nangangahulogan na an saro mayo nin mga abilidad o nagibo. Halimbawa, dai noarin man hiningako ni Jesu-Cristo na sia bako an bugtong na Aki ni Jehova, asin dai sia noarin man nagsaginsagin na an saiyang ministeryo digdi sa daga bakong mahalaga. (Marcos 14:61, 62; Juan 6:51) Pero, si Jesus nagpaheling nin kapakumbabaan paagi sa pagtao sa saiyang Ama kan kredito para sa mga nagibo nia asin paagi sa paggamit kan saiyang kapangyarihan tanganing maglingkod saka magtabang sa iba imbes na magdominar patin mandaogdaog sa sainda.

Sarong Tanda nin Kakosogan

Daing duda, si Jesu-Cristo namidbid kan saiyang mga katemporanyo “paagi sa makapangyarihan na mga gibo.” (Gibo 2:22) Pero, sa pagheling kan nagkapira, sia “an pinakahababa sa katawohan.” (Daniel 4:17) Sia bako sanang namuhay nin simple kundi paorootro man na itinokdo nia an kahalagahan nin kapakumbabaan. (Lucas 9:48; Juan 13:2-16) Minsan siring, an saiyang kapakumbabaan dai nagin dahelan na sia magin maluya. Sia daing takot mantang idinedepensa nia an ngaran kan saiyang Ama asin ginigibo an saiyang ministeryo. (Filipos 2:6-8) Sa Biblia, si Jesus ilinaladawan bilang sarong makosog an boot na leon. (Kapahayagan 5:5) Ipinapaheling kan halimbawa ni Jesus na an kapakumbabaan kabagay kan karigonan sa moral asin kan makosog na determinasyon.

Mantang nagmamaigot kitang pataluboon an tunay na kapakumbabaan, narerealisar niato na kaipuhan an tunay na paghihingoa tanganing mamuhay kita na may kababaan nin isip. Kalabot dian an pirmeng pagpapasakop sa kabotan nin Dios imbes na paggibo nin pinakamadali para sa sato o pagpadaog sa makalaman na mga tendensia. An pagpatalubo nin kapakumbabaan nangangaipo nin karigonan sa moral, huli ta kaipuhan niato na ipagilid an personal na intereses tanganing daing kaimotan na makapaglingkod ki Jehova asin sa kapakanan kan iba.

An mga Pakinabang nin Kapakumbabaan

Kalabot sa kapakumbabaan an dai pagigin orgolyoso o mapalangkaw. Ginagamit kan Kasuratan an pananaram na “kababaan nin isip” tanganing iladawan iyan. (Efeso 4:2) An mapakumbabang kaisipan resulta nin realistikong pagturotimbang kan satong sadiri—an satong mga kakosogan asin kaluyahan, an satong mga kapangganahan saka pagkasudya. Si Pablo nagtao nin marahayon na hatol mapadapit digdi kan sia magsurat: “Sinasabihan ko an lambang saro dian sa saindo na dai mag-isip dapit sa saiyang sadiri nin orog kisa sa maninigong isipon; kundi na mag-isip tanganing magkaigwa nin toltol na isip.” (Roma 12:3) An siisay man na nagsusunod sa hatol na iyan nagpapaheling nin kapakumbabaan.

An kapakumbabaan naheheling man kun sinsero niatong ineenot an intereses kan iba kisa sa sato. Paagi sa pasabong, sinadol ni Pablo an mga Kristiano: “Dai [kamo maggibo] nin ano man huli sa iriwal o huli sa sobrang pagpaimportante sa sadiri, kundi sa kababaan nin isip na ibinibilang na an iba mas halangkaw kisa sa saindo.” (Filipos 2:3) Kaoyon ini kan pagboot ni Jesus sa saiyang mga parasunod: “An pinakadakula saindo dapat na iyo an magin paralingkod sa saindo. An siisay man na nagpapalangkaw kan saiya man sana ibababa, asin an siisay man na nagpapakumbaba sa saiya man sana ilalangkaw.”—Mateo 23:11, 12.

Iyo, pinapahalagahan na marhay nin Dios an mga may kababaan nin isip. Idinoon ni disipulo Santiago an puntong iyan kan sia magsurat: “Magpakumbaba kamo sa mga mata ni Jehova, asin ilalangkaw nia kamo.” (Santiago 4:10) Siisay an mahabo na ilangkaw nin Dios?

An kawaran nin kapakumbabaan nagigin dahelan nin grabeng pagkariribok asin iriwal sa pag-oltanan nin mga grupo nin tawo saka sa pag-oltanan nin mga indibiduwal. Sa ibong na lado, an pagigin mapakumbaba nagbubunga nin positibong mga resulta.  Puede kitang magkaigwa kan mamomoton na pag-oyon nin Dios. (Miqueas 6:8) Puede kitang magkaigwa nin katoninongan nin isip huli ta an mapakumbabang indibiduwal mas posibleng marhay na magin maogma asin kontento kisa sa maabhaw na tawo. (Salmo 101:5) An satong relasyon sa pamilya, mga katood, katrabaho, asin iba pa magigin mas areglado saka mas nakakagayagaya. Linilikayan kan mga mapakumbaba an pagigin antipatiko asin depisil manigoan, gawe-gawe na madaling magresulta sa kaanggotan, pagrayo nin boot, paghinanakit, asin makuring karaotan nin boot.—Santiago 3:14-16.

Iyo, an pagpatalubo nin kababaan nin isip sarong marahayon na paagi na mapagdanay an marahay na relasyon sa iba. Makakatabang iyan sa sato na atubangon an mga kadepisilan sa sarong maimot asin may kompetisyon na kinaban. Sa tabang nin Dios, napangganahan ni apostol Pablo an pagpaabaw-abaw asin pagigin orgolyoso na dati niang mga ugale. Kaagid kaiyan, maninigo niatong pugolan an ano man na tendensia na magin maabhaw o mag-isip na mas marahay kita kisa sa iba. “An pagigin orgolyoso naeenot sa kapahamakan, asin an espiritu nin kaabhawan naeenot sa pagkapukan,” an patanid kan Biblia. (Talinhaga 16:18) Sa pagsunod sa halimbawa asin sadol ni Pablo, maheheling niato an kadonongan kan ‘pagsulog niato nin kababaan nin isip.’—Colosas 3:12.

[Ritrato sa pahina 4]

Napangganahan ni Pablo an pagpaabaw-abaw asin pagigin orgolyoso

[Ritrato sa pahina 7]

An pagkaigwa nin kababaan nin isip nakakatabang sa sato na mapagdanay an marahay na relasyon sa iba

[Picture Credit Line sa pahina 5]

Anglo-Australian Observatory/David Malin Images